Yesu wakhalele gu Yelusalema mu Lusugu lua Guhuluguga. Tangua muene nu alandudi enji akhalele muwenda mu dimbo, amonele yala mumoshi wakhalele mutoga athu ima, yala muene wavualewe gifofo. Alandudi ahudile Yesu egi: ‘Mulongeshi, nanyi wakalegele gubola, muthu yowu nga mvuaji jienji, hagula muene avualewe gifofo?’—Yone 9:2.

Alandudi akhalele mujiya egi yala muene gakhalelego mujinga gutuama egi avualewe; hene, ajiya gudihula gula yala muene wajiya gukalagala gubola tangua gakhalele mu vumo dia gin’enji. Yesu wahanele mvutu egi: ‘Ishigo yala yowu nga mvuaji jienji atshitshile gubola, uvi yakhalele hagula midimo ya Nzambi imuenege mu ndaga yenji.’ (Yone 9:3) Yala muene nu mvuaji jienji atshitshilego gubola guakalegele egi avualewe gifofo. Uvi, mukunda nu gubola gua tshitshile Adama, athu agasue ana guvualewa athu ashigo atagana; luko ana guvualewa nu ukhashi gifua gufua meso. Uvi gufua meso gua muthu muene guahanele Yesu okazio wa gumonesa midimo ya Nzambi, gifua luholo gayimonesele tangua gasagele athu akhalele nu misongo.

Yesu wamonesele egi wakhalele naye gukalagala midimo yene mu phushi. Wazuelele egi: ‘Tudi naye gutshita midimo ya muthu wangutumine hadi muanya. Handaga tangua phipha mbayiza muthu gajiyilego gutshita mudimo. Ha ngudi ha mavu, ngudi muanya wa ha mavu.’ (Yone 9:4, 5) Yadiago, gungima dia masugu, gufua guenji gua munginyishile mu phipha mu ndumba, muene gatshitshilego nga gima gimoshi guene. Uvi gutuama egi ikalegewe, wakhalele muhana muanya ha mavu.

Uvi Yesu wasagele diago muthu muene ba? Gula idi ngenyi, luholo lutshi gayikalegele? Yesu wafitshile mate hashi, waafutuile nu mavu. Waakungile gu meso a gifofo giene, wazuelele egi: ‘Nda uzue meya gu meso mu gijiba gia Siloe.’ (Yone 9:7) Yala muene wayile muzua meya mu gijiba giene, gungima wasendesele gumona. Tangiza gusuanguluga guakhalele nago yala muene tangua wasendesele gumona mu lujingu luenji!

Athu akhalele mujinga nawo hehi nu athu ako amujiyile egi wakhalele gifofo, adihudile diago. Akhalele muzuela egi: “Yowu gashigo yala wakhalele mukhala hashi mutoga ima?” Ako akhalele muzuela egi, “Muene.” Uvi ako akhalelego mutshigina, akhalele muzuela egi: “Ndo, gashigo muene, muthu wa mufuana.” Yala muene hakhenji wazuelele gamba: ‘Ame muthu muene.’—Yone 9:8, 9.

Hene, amuhudile egi: ‘Luholo lutshi meso aye a kanguga?’ Wavutudile egi: “Muthu udi mutamegewa egi Yesu, muene wafutuile mate nu mavu, wangukunga gu meso wanguwambela egi, ‘Nda uzue meya gu Siloe.’ Hene ngayi ngazua, ngasendesa gumona.” Ene amuhudile gamba: ‘Yala muene udi gui?’ Muthu wakhalele mutoga ima wazuelele egi: ‘Ngushigo mujiya.’—Yone 9:10-12, NW.

Athu abatele yala muene gudi Afalese, handaga ene nji akhalele mutshigina gujiya luholo yala muene wasendesele gumona. Waawambelele egi: ‘Muene wangukungi mavu gafutula nu mate gu meso, ngayi  ngazui meya gu meso, hene ngudi mumona.’ Mu guzuela guabonga, Afalese akhalele naye gusuanguluga luholo muthu wakhalele mutoga ima wasagewe. Uvi, ako mukatshi diawo asendesele guzuela ndaga jiabola mukunda nu Yesu. Azuelele egi: ‘Muthu yowu gajilego gudi Nzambi handaga gashigo munemesa Lusugu lua Guhuluguga.’ Uvi ako azuelele egi: ‘Luholo lutshi muthu wabola wajiya gukalagala ndaga jia gushimana ngenyi?’ (Yone 9:15, 16) Yadiago, akhalele nu matangi a gudisha.

Hene, abalumugile gudi yala muene, amuhudile egi: ‘Aye itshi udi muzuela giwa mukunda nu muene, luholo gagukangula meso?’ Yala muene gakhalelego nu giphapha mukunda nu Yesu, wazuelele egi: ‘Muene udi profete.’—Yone 9:17.

Enya Yuda atshiginyilego ndaga yene. Atangijile egi yala muene wadivuile nu Yesu hagula adimbe athu. Amonele egi ha gumanesela mulonga wene, akhalele naye guhula mvuaji jia muthu yowu wakhalele mutoga ima, ha guzuela gula muene wavualewe diago gifofo.