Yesu wakhalele gu Perea ha ‘sambua dia muta wa Yordani.’ (Yone 10:40) Gungima wayile gu gukhanda ya sudi gu Yelusalema.

Yesu gakhalelego hakhenji. Wayile nu alandudi enji nu ‘athu avula,’ mukatshi diawo muakhalele afutshishi a gitadi nu enya gubola. (Luka 14:25; 15:1) Afalese nu alongeshi a mikhuala akhalele nji hene, ene akhalelego mutshigina malongo a Yesu nu midimo yenji. Akhalele nu ndaga jiavula jia gutangiza mukunda nu ifezegeselo yahanele Yesu yatadila gimeme giatotele, mona watotele, nu muenya umonyi nu Lazalo.—Luka 15:2; 16:14.

Yajiya gukhala egi Yesu wakhalele muwunguluga ndaga jiabola jiamuwambelele mbalagaji jienji, hene wawambelele luko alandudi enji ndaga jiaalezele gu Galile.

Ha gufezegesa Yesu wazuelele egi: ‘Ndaga jidi mukhakhuisa athu jiajiyilego gulengewa. Uvi mukumbu gudi muthu udi mujijisa! . . . Muteme genu gula phangi’aye wagutshitshila gubola, mubele. Gula wabalumuna mutshima wenji, mutotesele gubola guenji. Gula wagutshitshila gubola mahugo sambadi mu lusugu lumoshi nu gula waza nji gudi aye mahugo sambadi muzuela egi ngabalumuna mutshima wami, udi nayo gumutotesela n’ago.’ (Luka 17:1-4) Yajiya gukhala egi mbimbi eji jia gisugishilo jiawunguluishile Phetelo muhu wahudile muene mukunda nu gutotesela muthu mahugo sambadi.—Matayo 18:21.

Alandudi akalegele ngolo ha gutshita ndaga mu gudivua nu mbimbi jia Yesu ba? Hawambelele ene Yesu egi: ‘Tuhane gutshigina guavula,’ Muene waawambelele egi: “Gula mudi nu gutshigina guakola gifua lumbale lua mutarde, muajiya guwambela mutshi owu wa miriye yabuita egi vuzumuga mu miji, udikune mukatshi dia kianga, wene wajiya gumitumagela.” (Luka 17:5, 6) Yadiago, ikhale gutshigina guazonda guajiya gukalagala ndaga jiakoma.

Yesu wasendesele gulongesa egi gukhala nu khadilo dia gudibulumuisa nu gutuna gudihala gudi nu ndando. Wawambelele apostolo egi: “Nanyi mukatshi dienu udi nu muenya mudimo udi mudima mu dihia, nga udi mubamba imeme, wajiya gumuwambela haza muene gu dihia egi, ‘iza gatshididi khala gu mesa?’ Gashigo gumuwambela egi ‘ngulondele ima ya gudia, sudiga mulele wa mesa ha gunguhua ima ya gudia nu ya gunua gungima udie unue giwa?’ Muene mbagahanyigo muenya mudimo mersi handaga muene watshitshi ndaga yamuwambela ha gutshita, ishigo ngenyi ba? Ngenyi nji, enue hamuatshita ndaga jiagasue jiamiwambelewa, zuelenu egi: ‘Tudi getu enya mudimo adi ashigo atagana, tuatshitshi khuta ituakhala nayo ya gutshita.’”—Luka 17:7-10, NWT.

Mukombeledi wagasue wa Nzambi udi naye gukotelesa funu ya guhaga ndaga jia Nzambi ha fundo dia thomo. Luko, muthu wagasue udi naye gujiya egi gukombelela Nzambi gifua muenya inzo yenji gudi luendu luakoma.

Yajiya gukhala egi gungima dia maga ene, muenya ngenji yago Mariya nu Mata atumine wahetele gudi Yesu. Mariya nu Mata akhalele aphangi’a Lazalo, akhalele mujinga gu Betaniya ya Yudea. Muenya ngenji muene wawambelele Yesu egi: “Fumu, tala! Futa diaye wanaguzumba umukata.”—Yone 11:1-3.

Ngatshima Yesu wavile egi futa di’enji Lazalo wakhalele mukata muavula diago, muene galebelego muila mukunda nu gikenene. Hafundo dia guvua gikenene, Yesu wazuelele egi: “Misongo ya Lazalo ishigo misongo ya gufua ndo, yene idi mukunda nu gudijiga gutumbuga guakoma gua Nzambi, nu hagula egi Mun’a Nzambi atumbuishiwe mukunda nu ndaga yene.” Watshitshile masugu mbadi mu dimbo diene, gungima wawambelele alandudi enji egi: ‘Tuvutugienu gu Yudea.’ Ene atunyile egi: ‘Mulongeshi, masugu awa ene anya Yuda akambi gugushiya nu maseso luenyelu na uvutuge luko guene?’—Yone 11:4, 7, 8.

Yesu wavutudile egi: “Muanya ushigo nu makumbi kumi nu muyadi (12) ba? Gula muthu wawenda mu muanya, gashigo mukhakhuga ndaga ya muene udi mumona muanya wa ha mavu awa. Uvi gula muthu wawenda mu phipha, udi mukhakhuga ndaga ya  muanya ushigo mu mutshima wenji.” (Yone 11:9, 10) Yesu watshiginyile guzuela egi tangua diamuhagele Nzambi mukunda nu mudimo wagulongesa diakhalele khenji dihua gale ndo. Uu nu tangua dinyinyi, Yesu wakhalele nu funu ya gukalegela muavula tangua diazonda muene wasalele nadio.

Yesu wazuelele luko egi: “Lazalo futa dietu wabandi gale tulo, uvi ame ngudi muya ha gumuzugisa gu tulo.” Yajiya gukhala egi alandudi akhalele mutangiza egi Lazalo wabandele ha guhuluguga, gungima dienji mbawuza muzuga; hene awambelele Yesu egi: ‘Fumu, gula wabandi tulo, mbawumuvua muabonga.’ Yesu waawambelele ha phelo egi: “Lazalo wafui . . . Uvi tuyenu gudi muene.”—Yone 11:11-15.

Toma wajiyile egi Yesu wajiya gushiyiwa gu Yudea, watshiginyile gumukuatesa, hene wawambelele alandudi ako egi: “Muabonga esue nji tuye, hagula tufue n’enji.”—Yone 11:16.