Yesu wayile gu Yelusalema mukunda nu Wano wa gukangudiwa gua tempelo (nga Hanoukka). Wano wene wakhalele mukunda nu guwunguluga luko gukangudiwa gua mbadi gua tempelo. Ivo yavula gutuama, Fumu wa dimbo dia Siliya, Antiochus IV Épiphane watambudile Yelusalema, gungima watungile giwotshielo holu dia giwotshielo giakoma giakhalele mu tempelo ya Nzambi. Gungima, ana a nganga-nzambi mumoshi wa muenya Yuda atambudile Yelusalema, ngenyi ahanele luko tempelo ha mago a Yehowa. Sendese mu tangua diene, akhalele mutshita wano givo giagasue mu lusugu lua 25 lua mbeji ya Kislev. Mangino mbeji yene idi gudivua nu gitshinyi gia mbadi gia mbeji ya Novembre nu gisendeselo gia mbeji ya Decembre.

Yakhalele mu sungi ya guhuma guakola diago, Yesu wakhalele muwenda mu tempelo, mu mbalanda ya Solomo. Enya Yuda amukutamene, amuhudile egi: ‘Uu nu tangua ditshi mbawubemba mitshima yetu molumolu? Gula udi Klisto, tuwambele diago haphelo.’ (Yone 10:22-24) Luholo lutshi Yesu gaahanele mvutu? Waadijigile egi: ‘Ngamiwambela gale, uvi enue mushigo mutshigina.’ Yesu gawambelelego giphungu gimoshi egi muene udi Klisto, gifua luholo wawambelele mukhetu wa mu dimbo dia Samaliya gu wina dia meya. (Yone 4:25, 26) Uvi, waamonesele gula muene udi nanyi, wazuelele egi: ‘Gutuama egi Abalahama avualewe, ame ngadiangele gujinga.’—Yone 8:58.

Yesu wakhalele mutshigina egi athu ene hakhawo akotelese egi muene udi Klisto tangua adi mufuanesa ndaga jiakhalele mutshita muene nu ndaga jia zuelele Biblia gutuama egi Klisto mbawukalagala. Hene, matangua ako wakhalele mudijiga alandudi enji egi awambelago nga muthu egi muene udi Masiya. Uvi mu tangua dinyi, wawambelele enya Yuda anyi akhalele nenji umbalagaji egi: ‘Ndaga eji ngudi mutshita mu jina dia sh’ami, jiene jidi muzuela mukunda nu ame. Uvi enue mushigo mutshigina ndo.’—Yone 10:25, 26.

Mukunda natshi akhalelego mutshigina egi Yesu udi Klisto? Muene wazuelele egi: ‘Mushigo mutshigina handaga enue mushigo imeme yami ndo. Imeme yami yana guvua dijui diami, ame ngana guyijiya, luko yene yana gungulandula. Ngudi guyihana monyo wa ivo nu ivo, yene mbayifuigo nga hazonda, luko gushigo nu muthu mbawuyitambula ha koko diami. Gima gia nguhuile Tata gidi gima gimoshi giabalega ima iko yagasue.’ Gungima, Yesu waamonesele ufuta wenji wakola gakhalele nawo nu sh’enji, wazuelele egi: ‘Ame nu tata tudi muthu mumoshi.’ (Yone 10:26-30) Mu tangua diene Yesu wakhalele ha mavu, uvi sh’enji wakhalele gosa mu dilu. Hene, ishigo mukotelesa egi Yesu nu sh’enji adibungishile diago ha gubua muthu mumoshi. Uvi, adi muthu mumoshi handaga adi nu felela dimoshi, adi mbimbi imoshi.

Mbimbi jia Yesu jiahanele diago enya Yuda khabu jiakola, hene anonele luko maseso ha gumushiya. Uvi ndaga yene yahanelego Yesu woma. Wazuelele egi: “Ngamidijiga midimo yavula yabonga yajile gudi tata, mukatshi dia midimo eyi, mudimo utshi mudi gungusonuena jiseso ha gungushiya?” Enya Yuda amuvutudile egi: ‘Tushigo mugusonona jiseso mukunda nu mudimo wabonga, uvi mukunda nu mashingo, handaga udi . . . muzuela egi aye udi nzambi.’ (Yone 10:31-33) Yesu gazuelelego nga hazonda egi muene udi nzambi. Uvi, mukunda natshi ene akhalele gumufunda ngenyi?

Yesu wazuelele egi wakhalele nu ngolo, uvi enya Yuda akhalele mutangiza egi phamba Nzambi udi naye gukhala nu ngolo jiene. Mukunda nu “imeme,” Yesu wazuelele egi: ‘Ngudi guyihana monyo wa ivo nu ivo.’ Uvi gushigo nga muthu mumoshi wajiya guhana athu monyo. (Yone 10:28) Enya Yuda abuitshile mutshima egi Yesu hakhenji wazuelele haphelo egi sh’enji wamuhuile ngolo gakhalele mutshitshila ndaga jia gushimana.

Ha gumonesa mambo awo, Yesu waahudile egi: “Ishigo ya gusonega mu Mukhuala wenu [mu Ngimbo 82:6], egi ‘Ngazuelele egi: “Enue mudi jinzambi”’? Gula muene watamegele athu ahuiwe mbimbi ya Nzambi egi “jinzambi,” . . . mudi muzuela gudi ame wago Nzambi watumbuishile nu watumile ha mavu egi, ‘udi mushingana,’ handaga ngazuedi egi, ‘Ame ngudi mun’a Nzambi’?”—Yone 10:34-36, NW.

Yadiago, mbimbi ya Nzambi yana gutamega nji athu ashigo atagana uvi adi manzuji egi, “jinzambi.” Hene, mukunda natshi enya Yuda amonele gubola luholo Yesu wazuelele egi, “Ame ngudi mun’a Nzambi”? Yesu  wazuelele ndaga yakhalele naye guatshiginyisa, wazuelele egi: ‘Gula ngushigo mutshita midimo ya sh’ami, mungutshiginago. Uvi, gula ngudi muyitshita, ngatshima muangutshiginyilego, tshiginenu yene midimo hagula enue mujiye nu mulandule gujiya egi Tata nu ame tudi muthu mumoshi, luko ame nu Tata tudi muthu mumoshi.’—Yone 10:37, 38.

Havuile enya Yuda ngenyi, akambele gukuata Yesu, uvi giphungu egi nji, walengele. Wakatugile gu Yelusalema, wayile gu khanda ya Muta wa Yordani, fundo Yone wasendesele gubatiza athu ivo nguana yabalega gale. Yajiya gukhala egi fundo diene diakhelele hehi nu gu sudi ya Kianga gia Galile.

Athu avula ayile gudi Yesu, azuelele egi: ‘Yone gatshitshilego nga gijiyishilo gimoshi, uvi ndaga jiagasue jia zuelele Yone mukunda nu muthu owu jiakhalele jia giamatshidia.’ (Yone 10:41) Hene, enya Yuda avula ashile gutshina guawo gudi Yesu.