Yesu wamonesele egi phamba “thundu yazonda” ya athu mbayiheta fundo mu Ufumu wa mu dilu. (Luka 12:32) Uvi, guheta gishimbigo egi giabonga gushigo ndaga ya gukena nayo. Wamonesele egi gula muthu watshigina gukhala mu Ufumu wa mu dilu, udi naye gukhala nu khadilo diabonga.

Wawambelele alandudi enji ha gukhala agudilondega mukunda nu guvutuga guenji. Wazuelele egi: ‘Khalenu a gudilondega, miya yenu ha kete, mienda yenu mulema. Khalenu gifua athu adi munenga guza gua fumi’awo wayile gu wano wa ulo, hagula tangua mbadiza muene nu mbadibunda muene gu gijidigo, ene amukangudila giphungu gimoshi. Gusuanguluga gudi nu enya mudimo mbaasangewa adi mukengelela tangua fumi’awo mbaavutuga!’—Luka 12:35-37.

Alandudi akotelesele muabonga khadilo diakhalele muzuelela Yesu mu gifezegeselo gienji. Athu akhalele muzuelela muene akhalele a gudilonda ha gunengena guvutuga gua fumi’awo. Yesu wazuelele luko egi: ‘Gusuanguluga gudi nu alandudi gula [fumu] waza mu sungi ya mbadi ya gukengelela [sendese mu tangua dia divua dia phipha uu nu mu midi ya phipha], ikhale mu sungi ya thathu ya gukengelela [sendese mu midi ya phipha uu nu mu tangua thathu dia gimegena], enji waasanga adi a gudilondega gale!’—Luka 12:38.

Longo diene diasugile ndo phamba ha gukhala enya mudimo a gikhesa. Yamonegele diago haphelo tangua Yesu, mun’a Nzambi wadinginyishile mu gifezegeselo giene. Wawambelele alandudi enji egi: ‘Enue nji, khalenu a gudilondega, handaga mun’a muthu mbawuza mu tangua mushigo mutangiza.’ (Luka 12:40) Yamonesele diago egi Yesu mbawuza mu sungi imoshi ngenyi ishigo mujiyiwa. Wakhalele mutshigina egi alandudi enji—muavula anyi akhalele mukatshi dia “thundu yazonda”—akhale a gudilondega.

Phetelo wakhalele mutshigina gukotelesa diago ndaga jia zuelele Yesu, hene wahudile egi: ‘Fumu, udi muhana gifezegeselo egi mukunda nu esue hakhetu nga mukunda nu athu agasue?’ Hafundo dia guhana Phetelo mvutu, Yesu wahanele gifezegeselo gia luholo lumoshi. Wazuelele egi: ‘Nanyi diago udi muenya mudimo wa gujinginyina nu watema mbawuhagewa gudi fumi’enji holu dia enya mudimo wenji agasue, ha gulandula guaahana ima ya gudia adi nayo funu mu tangua diabonga? Gusuanguluga gukhale nu muhiga muene gula fumi’enji waza wamusanga udi mutshita ngenyi! Giamatshidia ngudi gumiwambela egi muene mbawumuhaga holu dia ima yenji yagasue.’—Luka 12:41-44.

Mu gifezegeselo gia thomo, “fumu” adi muzuelela udi Yesu, mun’a muthu. Yadiago, ‘muenya mudimo wa gujinginyina’ udi mala ako adi mukatshi dia “thundu yazonda” ya athu. Luko, Nzambi mbawahana Ufumu. (Luka 12:32) Yesu udi muzuela egi Aklisto ako mukatshi dia thundu yazonda mbaakhala muhana ‘enya mudimo wenji agasue’ ‘ima ya gudia adi nayo funu mu tangua diabonga.’ Hene, Phetelo nu alandudi ako awa Yesu wakhalele mulongesa nu gudisa mu nyuma, akotelesele egi gudi nu sungi imoshi ngenyi Mun’a muthu mbawuza mu masugu adi muza. Mu sungi yene, mbagukhala nu ulondegi umoshi mbawukalegewa ha gudisa alandudi a Yesu mu nyuma, ya kotelesa egi ‘enya mudimo agasue’ a Fumu.

Yesu wamonesele luko gishina alandudi enji akhalele naye gukhala atema nu gutadila muabonga khadilo diawo. Handaga ako ajiya gusendesa gutuna gutumaga nu gubuisa aphangi’awo a mala nu a akhetu gifua mbalagaji jiawo. Wazuelele egi: “Uvi gula muhiga muene udi muzuela moshi’a mutshima wenji egi, ‘Fumi’ami udi mushipha ha guza,’ nu wasendesa gubeta enya mudimo nu ako, mala nu akhetu, wasendesa gudia nu gunua nu gukuatewa matombe, fumi’a muhiga muene mbawuza lusugu ludi muene gashigo mutangiza, nu ha kumbi didi muene gashigo mujiya. Mbawumuhana ndola yakola, nu mbawumuhaga gu khanda ya enya midimo ashaga.”—Luka 12:45, 46, NW.

Yesu wazuelele egi wajile ha ‘gulemesa tshiuya ha mavu.’ Walemesele tshiuya luholo gazuelele ndaga  jiazolele ukhaphumunyi wakola nu jia kalegele egi shigu nu malongo a mambo azoge haphelo. Luko ndaga jiene jia khaphumuine athu akhalele thomo mujinga hamoshi. Wazuelele egi: ‘Tata mbawukhala umbalagaji nu mun’enji wa yala, mon’a yala nu sh’enji, mama mbawukhala umbalagaji nu mun’enji wa mukhetu, mon’a mukhetu nu gin’enji, givuaji gia mukhetu mbagikhala umbalagaji nu mukaji’a mun’enji wa yala, mukaji’a mun’enji wa yala mbawukhala umbalagaji nu gin’a mulumi’enji.’—Luka 12:49, 53.

Ndaga eji jiakhalele mutadila diago alandudi enji. Gungima Yesu wabalumugile gudi athu avula akhalele gumutegelela. Avula mukatshi diawo atunyile diago nu mutshima umoshi egi Yesu gashigo Masiya. Hene, wawambelele egi: “Tangua muana gumona tuta didi mukanduga gu westi, muana guzuela mu phushi egi, ‘Mvula ya gikudi idi muza,’ enji yana gukalegewa ngenyi. Luko tangua muana gumona funji ya gu sudi idi mubunda, muana guzuela egi, ‘Muanya udi mukhala wabala,’ enji yana gukalegewa ngenyi. Enya mambo, enue muana gujiya gutala muabonga luholo mavu nu dilu ana gumonega, uvi mukunda natshi mushigo mujiya gutala muabonga sungi eyi ya tangua?” (Luka 12:54-56, NW) Athu awa akhalelego diago a gudilondega.