Tangua Yesu wakhalele gu Yudea, Mufalese mumoshi wamutamegele ha guya mudia gumbo dienji, hene Yesu wayile. Yajiya gukhala egi yakhalele mu muanya. (Luka 11:37, 38; fuanesa nji nu Luka 14:12.) Gutuama dia gudia, Afalese awovele mago uu nu gu khokhona, gifua muakhalele khadilo diawo. Uvi Yesu gatshitshile ndo ngenyi. (Matayo 15:1, 2) Guwevua mago luholo elu guakhalele ndo mushiya Mukhuala wa Nzambi, uvi mukhuala wene nji wakhalele ndo muzuela egi khuta sha athu adi naye gutshita ngenyi.

Mufalese muene wadihudile luholo Yesu galanduilego khadilo diawo. Yesu wakotelesele ndaga yene, hene wazuelele egi: ‘Enue Afalese muana phelegetesa holu dia khiopho nu longa, uvi moshi’a mitshima yenu mudi mua guzala pha nu unyongi nu gubola. Enue mudi muaheya! Muthu wa londele holu, galondelego moshi ba?’—Luka 11:39, 40.

Gula muthu wawovua mago gutuama dia gudia, ishigo ndaga yabola ndo, uvi gukombelela Nzambi nu mambo mukatshi yene ndaga yabola. Afalese nu athu ako akhalele nu khadilo dia guwevua mago uu nu gu khokhona, aphelegeteselego mitshima yawo, akhalele mutshita ndaga jiabola. Hene, Yesu waahanele longo egi: ‘Huenu athu ima ya khenda mudi nayo mu mitshima; ngenyi, ima yagasue mbayikhala ya guphelegetesa gudi enue.’ (Luka 11:41) Idi diago ngenyi! Guzumba gudi naye gututuma ha guhana athu ako ima, uvi tushigo naye guhana mukunda nu guyitugisa athu hagula atumone egi tudi athu atagana.

Ishigo mukotelesa egi athu ene akhalele amina. Yesu wazuelele haphelo egi: ‘Enue muana hana gitshinyi gia kumi gia mente nu gia mbuto jiagasue, uvi muanago guzula nduedi nu guzumba gua Nzambi nu ndando! Muakhalele naye gutshita ndag’eji, uvi mubembigo ndaga jiko mudi gale mutshita.’ (Luka 11:42) Mukhuala wa Nzambi wakhalele mutoga athu ha guhana gitshinyi gia kumi gia mbuto jiawo. (Mikhuala 14:22) Mukatshi dia mbuto jiene, tuajiya gutanga mente (gibo) nu mayiji nga mitshi iko akhalele mukalegele ha gutelega ima ya gudia. Afalese akhalele munemesa muabonga mukhuala wa guhana gitshinyi gia kumi gia mbuto eji nu mitshi eyi, uvi akhalele ndo munemesa ndaga jia balega funu jia Mukhuala, gifua gutshita ndaga jia nduedi nu gula gukhala ndo muenya lulendo gu meso a Nzambi.—Mika 6:8.

Yesu wazuelele luko egi: ‘Lamba dienu enue Afalese, handaga mudi muzumba nguasa jia balega gubonga mu ikombelelo nu guhanewa lutumbu mu mafundo a mazando. Lamba dienu, handaga mudi gifua malumba ashigo mumonega, athu adi muwenda holu diawo uvi ene ashigo mukotelesa ndo.’ (Luka 11:43, 44) Ha gutadila mikhuala yawo, gula muthu wabua mu malumba, wakhalele mubua muenya usala. Ngenyi Yesu wamonesele egi Afalese akhalele enya usala, uvi usala wawo wakhalele ndo mumonega gu meso.—Matayo 23:27.

Yala mumoshi wakhalele mujiya muabonga Mukhuala wa Nzambi, wazuelele egi: “Mulongeshi, ha udi muzuela ngenyi, na udi mutushinga nji nu esue.” Afalese akhalele naye gukotelesa egi akhalele ndo mutagenesa ginemo giawo gia gukuatesa athu. Hene, Yesu waadijigile gamba: ‘Lamba dienu enue alongeshi a mikhuala nji, handaga mudi muhana athu inemo idi yanema ha gubata, uvi enue hakhenu mushigo mubata inemo yene nga nu muno wenu umoshi! Lamba dienu, handaga muana gutunga malumba a ba profete a Nzambi ashiyiwe gudi akhakh’enu.’—Luka 11:45-47.

Inemo yakhalele muzuelela Yesu idi ndaga jia shigu jia mambuta, nu luholo Afalese akhalele mubalumuna Mukhuala wa Nzambi. Afalese akhalele mukolesa lujingu lua athu. Akhalele mutuma athu ha gukalagala ndaga jiawo, jiakhalele gifua inemo yanema. Akhakh’awo ashiyile ba profete a Nzambi, sendese nu Abele uu nu ba profete ako. Afalese akhalele mutunga malumba a ba profete ha gumonesa egi akhalele guanemesa, uvi mu guzuela guabonga akhalele mulandula khadilo nu ndaga jia akhakh’awo. Akhalele nji mukamba gushiya profete wakoma wa Nzambi. Yesu wazuelele egi Nzambi mbawusophesa gindongo egi gia athu. Luko, gungima dia ivo 38, ndaga yene ya taganele mu givo 70 gia tangua dietu.

 Yesu wazuelele luko egi: ‘Lamba dienu enue alongeshi a mikhuala, handaga muakatuile saphi jia ujiyi. Enue hakhenu mushigo mungina guene, uvi mudi mukangesa athu adi mutshigina gungina guene.’ (Luka 11:52) Afalese akhalele naye gulongesa athu mbimbi ya Nzambi, uvi atshitshile ndo ngenyi, ahanelego athu okazio wa gujiya mbimbi yene nu guyikotelesa.

Havuile Afalese nu alongeshi a mikhuala ndaga yene, itshi akalegele? Tangua Yesu wazogele monzo ha guya, amuvuidile khabu jiakola, asendesele nji gumuhula mihu yavula. Akhalele ndo gumuhula mukunda nu gujiya. Uvi, akhalele mukamba egi Yesu azuele ndaga imoshi ngenyi hagula ahete okazio wa gumufunda.