Yesu nu alandudi enji akatugile gu Galile, azawugile Muta wa Yordani abalegele nji Perea, ayile gu khanda ya sudi. Giphungu gia gisugishilo giakhalele Yesu gu Perea, wawambelele Afalese matangi a Nzambi atadila gushiya ulo. (Luka 16:18) Uvi mu tangua edi, asendesa luko ndaga yene ha gulola Yesu.

Moise wasonegele egi, yala wajiya gushiya ulo nu mukaji’enji gula wamona egi mukhetu muene wakalagala ‘ndaga imoshi yabola.’ (Mikhuala 24:1) Athu akhalele nu matangi agudisha mu ndaga yatadila gishina gia gushiya ulo. Ako akhalele mutangiza egi yakhalelego mulonga wakola. Hene, Afalese ahudile egi: ‘Mikhuala yetu idi muhana muthu njila ha gubemba mukaji’enji nga mukunda nu ndaga itshi ba?’—Matayo 19:3.

Ha fundo dia guhana matangi a athu, Yesu waawunguluishile nu gutema guagasue gishina Nzambi walondele ulo. Wawambelele gamba: ‘Enue khenji muatangele egi, gu gisendeselo Nzambi wafugile yala nu mukhetu ba? Muene wazuelele egi handaga yala mbawukatuga gudi sh’enji nu gin’enji mbawudibungisa gudi mukaji’enji, muyadi tshima mbakhala muthu mungoshi. Ngenyi ashigo luko athu muyadi, uvi adi muthu mumoshi. Hene, muthu gakaphumunago yabungisa Nzambi.’ (Matayo 19:4-6) Tangua Nzambi walondele ulo mukatshi dia Adama nu Eva, gazuelelego egi adi naye gudikhaphumuna.

Afalese ashile giphapha gu ndaga yazuelele Yesu; hene azuelele egi: ‘Gula idi ngenyi, mukunda natshi Moise gazuelele egi yala ahue mukhetu gabembi mukanda wa gushiya mahata?’ (Matayo 19:7) Yesu waavutudile egi: “Mukunda nu gukola gua mitshima yenu, hene Moise gamihuile njila ya gubemba akaji’enu, uvi gu gisendeselo yakhalelego ngenyi.” (Matayo 19:8) “Gisendeselo” giene giakhalelego mu masugu a Moise, uvi giakhalele mu tangua Nzambi walondele ulo wa thomo mu dihia dia Edene.

Gungima, Yesu wamonesele giamatshidia gia ndando, wazuelele egi: ‘Ngudi gumiwambela egi, muthu wagasue udi mubemba mukaji’enji gula gakalegelego uthambi [mu zuelelo dia Greki, porneiʹa], nu muene wazula mukhetu muko, udi muwenda uthambi.’ (Matayo 19:9) Gishina gimoshi Biblia idi muhana muthu njila ya gushiya ulo nu mukanji’enji nga nu mulumi’enji gidi uthambi.

Ndaga yene yatumine alandudi ha guzuela egi: ‘Gula idi ngenyi mukunda nu yala nu mukaji’enji, na ishigo yabonga ha athu adizule mu ulo.’ (Matayo 19:10) Yadiago muthu udi mutangiza guhaga udi naye gujiya egi ulo udi naye gukhala mayilago, ajiyilego gudikhaphumuna!

Mu ndaga yatadila undumbu, Yesu wamonesele egi athu ako avualewe agutungula, ngenyi ajiyilego guwata. Ako aditungudile, a akatudile itshinyi ya muila yana gukalagala egi muthu avue nzala ya gubungisa muila. Uvi, athu ako ana gudikanda gu nzala jiawo jia gubungisa muila, mukunda nu gudihana muavula mu ndaga jia Ufumu. Yesu wawambelele athu akhalele gumutegelela egi: ‘Muthu udi nu ngolo jia gulandula longo edi [dia undumbu] adilandule.’—Matayo 19:12.

Mu tangua diene, athu asendesele gubata ana azonda gudi Yesu. Uvi, alandudi abalediele athu akhalele mubata ana gudi Yesu; yajiya gukhala egi akhalelego mutshigina egi asagese Yesu. Hamonele Yesu ndaga yene, yamusagesele, hene wazuelele egi: ‘Bembenu ana azonda aze gudi ame; muakangigo njila, ndaga ya Ufumu wa Nzambi udi wa athu adi gifua ene. Giamatshidia ngudi gumiwambela egi, muthu udi gashigo mutshigina Ufumu wa Nzambi gifua mona wa zonda, gashigo mulola gungina muene.’—Mako 10:14, 15; Luka 18:15.

Longo dia ndando diago! Hagungina mu Ufumu wa Nzambi, tudi naye gudibulumuisa nu gutshigina egi athu ako atulongese, gifua ana azonda. Gungima, Yesu wamonesele guzumba guenji gudi ana azonda, waazudile ha mago nu waahagele mago ha muto. Yesu wakhala nu guzumba gua luholo lumoshi gudi muthu wagasue udi “mutshigina Ufumu wa Nzambi gifua mona wa zonda.”—Luka 18:17.