1. Tangua ditshi Aklisto agasue ambiwe maji mu nyuma mbaaya mu dilu?

 SENDESE mualeha, akombeledi a Yehowa ana gudihula egi: ‘Tangua ditshi Aklisto ambiwe maji mu nyuma asala ha mavu mbaaya mu dilu?’ Thomo tuakhalele mutangiza egi gungima dia ita ya Alemagedona, Aklisto ako ambiwe maji mu nyuma ajiya gukhala ha mavu nu gujinga mu phaladiso mukunda nu tangua diazonda. Uvi mu Inzo Yaleha ya Mutaledi ya 15 Juillet 2013, tualongugile egi, gutuama egi ita ya Alemagedona isendese, Aklisto agasue ambiwe maji mu nyuma mbaakhala ayi gale mu dilu.​—Mat. 24:31.

2. Muhu utshi tuajiya gudihula? Itshi tuza muzuelela mu longo edi?

² Uvi athu ako mukatshi dietu ajiya gudihula egi: Itshi mbayibuila “imeme iko” ya Klisto inyi mbayilandula gukombelela Yehowa nu gujinginyina guagasue mu tangua dia “lamba diakola”? (Yone 10:16; Mat. 24:21) Mangino athu ako ajiya gudisagesa egi mbaashigo mukhala nu athu aguakuatesa nga aguatuameza tangua Aklisto ambiwe maji mu nyuma mbaaya mu dilu. Tutadilenu mene mbadi jia Biblia jiajiya guatuma ha gutangiza ngenyi. Gungima tuza mumona mukunda natshi ishigo nu ndando ha gudisagesa.

ITSHI MBAYISHIGO MUBUILA IMEME IKO?

3-4. Mihu itshi athu ako ajiya gudihula? Mukunda natshi?

³ Athu ajiya gudihula gula imeme iko mbayibemba gukombelela Yehowa tangua Aklisto ambiwe maji mu nyuma a gu Hunji dia Akulu Atuameji mbaabemba guatuameza. Aphangi ene ajiya gudivua ngenyi mukunda nu mene jiko jidi mu Biblia. Tutadilenu ifezegeselo mbadi. Gia thomo gidi mutadila Nganga-nzambi wakoma Yoyada. Wakhalele mukombelela Nzambi nu gujinginyina guagasue. Muene nu mukaji’enji Yehosheba abambele Yoase, amukuatesele nji ha gubua fumu wabonga nu wagujinginyina gudi Yehowa. Tangua Yoyada wakhalele nu monyo, Yoase wakhalele mukombelela Yehowa nu gukalagala ndaga jiabonga. Uvi tangua Yoyada  wafuile, Yoase wasendesele gukalagala ndaga jiabola. Watshiginyile matangi abola amuhanele manene, hene wabembele gukombelela Yehowa.​—2 Gudi. 24:2, 15-19.

⁴ Gifezegeselo gia mbadi gidi mutadila Aklisto ajingile gungima dia gufua gua apostolo. Mupostolo Yone wajingile muavula gubalega apostolo ako, wakhalele nji gifezegeselo giabonga mukunda nu Aklisto avula; waakuatesele ha gukolesela mu mudimo wa Yehowa. (3 Yone 4) Gifua muayitshitshile apostolo ako a Yesu, mupostolo Yone nji watshitshile mudimo wakola ha gubamba hungu gudi athu akhalele nu matangi a mambo nu ndaga jiabola. (1 Yone 2:18; tala note d’étude ya 2 Tes. 2:7.) Uvi gungima dia gufua gua Yone, athu avula a mu hungu alanduile malongo a ba aposta. Ivo yazonda gungima, ba aposta ene asendesele gulongesa malongo avula a mambo, abembele nji egi athu agasue mu mahungu asendese gukalagala ndaga jiabola.

