Mu mukhapho wa balega, tuamonyi gamba Yesu wavutugile luko malongo atadila gisambu. Uvi yakhalelego phamba gisambu gakhalele muvutugila mu mudimo wenji wa gulongesa. Tangua gatshitshile ndaga jia gushimana gu Galile, athu amuwambelele egi wakhalele gujitshita mu ngolo jia fumu wa bademo. Henyaha, enya gu Yudea nji, asendesele luko gumuwambele ngenyi.

Yala mumoshi wakhalele nu demo diamubuishile mbobo. Tangua Yesu wamuzolele demo diene, athu akhalele hene adihudile muavula. Uvi mbalagaji jienji jia dihudilego. Amufundile luko egi: ‘Muene udi muzola bademo nu ngolo jia Belezebula, fumu wa mademo.’ (Luka 11:15) Athu ako akhalele mukamba gujiya gula Yesu udi diago nanyi, hene amutogele ha guaahana gijiyishilo gia mu dilu.

Hajiyile muene egi akhalele gumulola, waahanele mvutu gifua luholo gahanele athu anyi a gu Galile. Wazuelele egi ufumu wagasue udi gudiluisa wene hakhawo, mbawufua. Wazuelele luko egi: ‘Gula Satana udi gudiluisa muene hakhenji, luholo lutshi ufumu wenji wajiya guya gu matuamena?’ Gungima, Yesu wawambelele egi: ‘Gula ngudi muzola bademo nu muno wa Nzambi, na Ufumu wa Nzambi waji gale diago gudi enue.’—Luka 11:18-20.

‘Muno wa Nzambi’ wakhalele muzuelela Yesu, wawunguluishile athu akhalele gumutegelela ndaga jiabuidile enya Isalele mu ginono. Athu akhalele mu inzo ya Pharaon, amonele ndaga ya gushimana ya kalegele Moise. Azuelele egi: “Owu muno wa Nzambi!” Luko, “muno wa Nzambi” wasonegele Mikhuala Kumi holu dia ibala ya seso. (Guzoga 8:19; 31:18) Luholo lumoshi, “muno wa Nzambi” (nyuma yenji yabonga, nga ngolo jienji) wene wakhalele mukuatesa Yesu ha guzola bademo nu gusaga athu akhalele nu misongo. Hene, Ufumu wa Nzambi wajile diago gudi mbalagaji jia Yesu handaga Yesu, Fumu wa Ufumu wene, watombewe gudi Nzambi, wakhalele mukatshi diawo nu gukalagala ndaga jia gushimana.

Ngolo jia Yesu jia guzola bademo jiakhalele diago mumonesa egi muene wakhalele nu ngolo gubalega Satana. Idi gifua yala mumoshi wa muenya ngolo, wasuena hehi nu suta dimoshi didi nu uta nu didi mutalela inzo ya fumu mumoshi; uvi yala muene wa muenya ngolo watambula suta diene uta. Yesu wavutugile luko gifezegeselo gia nyuma yabola yazogele mukatshi dia muthu mumoshi. Gula muthu muene gazaleselego ndaga jiabonga ha fundo diene, nyuma yabola mbayivutuga nu nyuma jiko jiabola sambadi; ngenyi, mbajibolesa diago muthu muene gubalega luholo gakhalele thomo. (Matayo 12:22, 25-29, 43-45) Ndaga yene yabuidile gifutshi gia enya Isalele.

Mukhetu mumoshi wakhalele mutegelela ndaga jiakhalele muzuela Yesu, wazuelele egi: ‘Mukhetu wa gumitshile, nu mele a guwamuesele, akhale nu gusuanguluga!’ Akhetu agasue a enya Yuda akhalele nu felela dia gukhala gin’a profete nga Masiya. Hene, yajiya gukhala egi mukhetu muene watangijile egi Mariya wakhalele naye gusuanguluga luholo gavualele mulongeshi wa luholo elu. Uvi Yesu wavutudile mukhetu muene mu njila, ha gumonesa ndaga yana guhana gusuanguluga gua giamatshidia. Wazuelele egi: ‘Ndo, gusuanguluga gudi nu athu adi muvua mbimbi ya Nzambi nu adi guyitumagela!’ (Luka 11:27, 28) Yesu gamoneselego nga hazonda egi athu adi naye guhana Mariya lutumbu lua luholo lumoshi ngenyi. Yala nga mukhetu wana guheta gusuanguluga gua giamatshidia gula udi mukombelela Nzambi nu gujinginyina guagasue. Tuajiyilego guheta gusuanguluga gua giamatshidia handaga tudi aphangi’a muthu mumoshi ngenyi, nga ndo mukunda nu gima gimoshi ngenyi.

Gifua luholo gatshitshile gu Galile, Yesu wawambele enya gu Yudea luholo amutogele ha guaahana gijiyishilo gia mu dilu. Wazuelele egi gijiyishilo nga gimoshi mbagiaahanewago phamba ‘gijiyishilo gia Yona.’ Yona wakhalele gifua gijiyishilo luholo gakalegele masugu thathu mu vumo dia ishui, nu luholo galongesele lukuma luabonga nu gikhesa giagasue gu Ninive. Gulongesa guenji guatumine enya Ninive ha gubalumuna mitshima yawo. Yesu wazuelele egi: ‘Uvi tadienu, muthu udi wabalega Yona gukoma udi haha!’ (Luka 11:29-32) Yesu wakhalele luko wakoma gubalega Solomo, wago fumu wa mukhetu wa gu Sheba wayile mutegelela ndunge jienji.

Yesu wazuelele luko egi: ‘Gushigo nu muthu wana guhaga muenda tshiuya ha guwuhaga fundo dia gusuega nga moshi’a kinda; uvi wana guwuhaga ha gihagelo gia  muenda.’ (Luka 11:33) Yajiya gukhala watshiginyile guzuela egi, gulongesa nu gukalagala ndaga jia gushimana ha meso a athu anyi, yakhalele gifua muthu udi musuega tshiuya tua muenda. Handaga meso awo akhalelego abonga, ene akhalelego mujiya funu ya ndaga jia Yesu jia gushimana.

Yesu wazolele demo diabuishile yala mumoshi mbobo, gungima yala muene wasendesele guzuela. Ndaga yene yatumine athu ha gutumbuisa Nzambi nu ha guwambela athu ako ndaga jiakhalele mutshita Yehowa. Hene, Yesu wawambelele mbalagaji jienji egi: ‘Ngenyi temienu, hagula muanya udi mu mitshima yenu ubuigo phipha. Hene, gula muila waye wamudidi udi wa guphelegetesewa nu muanya, gushigo musala nu hama hako habuita, na mbawuphelegeta diago gifua muenda udi mulema nu tshuya tuenji.’—Luka 11:35, 36.