Habalegele Yesu nu alandudi enji gu Perea tangua akhalele muya gu khanda ya sudi gu Yelusalema, azawugile Muta wa Yordani hehi nu dimbo dia Yeliko. Athu ako anyi akhalele muya nawo njila imoshi, akhalele muya ha gukalagala wano wa Pake ya givo 33 gia tangua dietu.

Yesu wakhalele muya gutuama dia alandudi enji, handaga wakhalele nu funu ya guheta mu tangua diabonga mu dimbo mukunda nu wano wa Pake. Uvi alandudi akhalele muvua woma. Tangua diafuile Lazalo, Yesu wakhalele gudilonda ha gukatuga gu Perea ha guya gu Yudea. Mu tangua diene, Toma wawambelele alandudi ako egi: “Muabonga esue nji tuyenu ha esue tufue n’enji.” (Yone 11:16, 47-53) Hene, guya gu Yelusalema guakhalele gingonza diago, alandudi akhalele nu gishina gia guvua woma.

Ha gulondega matangi awo mukunda nu ndaga yakhalele guanenga gutuama, Yesu watamegele apostolo, waawambelele egi: ‘Vuenu, tudi mukanduga gu Yelusalema. Mun’a muthu mbawuhanewa gudi mafumu a nganga-nzambi nu alongeshi a mikhuala. Ene mbaamufisa milonga egi afue, muene mbawuhanewa gudi athu a ifutshi iko ha ene gumulela, nu gumukhuphula jifimbo nu gumushiya holu dia mutshi. Mu lusugu lua thathu, muene mbawufuzumuga gu gufua.’—Matayo 20:18, 19.

Didi hugo dia thathu Yesu wawambelele alandudi enji ndaga yatadila gufua nu gufuzumuga guenji. (Matayo 16:21; 17:22, 23) Uvi, mu hugo dinyi waalezele egi mbawushiyiwa holu dia mutshi. Avile ndaga yazuelele muene, uvi ayikoteleselego. Yajiya gukhala atangijile egi ufumu wa Isalele mbawuvutudiwa ha mavu, luko ene mbaheta lutumbu nu ginemua mu ufumu wene ha mavu hamoshi nu Klisto.

Gin’a mupostolo Yakoba nu Yone, yajiya gukhala egi Salome, wakhalele nji mukatshi dia athu akhalele  muya nawo njila imoshi. Yesu wakhalele wahanyi gale apostolo awa mbadi majina akhalele mukotelesa egi “ana a gunuma gua mvula.” Yajiya gukhala wahanele majina awa handaga akhalele nu khadilo dia guvua khabu jiakola. (Mako 3:17; Luka 9:54, NW) Matangua ako, ene agasue mbadi akhalele nu nzala ya gubua athu a lutumbu mu Ufumu wa Klisto. Gin’awo wakhalele mujiya ndaga yene muabonga. Wasuenele gudi Yesu, wafugamele gutuama dienji ha gumutoga gima gimoshi. Yesu wamuwambelele egi: “Itshi watshigina?” Muene wazuelele gamba: “Umbe mbimbi hagula an’ami awa a mala muyadi akhale muko gu koko diaye dia madia muko gu koko diaye dia mahidi, mu Ufumu waye.”—Matayo 20:20, 21.

Ndaga yene yakatugile diago gudi Yakoba nu Yone. Gungima dia guzuelela lamba nu musonyi wakhalele gumunengena, Yesu waawambelele egi: ‘Enue mushigo mujiya imudi mulomba. Enue muajiya gunua khiopho gingudi mutshigina gunua ame ba?’ Ene amuvutudile egi: “Tuajiya gunua.” (Matayo 20:22) Uvi yajiya gukhala egi, akhalelego mukotelesa ndaga ya awambelele Yesu.

Uvi Yesu waawambelele egi: ‘Giamatshidia mbamunua khiopho giami. Uvi ishigo ndaga yami ha gutomba nanyi udi naye gukhala gu koko guami gua madia nga gu koko guami gua mahidi. Mabugu anyi Tata waalondele mukunda nu afumi’a n’awo.’—Matayo 20:23.

Tangua apostolo ako kumi avuile ndaga yatogele Yakoba nu Yone, avuile khabu. Yajiya gukhala egi, Yakoba nu Yone amonesele matangi awo haphelo gudi apostolo ako tangua akhalele mumana ha gujiya gula nanyi wakhalele wabalega ako? (Luka 9:46-48) Ikhale ngenyi nga ndo, ndaga atogele ene yamonesele egi apostolo awa 12 atumagelego longo diahanele Yesu dia gukhala gifua mona wa zonda. Nzala yawo ya gukamba lutumbu yakhalele khenji ihua ndo.

Yesu wazudile desizio dia gumanesa ndaga yene nu malamba yajiya gubata. Watamegele apostolo kumi nu muyadi, waahanele longo nu guzumba guagasue, wazuelele egi: “Mudi mujiya egi athu anyi ana gumonega egi ana guhinyina ifutshi, ana guyihinyina gu ngolo. Luko, athu awo akoma ana gumonesa egi adi nu ufumu holu diawo. Ishigo naye gukhala ngenyi ndo mukatshi dienu; uvi muthu wagasue watshigina gukhala wakoma mukatshi dienu, udi naye gukhala muenya mudimo wenu, nu muthu wagasue watshigina gukhala muthu wa thomo mukatshi dienu udi naye gukhala muhiga wenu.”—Mako 10:42-44, NW.

Yesu waahanele gifezegeselo gienji. Wazuelele egi: ‘Mun’a muthu gajilego hagula athu amukuatele mudimo, uvi wajile ha gukuatela athu mudimo nu ha guhana monyo wenji gifua gibawu mukunda nu gukula athu avula.’ (Matayo 20:28) Yesu wakuatele athu ako mudimo mu sungi ya ivo thathu. Luko, walanduile guaakuatela mudimo nu wafuile mukunda nu athu! Alandudi adi naye gulandula khadilo dia Klisto dia gukuatela athu ako mudimo. Ashigo naye gunengena egi athu a akuatele mudimo. Luko, adi naye gukhala gifua ana azonda uvi ashigo naye gukamba lutumbu.