1. Mukunda natshi tudi nu funu ya utuameji wa Yehowa? Hana gifezegeselo.

 TANGIZA gale egi watota mu gishitu. Didi fundo dia gingonza handaga didi nu shitu jia mu foto, mitshi ya puazo, jimue, tudimu nu nyigi nu ima iko yabala. Mbawukhala nu gusuanguluga gula udi nu mutuameji wana jiya fundo diene muabonga nu wajiya gugukuatesa gula udi mu gingonza! Mavu awa adi gifua gishitu giene. Adi nu ingonza yavula yajiya gubolesa ufuta wetu nu Yehowa. Uvi Yehowa udi Mutuameji wetu watagana. Wana gutubamba mu ndaga jiajiya gubolesa ufuta wetu n’enji nu mbawutuhana monyo wa ivo nu ivo mu mavu ahe-ahe.

2. Mu luholo lutshi Yehowa wana gututuameza?

² Mu luholo lutshi Yehowa wana gututuameza? Thomo, wana gututuameza mu njila ya Mbimbi yenji Biblia. Uvi wana kalegela nji athu ha gututuameza. Ha gufezegesa, wana kalegela “muhiga wafubidila nu watema” ha gutuhana ima ya gudia ya mu nyuma yana gutukuatesa ha guzula badesizio abonga. (Mat. 24:45) Yehowa wana kalegela nji mala ako atema ha gututuameza. Ha gufezegesa, atadi awendji nu akulu mu hungu, ana gutuhana gikhesa nu malongo ajiya gutukuatesa ha gukolesela gula tuatagana nu malamba. Tudi muhana Yehowa mersi yavula luholo luana gututuameza muene mu masugu awa a gisugishilo a lamba! Utuameji wene wana gutukuatesa ha gubamba ufuta wetu nu Yehowa nu gulandula guwenda mu njila ya monyo.

3. Ndaga jitshi tuza mutadila mu longo edi?

³ Uvi matangua ako, yajiya gukhala lamba ha gulandula utuameji wene, handaga athu adi gututuameza ashigo athu atagana. Mukunda natshi? Handaga yajiya gukhala egi tushigo musuanguluga nu ndaga adi gutuwambela. Nga ndo tuajiya gutangiza egi malongo ana gutuhana ashigo abonga nu anago gukatuga gudi Yehowa.  Mu matangua a luholo elu, tudi naye gusha mutshima egi Yehowa udi mutuameza akombeledi enji, gula tualandula nji utuameji wene mbatuheta gubonga. Mu longo edi tuza mutadila ndaga thathu jiajiya gutukuatesa ha gukolesa khadilo dietu dia gushila Yehowa mutshima: 1) luholo Yehowa watuamezele akombeledi enji mu tangua dikulu 2) luholo luana gututuameza muene mangino, 3) nu gubonga tuajiya guheta gula tudi mulandula utuameji wenji.

LUHOLO LUTSHI YEHOWA WATUAMEZELE ENYA ISALELE?

4-5. Luholo lutshi Yehowa wamonesele egi muene wakhalele mukalegela Moize ha gutuameza enya Isalele? (Tala gifuanesa.)

⁴ Yehowa watombele Moize ha guzola enya Isalele gu Ejipitu. Wahanele enya Isalele ijiyishilo yakhalele mumonesa egi, muene wakhalele guatuameza mu njila ya Moize. Ha gufezegesa mu muanya, wakhalele guatuameza nu kunji dia tuta, uvi mu phipha wakhalele guatuameza nu zenyi dia tshuya. (Guz. 13:21) Moize nu enya Isalele akhalele mulandula kunji dia tuta diakhalele guatuameza gu Kianga Giabenga. Enya Isalele avuile woma tangua ajiyile egi masuta a gu Ejipitu akhalele gualandula mu njila ya kianga ha guashiya. Gungima atangijile egi Moize wazudile desizio diabola dia guatuameza gu Kianga Giabenga. Uvi yakhalelego ngenyi. Yehowa wakhalele mutuameza akombeledi enji mu njila ya Moize. (Guz. 14:2) Gungima Nzambi waahuluishile mu luholo lua gushimana.​—Guz. 14:26-28.

⁵ Mu ivo yagasue 40, Moize walanduile gusha mutshima egi Yehowa wakhalele mukalegela kunji dia tuta ha gutuameza akombeledi enji mu mavu a luselenga. a Gungima, Yehowa wahagele kunji diene gutuama dia tenta ya Moize hagula enya Isalele agasue ajiya gudimona. (Guz. 33:7, 9, 10) Wawambelele Moize ha guwambela enya Isalele ndaga jiatadila kunji diene. (Ngi. 99:7) Enya Isalele akotelesele diago egi Yehowa wakhalele mukalegela Moize ha guatuameza.

