Yesu wakhalele yowu genji gu Samaliya nga gu Galile. Mu tangua diene Afalese amuhudile ndaga jiatadila guza gua Ufumu; ene akhalele mutangiza egi tangua Ufumu mbawuza phungi mbajishigiwa gifua mu tangua dia fete. Uvi, Yesu wazuelele egi: “Ufumu wa Nzambi ushigo muza mu luholo athu ajiya guwumona; athu mbaazuedigo egi, ‘tadienu udi guogu!’ nga, ‘udi gunu!’ Ndaga ya Ufumu wa Nzambi udi mukatshi dienu!’”—Luka 17:20, 21.

Athu ako ajiya gutangiza egi Yesu wazuelele egi Ufumu wakhalele muhinyina mu mitshima ya akombeledi a Nzambi. Uvi, yajiyilego gukhala ngenyi, handaga Ufumu wa Nzambi wakhalelego mu mitshima ya Afalese akhalele muzuela nu Yesu. Ufumu wakhalele mukatshi diawo, handaga Yesu yago udi Fumu wa Ufumu wa Nzambi, wakhalele mukatshi diawo.—Matayo 21:5.

Idi mumonega gifua, tangua Afalese ayile, Yesu wasalele muwambela alandudi enji ndaga jiko jiavula jiatadila guza gua Ufumu. Mu ndaga yatadila guza guenji gifua fumu, waawambelele egi: “Mu masugu adi muza, mbamutshigina gumona lusugu lumoshi lua masugu a Mun’a muthu, uvi mbamushigo gulumona.” (Luka 17:22) Yesu wamonesele egi Mun’a muthu mbawuhinyina Ufumu mu masugu adi muza. Gutuama dia guza gua Ufumu wene yajiya gukhala egi alandudi ako mbaakhala nu nzala yakola ya Ufumu, uvi mbaakhala naye ya gunengenena uu tangua diahagele Nzambi ha gula Mun’a muthu aze.

Yesu wazuelele luko egi: “Athu mbaamiwambela egi, ‘tadienu gugu!’ nga, ‘gunu!’ Muyigo, mualandulago. Luholo mvula yana guhenia muphelegetesa dilu khanda nu khanda, mun’a muthu mbawukhala nji ngenyi mu lusugu luenji.” (Luka 17:23, 24) Luholo lutshi alandudi a Yesu mbadibamba ha gutuna gulandula ba masiya a mambo? Yesu wazuelele egi guza gua Masiya wa giamatshidia mbagukhala gifua guhenya gua mvula gudi mumonega gualeha. Gijiyishilo gia guza guenji mu ngolo jia Ufumu mbagimonega gudi athu agasue.

Gungima Yesu wafuanesele ndaga jiabuile mu tangua dikulu ha gumonesa makalegelo athu mbaakhala nawo mu masugu adi muza, wazuelele egi: “Gifua muakhalele milonga mu masugu a Nowa, mbayikhala nji ngenyi mu masugu a Mun’a muthu . . . Yakhalele nji ngenyi mu masugu a Lota, athu akhalele mudia, munua, musumba, mudiga, mukuna, nu mutunga. Uvi lusugu lua zogele Lota mu dimbo dia Sodoma, tshuya nu sifele ya nogele mu dilu, yaashiyile agasue. Mbayikhala nji ngenyi lusugu mbaluza Mun’a muthu.”—Luka 17:26-30.

Yesu gazuelelego egi athu a mu tangua dia Nowa nu Lota ashiyiwe handaga akhalele mutshita ndaga gifua gudia, gunua, gusumba, gudiga, gukuna nu gutunga. Nowa nu Lota nu enya fami jiawo atshitshile nji ndaga jiko mukatshi jia ndaga jiazuelele Yesu. Athu ako a mu sungi jiawo akhalele mutshita ndaga jiene, uvi akhalelego mutumagela  Nzambi, akhalelego nji mujiya sungi akhalele mujinga. Hene, Yesu wawambelele alandudi enji egi atshite gutshigina gua Nzambi nu adihane muavula ha gutaganesa gutshigina guene. Waamonesele luholo lua gudibamba—ha gulandula gujinga—tangua Nzambi mbawushiya athu mu masugu adi muza.

Alandudi akhalele naye gutuna ndaga jia ha mavu, jidi gifua ‘ndaga jia gungima’ jiajiya guawunganesa matangi. Yesu wazuelele egi: ‘Lusugu lunu muthu udi holu dia inzo gila ima yenji idi monzo, gatulugago ha guyizangula, ngenyi nji, muthu udi mu dihia gavutugago. Wungulugenu mukaji’a Lota.’ (Luka 17:31, 32) Wabuile seso dia mungua.

Yesu walandudile guzuela luholo ndaga mbajikhala tangua Mun’a muthu mbawuhinyina gifua Fumu. Wawambelele alandudi enji egi: ‘Mu phipha yene athu muyadi mbakhala ha gitanda gimoshi, mumoshi mbawuzudiwa muko mbawubembewa.’ (Luka 17:34) Athu ako mbaahuluishiwa, uvi ako mbaabembewa nu mbaatotesa lujingu luawo.

Alandudi amuhudile egi: ‘Fumu, mbayibuila gui?’ Yesu waavutudile egi: ‘Bugu didi kimbi, guene njila jia khuyi mbajidibungisa.’ (Luka 17:37) Yadiago, alandudi ako mbaakhala nu meso a bala gifua a njila ya khuyi. Alandudi ene mbaadibungisa gudi mun’a muthu, Klisto wa giamatshidia. Mu tangua diene diakhalele naye guza, Yesu wakhalele naye guhana giamatshidia gidi muhana monyo gudi athu adi nu gutshigina.