Yesu wakudile gu Nazaleta, gadimbo gamoshi gazonda, gashigo nu funu. Gadimbo gene gakhalele gu khanda ya nordi, gu mulundu wa Galile, gu westi ya kianga giakoma gia Galile.

Hakatugile Yozefe nu Mariya gu Egypte, yajiya gukhala egi Yesu wakhalele nu ivo mbadi. Idi mumonega egi mu tangua diene, akhalele nu mona phamba mumoshi. Uvi gungima, avualele ana ako—Yakoba, Yozefe, Simona, nu Yuda. Yozefe nu Mariya avualele nji ana a akhetu, aphangi’a Yesu. Yadiago, Yesu wakhalele nu alenge enji a mala nu a akhetu musambano.

Yesu wakhalele nu aphangi’enji ako. Tudi mujiya gale Elizabete nu mun’enji Yone, akhalele mujinga gu Yudea, bakilometre avula gu khanda ya sudi. Salome wakhalele mujinga hehi, gu Galile. Yajiya gukhala egi Salome wakhalele phangi’a Mariya, enji gudi Yesu wakhalele gin’enji wa galenge. Mulumi’a Salome wakhalele Zebede. An’awo mbadi a mala, Yakoba nu Yone, akhalele isonyi ya Yesu. Tushigo mujiya gila Yesu wabalegesele nawo matangua avula tangua akhalele ene alenge. Uvi gungima, abuile mafut’enji akola, nu apostolo enji.

Yozefe wakhalele naye gukalagala mudimo wakola ha gukuatesa fami yenji eyi yakoma. Wakhalele muenya mudimo wa mabaya. Yozefe wasasele Yesu gifua mun’enji wa somi, hene athu akhalele mutamega Yesu egi “mun’a muenya mabaya.” (Matayo 13:55) Yozefe walongesele nji  Yesu mudimo wa mabaya, enji Yesu wajiyile mudimo wene muabonga diago. Hene, athu akhalele muzuela mukunda nu Yesu egi: “Yowu muenya mabaya.”—Mako 6:3, NW.

Fami ya Yozefe yakhalele musha gikombelelo gia Yehowa ha fundo dia thomo. Luholo Yozefe nu Mariya akhalele munemesa Mukhuala wa Nzambi, alongesele an’awo ndaga jia mu nyuma ‘tangua akhalele n’awo monzo, akhalele muwenda nawo mu njila, nu tangua akhalele mubanda nu guzuga nawo.’ (Mikhuala 6:6-9) Dimbo dia Nazaleta diakhalele nu sinagoga. Yadiago, Yozefe wakhalele muya tangua diagasue nu enya fami yenji gu sinagoga ha gukombelela guene. Ivo yavula gungima, Biblia idi muzuela egi ‘mu Lusugu lua Guhuluguga, Yesu wanginyine mu sinagoga gifua muakhalele khadilo dienji.’ (Luka 4:16) Fami ya Yozefe yakhalele nji musuanguluga ha guwenda iphungu yavula ha guya gu tempelo ya Yehowa gu Yelusalema.