6. Ndaga jitshi enya Isalele akhalele muzuela mukunda nu Moize? (Lutango 14:2, 10, 11)

⁶ Gungima, enya Isalele avula asendesele gutuna ijiyishilo yakhalele mumonesa egi ndaga jiakhalele muzuela Moize jiakhalele mukatuga gudi Yehowa. (Tanga Lutango 14:2, 10, 11.) Akhalele muzuela mbala jiavula egi, ishigo Yehowa watombele Moize ha guatuameza. Gishina giene Yehowa wazuelele egi gindongo giene mbagishigo mungina mu Mavu a Gutendelela.​—Lutang. 14:30.

7. Athu atshi alanduile utuameji wa Yehowa? Hana gifezegeselo. (Lutango 14:24) (Tala nji gifuanesa.)

⁷ Uvi enya Isalele ako alanduile utuameji wa Yehowa. Ha gufezegesa, Yehowa wazuelele mukunda nu Kalebe egi: ‘Kalebe . . . walandula gungutumagela nu mutshima wenji wagasue.’ (Tanga Lutango 14:24.) Nzambi washimbigile Kalebe, wamuwambelele ha gutomba fundo diakhalele muene mutshigina gukhala mu Mavu a Gutendelela. (Yosh. 14:12-14) Gindongo gianginyile mu Mavu a Gutendelela, giahanele gifezegeselo giabonga mu ndaga yatadila gulandula utuameji wa Yehowa. Tangua Yoshua wahinganele Moize ha gutuameza enya Isalele, ‘amunemesele masugu agasue a monyo wenji.’ (Yosh. 4:14) Gishina giene, Yehowa waashimbigile nu waahanele mavu alayele muene.​—Yosh. 21:43, 44.

8. Luholo lutshi Yehowa wakhalele mutuameza akombeledi enji mu tangua dia mafumu? Kotelesa. (Tala nji gifuanesa.)

⁸ Gungima dia ivo yavula, Yehowa watombele manzuji ha gutuameza akombeledi enji. Uvi tangua mafumu asendesele guhinyina Yehowa watombele baprofete ha gutuameza akombeledi enji. Mafumu akhalele a gujinginyina gudi Yehowa akhalele mulandula malongo akhalele mukatuga gudi baprofete. Ha gufezegesa,  Fumu Davidi watshiginyile lubelo luamuhanele profete Natana nu gudibulumuisa guagasue. (2 Sam. 12:7, 13; 1 Gudi. 17:3, 4) Fumu Yosafata walanduile utuameji wa profete Yahaziele nu wahanele enya Yuda gikhesa ha ‘gusha gutshigina gudi baprofete’ a Nzambi. (2 Gudi. 20:14, 15, 20) Tangua Fumu Ezekiase wataganele nu lamba, watogele ukuateshi gudi profete Yeshaya. (Yesh. 37:1-6) Tangua diagasue mafumu akhalele mulandula utuameji wa Yehowa, Yehowa wakhalele guashimbiga nu wakhalele mubamba akombeledi enji. (2 Gudi. 20:29, 30; 32:22) Athu agasue akhalele mukotelesa egi Yehowa wakhalele mukalegela baprofete ene ha gutuameza akombeledi enji. Uvi mafumu avula nu enya Isalele ako, ategelelego baprofete a Yehowa.​—Yel. 35:12-15.

LUHOLO LUTSHI YEHOWA WATUAMEZELE AKLISTO A MU SIEKLE YA THOMO?

9. Yehowa watombele nanyi ha gutuameza Aklisto mu siekle ya thomo? (Tala nji gifuanesa.)

⁹ Mu siekle ya thomo, gungima dia guvalewa gua Yesu (G.Y.) Yehowa wazolele hungu dia Uklisto. Luholo lutshi Yehowa watuamezele Aklisto a mu tangua diene? Watombele Yesu ha gubua fumu wa hungu. (Ef. 5:23) Yesu gatombelego alandudi enji agasue ha gutuameza. Uvi watombele apostolo nu akulu gu Yelusalema ha gutuameza. (Makal. 15:1, 2) Akulu atombewe nji ha gutuameza ma hungu.​—1 Tes. 5:12; Tito 1:5.

10. a) Aklisto a mu siekle ya thomo atshiginyile utuameji wa apostolo ba? (Makal. 15:30, 31) b) Mukunda natshi athu ako atunyile athu Yehowa watombele ha guatuameza? (Tala galuanda “ Mukunda Natshi Athu ako Anago Gutshigina egi Yehowa Wana Kalegela Athu ha Gutuameza Akombeledi Enji?”)

¹⁰ Aklisto a mu siekle ya thomo atshiginyile utuameji wa apostolo ba? Avula mukatshi diawo akhalele musuanguluga nu malongo akhalele guahanewa, akhalele nji guakalegela. Yadiago, “asuangulugile mangololo luholo ahetele mbimbi jiakhalele guahana ngolo.” (Tanga Makalegelo 15:30, 31.) Luholo lutshi Yehowa wana tuameza akombeledi enji mu masugu etu?

