Yesu udi mulandula gulongesa mu Yudea. Mu tangua diene, wazuelele ndaga yakhalele mujiyiwa muabonga gudi athu akhalele gumutegelela: imeme nu madinda. Uvi wakhalele muzuela ndaga jiene mu ifezegeselo. Enya Yuda awungulugile mbimbi jia zuelele Davidi egi: ‘Yehowa udi Mubambi wami. Mbangukambigo nga gima ndo. Muene udi mungubandesa mu muangu ula lembe-lembe.’ (Ngimbo 23:1, 2) Mu lungimbo luko, Davidi wawambelele enya Isalele egi: ‘Tufugamienu gu phala ya Yehowa, Mufugi wetu. Handaga muene udi Nzambi wetu, esue tudi athu a mu muangu wenji wa gudisa shitu.’ (Ngimbo 95:6, 7) Yadiago, enya Isalele anyi akhalele munemesa Mukhuala wa Moise akhalele gifua hunji dia imeme.

Enya Isalele anyi akhalele gifua “imeme,” akhalele mu “madinda” luholo akhalele muvalewa mu tangua dia gikotelo gia Mukhuala wa Moise. Mukhuala wa Moise wakhalele gifua luphango, handaga wakhalele guakhaphumuna nu makalegelo abola a athu akhalelego mukatshi dia gikotelo giene. Uvi enya Isalele ako amonesele imeme ya Nzambi lamba. Yesu wazuelele egi: ‘Ngudi gumiwambela giamatshidia egi, muthu gashigo mungina gu mufulo wa dinda dia imeme uvi udi munginyina khanda iko, muene udi nzangi nu munyongi. Uvi muthu udi munginyina gu mufulo, udi mubambi wa imeme.’—Yone 10:1, 2.

Havuile athu ndaga eyi, atangijile athu anyi akhalele guditamega egi adi Masiya nga Klisto. Athu ene akhalele diago gifua nzangi nu anyongi. Athu akhalelego naye gulandula enya mambo anyi. Uvi, akhalele naye gulandula “mubambi wa imeme,” wago Yesu wazuelele egi:

‘Mubambi wa mufulo udi gumuzuluila. Imeme idi muvua dijui dienji, muene udi mutamega imeme yenji mu majina ayo, udi muyituameza hanze. Hayizola muene yagasue, udi muya gutuama diayo, yene idi gumulandula handaga idi mujiya dijui dienji. Uvi yene mbayilandulago muenyi nga hazonda, uvi mbayimulenga handaga ishigo mujiya dijui dia enyi.’—Yone 10:3-5.

Mu masugu a balega, Yone Mubatiji wakhalele gifua mubambi wa mufulo, wamonesele egi Yesu udi muthu imeme ya gifuanesa yakhalele mu gikotelo gia Mukhuala wa Moise yakhalele naye gulandula. Hene, imeme iko gu Galile nu gu Yudea, yajiyile dijui dia Yesu. Uvi, muene ‘mbawuyituameza’ fundo ditshi? Luko, gubonga gutshi mbayiheta gula yamulandula? Yajiya gukhala egi athu akhalele mutegelela gifezegeselo egi adihudile, handaga ‘akhalelego mukotelesa ndaga gakhalele guaawambela.’—Yone 10:6.

Yesu wazuelele gamba: ‘Ngudi gumiwambela giamatshidia egi, ame ngudi mufulo wa dinda dia imeme. Athu agasue adiangele gutuama diami, adi nzangi nu anyongi; uvi imeme yaavuidilego. Ame ngudi mufulo. Muthu wagasue wanginyina gudi ame, mbawuhuluishiwa; muene mbawukhala mungina, muzoga, nu muheta muangu wa sawu-sawu.’—Yone 10:7-9.

Yadiago, Yesu wakhalele mulongesa ndaga ihe-ihe. Athu akhalele gumutegelela akhalele mujiya egi Yesu gashigo mufulo wa gikotelo gia Mukhuala wa Moise, giakhalele gia kotewe gale ivo midimbila khusu. Hene, Yesu wakhalele naye guzuelela dinda diko diakhalele naye gungina imeme gakhalele ‘mutuameza hanze.’ Gubonga gutshi yahetele?

Gungima, Yesu wamonesele ginemo gakhalele nagio, wazuelele egi: ‘Ame ngajile hagula athu ahete monyo, awuhete wavula diago. Ame ngudi mubambi wabonga. Mubambi wabonga udi mufuila imeme yenji.’ (Yone 10:10, 11) Mu masugu abalega, Yesu wahanele alandudi enji gikhesa egi: ‘Mukhadigo nu woma, enue thundu yazonda, handaga Sh’enu watshiginyile ha gumihana Ufumu.’ (Luka 12:32) Yadiago, athu adi mukatshi dia “thundu yazonda,” adi athu Yesu mbawutuameza mu dinda dihe-dihe hagula ‘ahete monyo, nu awuhete wavula diago.’ Idi diago ndaga yabonga ha gukhala mukatshi dia athu awa!

Uvi, Yesu gasugishile ndo maga enji hanyinyi. Wazuelele luko egi: ‘Ngudi nu imeme iko idi ishigo ya  mu dinda edi. Ngudi naye guyinginyisa nji mu dinda, yene mbayivua dijui diami, ngenyi mbayibua thundu imoshi, nu mubambi mumoshi.’ (Yone 10:16) “Imeme iko” ‘ishigo ya mu dinda edi.’ Hene, idi naye gukhala ya dinda diko didi dia gudisha nu “thundu ya zonda” inyi mbayizangula Ufumu. Thundu eji mbadi jia imeme jidi nu mafelela agudisha. Uvi, imeme yene ya madinda agasue mbadi mbayiheta gubonga mu ginemo gidi nagio Yesu. Yesu wazuelele egi: ‘Tata wanguzumba handaga ngudi muhana monyo wami.’—Yone 10:17.

Athu avula akhalele mukatshi dia enya Yuda azuelele egi: ‘Muene udi nu demo, udi muenya malui.’ Uvi ako amonesele egi akhalele gumutegelela nu mutshima wagasue, nu akhalele agudilonda ha gulandula Mubambi Wabonga. Hene azuelele egi: ‘Eji jishigo mbimbi jia muthu udi nu demo. Demo diajiyilego gukangula gifofo meso, ishigo ngenyi ba?’ (Yone 10:20, 21) Akhalele muzuelela ndaga ya kalegele Yesu tangua gasagele yala mumoshi wavualewe gifofo.