Tangua Yesu wakhalele mudia gumbo dia Fumu wa Afalese, walongesele malongo a ndando. Gungima, Yesu wayile gu Yelusalema. Athu avula akhalele gumulandula. Mukunda natshi? Akhalele diago nu nzala ya gubua alandudi enji a giamatshidia, ngatshima yakhalele mutoga egi atshite ndaga yagasue yatogewa?

Hakhalele ene muya mu njila, Yesu wazuelele ndaga imoshi yaasagesele, wazuelele egi: ‘Gula muthu waza gudi ame, udi naye gutuna guzumba sh’enji nu gin’enji, nu mukaji’enji nu an’enji, nu aphangi’enji a mala nu a akhetu, nga nu monyo wenji diago, gula ndo muene gajiyilego gukhala mulandudi wami.’ (Luka 14:26) Mbimbi eji jidi mukotelesa itshi?

Yesu gakhalelego muzuela egi athu agasue anyi mbaabua alandudi enji adi naye gukhala nu umbalagaji nu enya fami jiawo. Uvi, guzuela gua Yesu gudi mukotelesa egi athu anyi mbaabua alandudi enji adi naye guzumba Yesu muavula gubalega enya fami jiawo. Ashigo naye gukhala gifua muthu gazuelele mu gifezegeselo gienji, watunyile emvitasio ya funu ya guya mudia handaga wakhalele wazudi gale mukaji’enji mu ulo. (Luka 14:20) Biblia idi muzuela mukunda nu Yakobo, khakha wa enya Yuda egi, ‘gakhalelego muzumba’ Leya, uvi wakhalele muzumba Rachel. Idi mukotelesa egi Yakobo wakhalele muzumba Rachel muavula gubalega Leya.—Gisendeselo 29:31; mbimbi goshi’a diyiji.

Jiya egi Yesu wazuelele gamba mulandudi wenji udi naye gutuna nji guzumba ‘monyo wenji.’ Idi mukotelesa egi mulandudi wa Yesu wa giamatshidia udi naye guzumba Yesu muavula gubalega monyo wenji, wajiya nji gutshigina gufua mukunda nu Yesu gula yatoga ngenyi. Yadiago, gubua mulandudi wa Klisto idi ginemo gimoshi giakoma diago. Dishigo desizio dia gukena nadio ndo, didi mutoga gutangiza muavula diago.

Gukhala mulandudi wa Yesu guajiya gubata malamba nu usageshi, handaga Yesu wazuelele egi: ‘Muthu wagasue udi gashigo mubata mutshi wenji wa lamba ha gungulandula ame, gajiyilego gukhala mulandudi wami.’ (Luka 14:27) Yadiago, mulandudi wa Yesu wa giamatshidia udi naye gutshigina gumonesewa lamba gifua luholo Yesu gamonesewe lamba. Yesu wazuelele egi mbawufua ha mago a mbalagaji jienji.

Hene, athu avula akhalele muya nu Yesu gu Yelusalema akhalele naye gutangiza muavula gula gubua mulandudi wa Klisto guakotelesa itshi. Yesu wamonesele ndaga yene mu gifezegeselo gahanele, wazuelele egi: ‘Nanyi mukatshi dienu gula watshigina gutunga inzo yaleha gashigo mudianga gukhala hashi ha gutadila guvula gua makuta mbayitoga ha gujiya gula udi nu makuta atagana ha guyimanesela nga ndo? Gula ndo, hasendesa muene fondasio, gajiyilego guyimanesela.’ (Luka 14:28, 29) Hene, gutuama dia gubua alandudi a Yesu, athu akhalele muya nenji gu Yelusalema akhalele naye guzangula desizio diakola dia gutagenesa ginemo ginyi muabonga diago. Yesu wamonesele ndaga yene mu gifezegeselo giko. Wazuelele egi:

‘Fumu mutshi hadi muene muya ha gulua ita nu fumu muko, gashigo mudianga gukhala hashi,  ha gutangiza gula wajiya gulua nenji ita nu masuta 10 000 hadi muene muza nu masutu 20 000? Yadiago, gula wamona egi gashigo mubinga ita yene, tangua didi fumu muko unu gualeha, muene mbawutuma amoneshi enji ha gukamba nenji guhuima.’ Ha gumonesa funu ya ndaga yene, Yesu wazuelele egi: ‘Luholo lumoshi nji, muthu wagasue mukatshi dienu udi gashigo muwasa ima yagasue idi nayo muene dikunda, gajiyilego gukhala mulandudi wami.’—Luka 14:31-33.

Yadiago, Yesu gakhalelego muzuelela phamba athu anyi akhalele muya n’enji gu Yelusalema. Muthu wagasue watshigina gubua mulandudi wa Klisto udi naye gutshigina gukalagala ndaga eji jiazuelele Yesu. Yakotelesa egi gula muthu muene watshigina gukhala mulandudi wenji, udi naye gutshigina gubemba gima giagasue gadi nagio muene gifua, ima yenji, nga monyo wenji. Idi ndaga tudi naye gutangigiza mu gisambu.

Gungima, Yesu wavutugile luko ndaga gazuelele mu Diskur dienji holu dia Mulundu tangua gawambelele alandudi enji egi, adi ‘mungua wa ha mavu.’ (Matayo 5:13) Yesu watshiginyile guzuela egi mungua wana gubamba ima hagula ifukhigo. Hene, makalegelo a alandudi enji ana gukuatesa athu ako ha gubamba ufuta wawo nu Nzambi nu ha gukhala nu makalegelo abonga. Henyaha, tangua mudimo wenji wa gulongesa wakhalele muya gu gisugishilo, wazuelele egi: ‘Mungua udi gima giabonga. Uvi gula mungua wahua ngolo jiawo, mbawuvutudiwa luko ngolo jiawo nu itshi?’ (Luka 14:34) Athu akhalele mutegelela Yesu akhalele mujiya egi mungua udi gima giabonga, uvi gula wabungishiwa nu mavu nga nu gima giko gia mvindu, wana khalago nu funu.

Ngenyi, Yesu wamonesele egi athu abuile gale alandudi enji ashigo naye gubemba egi desizio diawo dilebe. Gula desizio diawo dialeba, mbaakhadigo luko nu funu, mbaabua gifua mungua wahua ngolo jiawo. Athu ajiya guaasagesa nga guaamonesa lamba. Ndaga yabola idi egi mbaakhadigo luko abonga gu meso a Nzambi, mbaashingisa nji jina dienji. Yesu wamonesele egi tudi naye gutuna egi ndaga ya luholo elu itubuile. Wazuelele egi: “Muthu udi nu matshui aguvua, avue genji.”—Luka 14:35.