Dimbo dia Betaniya diakhalele gu khanda ya esti ya Mulundu wa Olive. Gula muthu wakatuga gu Yelusalema ha guya gu Betaniya, wakhalele naye guwenda bakilometre thathu. (Yone 11:18) Yesu wakhalele muya gu dimbo diene, gumbo dia Mata nu Mariya. Ene nu phangi’awo Lazalo akhalele mafut’a Yesu. Akhalele muyamba Yesu muabonga diago.

Gula muthu wayamba Masiya gumbo dienji, yakhalele ndaga yabonga diago. Mata wakhalele mutshigina guyamba Yesu muabonga, hene wadilondele ha gutelega ima yabonga ya gudia. Hakhalele Mata mutelega ima, phangi’enji Mariya wayile mukhala gu malu a Yesu ha gumutegelela. Gungima, Mata wawambelele Yesu egi: ‘Fumu, aye ushigo mumona egi phangi’ami wangubemba hakh’ami ha gutshita midimo yagasue? Muwambele aze angukuatese.’—Luka 10:40.

Ha fundo dia guwamba Mariya, Yesu wahanele Mata malongo luholo gakhalele gudisagesa muavula gubalega mukunda nu ima ya gudia. Wazuelele egi: ‘Mata, Mata, udi musubala nu gudisagesa mukunda nu ndaga jiavula. Uvi ima yazonda nga gimoshi phamba gidi nu funu. Mariya watombi shinda diabonga, mbadimutambuiwago.’ (Luka 10:41, 42) Yadiago, Yesu wamonesele egi ishigo nu funu ha gubalegesa matangua avula ha gutelega ima yavula ya gudia. Ima ya gudia ikhale idi yazonda, idi yatagana.

Matangi a Mata akhalele abonga. Wakhalele nu funu ya gumonesa khadilo dia guyamba athu. Uvi luholo gakhalele gudisagesa muavula mukunda ima ya gudia, guamufudishile malongo a ndando akhalele mulongesa mun’a Nzambi! Yesu wamonesele egi Mariya wazudile desizio diabonga, dinyi diamubatele gubonga gua mayilago. Mukuta wetu agasue tuajiya guzangula malongo mu desizio diazudile Mariya.

Lusugu lumoshi, Yesu wazuelele ndaga iko ya gudisha uvi yakhalele nu malongo a ndando. Mulandudi wenji mumoshi wamutogele egi: ‘Fumu, tulongese luholo lua gukombelela, gifua luholo Yone galongesele alandudi enji.’ (Luka 11:1) Mu diskur dienji holu dia Mulundu, Yesu walongesele ndaga jiavula jiatadila gisambu, givo gimoshi nu ndambu gia balega gale. (Matayo 6:9-13) Uvi, yajiya gukhala egi mu tangua diene, mulandudi yowu gakhalelego hene. Hene, Yesu wavutugile luko malongo a ndando atadila gisambu gazuelele mu diskur diene. Wahanele gifezegeselo ha gumonesa funu ya gufubidila mu gisambu.

Wazuelele egi: “Nanyi mukatshi dienu udi nu futa dienji, gula waya gudi muene mukatshi dia phipha wazuela gamba, ‘Futa diami, ngusombe mapha thatu handaga futa diami muko waza luenyelu mu njila, ngushigo nu gima gia gumuhana.’ Uvi muene wamuvutudila mukatshi dia inzo egi: ‘Bemba gungusagesa. Gijidigo gidi gia gujidiga, an’ami azonda nu ame tudi yagubanda ha gitanda. Ngajiyilego guzuga ha guguhua gima.’ Ngudi gumiwambela egi gula gajiyilego guzuga tshima ha gumuhua gima handaga udi futa dienji, yadiago mukunda nu gufubidila guenji, mbawuzuga ha gumuhua gima giagasue gidi muene nagio funu.”—Luka 11:5-8, NW.

Yesu gazuelelego egi Yehowa gashigo nu tangua dia guhana mvutu gu gutoga guetu, gifua luholo lua tshitshile futa munu. Uvi wamonesele egi gula futa munu gakhalelego nu tangua, wahanele mvutu gudi futa dienji wakhalele mufubidila, idi mumonesa diago egi Tata wetu wa mu dilu mbawuhana mvutu gu isambu ya giamatshidia ya akombeledi enji a gujinginyina! Yesu walanduile guzuela egi: “Ngudi gumiwambela egi, landulenu gutoga, mbaamihana; landulenu gukamba, mbamumona; landulenu gubunda, mbaamizuluila gijidigo. Ndaga ya muthu wagasue wana gutoga, ana gumuhua, muthu wagasue wana gukamba, wana guheta, muthu wagasue wana gubunda, ana gumuzuluila.”—Luka 11:9, 10, NW.

Gungima, ha gumonesa diago matangi enji muabonga, Yesu wazuelele egi Yehowa udi gifua atata. Wazuelele egi: ‘Tata mutshi mukatshi dienu, gula mun’enji wa mutoga ishui, muene gamuhui nyoga? Nga ndo gula mun’enji wa mutoga diyi, muene gamuhui gaminyiminyi? Hene, gula enue athu abola, muajiya guhana an’enu ima yabonga, tata udi mu dilu mbawubalega guhua athu adi gumulomba nyuma yabonga.’ (Luka 11:11-13) Idi gututshiginyisa diago egi tata wetu wana gutshigina gututegelela nu gutuhana ima tudi nayo funu!