Yozefe wazugishile Mariya gu tulo ha gumuwambela ndaga imoshi. Muanjelo wa Yehowa wamuenegene gudi muene mu nzoji, waamuwambelele egi: ‘Zuga, zangula mona nu gin’enji, lengela gu Egypte. Khala guene uu nu tangua mbanguguwambela ha guvutuga, handaga Helode udi mukamba gushiya mona yowu.’—Matayo 2:13.

Giphungu gimoshi, Yozefe nu Mariya nu mun’awo alengele phipha a phipha. Alengele mu tangua diabonga diago, handaga Helode wakotelesele egi enya ndunge amudimbile. Wawambelele egi gula amona mona, avutuge ha gumuwambela. Uvi ene avutugilego gudi Helode, ayile gumbo diawo. Hene, Helode wavuile khabu jiakola diago. Handaga muene wakhalele mukamba phamba gushiya Yesu, watumine athu ha gushiya ana mala agasue a ivo mbadi uu nu goshi, a mu dimbo dia Beteleheme nu mu membo a hehi-hehi. Ha gujiya ivo ya ana adi naye gushiyiwa, watangijile tangua gatele maga nu enya ndunge akatugile gu khanda ya Esti.

Gushiya ana mala agasue guakhalele ndaga ya shidi diago! Tushigo mujiya ana mala guvula gutshi ashiyiwe. Uvi gudila nu gikenene giakola gia in’awo guatagenesele profesi imoshi ya Biblia, yahanewe gudi profete wa Nzambi Yelemiya.—Yelemiya 31:15.

Mu tangua diene, Yozefe nu fami yenji alengele gu Egypte, enji akhalele mujinga guene. Mu phipha imoshi, muanjelo wa Yehowa wamonegene luko gudi Yozefe mu nzoji. Wamuwambelele egi: ‘Zuga, zangula mona nu ginenji, vutugenu mu mavu a Isalele, ndaga ya athu akhalele mukamba gushiya mona afui gale.’ (Matayo 2:20) Ngenyi, Yozefe wakotelesele egi muene nu fami yenji ajiya giwa guvutuga gumbo diawo. Mu ndaga eyi nji, profesi iko ya Biblia yatagenele—Nzambi  watamegele mun’enji ha guzoga mu Egypte.—Hoshea 11:1.

Idi mumonega egi, Yozefe watshiginyile egi fami yenji ijinge mu mavu a Yudea, hehi nu gumbo diawo gu Beteleheme, guakhalele ene mujinga gutuama egi alenge aye gu Egypte. Uvi, wavuile egi Archélaüs, muna Helode wahinganele mu Yudea ha fundo dia sh’enji Helode. Mu nzoji iko, Nzambi wawambelele Yozefe ndaga yabola yajiya guaabuila. Hene, Yozefe nu fami yenji ayile gu khanda ya nordi, asendesele gujinga mu dimbo dia Nazaleta, mu mavu a Galile, gualeha nu fundo diakhalele mukombelela enya Yuda. Yesu wakudile mu dimbo diene, yatagenesele profesi iko yakhalele muzuela egi: “Muene mbawutamegewa egi muenya Nazaleta.”—Matayo 2:23.