Yesu wawambelele athu akhalele gumutegelela gu Perea egi “avula adi athu a thomo mbaakhala athu a gisugishilo, nu adi a gisugishilo mbakhala athu a thomo.” (Matayo 19:30, NW) Ha guakotelesela muabonga, Yesu wahanele gifezegeselo gia enya mudimo mu dihia dia vinyo. Wazuelele egi:

“Ufumu wa mu dilu udi gifua fumi’a dihia wazogele mu gimenegena ha gukamba enya mudimo mukunda nu dihia dienji dia vinyo. Muene wadivishile nu enya mudimo ha guafuta kiamo gimoshi gia denye mu lusugu lumoshi. Muene waatumine mu dihia dienji dia vinyo ha gutshita mudimo. Muene wazogele luko mu kumbi dia 9 mu gimenegena, wamuenene athu ako mulaba gumagana mu mafundo a zando. Muene waawambelele egi, ‘Enue nji ndienu mutshite mudimo mu dihia diami dia vinyo mbangumihua gishimbigo giatagana’. Ngenyi, ene ayile. Muene wazogele luko kumbi dia thathu gungima dia midi. Muene watshitshile ngenyi luholo lumoshi. Hahetele kumbi hehi nu thano mu ngueze muene wazogele, wasangele athu ako mumagana. Muene waahudile gamba: ‘Mukunda natshi mudi mumagana gugu lusugu lua mudidi mudimo ndo?’ Ene a muvutudile egi: ‘handaga gushigo muthu wagutuhaga gu mudimo.’ Muene waawambelele egi: ‘Nu enue nji, ndienu mutshite mudimo mu dihia diami dia vinyo.’”—Matayo 20:1-7.

Hazuelele Yesu egi “Ufumu wa mu dilu” nu “fumi’a inzo,” yajiya gukhala egi athu akhalele gumutegelele atangijile egi udi muzuelela Yehowa Nzambi. Biblia yana gumonesa Yehowa gifua fumi’a dihia dia vinyo; dihia diene didi mumonesa gifutshi gia Isalele. (Ngimbo 80:8, 9; Yeshaya 5:3, 4) Athu akhalele mu gikotelo gia Mukhuala afuanesewe nu enya mudimo a mu dihia dia vinyo. Uvi mu gifezegeselo egi, Yesu gakhalelego muzuelela ndaga jiabalegele gale. Wakhalele muzuelela ndaga yakhalele mukalegewa mu tangua dienji.

Mafumu a mangumba, gifua Afalese anyi alolele Yesu mu ndaga yatadila gushiya ulo, akhalele muzuela egi ene ana gulandula gukalegela Nzambi mudimo. Akhalele gifua athu ana gukalagala mudimo wavula ha guheta lufuto luavula, yakotelesa egi denye imoshi ya mbongo mu lusugu.

Nganga-nzambi nu athu ako mukatshi diawo akhalele mumona enya Yuda anyi akhalele mukombelela Nzambi, gifua athu ashigo nu funu, nu akhalelego gumukalegela diago mudimo muavula. Gudi ene, akhalele gifua enya mudimo anyi akalegelego mudimo lusugu lua mudidi mu dihia dia vinyo. Mu gifezegeselo gia Yesu, enya Yuda ene akhalele gifua athu azudiwe mu mudimo mu kumbi dia divua mu gimenegena, nga ndo mu kumbi dia thano mu ngueze (mu midi, mu kumbi dia thathu nu dia thano gungima dia midi).

Mala nu akhetu akhalele mulandudula Yesu akhalele mumonewa gifua “athu atewe mukumbu.” (Yone 7:49) Avula mukatshi diawo akhalele mayanga a jishui nu adimi a mahia. Gungima, mu sungi ya mvula ya givo gia 29 gia tangua dietu, “fumi’a dihia” watumine Yesu ha gutamega athu a gudibulumuisa ha gukalagala mudimo mukunda nu Nzambi gifua alandudi a Klisto. Ene akhalele athu a “gisugishilo” ago Yesu wazuelele egi azangudiwe ha gutshita mudimo wa vinyo mu tangua dia thano mu ngueze.

Ha gusugisa gifezegeselo gienji, Yesu wazuelele ndaga yabuile tangua mudimo wahuile. Wazuelele egi: “Hakambele kumbi gushiwuga, fumi’a dihia wawambelele gaphita genji egi, ‘tamega enya mudimo waahue gishimbigo giawo sendese gudi athu aji gungima uu nu gudi athu agudiangela.’ Hajile athu ahagewe gu mudimo ha kumbi dia thano mu ngueze, muthu nu muthu wahetele kiamo gimoshi gia denye. Hajile athu adiangele guhagewa gu mudimo, akhalele mudifuelela egi aza muheta gishimbigo giabalega, uvi ene nji, ahetele muthu nu muthu kiamo gimoshi gia denye. Hatambuile ene gishimbigo ginyi, avuidile fumi’a nzo gubola, ene azuelele egi, ‘Athu awa aji gungima atshitshi mudimo khuta kumbi dimoshi, aye waafuta luholo lumoshi nu esue tuabatshi ginemo gia lusugu lua mudidi nu muanya wabala!’ Uvi muene wawambelele mumoshi mukatshi diawo egi, ‘Mbayi, ngushigo mutshitshila muthu gubola. Esue tuadivilego nenu ha gumihana lufuto lua kiamo gimoshi gia denye ba? Zula gishimbigo giaye nda gaye. Ngatshigina ha gufuta athu aji gungima gifua mungudi mumifuta enue. Ame ngajiyilego gutshita nu ikumba yami gifua mungatshigina ba?  Nga, mudi mungutala nu diso dia githedi mukunda nu gudizalumuna guami?’ Ngenyi, athu a gisugishilo, mbakhala athu a thomo nu adi a thomo mbaakhala a gisugishilo.”—Matayo 20:8-16, NW.

Yajiya gukhala egi alandudi adihudile mukunda nu gitshinyi gia gisugishilo gia gifezegeselo gia Yesu. Luholo lutshi mafumu a mangumba a enya Yuda anyi akhalele gudimona egi adi athu a “thomo,” mbaabua athu a “gisugishilo”? Luholo lutshi alandudi a Yesu mbaabua athu a “thomo”?

Alandudi a Yesu, anyi Afalese nu athu ako akhalele mumona egi adi athu a “gisugishilo,” akhalele mu njila ya athu a “thomo” mukunda nu guheta lufuto luavula. Hafuile Yesu, Nzambi watunyile Yelusalema ya ha mavu, watombele gifutshi gihe-gihe gia “Isalele ya Nzambi.” (Galatiya 6:16; Matayo 23:38) Yone Mubatiji wazuelele ndaga jiatadila gifutshi gihe-gihe tangua gazuelele ndaga yatadila gubatijiwa nu nyuma ya Nzambi. Athu akhalele a gisugishilo abuile athu a “thomo” ha gubatijiwa mu nyuma nu ha guheta luendu lua gukhala matemue a Yesu “uu nu gu gisugishilo gia mavu agasue.” (Makalegelo 1:5, 8; Matayo 3:11) Luholo alandudi akotelesele usombegeshi udi naye gukalegewa, akhalele mumona gutuama luholo mafumu a mangumba mbaakhala mu gikenene luholo mbaabua athu a “gisugishilo.”