Tangua Yesu wakhalele mudia gumbo dia Mufalese, athu avula akhalele gumunenga hanze. Hakhalele muene nji gu Galile, wataganele nu ndaga ya luholo elu. (Mako 1:33; 2:2; 3:9) Henyaha gu Yudea, athu avula akhalele nu funu ya gumumona nu gumutegelela. Ngenyi yamonesele diago egi athu ene akhalele a gudisha nu Afalese.

Ha gusendesa, Yesu wawambelele alandudi enji egi: ‘Temienenu levire ya Afalese, yene mambo awo.’ Yesu wadiangele guatemesa, uvi ndaga gamonele tangua akhalele mudia gumbo dia Mufalese, yamonesele diago egi longo edi diakhalele nu funu. (Luka 12:1; Mako 8:15) Tangua diko Afalese akhalele musuega khadilo diawo dia khuta ha gumonesa egi ana guvuila athu khenda, uvi akhalele diago athu abola nu yakhalele mutoga egi khadilo diawo dimonesewe haphelo. Yesu wazuelele egi: “Ndaga yagasue idi ya gusuega mbayisologa, ndaga yagasue idi ya mafumbe mbayijiyiwa.”—Luka 12:2.

Yajiya gukhala egi athu avula akhalele mujieta Yesu akhalele enya gu Yudea, anyi akhalele khenji amuvua gale ndo mulongesa gu Galile. Hene, Yesu wavutugile luko malongo a ndando awa galongesele thomo. Wawambelele athu agasue akhalele gumutegelela egi: ‘Muvuigo woma wa athu ana gushiya muila uvi gungima ashigo nu ngolo jia gukalagala gima giko.’ (Luka 12:4) Gifua luholo gayizuelele thomo, Yesu wamonesele alandudi enji funu ya gushila Nzambi mutshima egi mbawaahana ima adi nawo funu. Akhalele nji nu funu ya gusha gutshigina guawo gudi mun’a muthu nu gujiya egi Nzambi wajiya guaakuatesa.—Matayo 10:19, 20, 26-33; 12:31, 32.

Gungima, yala mumoshi wakhalele mukatshi dia athu wamuwambelele egi: ‘Mulongeshi, wambela phangi’ami tukhape nenji gifugo gia tubembele tata.’ (Luka 12:13) Mukhuala wakhalele muzuela egi mona wa somi udi naye guzula mashinda mbadi a gifugo (héritage), ngenyi mbagukhadigo nguma. (Mikhuala 21:17) Uvi idi mumonega egi, yala muene wakhalele mutshigina guzula khapho diakoma gubalega. Hene, Yesu watunyine genji gungina mu ndaga yene nu gutema guagasue. Wamudijigile egi: “Mbayi, nanyi wanguhagi nzuji yenu nga mukhaphi wa gifugo gienu?”—Luka 12:14.

Gungima, Yesu wahanele athu agasue longo egi: ‘Temienu, lengenu nzala ya miho yagasue ya ima, ndaga ya monyo wa muthu ushigo mukunda nu guvula gua ima idi nayo muene.’ (Luka 12:15) Ikhale muthu udi nu umonyi wa luholo lutshi, gula wafua, ima yagasue yana sala. Yesu wahanele gifezegeselo gimoshi mbagikatugago mu mito ya athu. Gifezegeselo giene gidi mumonesa funu ya gukhala nu ufuta wabonga nu Nzambi. Wazuelele egi:

“Muenya umonyi mumoshi wakhalele nu mavu a zolele mbuto jiavula. Hene, wasendesele gutangiza egi, ‘Ngutshita gutshi, handaga ngushigo nu fundo dia gubambela mbuto jiami jiagasue?’ Hangima wazuelele egi: ‘Mbangukalagala ngegi: Mbangumuanga jinzo jiami jia gubambela ima, mbangutunga jiko jiakoma gubalega jia thomo. Mbangubamba mbuto jiami nu ima yami yagasue muene, ngenyi mbangudizuelela egi: “Mutshima, udi nu ima yabonga yavula idi ya gubambewa idi ya tagana mukunda nu ivo yavula; huluguga, dia, nua, enji suanguluga gaye.”’ Uvi Nzambi wamuwambelele egi, ‘Aye muthu waheya, mu phipha eyi diago aye udi mufua. Ima yagasue iwalondele, mbayikhala ya nanyi?’ Idi ngenyi gudi muthu udi muditutshila ima uvi muene gashigo muenya umonyi gu meso a Nzambi.”—Luka 12:16-21, NW.

Alandudi a Yesu nu athu ako akhalele gumutegelela, ajiya nji gubua mu muheto wa gukamba gukhala nu umonyi wavula-vula. Nga ndo malamba a lujingu ajiya guaakanga njila ha gukombelela Yehowa. Hene, Yesu wavutugile luko longo diabonga gahanele mu Diskur dienji holu dia Mulundu,  givo gimoshi nu ndambo giabalega gale. Wazuelele egi:

‘Bembenu gudisagesa mukunda nu mionyo yenu egi mbatudia itshi nga mukunda nu mila yenu egi mbatusudiga itshi. . . . Tadienu ikuanga: Yana gukuna ndo, yana gumunago gima; ishigo nu gibambelo nga mukala; uvi Nzambi wana guyidisa. Enue mushigo nu ndando yavula gubalega tunjila ba? . . . Tadienu luholo yaji yana gukula: Yana gutshitago mudimo, yana gutungago milele; uvi ngudi gumiwambela egi nga muene Solomo diago, mu gutumbuga guenji guagasue, gakhalelego nu milele yabonga gifua giaji gimoshi gia mukatshi dia yaji eyi. . . . Hene, mudisagesago ha gukamba masugu agasue ima mbamudia nu mbamunua hamene, luko bembenu gudisagesa muavula gubalega . . . Sh’enu udi mujiya egi mudi nu funu ya ima eyi. . . . Landulenu gukamba Ufumu wenji, muene mbawumilezela ima eyi.’—Luka 12:22-31; Matayo 6:25-33.

Akuatshi mbaalandula gukamba Ufumu wa Nzambi? Yesu wamonesele egi athu ene ashigo avula, wazuelele egi “thundu yazonda” ya athu a gujinginyina mbaalandula gukamba Ufumu. Gungima, mutango wawo wajiyiwe egi adi guvula 144 000. Itshi idi guanengenena? Yesu waadijigile egi: ‘Sh’enu watshiginyile ha gumihana Ufumu.’ Aklisto ene mbaadihanyigo ha gukamba umonyi wa ha mavu, wajiya gukuyiwa gudi jinzangi. Uvi, mitshima yawo mbayikhala mu ‘umonyi wanago guhua mu dilu,’ fundo mbaahinyina nu Klisto.—Luka 12:32-34.