Tuajiya guzuela egi ndaga jiagasue jidi mu Biblia jiakatuga gudi Nzambi. Tata wetu wa mu dilu wasonegesele Biblia ha gutulongesa. Tala mene mbadi jia funu jiasonegewe ivo 2 000 yabalega gale. Muanjelo wajile nu mene jiene jina dienji Gabriele; muene ‘wana magana gu phala ya Nzambi.’ (Luka 1:19) Mu givo gitshi, nu fondo ditshi muanjelo muene wahetesele mene jiene mbadi jia funu?

Wajihetesele hehi nu givo 3 gutuama dia tangua dietu. Gabriele wahanele lumene luene mu dimbo ditshi? Mu milundu ya Yudea, yajiya gukhala hehi nu Yelusalema. Guene guakhalele nganga-nzambi mumoshi wa Yehowa, jina dienji Zakaliya. Zakaliya nu mukaji’enji Elizabete akhalele akolele gale, akhalelego nu mona nga mumoshi. Tangua dia Zakaliya dia guya gukalagala mudimo wa unganga-nzambi gu tempelo gu Yelusalema diataganele. Hakhalele Zakaliya mukatshi dia tempelo, muanjelo Gabriele wamuzogelele hehi nu giwotshielo gia uhafu.

Yadiago, Zakaliya wavuile woma. Uvi, muanjelo wamuhuimishile mutshima, wamudijigile egi: ‘Ukhadigo nu woma ndaga ya gutoga guaye guavuiwa gudi Nzambi . Mukaji’aye Elizabete mbawuguvualela mona yala. Aye mbawumuluga dijina egi Yone.’ Gabriele wazuelele luko egi Yone ‘mbawukhala muthu wakoma gu phala ya Yehowa,’ luko ‘mbawulondegela Yehowa athu.’—Luka 1:13-17.

Uvi Zakaliya wamonele gifua ndaga yene yajiyilego gutagana. Mukunda natshi? Handaga muene nu mukaji’enji Elizabete akhalele akolele gale. Hene, Gabriele wamuwambelele egi: ‘Aye mbawufwa kano, mbawushigo muzuela uu nu lusugu ndaga eyi mbayitagana, handaga watshiginyilego mbimbi jiami.’—Luka 1:20.

Mu tangua diene, athu akhalele hanze adihudile gishina Zakaliya washiphile mu tempelo. Gu suga yenji, Zakaliya wazogele, uvi gakhalelego muzuela. Zakaliya wakhalele muzuelela gu mago. Yamonesele egi wamonele ndaga ya gushimana mu tempelo.

Hamanesele Zakaliya mudimo mu tempelo, wavutugile gumbo di’enji. Masugu azonda gungima, Elizabete wamitshile vumo! Gungima dia mbeji thano, Elizabete wakhalele munengena guvuala, wakhalele phamba gumbo di’enji, gakhalelego luko muzoga.

Muanjelo Gabriele wazogele luko luyadi. Wazogelele nanyi? Wazogelele muvuala mumoshi wa mukhetu, jina dienji Mariya. Wakhalele gu khanda ya nordi gu gifutshi gia Galile, mu dimbo dia Nazaleta. Ndaga itshi muanjelo wamuwambelele? Wazuelele egi: “Waheta luendu gudi Nzambi.” Gabriele wawambelele luko Mariya egi: ‘Tala! Aye mbawumita vumo, mbawuvuala mona wa yala, mbawumutamega egi Yesu.’ Gabriele wamudijigile luko egi: ‘Muene mbawukhala muthu wakoma, mbawutamegewa egi mun’a Nzambi wa Gudinyinyiga. . . . Mbawuhinyina giphuta gia Yakoba ivo nu ivo, Ufumu wenji mbawukhadigo nu gisugishilo.’—Luka 1:30-33.

Wajiya gutangiza luholo Gabriele wasuangulugile nu luendu lua guwambela athu mene eji mbadi. Gula tuatanga ndaga jiavula jiatadila Yone nu Yesu, mbatukotelesa gishina mene eji mbadi jidi nu ndando yavula.