Tangua muanjelo Gabriele wawambelele Mariya egi mbawuvuala mona yala, mbawumuhana jina egi Yesu, Mariya wahudile egi: ‘Ndag’eyi yajiya gubua luholo lutshi handaga khenji ngabungishile gale muila nu yala ndo?’—Luka 1:34.

Gabriele wamuwambelele egi: ‘Nyuma ya Nzambi mbayigubulumugila, ngolo jia Nzambi wa gudinyinyiga mbajigutshuiga gifua givule-vule. Ngenyi, mona mbawuvuala, mbawutamegewa egi: wagijila, Mun’a Nzambi.’—Luka 1:35.

Gabriele wawambelele Mariya egi: ‘Tala! Phangi’aye Elizabete, wakhalele mutamegewa egi gikunya, wamitshi gale vumo mu gukola guenji, eyi mbeji yenji ya samano. Handaga gudi Nzambi, gushigo nu gima giajiya gukhala giakola ha gutshitshiwa.’ Yajiya gukhala egi Gabriele wawambelele Mariya ndaga yene hagula ambigo maya.—Luka 1:36, 37.

Mvutu yahanele Mariya yamonesa diago egi watshiginyile mbimbi jia Gabriele. Wazuelele egi: ‘Tala muhiga wa Yehowa. Mbimbi eji wazuela mukunda nu ame, jitagane.’—Luka 1:38.

Hakatugile Gabriele, Mariya wadilondele ha guya mutala Elizabete, wakhalele mujinga nu mulumi’enji Zakaliya gu milundu ya Yudea, hehi nu Yelusalema. Ha gukatuga gu Nazaleta ha guya gumbo dia Elizabete, Mariya wakhalele naye guwenda masugu thathu nga nguana.

Gungima, Mariya wahetele gu inzo ya Zakaliya. Hanginyine muene monzo, wahanelele Elizabete moyo. Mu tangua diene, Elizabete wazalele nu nyuma ya Nzambi. Wawambelele Mariya egi: ‘Nzambi agubambe gubalega akhetu agasue. Abambe nji mona udi mu vumo diaye. Ame ngudi nanyi hagula gin’a Fumu wami aze gumbo diami? Tala, tangua ngavua lumene luaye, mona wadinyigisa mu vumo diami mukunda nu gusuanguluga.’—Luka 1:42-44.

Mariya wamuhanele mvutu nu gusuanguluga guagasue egi: ‘Monyo wami udi mutumbuisa Yehowa. Mutshima wami udi musuanguluga mukunda nu Nzambi Muhuluishi wami, handaga watalele gubulumuga gua muenya mudimo wenji. Ngenyi sendese luenyelu uu ivo nu ivo, indongo yagasue mbayingutumbula egi muenya gusuanguluga handaga Nzambi wa ngolo Jiagasue wangutshitshila ndaga jiakoma.’ Tuamona egi ngatshima Mariya watumbuishiwe, muene wahanele lutumbu luagasue gudi Nzambi. Wazuelele egi: ‘Jina dienji didi dia gijila. Mu indongo yagasue, mbawumonesa khenda jienji gudi athu ana gumuvuila woma.’—Luka 1:46-50.

Mariya walanduile gutumbuisa Nzambi egi: ‘Muene watshitshi ndaga jiakola nu ngolo jia koko dienji. Wamuanga athu adi nu lulendo mu mitshima yawo. Nzambi wakatula enya ngolo ha ife yawo ya ufumu, wakanduisa athu adi a gudibulumuisa. Muene wahana athu adi nu nzala ima yavula yabonga, uvi athu adi nu umonyi, waavutula mago a gituhu. Muene wakuatesele muenya mudimo wenji Isalele, wawungulugile khenda jienji, luholo wawambelele akhakh’etu, Abalahama nu ajigulu enji ivo nu ivo.’—Luka 1:51-55.

Mariya watshitshile mbeji hehi nu thathu gu mbo dia Elizabete, tangua diko wakhalele mukuatesa Elizabete mu masugu a gisugishilo a vumo dienji. Yakhalele diago ndaga ya gusuanguluga ha gumona luholo akhetu awa muyadi, amitshile mu ukuateshi wa Nzambi, abalegesele tangua hamoshi!

Tala luholo Yesu wakhalele munemesewa gutuama dia guvualewa guenji. Hanginyine Mariya, Elizabete wamutamegele egi: “Fumu wami,” luko, mona wakhalele mu vumo dienji ‘wadinyigishile mukunda nu gusuanguluga.’ Mbatuza mumona egi athu ako anemeselego Mariya nu mun’enji Yesu, wakhalele mu vumo.