Sezale Auguste, fumu wa Ufumu wa Roma, wambile mukhuala egi athu agasue adi naye gutangewa. Hene, Yozefe nu Mariya akhalele naye guya gu dimbo diawo, gu Beteleheme gu khanda ya sudi ya Yelusalema.

Athu avula ayile gu Beteleheme ha gusonegesa majina. Yozefe nu Mariya akhalelego nu fundo dia gutuluga. Hene ayile mukhala mu inzo yakhalele mubambewa shamo nu shitu jiko. Yesu wavalewe mu inzo yene. Mariya wamuvungile milele, wamubandesele mu gidilo gia shitu.

Idi naye gukhala egi Nzambi wakalegele egi Sezale Auguste ahane mukhuala wa gusonegesa majina. Mukunda natshi? Handaga mukhuala wene wakalegele egi Yesu avalewe mu Beteleheme, dimbo dia khakh’enji Davidi. Biblia yazuelele gutuama egi Fumu walayile Nzambi mbawuvalewa mu dimbo dia Beteleheme.—Mika 5:2.

Phipha yene yakhalele ya funu diago! Gukhanda iko mu foto, tshuya tuazogelele abambi a imeme. Yakhalele lutumbu lua Yehowa! Muanjelo mumoshi wa Nzambi wawambelele abambi a imeme egi: ‘Muvuigo woma. Tegelelenu! Ngudi gumiwambela lukuma luabonga, mbalusuanguluisa athu agasue. Mangin’owu muhuluishi wavalewa mu dimbo dia Davidi, muene udi Klisto Fumu. Ndaga eyi mbayimikuatesa ha gumujiya: Mbamusanga mona wa gitebe wagulala milele, wagubanda mu gidilo gia shitu.’ Mu tangua diene, anjelo ako azogele, enji azuelele egi: ‘Gutumbuga gukhale gudi Nzambi gosa mu dilu, guhuima gukhale ha mavu mukatshi dia athu a mitshima yabonga.’—Luka 2:10-14.

Hakatugile anjelo ha guvutuga mu dilu, abambi a imeme azuelele egi: ‘Tuyenu gu Beteleheme, tutale ndaga eyi yabua yatujiyisa Yehowa.’ (Luka 2:15) Ayile gatshididi, asangele Yesu wagitebe ha fundo diaadijigile muanjelo. Tangua abambi a imeme atele lumene luawambelele muanjelo, athu agasue avile ndaga yene ashimanene mangololo. Mariya wabambele ndaga eji jiagasue, wakhalele mujitangiza mu mutshima wenji.

Athu avula mangino ana guzuela egi Yesu wavalewe mu 25 Décembre. Uvi, gu khanda ya dimbo dia Beteleheme, mu mbeji ya Décembre mvula yana gunoga muavula, nu guhuma guakola. Matangua ako, neige jiana gubua. Mu sungi yene, yakhala lamba egi abambi a imeme abande hanze nu imeme yawo phipha yagasue. Luko, fumu wa Roma gajiyilego gutoga athu akhalele gumulumbugila muavula, egi awende masugu avula mu sungi eyi yahuma ha guya gusonegesa majina. Idi yadiago egi Yesu wavalewe mu mbeji ya Octobre.