Gungima dia gusaga muthu wakhalele nu misongo yana gujimbisa malu nu mago, Yesu gakatugilego, wakhalele monzo ya Mufalese yonu wamutamegele ha gudia. Tangua akhalele ene mutshigina gudia, Yesu wamonele athu ako atamegewe adi mutomba gukhala ha mafundo abalega gubonga. Hene, wamonele ndaga yene gifua okazio wa gulongesa khadilo dia gudibulumuisa.

Yesu wazuelele egi: “Gula muthu wa gutamega gu wano wa ulo, gukhala ndo ha fundo diabalega gubonga. Mahugo ako gudi nu muthu muko wa gubalega gukoma watamegewa nji. Ngenyi, muthu wamitamega enue muyadi gu wano gaji, gaguwambela egi, ‘Shila muthu owu fundo dia gukhala.’ Ngenyi, nu sonyi gu meso, mbawuya mukhala ha fundo dia balega gubulumuga.”—Luka 14:8, 9, NW.

Gungima Yesu wazuelele egi: “Gula agutamega gu wano, nda gaye ukhale ha fundo dia balega gubulumuga hagula tangua mbadiza muthu wamitamega, mbawuguwambela egi, ‘Mbayi, nda ukhale ha fundo dia balega gubonga.’ Ngenyi mbayikhala lutumbu gu phala ya athu agasue atamegewa gu wano.” Gukalagala luholo elu gudi mumonesa egi tudi nu makalegelo abonga, uvi gudi mumonesa nji ndaga jiko. Yesu wazuelele egi: “Ndaga ya muthu wagasue udi mudikanduisa mbaamubulumuisa, uvi muthu udi mudibulumuisa mbaamukanduisa.” (Luka 14:10, 11, NW) Yadiago, Yesu wakhalele muwambela athu akhalele gumutegelela ha gukudisa khadilo dia gudibulumuisa.

Gungima, Yesu wahanele longo diko mukunda nu Mufalese wago waatamegele ha gudia gumbo dienji. Longo diene didi mumonesa luholo lua gukalagala wano udi nu funu yavula gu meso a Nzambi. Wazuelele egi: ‘Tangua udi mulonda gudia gua midi nga gua mu ngueze, utamegago mafut’aye nga aphangi’aye nga akuaku’aye, nga athu na akuenu enya umonyi. Handaga ene nji mbaagutamega nu aye lusugu luko, ngenyi mbayikhala gishimbigo giaye. Hene, gula udi mukalagala wano, tamega jiphutu, nu athu adi nu malu a gufua, nu ikata, nu ifofo. Ngenyi, mbawuheta gusuanguluga handaga ene ashgigo nu gima gia gugufuta.’—Luka 14:12-14.

Gutamega mafuta, nu akuaku’etu, nga athu tuana gujinga nawo hehi ha guza mudia gumbo dietu yakhala ndaga yabonga diago. Yesu nji gazuelelego egi idi ndaga yabola. Uvi, wamonesele phamba egi guhana ima ya gudia gudi athu adi nayo diago nu funu gifua jiphutu, muthu udi nu malu a gufua nga gifofo, guana gubata ishimbigo yabonga diago. Yesu wawambelele Mufalese waatamegele ha gudia egi: ‘Mbawuheta gishimbigo mu tangua dia gufuzumuga gua athu atagana.’ Muthu muko akhalele nenji gu mesa wazuelele egi: ‘Gusuanguluga gukhale gudi muthu udi mudia mu Ufumu wa Nzambi.’ (Luka 14:15) Muthu muene wamonele egi gukhala gu wano wa mu Ufumu wa Nzambi gudi luendu luakoma diago. Uvi, athu ako asuangulugilego nu ndaga yene, Yesu wazuelele egi:

“Muthu mumoshi wakalegele wano wakoma, nu watamegele athu avula. Watumine muenya mudimo wenji . . . ha guwambela athu atamegewe gamba, ‘Ijienu, handaga ima yagasue idi ya gulonda.’ Uvi, mukuta wawo agasue abinduluile. Muthu wa thomo wawambelele muenya mudimo egi, ‘Ngasumbi dihia diami, ngudi naye guya guditala; ngagububila, ngufuile jikhenda.’ Muthu muko wamudijigile gamba, ‘Ngasumbi jingombe jiami kumi, ana gubungisa mbadi-mbadi, nguya gujilola gula jiajiya gutema gutshita mudimo muabonga; ngagububila, ngufuile jikhenda.’ Muthu muko wa thathu wazuelele egi, ‘Ngazudi mukaji’ami mu ulo luenyelu, hene ngajiyilego guya.’”—Luka 14:16-20, NW.

Ndaga eji jiagasue jia zuela athu awa jishigo diago guaabingisa ndo! Mu guzuela guabonga, muthu wana gutala dihia nga ngombe gutuama egi ayisumbe, yanago gutoga egi ayitale hadi muene wayisumbi gale. Luko, muthu wa thathu gashigo mudilonda ha guzula mukhetu mu ulo, uvi wakhalele adizudi gale nenji mu ulo. Hene, guzula mukhetu mu ulo guakhalelego naye gumutunyisa ha gutshigina emvitasio eyi ya funu. Havuile Fumu wakalegele wano wakoma ndaga eji, wavuile khabu jiakola. Wawambelele muenya mudimo wenji egi:

‘Nda gatshididi mu njila jiakoma nu jiazonda jia dimbo, iza nu jiphutu, nu athu adi nu malu a gufua, nu ifofo, nu ikata.’ Muenya mudimo wayile, wajile nu athu ene. Uvi guakhalele nu mafundo ako asalele mu inzo. Hene, Fumu wakalegele wano diakoma wawambelele luko muenya mudimo wenji egi: ‘Nda mu njila jiakoma  nu mu khulo jia phango hagula inzo yami izale pha nu athu. Handaga ngudi gumiwambela egi, gushigo nga muthu mumoshi mukatshi dia athu awa atamegewe mbawudia ima ngalondega.’—Luka 14:21-24.

Ndaga jia zuelele Yesu mu gifezegeselo egi jidi mumonesa luholo Yehowa Nzambi watumine Yesu Klisto ha gutamega athu mbaahinyina mu Ufumu wa mu dilu. Athu a thomo atamegewe akhalele enya Yuda nu mafumu awo a mangumba. Avula mukatshi diawo atunyile emvitasio ya Yesu tangua gakhalele mulongesa lukuma luabonga. Uvi emvitasio yene ya sugilego phamba gudi ene. Yesu wamonesele haphelo egi mu masugu adi muza emvitasio ya mbadi mbayihanewa nji gudi enya Yuda akhalele jiphutu, nu gudi athu akhalelego enya Yuda. Gungima, emvitasio ya thathu nu ya gisugishilo, mbayihanewa gudi athu anyi enya Yuda akhalele mumona gifua ashigo nu funu gu meso a Nzambi.—Makalegelo 10:28-48.

Yadiago, ndaga jia zuelele Yesu jiadivuile diago nu ndaga jia zuelele muthu muko watamegewe gu wano. Muthu muene wazuelele egi: ‘Gusuanguluga gukhale gudi muthu udi mudia mu Ufumu wa Nzambi.’