Yesu wakhalele muya gu Yelusalema, yajiya gukhala egi muene nu alandudi enji akhalele wawa gawo gumbo dia Zake. Alandudi akhalele mutangiza egi “Ufumu wa Nzambi” wakhalele hehi ha gula egi ahinyine nu Yesu gifua Fumu. (Luka 19:11) Akoteleselego ndaga yene yatadila Ufumu, luholo ajimbidile egi gualeha ndo Yesu udi naye gufua. Hene wahanele gifezegeselo gimoshi gia akuatesele ha gukotelesa egi Ufumu wakhalele gualeha.

Wazuelele egi: “Nene diakoma diayile khanda iko gualeha ha guhingana ufumu nu ha guvutuga luko.” (Luka 19:12) Vuayaje yene yazudile tangua diavula. Idi yadiago egi Yesu muene udi “nene diakoma” diayile mu vuayaje, “gukhanda iko gualeha,” mu dilu, fundo Sh’enji mbawumuhana ufumu.

Mu gifezegeselo egi, gutuama egi “nene diakoma” diye mu vuayaje, watamegele enya mudimo enji kumi nu wahanele muthu nu muthu bunda dimoshi dia utadi wa siliva, waadijigile egi: ‘Mudigulule n’ayo uu nu ha mbanguza.’ (Luka 19:13) Bunda dimoshi dia utadi wa siliva diakhalele nu makuta a utadi a ndando yavula. Diakhalele lufuto lua mbeji thathu akhalele mufuta muenya mudimo wa ilanga.

Yajiya gukhala egi alandudi akotelesele egi, ene akhalele gifua enya mudimo kumi a mu gifezegeselo gia Yesu, handaga Yesu wakhalele waafuanesa gale nu amunyi a mbuto. (Matayo 9:35-38) Yadiago, Yesu gaatuminego ha gumuna mbuto. Uvi, gumuna guene guakotelesa gukamba alandudi ako ajiya gungina mu Ufumu wa Nzambi. Alandudi akhalele naye gukalegela ima akhala nayo ha gukamba athu avula mbaheta Ufumu.

Ndaga tshi jiko Yesu wazuelele mu gifezegeselo gienji? Wazuelele egi athu a mu mavu enji akhalele n’enji [nene diakoma] “umbalagaji atumine mikenji ha gumulandula nu guzuela egi: ‘Tuatshiginyilego muthu owu akhale fumi’etu.’” (Luka 19:14) Alandudi akhalele mujiya egi enya Yuda akhalelego mutshigina Yesu—ako akambele gumushiya. Gungima dia gufua nu guya gua Yesu mu dilu enya Yuda avula amonesele matangi awo mukunda nu Yesu, luholo amonesele alandudi enji lamba. Mbalagaji jiene jiamonesele haphelo egi jiakhelelego mutshigina Yesu ha gukhala Fumu.—Yone 19:15, 16; Makalegelo 4:13-18; 5:40.

Luholo lutshi alandudi akhalele naye gukalegela mabunda a utadi wa siliva gifua enya mudimo kumi uu nu tangua “nene diakoma” mbadiheta “ufumu” nu mbadivutuga? Yesu wazuelele egi: “Muene wabuile fumu wavutugile mu mavu enji. Hangima watamegene enya mudimo ahuile muene mbongo, watshiginyine gujiya mbongo jiahetele ene mu guwendulula guawo. Muthu wa gudiangela wajile guphala yenji wazuelele gamba, fumu bunda diaye dia utadi wa siliva diaheta mabunda ako kumi. ‘Fumu wamuwambelele egi watshitshile muabonga, aye muenya mudimo wabonga ndaga ya aye wakhalele nu gufubidila mu ima yazonda ngudi guguhaga guvelenele wa membo kumi’. Muthu ya ngiadi wajile wazuelele gamba: ‘Fumu, bunda diaye dia utadi diaheta mabunda ako atano. Fumu wamuwambelele egi: Aye ngudi guguhaga guvelenele wa membo atano.’”—Luka 19:15-19.

Luholo lumoshi nu enya mudimo abonga a gifezegeselo gia Yesu, gila alandudi akalegela ima yawo ha gubuisa athu ako alandudi a Yesu, adi naye gujiya egi Yesu udi musuanguluga muavula. Luko adi naye gutshigina egi Yesu mbawushimbiga gikhesa giawo. Yadiago, alandudi a Yesu agasue ana khalago nu luendu nga ngolo nu ndaga jia luholo lumoshi mu lujingu luawo. Uvi Yesu, yago wahetele “ufumu,” mbawushimbiga alandudi mukunda nu ngolo akalegele ha gubuisa athu ako alandudi.—Matayo 28:19, 20.

Uvi tala luholo Yesu wasugishile gifezeselo gienji: “Hangima [muenya mudimo] muko wajile wazuelele egi, ‘Fumu, bunda diaye dia utadi wa siliva dienyedi ngadibambele dia gujitshiga ha gilengo. Ngakhalele nu woma gudi aye ndaga ya aye udi muthu wakola ndaga, wana zangula iwahagelego, wana muna iwakunyilego.’ Fumu wamuwambelele egi: ‘Ngudi mugufuisa milonga nu mbimbi jiazoga mukano diaye, udi muenya mudimo wabola! Aye wajiyile egi ngudi muthu wakola ndaga, ngana zangula ingahagelego,  ngana muna ingakunyilego. Mukunda natshi wahanenego ikumba yami gudi abambi a makuta? Nga watshitshile ngenyi nga hugo dia guza guami ngabandele gutambula ikumba yami nu iko yagulezela holu.’ Hangima wawambelele akhalele mumagana hehi egi: ‘Mutambudienu bunda dia utadi wa siliva mudihue udi nayo kumi.’”—Luka 19:20-24.

Luholo muenya mudimo muene gavudishilego umonyi wa ufumu wa fumi’enji, amutambudile makuta agasue. Apostolo ana gunengena guhinyina gua Yesu mu Ufumu wa Nzambi. Hene ndaga yazuelele Yesu yatadila muenya mudimo wabola, yaakuatesele ha gujiya egi gula atshitshilego gikhesa mbaashigo muheta fundo mu Ufumu wa Nzambi.

Mbimbi jiazuelele Yesu jiakhalele naye gutuma alandudi enji agujinginyina ha gukudisa gikhesa giawo. Wasugishile egi: “Ngudi gumiwambela egi: Muthu wagasue udi nu ima mbawulezelewa iko, uvi yago gashigo nu ima mbawutambudiwa giene gidi nagio muene.” Wazuelele luko egi mbalagaji jienji jiakhalele mutuna egi muene “gahinyinago” mbajishiyiwa. Gungima Yesu walandudile vuayaje yenji gu Yelusalema.—Luka 19:26-28.