Mu lusugu lua sambadi lua gisugishilo gia wano wa Isasa, Yesu walongesele mu tempelo ha fundo diakhalele mutamegewa egi “gibambelo gia mbongo.” (Yone 8:20; Luka 21:1) Idi mumonega egi, fundo diene athu akhalele muya mumba misomonyi yawo diakhalele mu luphango lua akhetu.

Mu phipha, mu sungi ya wano, fundo edi dia tempelo diakhalele muhana kiajiji. Akhalele muhaga ihagelo nguana yakoma ya mienda ha fundo diene. Gihagelo giagasue gia mienda giakhalele nu longa diaguzala pha nu maji a olive. Kiajiji gia mienda yene giakhalele giavula handaga giakhalele mutshiesa gitshinyi giakoma diago. Hene, yajiya gukhala egi ndaga yazuelele Yesu yakuatesele athu akhalele gumutegela ha guwunguluga kiajiji gia mienda yene. Wazuelele egi: ‘Ngudi muanya wa ha mavu. Muthu wagasue wangulandula, mbagawendjigo mu phipha nga hazonda, uvi mbawukhala nu muanya wa monyo.’—Yone 8:12.

Afalese atunyile ndaga yazuelele Yesu. Azuelele gamba: “Aye udi gudisamba, gudisamba guaye gushigo gua giamatshidia.” Yesu waawambelele egi: ‘Ngatshima ngudi musamba hakhami, gudisamba guami gudi gua giamatshidia handaga ngudi mujiya fundo ngajile nu fundo mbanguya. Uvi enue mushigo mujiya fundo ngajile nu fundo mbanguya.’ Yesu wazuelele luko egi: “Mu mikhuala yenu idi ya gufundjiwa gamba: ‘Ulondolodi wa athu muyadi udi nu ndando ya giamashidia.’ Ame ngudi mudisamba, luko, Tata wago wangutumine udi mungusamba nji.”—Yone 8:13-18.

Afalese atunyile ndaga yazuelele Yesu, amuhudile egi: “Sh’aye udi gui?” Yesu waabalumuine haphelo egi: ‘Enue mushigo mungujiya ame, mushigo nji mujiya Tata. Gula nga muangujijyile, nga muajiyile nji Tata wami.’ (Yone 8:19) Afalese akhalele mutshigina khuta egi Yesu akuatewe, uvi nga muthu mumoshi gamukuatelego.

Yesu wazuelele luko ndaga yadiangele muene guzuela egi: ‘Ngudi muya gami, mbamungukamba,  uvi enue mbamufua mu gubola guenu. Muajiyilego guheta ha fundo ngudi muya.’ Enya Yuda akoteleselego diago nga hazonda mbimbi jia Yesu, asendesele gudihula egi: “Muene mbawudishiya ba? Handaga udi muzuela egi ‘muajiyilego guheta ha fundo ngudi muya.’” Akhalelego mukotelesa ndaga Yesu wakhalele muzuela, handaga akhalelego mujiya fundo diakatugile muene. Waawambelele egi: “Enue mudi a hashi a ha mavu; uvi Ame ngajile gosa mu dilu. Enue mudi a ha mavu awa, uvi ame ngushigo wa ha mavu awa ndo.”—Yone 8:21-23.

Yesu wakhalele muzuelela lujingu luenji gakhalele nalo mu dilu gutuama egi aze ha mavu, luko, muene udi Masiya nga Klisto walayewe wago mafumu a mangumba akhalele munengena. Uvi, ene amuhudile nu gusegulula guagasue egi: “Aye udi nanyi?”—Yone 8:25.

Luholo akhalele mutuna ndaga jiakhalele Yesu muzuela, waawambelele egi: ‘Tshimana, mukunda natshi ngudi gumiwambela?’ Uvi, wambile matangi enji gudi sh’enji, nu wamonesele mukunda natshi enya Yuda adi naye gutegelela Mun’a Nzambi. Wazuelele egi: ‘Muthu wangutumine udi wa giamatshidia, nu ngudi muwambela a ha mavu khuta ndaga ngavuile gudi muene.’—Yone 8:25, 26.

Gungima, Yesu wamonesele egi wana gushila Sh’enji mutshima, ikhale enya Yuda akhalelego gumushila mutshima. Wazuelele egi: ‘Tangua mbamuzugisa Mun’a muthu, mbamujiya giwa egi ame muene; luko ngushigo muditshitshila ndaga mu ngolo jiami; uvi ngudi muzuela gifua muangulongesele Tata. Muthu wangutumine udi nu ame; gangubembelego hakhami handaga ngana gutshita idi gumusuanguluisa muene.’—Yone 8:28, 29.

Uvi enya Yuda ako amonesele gutshigina guawo gudi Yesu, hene wawambelele egi: ‘Gula muatumagela muabonga mbimbi jiami, mudi diago alandudi ami. Ngenyi, mbamujiya giamatshidia, enji giamatshidia mbagimikula mu uhiga.’—Yone 8:31, 32.

Enya Yuda ako amonele egi guzuela gua Yesu egi giamatshidia mbagiaakula mu uhiga yajiyilego gukalegewa. Hene, amuwambelele egi: “Esue tudi ajigulu a Abalahama, khenji tuakhalelego ahiga a muthu. Luholo lutshi udi muzuela egi, ‘Mbamukudiwa mu uhiga’?” Enya Yuda akhalele mujiya egi mu tangua dimoshi ngenyi, akhalele ahiga a ifutshi iko, uvi atunyile egi atamegewe egi ahiga. Uvi Yesu waamonesele egi uu nu tangua dinyinyi, akhalele ahiga. Waadijigile egi: “Ngudi gumiwambela giamatshidia egi, muthu wagasue udi mutshita gubola udi muhiga wa gubola.”—Yone 8:33, 34.

Tangua enya Yuda atunyile egi ashigo ahiga a gubola, adimbile mu gingonza diago. Yesu wawambelele egi: ‘Muhiga ganakhalago monzo ya fumi’enji ivo nu ivo, mona wanakhala muene ivo nu ivo.’ (Yone 8:35) Muhiga gajiyilego guzangula shinda dia ima ya fumi’enji nga hazonda, luko ajiya gumukaya tangua diagasue atshigina. Phamba mona wa givuadiwa nga wa gusasa wajiya gusala mu fami yawo “ivo nu ivo,” yakotelesa egi lujingu luenji luagasue.

Hene, giamatshidia giatadila Mona giene giamatshidia giana gukatula athu mu uhiga wa gubola guana gubata gu gufua. Yesu wazuelele egi: “Gula mona wamikula mu uhiga, mbamukhala diago adikhaledi.”—Yone 8:36.