Elizabete wakhalele hehi nu guvuala. Phangi’enji Mariya watshitshile mbeji thathu gumbo dienji. Tangua diataganele hagula Mariya avutuge gumbo dienji gu Nazaleta; wakhalele naye guwenda njila yaleha. Guasala mbeji hehi nu samano hagula muene nji avuale mona yala.

Havutugile Mariya, tangua diazonda gungima, Elizabete wavualele mona yala. Wavualele muabonga. Muene nu mun’enji akhalele nu sante yabonga. Muene nu mulumi’enji Zakaliya asuangulugile diago! Halezele Elizabete mona gudi athu akhalele mujinga nawo hehi, athu ene asuangulugile muavula.

Nzambi wahanele enya Isalele mukhuala egi, gula mukhetu wavuala mona yala, gungima dia masugu nage, mona muene udi naye gumbiwa gu mukanda, nu gulugiwa dijina. (Levi 12:2, 3) Athu ako azuelele egi mona muene udi naye gulugiwa jina dia shenji Zakaliya. Uvi, Elizabete wazuelele mu dizui diakola egi: “Ndo, jina dienji Yone.” (Luka 1:60) Ujimbilago egi muanjelo Gabriele wazuelele egi mona owu udi naye gutamegewa egi Yone.

Uvi, aphangi’awo nu athu akhalele mujinga nawo hehi azuelele egi: ‘Gushigo nu muthu wa mu fami yenu udi nu jina edi.’ (Luka 1:61) Azuelele gu mago ha guhula Zakaliya jina adi naye guhana mun’enji. Zakaliya waatogele baya, wasonegele egi: “Jina dienji Yone.”—Luka 1:63.

Mu tangua diene, Zakaliya wasendesele luko guzuela. Ujimbilago egi Zakaliya gakhalelego luko muzuela sendese tangua atunyile gutshigina ndaga jia muwambelele muanjelo egi Elizabete mbawuvuala mona yala. Hene, tangua Zakaliya wasendesele guzuela, athu akhalele mujinga nawo hehi ayitugile, adihudile egi: “Mona owu mbawukhala gikuatshi?” (Luka 1:66) Amonele diago koko dia Nzambi luholo jina dia Yone diahanewe.

Gungima, Zakaliya wazalele pha nu nyuma ya Nzambi, wazuelele egi: ‘Yehowa Nzambi wa Isalele  atumbuishiwe, ndaga ya muene watala athu enji, waahuluisa. Muene watuzolela lumbinga lua guhuluga mu inzo ya muenya mudimo wenji Davidi.’ (Luka 1:68, 69) Fumu Yesu yonu wakhalele naye guvualewa, muene ‘lumbinga lua guhuluga’ wazuelele Zakaliya. Wamonesele luko egi mu njila yenji, Nzambi ‘mbawutuhuluisa ha mago a mbalagaji jietu, mbatuvuigo woma wa gumukalegela mudimo wa gijila nu gujinginyina guagasue nu nduedi, guphala yenji masugu etu agasue.’—Luka 1:74, 75.

Hatalele Zakaliya mun’enji, wazuelele egi: ‘Aye, mun’ami, mbaagutamega egi profete wa Nzambi wa Gudinyinyiga, handaga mbawuya gutuama dia Yehowa ha gulondega njila jienji, nu ha guhana athu enji ujiyi wa guhuluga mu njila ya gutotesewa gua gubola guawo, handaga muene udi Nzambi wazala pha nu khenda. Mukunda nu khenda jienji, mbatumona muanya wakatuga gosa, ha gukiesa guma mukunda nu athu adi mu phipha nu mu givulevule gia gufua, nu ha gutuameza idio yetu mu njila ya guhuima.’ (Luka 1:76-79) Profesi eyi idi muhana diago gikhesa!

Mariya wahetele gumbo diawo gu Nazaleta, wakhalele khenji gazudiwa gale mu ulo ndo. Itshi ya mubuidile tangua athu ajiyile egi wakhalele gu vumo?