Yesu wakhalele gu Yelusalema mukunda nu wano wa Isasa; mu tangua diene, walanduile gulongesa malongo a ndando diago. Enya Yuda akhalele gu wano wene, amuwambelele egi: ‘Esue tudi ana a Abalahama, khenji tuakhalelego ahiga a muthu.’ Yesu waawambelele egi: ‘Ngajiya egi mudi ana a Abalahama. Uvi mudi mukamba gungushiya, handaga mbimbi yami ishigo mukula mukatshi dienu. Ame ngudi muzuela ingamonele gudi Tata, uvi enue mudi mutshita imuavuile gudi sh’enu.’—Yone 8:33, 37, 38.

Yesu wamonesele matangi’enji haphelo: Sh’enji udi wa gudisha nu sh’awo. Enya Yuda akoteleselego ndaga jia zuelele Yesu, hene azuelele luko egi: “Sh’etu udi Abalahama.” (Yone 8:39; Yeshaya 41:8) Mu guzuela guabonga, akhalele diago ajigulu a Abalahama. Hene, akhalele mutangiza egi gutshigina guawo guakhalele gifua gua Abalahama, futa dia Nzambi.

Uvi, Yesu waahanele mvutu ya asagesele: “Nga mudi ana a Abalahama, nga mudi mutshita gifua muatshitshile Abalahama.” Yadiago, mona wana gulandula khadilo dia sh’enji. Yesu walanduile guzuela gamba: ‘Uvi henyaha mudi mukamba gungushiya, ame wago ngamiwambela giamatshidia gingavuile gudi Nzambi. Abalahama gatshitshilego gifua luholo mudi mutshita.’ Gungima, Yesu waadijigile ndaga ya tunganesele matangi’awo. Wazuelele egi: ‘Enue mudi mutshita ndaga jia kalegele sh’enu.’—Yone 8:39-41.

Enya Yuda akhalelego mukotelesa muthu Yesu wakhalele muzuelela. Amonesele egi akhalelego ana a undumbu. Azuelele gamba: ‘Esue tuavualewego mu uthambi; tudi nu tata mumoshi, muene Nzambi diago.’ Uvi, Nzambi wakhalele diago sh’awo ba? Yesu wazuelele egi: “Nga Nzambi udi sh’enu diago, nga muanguzumba ndaga ya ngajile gudi Nzambi. Ngadijidilego ame hakhami, uvi muene wangutumine.” Yesu waahudile muhu, gungima wahanele mvutu egi: ‘Mukunda natshi mushigo mukotelesa ingudi muzuela? Handaga muajiyilego gukotelesa mbimbi yami.’—Yone 8:41-43.

Yesu waamonesele ndaga jiajiya guabuila gula amutuna. Gungima waadijigile egi: ‘Enue mudi ana a Diabulu, muana tshigina gutshita ndaga jidi sh’enu Diabulu mutshigina.’ Sh’awo udi muthu wa luholo lutshi? Yesu wamumonesele haphelo egi: ‘Mu gisendeselo muene wakhalele mushiyi, muene gamaganelego mu ndaga ya giamatshidia.’ Yesu wazuelele luko egi: ‘Muthu wa Nzambi wana gutegelela mbimbi jia Nzambi. Uvi enue mushigo mujitegelela handaga mushigo athu a Nzambi.’—Yone 8:44, 47.

Enya Yuda avuile khabu jiakola, azuelele egi: “Tuabingilego ha tudi muzuela egi, ‘Aye udi muenya Samaliya, nu udi nu demo nadio’?” Tangua atamegele Yesu egi “muenya Samaliya,” amonesele egi akhalele gumusegulula. Uvi Yesu gatalelego mashingana awo, wazuelele egi: ‘Ame ngushigo nu demo, ngudi munemesa tata, uvi enue mudi gungusegulula.’ Yesu waahanele laji diabonga diamonesele egi ndaga gakhalele muzuelela yakhalele nu funu. Wazuelele egi: ‘Gula muthu watumagela mbimbi jiami, mbagafuigo nga hazonda.’ Yakoteleselego egi apostolo nu athu ako akhalele gumulandula mbaafuigo. Uvi, ene mbaafuigo mayilago, “gufua gua ngiadi,” gushigo nu felela dia gufuzumuga.—Yone 8:48-51, NW; Yatuwuwe 21:8.

Uvi enya Yuda akoteleselego muabonga mbimbi jia Yesu, azuelele egi: ‘Henyaha tuajiya giwa egi aye udi nu demo nadio. Abalahama wafuile, ba profete nji afuile. Uvi aye udi muzuela egi, ‘gula muthu watumagela mbimbi jiaye mbagafuigo nga hazonda.’ Khakh’etu Abalahama wafuile, aye wamubalega ba? . . . Aye udi gudibuisa nanyi?’—Yone 8:52, 53.

Idi mumonega haphelo egi Yesu wakhalele mumonesa egi udi Masiya. Uvi ha fundo dia guaahana mvutu giphungu gimoshi, wazuelele egi: ‘Gula ngaditumbuisa ame hakhami, lutumbu luami ludi lua githuhu. Tata wago mudi muzuela egi Nzambi wenu, muene udi gungutumbuisa. Enue muamujiyilego, uvi ame ngamujiya. Luko, gula ngazuela egi ngamujiyilego, ngudi mubua muenya mambo gifua enue.’—Yone 8:54, 55.

 Gungima, Yesu watangele luko khakh’awo wakhalele nu gutshigina guakola. Wazuelele egi: ‘Sh’enu Abalahama wasuangulugile muavula mu gudifuelela gua gumona lusugu luami. Muene wa lumonele, wasuangulugile.’ Yadiago, Abalahama washile gutshigina guenji mu malaji a Nzambi, hene wasuangulugile gutuama mukunda nu guza gua Masiya. Enya Yuda atshiginyilego ndaga yene, azuelele egi: ‘Aye khenji utagenesa galego ivo 50, luholo lutshi aye wamonele Abalahama?’ Yesu waadijigile egi: ‘Giamatshidia, ngudi gumiwambela egi, gutuama egi Abalahama avualewe, ame ngadiangele gujinga.’ Yesu wakhalele muzuelela luholo gakhalele muanjelo wa ngolo jiavula gosa mu dilu, gutuama egi avualewe ha mavu.—Yone 8:56-58.

Enya Yuda avuile khabu jiakola luholo Yesu wazuelele egi muene wadiangele gujinga gutuama egi Abalahama avualewe. Hene, anonele maseso ha gumusonona, uvi Yesu walengele.