5. Ndaga itshi tushigo naye guzuela mukunda nu mene eji mbadi?

⁵ Ifezegeselo eyi mbadi ya mu Biblia idi mumonesa egi tangua Aklisto ambiwe maji mu nyuma mbaaya mu dilu, imeme iko ya Klisto mbayisendesa gutshita ndaga jiabola gifua luholo Yoase wakalegele ba? Nga ndo mbaabua ba aposta gifua luholo Aklisto avula a mu siekle ya mbadi ayitshitshile gungima dia gufua gua apostolo? Ndo sha! Tuajiya gusha mutshima egi tangua Aklisto ambiwe maji mu nyuma mbaaya mu dilu, imeme iko mbayilandula gukombelela Yehowa mu luholo luabonga, Yehowa nji mbawulandula gutuhana ima tudi nayo funu. Itshi idi gututshiginyisa?

AKOMBELEDI A YEHOWA MBAALANDULA GUMUKOMBELELA MU LUHOLO LUANA TSHIGINA MUENE

6. Sungi jitshi thathu tuza muzuelela mu guhihia mu longo edi?

⁶ Mukunda natshi tudi musha mutshima egi akombeledi a Yehowa mbaalandula gumukombelela mu luholo luana tshigina muene ikhale tangua mbaatagana nu malamba mu masugu adi muza? Handaga Biblia yana monesa egi sungi tudi mujinga idi yagudisha diago nu sungi ya enya Isalele ya mutangua dikulu nu sungi Aklisto ajingile mu siekle ya mbadi. Henyaha tuzuelelenu muabonga sungi jiene thathu: 1) Sungi ya enya Isalele a mu tangua dikulu, 2) sungi yajingile Aklisto gungima dia gufua gua apostolo, 3) sungi yetu, yakotelesa egi, sungi ya ‘guvutula luko ndaga jiagasue luholo jiakhalele thomo.’​—Makal. 3:21.

7. Mukunda natshi athu akhalele yagujinginyina gu Isalele akhalelego naye gutotesa felela diawo tangua mafumu nu athu ako avula asendesele gutshita ndaga jiabola?

⁷ Sungi ya enya Isalele a mu tangua dikulu. Matangua azonda gutuama egi Moize afue, wawambelele enya Isalele egi: ‘Ngudi mujiya muabonga egi gungima dia gufua guami, mbamubua mu gubola, mbamutuna malongo agasue ngamilongesele.’ (Mikh. 31:29) Moize watemesele nji enya Isalele egi, gula alumbugila Yehowa adi naye guya mu uhiga. (Mikh. 28:35, 36) Mbimbi jia Moize jiataganesewe ba? Ayi. Mafumu avula a gu Isalele akhalele mukalagala ndaga jiavula jiabola gu meso a Yehowa mu ivo yavula, enya Isalele alanduile nji gukombelela nzambi jia mambo. Ndaga yene yatumine Yehowa ha guahana ndola nu gabembelego egi mafumu a gu Isalele alandule guahinyina luko. (Ezek. 21:25-27) Uvi tangua enya Isalele asalele agujinginyina gudi Yehowa amonele gutagenesewa gua mbimbi jienji, ndaga yene yaahanele gikhesa alanduile nji gumukombelela nu gujinginyina guagasue.​—Yesh. 55:10, 11.

8. Tudi naye gudihula luholo Aklisto a mu siekle ya mbadi abuile ba aposta ba? Kotelesa.

⁸ Sungi yajingile Aklisto gungima dia gufua gua apostolo. Tudi naye gudihula ha gujiya egi Aklisto ajingile mu siekle ya mbadi, akhalelego mukombelela Yehowa luholo luakhalele mutshigina muene ba? Ndo sha. Yesu wadiangele guzuela egi athu avula mbaanginyisa malongo a mambo mu hungu. (Mat. 7:21-23; 13:24-30, 36-43) Mupostolo Phaula, Phetelo nu Yone azuelele  egi profesi ya Yesu yasendesele gutagenesewa mu siekle ya thomo Gungima dia guvualewa gua Yesu. (G.Y.) (2 Tes. 2:3, 7; 2 Phet. 2:1; 1 Yone 2:18) Mu siekle ya mbadi ya tangua dietu, malongo a mambo anginyile mu gikombelelo gia giamatshidia. Gungima dia gufua gua apostolo, Aklisto anyi abuile ba aposta, adinginyishile mu Babilona Yakoma. Ndaga jiazuelele Yesu jiataganesewe.

