Yesu nu athu akhalele muya nawo ahetele gu Yeliko. Athu akhalele mukalagala lusugu lua mudidi gula akatuga gu Yelusalema ha guya gu Yeliko. Mu guzuela guabonga, Yeliko yakhalele nu membo mbadi, Yeliko ikulu yakhalele mu giteso gia kilometre gimoshi nu ndambo, nu Yeliko ihe-ihe ya enya Roma. Tangua Yesu nu athu akhalele muya nawo akatugile gu Yeliko ya thomo nu ahetele hehi nu Yeliko iko, ifofo mbadi yana gutoga athu ima yavuile matululu a athu. Mumoshi mukatshi diawo jina dienji Batime.

Tangua avuile egi Yesu udi mubalega, Batime nu futa dienji muko wa gifofo asendesele gukologoga egi: ‘Fumu mujigulu’a Davidi, tuvuile jikhenda!’ (Matayo 20:30) Athu ako mukatshi dia thundu ya athu a abalele mu dijui diakola ha guhena tedie, uvi ene alandudile gukaluguga. Havuile Yesu matululu, wamaganele. Wawambelele athu akhalele muya nawo ha gutamega athu anyi athu akhalele mukaluga. Ayile gudi athu akhalele mutoga ima, awambelele mungoshi mukatshi diawo egi: “Kolesela! Zuga; muene udi mugutamega.” (Mako 10:49) Nu gusuanguluga guagasue, gifofo giabishidile gikuto gienji, giazugile mu molu, giayile gudi Yesu.

Yesu waahudile egi: “Enue muatshigina ngumitshitshile itshi?” Ifofo yagasue mbadi yamuwambelele egi: “Fumu, meso etu amone.” (Matayo 20:32, 33) Yesu wavuile jikhenda, waakuatele gumeso, gungima wakuatele mumoshi mukatshi diawo, wamuwambelele egi: “Nda gaye. Gutshigina guaye guaguwelugisa.” (Mako 10:52) Idi yadiago egi ifofo yagasue mbadi yasendesele gumona, nu yatumbuishile Nzambi. Tangua athu amonele ndaga yakalegele Yesu, atumbuishile Nzambi. Ifofo yene yasendesele gulandula Yesu.

Hakhalele Yesu mubalega gu Yeliko, athu avula amujietele. Athu agasue akhalele mutshigina gumona muthu wasagele ifofo. Athu akhalele gumujieta khanda nu khanda, hene athu ako akhalelego muheta luholo lua gumumona. Yakhalele ngenyi mukunda nu Zachée. Wakhalele fumu wa afutshishi a gitadi mu dimbo dia Yeliko. Luholo muene wakhalele muthu wa gitala gia hihia, gakhalelego nu luholo lua gumona ndaga jiakhalele mubalega. Hene, Zachée wazudile phushi gutuama, wanamatele gos’a mutshi wa sikomole (nga mutshi wa fige wagukula gale) wakhalele mu khulo ya njila yakhalele muya Yesu. Hanamatele Zachée gos’a mutshi, wamonele muabonga luholo ndaga jiagasue jiakhalele mubalega. Yesu wamonele Zachée gos’a mutshi wene, wamuwambelele gamba: ‘Zachée, sambuluga gatshididi handaga ngudi naye ya gukhala monzo yaye mangino.’ (Luka 19:5) Zachée wasambulugile nu wavutugile muphushi gumbodienji ha guyamba ngenji yenji yakoma.

Tangua athu amonele ndaga yakhalele mubalega, asendesele guboguta. Amonele egi ishigo ndaga yabonga egi Yesu atamegewe gudi muthu ene akhalele mumona gifua muenya masumu. Zachée wabuile muenya umonyi mukunda nu mbongo jiakhalele muene mutambula gudi athu mu mudimo wenji wa gufutshisa gitadi.

Hanginyile Yesu monzo ya Zachée, athu asendesele gumufueta egi: “Muthu yowu wangina monzo ya  muenya gubola ha gukhala muene.” Uvi, Yesu wamonele egi Zachée wakhalele hehi ha gubalumuna mutshima. Hene, gavuilego musonyi gu ndaga jiakhalele muzuela athu. Zachée wazugile mu molu, wawambelele Yesu egi: ‘Fumu! Vua, ngudi muhua jiphutu gitshinyi gia ngiadi gia ima yami. Gula ngahuigile muthu ha gumutambula mbongo, ngudi mumuvutudila najio mahugo awana.’—Luka 19:7, 8.

Lulu luholo luabonga gudi Zachée ha gumonesa egi wabalumuine diago mutshima wenji! Yajiya gukhala egi Zachée watalele mu mikanda yenji ha gujiya mbongo guvula gutshi gahetele gudi enya Yuda agudisha. Hene, wazudile desizio dia guavutudila najio mahugo nguana. Yabalegele ndaga Mukhuala wa Nzambi wakhalele mutoga. (Guzoga 22:1; Levi 6:2-5) Luko, Zachée walayile ha guhana phutu gitshinyi gia umonyi wenji.

Yesu wasuangulugile nu ndaga jiamonesele egi Zachée wabalumuine mutshima wenji. Wamuwambelele egi: ‘Mangino guhuluishiwa guangina monzo eyi handaga muthu owu udi mujigulu wa Abalahama. Ndaga ya Mun’a muthu wajile ha gukamba nu guhuluisa adi agutota.’—Luka 19:9, 10.

Masugu abalega, Yesu wazuelele ndaga yatadila ‘athu a gutota’ mu gifezegelo gienji gia mona yala watotele. (Luka 15:11-24) Gungima, Yesu wahanele gifezegeselo gia diago gia muthu watotele uvi gungima wamonegele. Yajiya gukhala egi mafumu a mangumba nu alandudi awo afetele nu azuelele ndaga jiabola mukunda nu Yesu luholo gadihanele gudi muthu gifua Zachée. Uvi, Yesu walanduile gukamba nu gukuatesa ana a Abalahama anyi atotele hagula avutugile Nzambi.