Yesu wakhalele wahanyi gale alandudi enji gifegeselo giatadila gufubidila mu gisambu. (Luka 11:5-13) Uvi tangua diazuelele muene luko funu ya gulandula gukalagala gisambu, yajiya gukhala egi wakhalele gu Samaliya nga gu Galile. Wazuelele luko ndaga yene mu gifezegeselo egi gialandula:

“Mu dimbo dimoshi muakhalele nu nzuji gakhalelego muvuila Nzambi woma, gakhalelego nji munemesa athu ndo. Mu dimbo diene muakhalele nji mukhetu wa gafunda wakhalele muya muavula gudi muene, wakhalele gumuwambela egi, ‘ngubingise gudi muthu udi nu ame umbalagalaji.’ Masugu avula nzuji yonu watunyine uvi hangima wazuelele mu mutshima wenji egi: ‘Giamatshidia nganavuilago Nzambi woma, ngananemesago athu, uvi luholo mukhetu owu ya gafunda udi gungusagesa mbangumubingisa, gula ndo mbawunguhuidisa mu guza guenji gua masugu agasue.’”—Luka 18:2-5.

Ha gumonesa luholo lua gukalegela longo diene Yesu wazuelele egi: ‘Tegelelenu ndaga yazuelele nzuji yonu, ngatshima wakhalele muthu wabola! Nzambi mbagabingisago athu atombele muene, ana dila gudi muene phipha nu muanya ba? Muene mbawushipha ha guakuatesa ba?’ (Luka 18:6, 7) Ndaga itshi yatadila Sh’enji Yesu watshiginyile gulongesa?

Yadiago Yesu gazuelelego egi Yehowa Nzambi udi gifua nzuji yonu wa mutshima wabola. Uvi watshiginyile gumonesa gudisha hene gazuelele egi: Gula nzuji wa mutshima wabola wahana mvutu gu ndaga akhalele gumutoga tangua diagasue, idi mumonega ha phelo egi Nzambi nji mbawutshita ngenyi. Nzambi wakhala watagana, wakhala nu mutshima wabonga, gula akombeledi enji alandula gumukombelela mbawuhana mvutu gu isambu yawo. Tuajiya gumona ndaga yene mu mbimbi jiazuelele Yesu egi: ‘Ngudi mumiwambela egi, [Nzambi] mbawabingisa muphushi.’—Luka 18:8.

Matangua avula athu anago gukalegela phutu ndaga nu nduedi, uvi ana gukalagala ndaga jiabonga phamba gudi enya manyinyi nu enya umonyi. Uvi Nzambi ganago gukalagala ngenyi. Mbahatagana tangua diahagele muene, mbawushiya athu abola nu mbawuhana monyo wa ivo nu ivo gudi akombeledi enji.

Nanyi udi nu gutshigina gifua guakhalele nago mukhetu wa gafunda? Athu guvula gutshi ana gutshigina egi Nzambi “mbawabingisa muphushi”? Yesu wamonesele funu ya gufubidila mu gisambu. Ha gumonesa gutshigina mu ngolo jia gisambu, Yesu waahudile egi: ‘Mbahaza Mun’a muthu, muene mbawusanga gutshigina gudi athu a ha mavu ba?’ (Luka 18:8) Idi mumonega egi tangua mbadiza Klisto, athu avula mbashigo mukhala nu gutshigina gua luholo luene.

Athu ako mukatshi dia athu akhalele mutegelela Yesu akhalele mumona gifua adi diago nu gutshigina. Akhalele muzuela egi adi athu amitshima yabonga, uvi akhalele musegulula athu ako. Yesu wahanele gifezegeselo egi gialandula mukunda nu athu ene:

“Mala muyadi akandugile gu tempelo ha gukombelela guene, muko wakhalele Mufalese, muko mufutshishi wa gitadi. Mufalese wamagenene mu molu, wakombelele egi, ‘Nzambi ngudi muguhua mersi handaga ame ngushigo gifua athu ako adi mutambula athu ako ima gu ngolo, nu athu abola nu enya uthambi. Ngudi muguhua mersi ndaga ya ngushigo gifua mufutshishi wa gitadi yowu. Ngana gutuna gudia mahugo ayadi mu phoso yagasue, ngana guhana  giakumi gia ima yagasue inganaheta.’”—Luka 18:10-12.

Afalese akhalele mujiyiwa gifua athu akhalele gudimonesa gumeso a athu ako egi akhalele athu abonga. Akhalele mutshita ngenyi ha guyitugisa athu. Akhalele nu khadilo dia gutuna gudia mu lusugu lua Thomo nu lua nguana, masugu athu avula akhalele muza ha zando hagula a amone. Akhalele muhana giakumi gia ima yawo, nga ya tumitshi tuazonda zonda. (Luka 11:42) Mbeji jia zonda gungima, amonesele lusegu luawo gudi athu tangua azuelele egi: ‘Uvi athu awa, adi gashigo mujiya Mikhuala ya Moise [mu matangi a Afalese] adi athu atewe mukumbu.’—Yone 7:49.

Yesu walanduile guzuela egi: “Uvi mufutshishi wa gitadi wamaganele gualeha, gatshiginyinego guzumbula meso enji gosa uvi wadikuatele mukondo, wazuelele gamba: ‘Nzambi ngudi gami muenya gubola, ungufuile jikhenda.’” Yadiago mufutshishi wa gitadi wajiyile gubola guenji nu gudibulumuisa guagasue. Yesu wasugishile egi: ‘Ngudi gumiwambela egi, yala owu wayile gumbodienji yagubingishiwa uvi muko ndo. Muthu wagasue udi mudikanduisa mbawubulumuishiwa uvi wadibulumuisa mbawukanduishiwa.’—Luka 18:13, 14.

Yesu wamonesele haphelo egi gudibulumuisa gudi nu ndando. Longo edi diakhalele nu funu gudi alandudi enji, handaga akhalele mukatshi dia Afalese ago akhalele gudimona gifua athu abonga nu alutumbu. Longo diene didi nji nu ndando gudi alandudi agasue a Yesu mangino.