Yesu walongesele nu wasagele enya misongo mu membo a Yudea nu gu Yelusalema. Gungima, wazawugile Muta wa Yordani ha gulongesa dimbo dimoshi-dimoshi dia distrike ya Perea. Uvi, masugu azonda gungima, wavutugile gu Yelusalema.

Hakhalele Yesu gu Perea, muthu mumoshi wamuhudile egi: “Fumu, khuta athu azonda mbaahuluishiwa ba?” Yajiya gukhala egi muthu muene wakhalele mujiya ndaga jiakhalele muzuela mafumu a mangumba ha gujiya gula athu avula nga azonda phamba mbaahuluishiwa. Hafundo dia gumuhana mvutu, Yesu wamuwambelele ndaga gadi naye gutshita ha guhuluishiwa. Wazuelele egi: ‘Hagienu ngolo ha gungina gu mufulo wazonda.’ Yadiago, akhalele naye gukalagala ngolo diago. Mukunda natshi? Yesu wazuelele egi: ‘Athu avula mbaakamba gungina uvi mbagiaakuma.’—Luka 13:23, 24.

Ha gumonesa funu ya guhaga ngolo, Yesu wahanele gifezegeselo egi: “Tangua fumi’a inzo mbawuzuga nu mbawujidiga gijidigo, enue mbamumagana hanze, enji mbamusendesa gubunda gu gijidigo egi, ‘Fumu, tuzuluile.’ . . . Uvi muene mbawumiwambela egi, ‘ngushigo mujiya fundo muakatuga. Mukuta wenu agasue mudi akalagadi a ndaga jiabola, katugenu gudi ame.’”—Luka 13:25-27, NW.

Gifezegeselo egi gidi mumonesa lamba diabuidile muthu wajile mu tangua diabola, mu tangua dia tshiginyile muene, hene wasangele mufulo wa gujidiga. Wakhalele naye guza mu tangua diabonga, ngatshima yakhalelego ndaga yaleba. Idi luholo lumoshi nji nu athu avula anyi akhalele mutegelela Yesu; akhalele naye guheta gubonga luholo Yesu gakhalele mukatshi diawo nu wakhalele guaalongesa. Akalegelego okazio akhalele nawo wa gusha gikombelelo gia giamatshidia ha fundo dia thomo mu lujingu luawo. Avula mukatshi dia athu anyi Yesu gajidile ha mavu, atunyile gawo ndaga ya tshitshile Nzambi ha guaahuluisa. Yesu wazuelele egi ene ‘mbaadila nu mbadisumata mazo’ tangua mbaambiwa hanze. Uvi, athu ‘akatuga gu esti nu westi, gu nordi nu sudi,’ mu ifutshi yagasue, ‘mbaakhala gu mesa mu Ufumu wa Nzambi.’—Luka 13:28, 29.

Yesu wazuelele egi: ‘Gudi nu athu a gisugishilo [gifua athu akhalelego enya Yuda, nu enya Yuda anyi akhalele mumonesewa lamba] mbaakhala athu a thomo, enji gudi nu athu a thomo [mafumu a mangumba a enya Yuda anyi akhalele gudisunzula egi adi ana a Abalahama] mbaakhala athu a gisugishilo.’ (Luka 13:30) Gukhala ‘athu a gisugishilo’ gua kotelesa egi, athu awa atunyile gumonesa khadilo dia guhana mersi, mbaanginyigo mu Ufumu wa Nzambi.

Mu tangua diene, Afalese ayile gudi Yesu, amudijigile egi: ‘Katuga haha, nda fundo diko handaga Helode [Antipase] udi mutshigina gugushiya.’ Yajiya gukhala egi Fumu Helode muene hakhenji wasendesele guzuela ngenyi, hagula Yesu akatuge mu terituare inyi. Yajiya gukhala egi Helode wavuile woma wa gukhala mukatshi dia athu atshiginyile gushiya profete muko, gifua luholo gashiyishile Yone Mubatiji. Uvi Yesu wawambelele Afalese egi: “Ndjienu muwambele mukenge unu egi, ‘Tala! Ngudi mukatula bademo,  ngudi musaga athu mangino nu hamene, nu mu lusugu lua thathu mbangumanesela mudimo wami.’” (Luka 13:31, 32, NW) Tangua Yesu watamegele Helode egi “mukenge,” yajiya gukhala egi wakhalele muzuelela ndunge jiabola jiana khala najio mikenge. Uvi, Yesu gabembelego egi Helode nga muthu muko amuhuige nga amulengese. Watagenesele mudimo wamuhuile sh’enji, mu gudivua nu ulondegi wa Nzambi, uvi wa athu ndo.

Yesu wayile gu Yelusalema, handaga wazuelele egi: ‘Profete gashigo naye gushiyiwa guma guko, phamba gu Yelusalema.’ (Luka 13:33) Gushigo nga profesi imoshi ya Biblia yazuelele egi Masiya udi naye gufua mu Yelusalema. Uvi mukunda natshi Yesu wazuelele egi mbawushiyiwa gu Yelusalema? Handaga Yelusalema yakhalele dimbo dia Ufumu (capitale), guene guakhalele sanhédrin (tribinale yakoma ya enya Yuda, yakhalele nu manzuji 71), luko guene guakhalele musophesewa athu akhalele mukuatewa egi ba profete a mambo. Luko, milambu ya shitu yakhalele muhanewa gu Yelusalema. Hene, Yesu wakotelesele egi gajiyilego gushiyiwa mu dimbo diko khuta gu Yelusalema.

Yesu wazuelele nu gikenene giagasue egi: ‘Aye Yelusalema, Yelusalema, dimbo diana gushiya ba profete, nu diana gusonona maseso gudi athu atumiwe gua Nzambi. Mahugo guvula gutshi ngatshiginyile gubungisa an’aye gifua luholo susua yana gubungisa an’enji mosh’a mahambu! Uvi enue muatunyine. Tadienu! Inzo yenu mbayibembewa gituhu.’ (Luka 13:34, 35) Giphuta gia enya Isalele gia tunyile Mun’a Nzambi, hene akhalele naye gumona malamba gu desizio diabola azanguile.

Gutuama egi Yesu aye gu Yelusalema, Fumu mumoshi wa Afalese wamutamegele gumbo dienji ha gudia mu Lusugu lua Guhuluguga. Athu ako atamegewe gumbo dia Mufalese akhalele mutala muabonga ndaga itshi Yesu wajiya gukalegela yala mumoshi wakhalele mukata misongo yana gujimbisa malu nu mago. Yesu wahudile Afalese nu alongeshi a mikhuala egi: “Mukhuala udi gutuhana njila ya gusaga muthu mu Lusugu lua Guhuluguga nga ndo?”—Luka 14:3, NW.

Gushigo nga muthu wahanele gueteya. Yesu wasagele yala muene, gungima wahudile athu akhalele hene egi: ‘Nanyi mukhatshi dienu gula mun’enji nga ngombe yenji yabua mu wina, muene gashigo muyizola muphushi mu Lusugu lua Guhuluguga?’ (Luka 14:5) Gushigo nga muthu wahanele luko gueteya gu muhu owu.