Yesu wakalegele maluholo avula ha gukuatesa athu ha gutangiza ufuta wawo nu Nzambi. Gungima dia gulongesa athu hanze ya inzo ya Mufalese, wahetele luko okazio wa guzuelela ndaga yene.

Athu ako mukatshi diawo, atele lumene lua ndaga imoshi ya gikenene yabuile. Azuelele ndaga yatadila ‘enya gu Galile ashiyiwe gudi Pilate [Guvernere wa Roma] tangua akhalele ene muhana milambu.’ (Luka 13:1) Itshi atshiginyile guzuela?

Yajiya gukhala egi enya gu Galile akhalele ene muzuelela adi athu ashiyiwe tangua enya Yuda avula atunyile egi Pilate gazangulago mbongo jia mu kesi ya tempelo ha gutunga njila ya gubata meya mu Yelusalema. Yajiya gukhala egi Pilate wadivuile nu mafumu a gu tempelo ha guzangula makuta ene. Athu akhalele mutela Yesu lumene elu akhalele mutangiza egi ndaga eyi yabuidile enya gu Galile handaga akhalele mutshita ndaga jiabola. Uvi Yesu gatshiginyilego matangi awo.

Waahudile egi: ‘Mudi mutangiza egi enya gu Galile anyi abalegele enya gu Galile ako agasue gubola handaga amonele lamba ngenyi ba?’ Mvutu yenji yakhalele egi ndo. Uvi ndaga eyi ya mukuatesele ha gutemesa enya Yuda egi: ‘Gula mushigo mubalumuna mitshima yenu, mukuta wenu agasue mbamufua gifua muafuile ene.’ (Luka 13:2, 3) Gungima, Yesu wazuelele ndaga iko yalamba yabuile mu masugu anyi. Yajiya gukhala egi ndaga yene yakhalele mutadila njila ya meya yakhalele mutungiwa. Hene, wahudile egi:

‘Athu 18 afuile habuile inzo yaleha ya gu Siloe—mudi mutangiza egi gubola guawo guabalegele gua athu ako agasue akhalele mujinga mu Yelusalema ba?’ (Luka 13:4) Athu akhalele gumutela lumene atangijile egi athu anyi afuile handaga akhalele mutshita ndaga jiabola. Yesu gatshiginyilego luko matangi awo. Muene wakhalele mujiya egi ‘tangua nu ndaga athu anago gutangiza’ jiana gubuila athu, enji jidi nji ha gishina gia ndaga yene ya gikenene. (Mulongeshi 9:11) Uvi, athu akhalele naye guzula longo mu ndaga ya gikenene inyi yabuile. Yesu wazuelele egi: ‘Gula mushigo mubalumuna mitshima yenu, mukutenu agasue mbamufua gifua muafuile ene.’ (Luka 13:5) Uvi mukunda natshi wahanele luko longo diene mu tangua dinyi?

Watshitshile ngenyi handaga mudimo wenji wa gulongesa wakhalele muya gu gisugishilo. Wahanele gifezegeselo egi: “Muthu mumoshi wakhalele nu mutshi wa figi wakunyile muene mu dihia dienji dia vinu, wayile mukamba mabundu gu mutshi wene uvi gasangelego nga bundu dimoshi. Wawambelele muthu wana gutshita mudimo mu dihia dia vinu egi, ‘Tala ivo eyi itatu, ngana guza mukamba mabundu gu mutshi owu wa figi uvi nganago gusanga nga dimoshi. Ubatule! Mukunda natshi udi muzangelela mavu?’ Muthu wana gutshita mudimo mu dihia dia vinu wamudijigile gamba, ‘Fumu, ubembe nji givo egi uu nu tangua mbanguphunda mu khulo yenji nu mbanguwumbila tuji tua shitu nu mayiji afukha. Gula wahaga mabundu mu masugu adi muza, idi ndaga yabonga; uvi gula wahagelego mabundu, mbawuwubatule.’”—Luka 13:6-9, NW.

Ivo thathu ya balega gale sendese Yesu gadi mukuna gutshigina mu mitshima ya enya Yuda. Uvi, mudimo wenji wabutshilego mabundu avula, athu azonda phamba abuile alandudi enji. Henyaha mu givo gia nguana gia mudimo wenji wa gulongesa, watshitshile diago ngolo jiavula. Hakhalele mulongesa muene gu Yudea nu gu Perea, yakhalele gifua wakhalele muphunda mu khulo ya mutshi wa figi nu guwumbila tuji tua shitu nu mayiji afukha. Mutshi wene wa figi wakhalele mukotelesa enya gu Yudea nu Perea. Itshi ya kalegewe? Enya Yuda azonda phamba atumagele malongo a Yesu. Gifutshi gia mudidi gia enya Yuda giatunyile gubalumuna mutshima, ngenyi gufua guakhalele guanengena.

 Khadilo diawo dia gutuna gusha gutshigina diamonegele luko haphelo mu Lusugu lua Guhuluguga. Yesu wakhalele mulongesa mu sinagoga imoshi. Wamonele mukhetu mumoshi wakhalele wa gudifugula handaga demo diakhalele gumusagesa ivo 18. Yesu wamuvuidile khenda, wamuwambelele egi: ‘Mukhetu, wajituluga gu ukhashi waye.’ (Luka 13:12) Yesu wahagele mago holu dienji, mukhetu muene wamaganele wa gusunuguga, wasendesele gutumbuisa Nzambi.

Ndaga yene yahanele fumu wa sinagoga khabu, wazuelele egi: ‘Masugu a gutshita mudimo adi asamano; hene jienu musagewe mu masugu ene, uvi mujigo ndo mu Lusugu lua Guhuluguga.’ (Luka 13:14) Fumu wa sinagoga gakhalelego musha giphapha egi Yesu gashigo nu ngolo jia gusaga. Wakhalele muwamba athu luholo akhalele muza hagula asagewe mu Lusugu lua Guhuluguga. Yesu wamuvutudile egi: ‘Mudi enya mambo, muthu mutshi mukatshi dienu wanago gujitulula ngombe yenji nga phunda yenji mu gidilo giayo ha guya nayo guyinuisa meya mu Lusugu lua Guhuluguga? Mukhetu owu udi mujigulu wa Abalahama, enji Satana wa mujitshigile gale ivo 18 yabalega, ishigo ndaga yabonga egi ajituluwe ngonji eji mu Lusugu lua Guhuluguga ba?’—Luka 13:15, 16.

Mbalagaji jiavuile diago musonyi, uvi athu akhalele mutegelela Yesu asuangulugile muavula mukunda nu ndaga jia gushimana jiakhalele mutshita muene. Gungima, Yesu wavutugile luko ifezegeselo mbadi yakhalele muzuelela profesi jiatadila Ufumu. Ifezegeselo yene wayihanele thomo mu masugu abalega tangua gakhalele mulongesa mu wato gu Kianga gia Galile.—Matayo 13:31-33; Luka 13:18-21.