9. Mu luholo lutshi sungi yetu idi yagudisha nu sungi ya Isalele ikulu nu mu tangua ba aposta anginyile mu hungu dia Uklisto?

⁹ “Tangua dia guvutula luko ndaga jiagasue luholo jiakhalele thomo.” Sungi yetu idi yagudisha nu sungi ya enya Isalele ikulu, idi nji yagudisha nu sungi inyi malongo a ba aposta anginyile mu gikombelelo gia giamatshidia mu siekle ya mbadi, Gungima dia Guvualewa gua Yesu (G.Y.) Sungi yetu yana tamegewa egi itshi? Yana tamegewa egi “masugu a gisugishilo” a uhinyinyi wa ndaga jiabola. (2 Tim. 3:1) Biblia yana monesa nji egi sungi yakoma nu yaleha mbayisendesa nji mu tangua diene dimoshi. Sungi yene mbayilandula guya uu nu tangua Ufumu wa Masiya mbawubuisa athu agasue atagana nu mbawubuisa mavu phaladiso. Biblia yana tamega sungi yene egi, “tangua dia guvutula luko ndaga jiagasue luholo jiakhalele thomo.” (Makal. 3:21) Sungi yene yasendesele mu 1914. Ndaga jitshi jiavutudiwe luko? Nzambi wabuishile Yesu Fumu mu dilu. Yehowa wahetele luko fumu wakhalele gifua mumoneshi wenji, fumu muene wakhalele mujigulu wa Fumu Davidi. Uvi Yehowa gavutudilego phamba ufumu wene. Gungima wasendesele guvutula gikombelelo gia giamatshidia! (Yesh. 2:2-4; Ezek. 11:17-20) Malongo a mambo mbaangina luko mu gikombelelo gia giamatshidia ba?

10. a) Ndaga itshi Biblia yadiangele guzuela mukunda nu gikombelelo gia giamatshidia mu masugu etu? (Yeshaya 54:17) b) Mukunda natshi profesi jiene jidi gutuhana gikhesa?

¹⁰ Tanga Yeshaya 54:17. Tangiza gale ndaga jidi muzuela profesi eyi: ‘Gushigo nga giluilo gimoshi gialondewe ha gugutshita gubola mbagibinga’! Mbimbi eji jiasonegewe mu ukuateshi wa nyuma ya Nzambi jidi mutagenesewa mangino. Mbimbi jidi mu Yeshaya 54:13, 14 jiana gutuhana nji gikhesa mangino. Verse jiene jidi muzuela egi: ‘An’aye agasue mbaalongesewa gudi Yehowa nu mbaakhala mu guhuima guavula. Gubonga nu giamatshidia mbagugukolesa. Mbawuvuigo woma nga wa gima gimoshi, gushigo nga nu gima gimoshi mbagiguhana woma.’ (Yesh. 54:13, 14) Nga muene Satana “nzambi wa ha mavu awa,” gashigo nu ngolo jia gukanga mudimo wa gulongesa lukuma luabonga. (2 Kol. 4:4) Gikombelelo gia giamatshidia giavutudiwe gale, malongo a mambo mbaashigo mungina luko mu gikombelelo giene. Gikombelelo giene mbagisala mayilago. Gushigo nga giluilo gimoshi mbagilondewa ha gututshita gubola mbagibinga!

 NDAGA ITSHI MBAYIBUILA IMEME IKO?

11. Ndaga itshi idi gututshiginyisa egi Yehowa mbagashigo mubemba nga hazonda thundu yakoma ya athu tangua Aklisto ambiwe maji mu nyuma mbaaya mu dilu?

