Yesu wajiyiwe muabonga mu ivo eyi yabalega sendese tangua gabatijiwe. Enya Yuda avula amonele ndaga jia gushimana akalegele, amuangele lumene lua midimo yenji mu gifutshi giagasue. Hakhalele Yesu gu Yelusalema mukunda nu Wano wa Isasa, athu avula akhalele gumukamba.

Athu akhalele muzuela ndaga jia gudisha mukunda nu Yesu. Ako akhalele muzuela egi: “Muene udi muthu wabonga.” Ako egi: “Ndo sha. Muene udi muwungisa athu.” (Yone 7:12) Athu avula akhalele muzuela ngenyi mu dijui dia hashi-hashi mu masugu a thomo a wano. Uvi guakhalelego nga muthu mumoshi wa gikhesa wajiya guzuela ndaga jiabonga mukunda nu Yesu ha meso a athu avula handaga akhalele muvua woma wa mafumu a mangumba a enya Yuda.

Gungima gua masugu azonda a gusendesa gua wano, Yesu wayile gu tempelo. Athu avula akhalele muyituga mukunda nu luholo luenji luabonga lua gulongesa. Yesu ganginyilego nga hazonda khalasa dia alongeshi a mangumba a enya Yuda (rabbins), hene enya Yuda adihudile egi: ‘Luholo lutshi muthu yowu gadi mujiya mbimbi ya Nzambi handaga muene khenji ganginyilego khalasa?’—Yone 7:15.

Yesu wazuelele egi: ‘Ingudi mulongesa ishigo yami uvi yajile gudi Nzambi wangutumine. Gula muthu watshigina gukalagala gutshigina gua Nzambi, mbawumujiya gula ndaga ngudi mulongesa jidi mukatuga gudi Nzambi nga jidi mukatuga gudi ame.’ (Yone 7:16, 17) Ndaga jiakhalele mulongesa Yesu jiakhalele gudivua nu Mukhuala wa Nzambi, hene idi naye gukhala diago egi gakhalelego mukamba lutumbu luenji, uvi lua Nzambi.

Gungima, Yesu wazuelele egi: ‘Moise gamihuilego Mikhuala ba? Uvi gushigo nga muthu mumoshi mukatshi dienu udi muyitumagela. Na mukunda natshi mudi mukamba ha gungushiya?’ Athu akatugile mu membo ako akhalelego mujiya ndaga yene. Gudi ene, yakhalelego ndaga yabonga ha gushiya mulongeshi wa luholo elu. Azuelele egi gula Yesu wazuela ngenyi, gudi nu ndaga jishigo muyila muabonga. Hene, amuwambelele egi: ‘Udi nu nyuma yabola, nanyi udi mukamba ha gugushiya?’—Yone 7:19, 20.

Givo gimoshi nu ndambo giabalega gale, mafumu a enya Yuda atshiginyile gushiya Yesu handaga wasagele yala mumoshi mu Lusugu lua Guhuluguga. Uvi mu tangua dinyi, Yesu wazuelele ndaga imoshi ha gumonesa egi matangi awo akhalele abola. Waawunguluishile ndaga yakhalele muzuela Mukhuala wa Moise, yatadila gumba mona yala gu mukanda mu lusugu lua nage, ngatshima idi Lusugu lua Guhuluguga. Gungima waahudile egi: ‘Gula muthu udi mumbiwa gu mukanda mu lusugu lua guhuluguga ha gubamba Mukhuala wa Moise, itshi mudi nu ame khabu handaga ngasagele muthu mu Lusugu lua Guhuluguga? Musophesago muthu gifua luholo mudi mumona gu meso, uvi musophesenu nu gusophesa gua giamatshidia.’—Yone 7:23, 24.

Enya gu Yelusalema anyi akhalele mujiya ndaga yene azuelele egi: ‘Yowu gashigo yala adi ene [mafumu] mukamba ha gumushiya ba? Uvi, tala! Yowu genji muzuela haphelo uvi ene ashigo gumuwambela nga gima. Yadiago mafumu etu ajiyi gale egi muene udi Klisto ba?’ Mukunda natshi athu akhalelego mutshigina egi Yesu udi Klisto? Azuelele egi: “Tudi mujiya fundo diaza muthu yowu; mbahamuenega Klisto, gushigo muthu mbawujiya fundo diaza muene.”—Yone 7:25-27.

Mukatshi dia tempelo munu, Yesu waawambelele egi: ‘Mudi gungujiya, nu mudi mujiya gui ngajile. Ngadijidilego hakhami, uvi muthu wangutumine udi wa giamatshidia, uvi enue mushigo gumujiya. Ame ngamujiya, handaga ngajile gudi muene, muene wangutumine.’ (Yone 7:28, 29) Havuile ene ndaga jiazuelele Yesu, akambelele gumukuata ha gumumba mu bologo nga gumushiya. Uvi, abingilego handaga tangua dia gufua gua Yesu diakhalele khenji ditaganago.

 Uvi, athu avula ashile gutshigina guawo gudi Yesu. Wawendele holu dia meya, wahuenesele funji, wadishile athu avula mu luholo lua gushimana nu ndambo ya mapha nu jishui, wasagele akhashi, wawendesele ikata, wakangudile ifofo meso, wasagele enya mahute, wafuzumuine a gufua. Yadiago, akhalele nu gishina giabonga gia guhula egi: ‘Tangua mbadiza Klisto, muene mbawutshita ijiyishilo yavula gubalega idi muthu yowu mutshita ba?’—Yone 7:31.

Tangua Afalese avuile athu avula muzuela ndaga eji, ene nu mafumu a nganga-nzambi, atumine masuta ha gukuata Yesu.