Afelese atshiginyilego egi Yesu wasagele muthu wavualewe gifofo, hene atamegele mvuaji jienji. Mvuaji jiene jiakhalele mujiya egi enya Yuda ajiya ‘guaakaya mu sinagoga.’ (Yone 9:22) Gula muthu wakayewa mu sinagoga, gajiyilego gudibungisa luko nu enya Yuda, ngenyi yajiya gumubatela malamba a mbongo mu fami yenji.

Afalese ahudile mihu mbadi gudi mvuaji jienji egi: ‘Yowu udi mun’enu mudi muzuela egi wavualewe gifofo ba? Luholo lutshi gadi mumona henyaha?’ Mvuaji jiavutuile egi: ‘Tudi mujiya egi udi mun’etu nu wavualewe gifofo. Uvi tushigo mujiya yakhadi gikuatshi hene gadi mumona luenyelu. Luko tushigo mujiya nanyi wamukangula meso.’ Ngatshima mun’awo waadijigile luholo meso enji akangugile, mvuaji jiamonesele gutema tangua avutudile egi: ‘Muhulenu muene, udi muthu wagukula. Udi naye gudizuelela hakhenji.’—Yone 9:19-21.

Hene, Afalese atamegele luko yala muene, amuhuile woma, amudijigile egi adi nu ndaga adi mufundjila Yesu. Azuelele egi: ‘Tumbuisa Nzambi. Tuajiya egi yala owu udi muenya gubola.’ Muthu wakhalele thomo gifofo gatalelego gufunda guawo, wazuelele egi: ‘Ngushigo mujiya gula muene udi muenya gubola nga ndo.’ Gungima wazuelele egi: ‘Ndaga imoshi ngudi mujiya idi egi, ngakhalele gifofo, uvi henyaha ngudi mumona.’—Yone 9:24, 25.

Uvi Afalese abembelego, amuhudile egi: ‘Itshi gagukalagala? Luholo lutshi gagukangula meso?’ Yala muene wahanele mvutu nu gikhesa giagasue egi: ‘Ngamiwambela gale uvi mushigo muvua ndo. Mukunda natshi muatshigina guvua luko ndaga yene? Nu enue nji, muatshigina gubua alandudi enji ba?’ Afalese avuile khabu jiakola, azuelele egi: ‘Aye udi mulandudi wenji, uvi esue tudi alandudi a Moise. Esue mujiya egi Nzambi wazuelele nu Moise, uvi muthu yowu tushigo mujiya gula wakatuga gui.’—Yone 9:26-29.

Muthu wakhalele thomo gifofo wazuelele egi: ‘Eyi ndaga ya gushimana, mushigo mujiya fundo gakatugile, uvi muene wakangula meso ami.’ Gungima, muthu muene wamonesele muabonga muthu Nzambi wana gutshigina nu gutegelela, wazuelele egi: ‘Tudi mujiya egi Nzambi gana guvuilago enya gubola, uvi wana guvuila muthu wana gumuvuila woma nu wana gukalagala gutshigina guenji. Sendese mu ginono, khenji tuavuilego egi muthu wakangula meso a muthu wavualewe gifofo.’ Gu gisugishilo, wazuelele egi: ‘Nga muthu yowu gakatugilego gudi Nzambi, nga gajiyilego gutshita nga ndaga imoshi.’—Yone 9:30-33.

Afalese amonelego luholo lua gutuna matangi a yala muene, azuelele egi: ‘Aye wa mudidi wavualewe muenya gubola, watshigina gutulongesa esue?’ Amubishidile hanze.—Yone 9:34.

Tangua Yesu wavuile ndaga jia buidile yala muene, wayile gumusanga, wamuhudile egi: ‘Aye udi musha gutshigina gudi mun’a muthu ba?’ Yala muene wasagewe wazuelele egi: ‘Fumu, muene udi nanyi hagula ame ngushe gutshigina guami gudi muene?’ Yesu wamudijigile egi: ‘Wamumonyi gale, muene udi muzuela naye.’—Yone 9:35-37.

Gungima, yala muene wavutudile gamba: ‘Fumu, ngasha gutshigina guami gudi muene.’ Yala muene wamonesele gutshigina nu wanemesele Yesu, wafugamene gutuama dienji. Yesu wamuwambelele egi: ‘Ame ngajile ha mavu awa mukunda nu gusophesa, hagula athu ashigo mumona, amone, uvi awa adi mumona, abue ifofo.’—Yone 9:38, 39.

Afalese anyi akhalele hene, akhalele mujiya egi ene akhalelego ifofo. Uvi, itshi tuajiya guzuela giwa luholo akhalele gudisunzula egi adi atuameji a mu nyuma? Ahudile egi: “Nu esue nji, tudi ifofo ba?” Yesu wazuelele egi: “Nga mudi ifofo, nga mushigo nu gubola. Uvi henyaha mudi muzuela egi, ‘Tudi mumona,’ na gubola guenu, gudi musala.” (Yone 9:40, 41, NW) Luholo ene akhalele alongeshi mu Isalele, akhalelego nu gishina nga gimoshi gia gutuna egi Yesu udi Masiya. Uvi luholo akhalele mujiya Mukhuala muabonga, akalegele diago gubola guakoma tangua atunyile Masiya.