Yesu wakhalele yowu genji mu njila ya Perea ha guya gu Yelusalema. Muvuala mumoshi wakhalele nu umonyi wayile phushi gudi Yesu, wafugamele ha mabongo gutuama dienji. Muvuala muene wakhalele “fumu.” Yajiya gukhala egi wakhalele prezida wa sinagoga, nga ndo wakhalele musopheshi wa gu tribinale ya enya Yuda yakhalele mutamegewa egi Sanhédrin. Wawambelele Yesu egi: “Mulongeshi wabonga, ngutshita itshi ha guheta monyo wa ivo nu ivo?”—Luka 8:41; 18:18; 24:20.

Yesu wamuhudile gamba: “Mukunda natshi udi gungutamega egi wabonga? Gushigo muthu wabonga, khuta Nzambi hakhenji.” Yajiya gukhala egi muvuala muene wakalegele mbimbi “wabonga” gifua jina dia lutumbu luholo alongeshi a mikhuala akhalele mukalagala. Ngatshima Yesu wakhalele mulongeshi wabonga, wawambelele muthu muene egi titre “wabonga” yakhala phamba mukunda nu Nzambi.

Yesu wamuwambelele egi ‘gula watshigina gungina mu monyo, landula gubamba mikhuala.’ Muene wamuhudile egi: “Mikhuala tshi?” Yesu wamutangele mikhuala itano mukatshi dia mikhuala kumi ya Moise: gushiya muthu, guwenda uthambi, gukuya, gukhala uthemua wa mambo, nu gunemesa mvuaji. Gungima, watangele mukhuala uko wabalega ndando, wazuelele egi: ‘Udi naye guzumba muthu na mukuenu gifua luholo wana gudizumba aye hakhaye.’—Matayo 19:17-19.

Muthu muene wavutudile egi: “Milonga eyi yagasue ngana guyitshita gale, itshi yangusala?” (Matayo 19:20) Yajiya gukhala egi muthu muene wakhalele gudivua gifua gashigo nu ndaga imoshi ngenyi yabonga, yajiya gumukuatesa ha guheta monyo wa ivo nu ivo. Luholo Yesu wakotelesele egi muthu muene wazuelele giamatshidia, wamumonesele ‘guzumba.’ (Mako 10:21) Uvi, muthu muene wakhalele nu ndaga yakhalele gumukanga njila.

Muthu muene wakhalele muzumba umonyi wenji muavula, hene Yesu wamuwambelele egi: ‘Ndaga ingoshi ya gusala, nda udige ima udi nayo, ukhaphele phutu mbongo, ngenyi mbawukhala nu umonyi mu dilu, hangima uze ungulandule.’ Yadiago, muthu muene wakhalele naye gukhapha falanga jienji gudi phutu  jinyi jiajiyilego gumuvutudila najio, gungima wajiya giwa gubua mulandudi wa Yesu. Yesu wamutalele luholo gakhalele muya nu gikenene giagasue. Muthu muene wazumbile muavula umonyi, nu ‘ima yavula’ yakhalele nayo muene, yamukangele meso ha gumona umonyi wa giamatshidia. (Mako 10:21, 22) Yesu wazuelele egi: ‘Idi ndaga yakola hagula egi athu adi nu umonyi angine mu Ufumu wa Nzambi!’—Luka 18:24.

Alandudi adihudile tangua avuile mbimbi eji nu ndaga Yesu wazuelele gungima egi: “Idi ndaga ya leba gudi shamo ha gungina mu wina dia ndongo, uvi idi lamba gudi muenya umonyi ha gungina mu Ufumu wa Nzambi.” Ndaga yene yatumine alandudi ha gumuhula egi: “Ngenyi, nanyi wajiya giwa guhuluishiwa?” Guhuluishiwa gudi diago ndaga ya lamba eyi muthu nga mumoshi gajiyilego guheta ba? Yesu waatalele nu waawambelele egi: “Ndaga idi yakola sha gudi athu, gudi Nzambi idi yaleba.”—Luka 18:25-27, NW.

Phetelo wamonesele egi ene azudile desizio dia gudisha nu muenya umonyi owu, wazuelele egi: “Tala! Esue tuabembele yagasue nu tuagulanduile. Ndaga itshi mbayitutshitshiwa?” Luholo alandudi azudile desizio diabonga, Yesu waamonesele gishimbigo mbaaheta gu gisugishilo. Wazuelele egi: “Mu hugo dia mavu ahe-ahe, mbahakhala mun’a muthu ha nguasa yenji ya gutumbuga, enue muadiangele gungulandula mbamukhala nji ha nguasa jia gutumbuga kumi nu jiyadi (12), ha gusophesa iphuta 12 ya Isalele.”—Matayo 19:27, 28, NW.

Yadiago, Yesu wakhalele muzuelela ndaga mbajikalegewa mu masugu adi muza tangua ima yagasue mbayikhala gifua luholo yakhalele mu dihia dia Edene. Phetelo nu alandudi ako mbaaheta gishimbigo tangua ene nu Yesu mbaahinyina hangoshi mavu anyi mbaabua phaladiso. Gigi gishimbigo giabonga gubalega ndaga yagasue eyi abembele ha gulandula Yesu!

Uvi alandudi enji mbashigo muheta phamba ishimbigo mu masugu adi muza. Ana guheta nji gishimbigo mu masugu awa. Yesu wazuelele egi: “Gushigo muthu wabembele inzo yenji, nga mukaji’enji, nga aphangi’enji, nga mvuaji jienji nga an’enji mukunda nu Ufumu wa Nzambi, mbagadi guheta ndo yabalega guvula mu gindongo egi, nu mbagadi guheta ndo monyo wa ivo nu ivo mu gindongo mbagiza.”—Luka 18:29, 30.

Yadiago, fundo diagasue alandudi enji ajiya guya, ajiya gukuata ufuta wakola nu aphangi’etu a mu nyuma gubalega aphangi tuavualewe nawo fami imoshi. Uvi idi mumonega egi fumu owu wa muvuala wakhalele nu umonyi, watotesele gishimbigo egi giabonga nu gishimbigo gia guhinyina nu Yesu mu Ufumu wa Nzambi mu dilu.

Yesu wazuelele luko egi: “Luenyelu avula adi athu a thomo mbaakhala athu a gisugishilo, nu adi a gisugishilo mbakhala athu a thomo.” (Matayo 19:30, NW) Yakotelesa itshi?

Luholo fumu owu wa muvuala wa enya Yuda wakhalele nu umonyi wavula, wakhalele mukatshi dia athu a “thomo.” Luko, luholo gakhalele munemesa mikhuala ya Nzambi, wakhalele mumonega gifua wajiya gukalegela Nzambi nu gukalagala ndaga jiko jiavula jiawaha. Ndaga ya lamba idi egi muene washile umonyi nu ima yenji ha fundo dia thomo. Uvi athu akhalelego nu umonyi, akotelesele egi malongo a Yesu adi a giamatshidia nu adi mu bata mu njila ya monyo. Ene akhalele gifua athu a “thomo,” uvi abuile athu a “gisugishilo.” Ajiya gudifelela ha gukhala ha nguasa jiawo jia ufumu nu Yesu mu dilu nu ha guhinyina mavu awa mbaabua phaladiso.