Tangua Yesu wavuile egi enya tribinale ya Sanhédrin ayile giphungi ha gumushiya, wayile gu dimbo dia Ephraim, diakhalele gukhanda ya thunda ya dimbo dia Yelusalema. Wakhalele guene nu alandudi enji, ha gulenga mbalagaji ji’enji. (Yone 11:54) Uvi, tangua dia wano wa Pake wa givo 33 gia tangua dietu diakhalele didi gale hehi, hene Yesu gashiphilego ha gukatuga. Wayile gu nordi ya Samaliya nu wakandugile gu Galile, yakhalele guya guenji gua gisugishilo wayile guene gutuama egi ashiyiwe.

Mu gisendeselo gia vuayaje yenji, hakhalele Yesu mubalega mu membo, wataganele nu mala kumi akhalele nu misongo ya hute. Maluholo ako a misongo ya hute ana gubolesa mage-mage itshinyi ya muila, gifua matshui, mino ya mago nga ya malu. (Mutango 12:10-12) Mukhuala wa Nzambi wakhalele muzuela egi muenya hute udi naye guzuela mangololo egi: ‘Ngudi ngabola, ngudi ngabola!’ wakhalele nji muzuela egi muenya hute udi naye gudikhalela hakhenji.—Levi 13:45, 46.

Gishina giene, enya hute 10 amaganele gualeha nu fundo diakhalele Yesu. Uvi, akhalele muzuela mangololo egi: ‘Yesu, Mulongeshi, utuvuile khenda!’ Yesu waamonele, waawambelele egi: “Ndienu genu mudidijige gudi nganga-nzambi.” (Luka 17:13, 14) Khadilo dia Yesu diamonesele egi wanemesele mukhuala wa Nzambi, wago wakhalele muhana nganga-nzambi njila ya gusaga athu akhalele nu misongo yene. Gungima ajiya gujinga luko mukatshi dia athu.—Levi 13:9-17.

Enya hute ene kumi amonesele gutshigina mu ndaga yagushimana yakalegele Yesu. Ayile gudi nganga-nzambi, ngatshima akhalele khenji asagewago. Tangua akhalele muya mu njila gutshigina guawo gudi Yesu guaakuatesele. Asendesele luko gumona nu avile muabonga!

Enya hute 9 asagewe ayile gawo. Uvi mumoshi gayilego, wakhalele muena gu Samaliya, wavutugile ha gukamba Yesu. Mukunda natshi? Handaga wasuangulugile muavula gu ndaga yatshitshile Yesu, hene wavutugile ha gumuhana mersi. Muthu muene “watumbuishile Nzambi mu dijui diakola,” handaga wakotelesele egi Nzambi wamanesele misongo yenji. (Luka 17:15) Hamonele muene Yesu, wabuile hashi gutuama dienji, ha gumuhana mersi.

Yesu wawambelele athu amujietele egi: ‘Ngasagelego athu kumi ba? Ako 9 adi gui? Gushigo nu muthu weza muvutuga ha gutumbuisa Nzambi khuta muenya Samaliya yowu ba?’ Gungima Yesu wawambelele muenya Samaliya egi: ‘Zuga, nda gaye, gutshigina guaye gua gukuatesa.’—Luka 17:17-19.

Luholo Yesu wasagele enya hute ene kumi, yamonesele diago egi Yehowa Nzambi waakuatesele. Yajiya gukhala egi mumoshi mukatshi dia mala ene kumi asagewe, wanginyine nji mu njila idi mubata gu lujingu. Tushigo mujinga mu tangua Nzambi wakalegele Yesu ha gusaga athu mu luholo lua gushimana. Uvi, gula tuasha gutshigina gudi Yesu, tuajiya gukhala mu njila idi mubata mu lujingu—lujingu lua ivo nu ivo. Tuana gumonesa khadilo dia guhana mersi, gifua muatshitshile yala yonu wa Musamaliya ba?