LUHOLO LUTSHI YEHOWA WANA TUAMEZA AKOMBELEDI ENJI MANGINO?

11. Hana gifezegeselo gidi mumonesa egi Yehowa wakuatesele athu akhalele mutuameza akombeledi enji mu ivo yabalega.

¹¹ Mangino, Yehowa wana landula gutuameza akombeledi enji. Wana guyitshita mu njila ya Biblia nu mu njila ya Yesu, fumu wa hungu. Tudi nu ijiyishilo idi mumonesa egi mangino Nzambi wana landula gukalegela athu ha gutuameza  akombeledi enji ba? Ayi. Ha gufezegesa, tangiza ndaga jiabuile gungima dia givo 1870. Charles Taze Russell nu mafuta enji asendesele gukotelesa egi givo 1914 mbagikhala givo gia ndando mukunda nu Ufumu Nzambi. (Dan. 4:25, 26) Ajiyile ndaga yene handaga atshitshile ba recherche mu Biblia nu ashile mutshima egi mbaamona gutagenesewa gua profesi yene. Yehowa waakuatesele ha gukotelesa profesi yene ba? Ayi. Ndaga jiakalegewe mu givo 1914, jiamonesele egi Ufumu wa Nzambi wasendesele guhinyina mu givo giene. Ita ya Thomo ya ha Mavu Agasue yabatele misongo ya gisambugila, gudigita gua mavu nu nzala. (Luka 21:10, 11) Idi yadiago egi Yehowa wakhalele mukuatesa Aklisto awa a mitshima yatagana ha gukuatesa akombeledi enji.

12-13. Luholo lutshi aphangi alondele ndaga ha gulongesa lukuma luabonga mu sungi ya Ita ya Mbadi ya ha Mavu Agasue?

¹² Tutadilenu nji ndaga jiabuile mu sungi ya Ita ya Mbadi ya ha Mavu Agasue. Tangua aphangi a gu hunji dia akulu atuameji alongugile ndaga jidi mu Gumonesa 17:8, akotelesele egi Ita ya Mbadi ya ha Mavu Agasue yakhalelego naye gubata gu Alemagedona. Uvi ajiyile egi gungima dia ita yene, mbagukhala nu sungi ya guhuima inyi mbayihana Matemue a Yehowa luendu lua gulongesa lukuma luabonga gudi athu avula. Ikhale yakhalele lamba mu tangua diene, uvi ulondegi wa Yehowa wazolele Khalasa dia Gileade ha guhana formasio gudi bamisionere ha gulongesa lukuma luabonga ha mavu a mudidi. Bamisionere ene atumiwe ha guya mulongesa lukuma luabonga ikhale mu sungi ya ita. Muhiga wafubidila nu watema wazolele nji khalasa diko diakhalele mutamegewa egi cours pour le ministère théocratique b ha guhana formasio gudi athu agasue mu mahungu ha gubua alongeshi abonga. Makhalasa ene ana kuatesa akombeledi a Nzambi ha gudilondega muabonga mukunda nu mudimo wa gulongesa.

¹³ Mangino tuana mona egi Yehowa watuamezele akombeledi enji mu tangua dia lamba. Sendese mu Ita ya Mbadi ya ha Mavu Agasue, akombeledi a Yehowa ana longesa lukuma luabonga mu guhuima mu ifutshi yavula. Ana longesa athu agasue a ha mavu. Ndaga yene yana kuatesa athu avula ha gujiya Yehowa.

14. Mukunda natshi tudi naye gusha mutshima mu utuameji wana gutuhana ulondegi wa Yehowa nu gudi akulu atombewe? (Gumonesa 2:1) (Tala nji gifuanesa.)

¹⁴ Mangino, aphangi a gu Hunji dia Akulu Atuameji ana landula gukamba utuameji gudi Klisto. Ana tshigina egi malongo adi muhana aphangi akhale gudivua nu gutshigina gua Yehowa. Gungima ana wambela atadi awendji nu akulu ha guhana malongo ene mu mahungu. c Akulu ene ambiwe maji mu nyuma ana khala gu ‘koko dia madia’ dia Klisto. (Tanga Gumonesa 2:1.) Uvi akulu awa agasue ashigo athu atagana; ana jimbila nji. Matangua ako apostolo akhalele nji mujimbila gifua luholo Moize nu Yoshua akalegele. (Lutang. 20:12; Yosh. 9:14, 15; Roma 3:23) Yesu wana tuameza muabonga muhiga wa fubidila nu watema nu akulu atombewe. Mbawulandula nji gutshita ngenyi “masugu agasue uu nu gu gisugishilo gia mavu awa.” (Mat. 28:20) Tudi diago nu ndaga jiavula jidi gututuma ha gusha mutshima mu utuameji wa Yesu mu njila ya athu atombele muene ha gutuameza.

