Vumo dia Mariya diatagenesele mbeji nguana. Ujimbilago egi Mariya wabalegesele mbeji jia thomo jia vumo dienji gumbo dia phangi’enji Elizabete, gu sudi ya milundu ya Yudea. Gungima, wavutugile gumbo diawo gu Nazaleta. Guasalele hazonda hagula athu ajiye egi udi gu vumo. Tangiza luholo ndaga yene yamusagesele!

Ndaga ya lamba idi egi Mariya wakhalele naye guzudiwa mu ulo gudi Yozefe, yala mumoshi wa mu dimbo diawo, wakhalele mukalagala mudimo wa mabaya. Mariya wakhalele mujiya egi Mukhuala wahanele Nzambi gudi enya Isalele wakhalele muzuela egi, gula yala wadizumba nu mukhetu ha gumuzula mu ulo, uvi mukhetu muene wakalagala uthambi nu yala muko, adi naye gumushiya nu maseso. (Mikhuala 22:23, 24) Mariya gakhalelego muenya uthambi, uvi yajiya gukhala egi wadihudile luholo mbaawambela Yozefe egi udi gu vumo, nu ndaga mbayizuela Yozefe gu mulonga wene.

Mariya wabalegesele mbeji thathu gumbo dia Elizabete, yamonega diago egi Yozefe wakhalele nu nzala yakola ya gumumona. Yajiya gukhala egi hadimonele Mariya nu Yozefe, wamuwambelele egi udi gu vumo, watshitshile yagasue ha gumukotelesela egi vumo dienji wadizudile mu njila ya nyuma ya Nzambi. Uvi, idi mumuenega haphelo egi gudi Yozefe yakhalele ndaga ya lamba ha gukotelesa nu gutshigina.

Yozefe wakhalele mujiya egi Mariya udi nu makalegelo abonga nu lukuma luabonga. Wakhalele nji gumuzumba muavula. Uvi, ikhale Mariya wamuwambelele ndaga jiagasue, Yozefe wakhalele mumona gifua yala muko wamumitshishile vumo diene. Yozefe gatshiginyilego egi Mariya ashiyiwe nu maseso, nga egi amonesewe musonyi ha meso a athu; gishina giene, wazudile desizio dia gushiya nenji ulo mu gisuegi. Mu tangua diene, gula athu adivua ha gudizula mu ulo (fiancés), akhalele guaazula gifua adihagele gale. Gila azuela egi mbashigo luko gudizula mu ulo, akhalele  naye guzula mukanda wa gushiya ulo (certificat de divorce).

Gungima, tangua Yozefe wakhalele mutangiza ndaga yene, wabandele tulo. Muanjelo wa Yehowa wamuzogelele gu nzoji, wamuwambelele egi: ‘Ukhadigo nu woma ha guzula mukaji’aye Mariya, ndaga ya mona wamitshiwa mu vumo dienji udi wa nyuma ya Nzambi. Mariya mbawuvuala mona yala, aye mbawumuhana jina egi Yesu, ndaga ya muene mbawuhuluisa athu enji gu gubola guawo.’—Matayo 1:20, 21.

Hazugile Yozefe gu tulo, wasuangulugile diago handaga wakotelesele muabonga ndage yene! Gashiphilego ha gutshita ndaga yamuwambelele muanjelo. Yozefe wazudile Mariya gu mbo dienji. Luholo Yozefe wazudile Mariya gumbo dienji, yamonesele diago gudi athu agasue egi adizudile mu ulo, henyaha abua yala nu mukhetu. Uvi, Yozefe gabungishilego muila nu Mariya hakhalele muene gu vumo dia Yesu.

Mbeji jiazonda gungima, Yozefe nu Mariya adilondele ha gukatuga gu Nazaleta ha guwenda bakilometre avula; Mariya wakhalele hehi ha guvuala. Gui akhalele mutshigina guya mu tangua edi Mariya udi hehi nu guvuala?