Aphangi a Mala nu a Akhetu:

Guzumba guetu mukunda nu Nzambi nu athu guana gututuma ha guya ‘gudi athu a ifutshi yagasue, ha guabuisa alandudi, nu guabatiza.’ (Mat. 28:19, 20; Mako 12:28-31) Guzumba gua giamatshidia guana khala nu ngolo jiavula. Guajiya gukuata mitshima ya “athu agasue anyi [adi] nu mitshima yatagana ha guheta monyo wa mayilago.”​—Makal. 13:48.

Mu ivo yabalega, tuakhalele mutshita yagasue ha gukuata ndaga tudi naye guzuela mu muto, nu guhana athu mikanda. Uvi henyaha tudi mutshigina gutshita ngolo ha gukudisa luholo luetu lua guta maga nu athu. Tudi naye gumonesela athu ako guzumba, tangua tudi muta nawo maga atadila ndaga jidi guasuanguluisa. Idi mukotelesa egi tushigo naye gukhala enya ndaga jiakola, uvi tudi naye gujiya muabonga ndaga jidi musagesa athu nu jidi guasuanguluisa. Luholo lutshi gamukanda gaga gajiya gutukuatesa ha gutshita ngenyi?

Gamukanda gaga gadi nu malongo 12 anyi adi gutulongesa makalegelo anyi tudi naye gukudisa ha gumonesela athu ako guzumba nu guabuisa alandudi. Longo diagasue diazudiwa mu lumene lua Biblia, ludi mumonesa luholo Yesu nga Muklisto muko wa mu siekle ya thomo wamonesele khadilo dimoshi ngenyi mu mudimo wa gulongesa. Tushigo mutshigina luko gukuata luholo lua guta maga nu athu mu muto, uvi tudi naye gukamba luholo lua guamonesela guzumba. Ngatshima makalegelo agasue abonga ana khala nu ndando mu mudimo wa gulongesa, uvi tuza mumona luholo makalegelo ako ana khala diago nu ndando yavula tangua tudi musendesa guta maga nu athu, tudi muvutugila athu nga tangua tudi mutuameza ulongugi wa Biblia.

Tangua udi mulonguga longo diagasue, tangiza muabonga luholo wajiya gumonesa khadilo diene tangua udi muta maga nu athu ha fundo wana khala. Tshita ngolo ha guzumba Yehowa muavula nu athu ako. Guzumba gudi nu ndando yavula gubalega maluholo etu a gulongesa, mbagugukuatesa ha gutagenesa felela diaye dia gubuisa athu alandudi.

Tuana suanguluga diago muavula handaga tuana khala nu luendu lua gutshita mudimo hamoshi. (Sef. 3:9) Yehowa amikuatese luholo mudi mulandula guzumba athu ako nu guabuisa alandudi!