TUANA HETA GUBONGA TANGUA TUANA LANDULA UTUAMEJI WA YEHOWA

15-16. Malongo atshi wajiya guzula mu mene jia aphangi alanduile utuameji wa Yehowa?

¹⁵ Tuana heta gubonga sendese mangino tangua tuana landula utuameji wa Yehowa. Ha gufezegesa, phangi Andy nu mukaji’enji Robyn alanduile malongo a muhiga wafubidila nu watema ha gusombegesa ndaga jiko mu monyo wawo. (Heb. 13:5) Adihanele mu mudimo wa gutunga Jinzo jia Ufumu nu Jinzo jiko jia Matemue a Yehowa. Phangi Robyn udi muzuela egi: “Matangua ako tuakhalele mukhala mu tunzo tuazonda, tuakhalelego nji nga nu gikhukhu. Ngakhalele musuanguluga gukuata foto, uvi ngadigile ba apareyi ami avula agukuatela foto. Tangua ngadigile ba apareyi ene, ngadidile muavula. Uvi gifezegeselo gia Sara mukaji’a Abalahama giangukuatesele ha gutuna gutala gungima uvi phamba gutuama.” (Heb. 11:15) Gubonga gutshi phangi Andy nu mukaji’enji ahetele? Phangi Robyn udi muzuela egi: “Tuana khala nu gusuanguluga guavula ha gujiya egi tuana hana Yehowa ima yetu yagasue tuana khala nayo. Tangua tuana tshita mudimo wa Yehowa, tuana mona luholo lujingu mbalukhala mu mavu ahe-ahe.” Phangi Andy udi mutshiginyisa egi: “Tuana khala nu gusuanguluga handaga tuana hana tangua dietu nu ngolo jietu mu mudimo wa Yehowa.”

¹⁶ Gubonga gutshi guko tuajiya guheta gula tudi mulandula utuameji wa Yehowa? Tutadilenu gifezegeselo gia phangi Marcia. Hazudile muene  diplome, wakhalele mutshigina gubua muvundji wa njila. (Mat. 6:33; Roma 12:11) Udi muzuela egi: “Ngahetele luendu lua guya mulonguga gu université mukunda nu ivo nguana. Uvi ngakhalele nji mutshigina gutagenesa mafelela ami a mu nyuma. Hene ngatombele gukalagala formasio yajiya gungukuatesa ha guheta makuta ajiya gungukuatesa mu mudimo wami wa muvundji wa njila. Yakhalele badesizio abonga diago ngazudile. Henyaha ngudi nu gusuanguluga luholo ngudi muvundji wa njila, ngudi nji volontere gu Betele, ngana kalagala nji ndaga jiko jiavula mu mudimo wa Yehowa.”

17. Gubonga gutshi guko tuajiya guheta gula tualandula utuameji wa Yehowa? (Yeshaya 48:17, 18)

¹⁷ Matangua avula, ulondegi wa Yehowa wana gutuhana malongo ana gutukuatesa ha gutuna gubua mu muheto wa gukamba umonyi wavula-vula nu ndaga jiajiya gututuma ha gushiya mikhuala ya Nzambi. Tuana heta gubonga gula tudi mulandula utuameji wa Yehowa. Tuana bamba mutshima waphelegeta, tuana gudibamba nji gu ndaga jiajiya gutubatela malamba. (1 Tim. 6:9, 10) Gutshita ngenyi guana gutukuatesa ha gulandula gukombelela Yehowa nu gukhala nu gusuanguluga guavula nu guhuima.​—Tanga Yeshaya 48:17, 18.

18. Mukunda natshi wazula desizio dia gulandula utuameji wa Yehowa?

¹⁸ Idi yadiago egi Yehowa mbawulandula gukalegela athu ha gutuameza akombeledi enji mu tangua dia lamba diakola nu mu Uhinyinyi wa ivo 1 000 wa Klisto. (Ngi. 45:16) Mbatulandula diago utuameji wene ikhale malongo ene ashigo gudivua nu ndaga tudi mutshigina ba? Mbayikhala yaleba gula tudi mulandula utuameji wa Yehowa sendese mangino. Hene, tutshitenu yagasue ha gulandula utuameji wa Yehowa nu gutumagela athu atombele muene ha gututuameza. (Yesh. 32:1, 2; Heb. 13:17) Tulandulenu gushila Yehowa Mutuameji wetu mutshima handaga wana gutubamba mu ndaga jiajiya gubolesa ufuta wetu n’enji nu mbawutuhana monyo wa ivo nu ivo mu mavu ahe-ahe.