¹¹ Tangua Aklisto ambiwe maji mu nyuma mbaaya mu dilu, itshi mbayibuila imeme iko? Tujimbilago egi Yesu udi Mubambi wetu. Muene udi fumu ya hungu dia Uklisto. Yesu wazuelele egi: “Mudi nu Fumu phamba mumoshi, Klisto.” (Mat. 23:10) Fumu wetu Yesu mbawulandula guhana alandudi enji ima adi nayo funu. Alandudi a Klisto ashigo naye guvua woma nga wa gima gimoshi handaga muene wana guatuameza. Idi yadiago egi tuanago gujiya ndaga jiagasue jidi mumonesa luholo Klisto mbawutuameza alandudi enji mu tangua diene. Henyaha tutadilenu ifezegeselo ya Biblia iko yajiya gutukuatesa ha gusha gutshigina mu ndaga yene.

12. Luholo lutshi Yehowa wahanele akombeledi enji ima akhalele nayo funu, a) gungima dia gufua gua Moize? b) tangua Eliya wahetele ginemo giko? (Tala nji gifuanesa.)

¹² Moize wafuile gutuama egi enya Isalele angine mu Mavu a Gutendelela. Ndaga itshi yabuidile akombeledi a Nzambi? Yehowa wabembele gukuatesa akombeledi enji gungima dia gufua gua Moize ba? Ndo sha. Tangua akhalele mutumagela Yehowa, muene wakhalele guahana ima yagasue akhalele nayo funu. Gutuama egi Moize afue, Yehowa wamuwambelele ha gutomba Yoshua ha gutuameza athu enji. Moize wahanele Yoshua formasio ivo yavula. (Guz. 33:11; Mikh. 34:9) Guakhalele nji nu mala avula atagana akhalele mutuameza athu, akhalele: Mafumu a athu 1 000, ako mafumu a athu 100, ako mafumu a athu 50 nu mafumu a athu 10. (Mikh. 1:15) Akhalele mutagenesa nzala jia akombeledi a Nzambi muabonga diago. Ndaga yene idi luholo lumoshi nu ndaga yabuidile Eliya. Watshitshile mudimo wakola ivo yavula ha gukuatesa enya Isalele ha gukombelela Yehowa. Uvi gungima Yehowa wamuhanele mudimo uko wa gutshita gu Yuda. (2 Maf. 2:1; 2 Gudi. 21:12) Yehowa wabembele gukuatesa akombeledi enji agujinginyina akhalele mu ufumu wa iphuta 10 ya enya Isalele ba? Ndo. Eliya wahanele Elisha formasio mu ivo yavula. Ahanele nji formasio yene gudi ‘ana a baprofete.’ (2 Maf. 2:7) Guakhalele nu mala avula atagana ha gutuameza akombeledi a Nzambi. Yehowa walanduile gutagenesa gutshigina guenji, walanduile nji gubamba athu ana gumukombelela nu mutshima umoshi.

13. Mbimbi jitshi jidi muhana gikhesa jidi mu Hebelu 13:5b? (Tala nji gifuanesa.)

¹³ Ha gutadila ifezegeselo eyi tuamona, itshi mbayibua tangua Aklisto ambiwe maji mu nyuma mbaaya mu dilu? Tushigo naye gudisagesa handaga Biblia idi gutuwambela giamatshidia gidi gutuhana gikhesa egi: Yehowa mbagashigo mubemba akombeledi a ha mavu nga hazonda.  (Tanga Hebelu 13:5b.) Thundu yazonda ya Aklisto ambiwe maji mu nyuma yana tuameza akombeledi a Nzambi mangino, yana kotelesa egi guhana athu ako formasio luholo Moize nu Eliya akalegele, gudi nu ndando yavula. Sendese mualeha, aphangi a gu Hunji dia Akulu Atuameji ana hana aphangi a mala a mukatshi dia imeme iko formasio ha gutuameza akombeledi a Nzambi. Ha gufezegesa, aphangi ene alondele makhalasa avula ha guhana formasio gudi akulu nu atadi awendji nu aphangi ana tshita mudimo gu Komite ya Filiale nu aphangi ana tuameza midimo gu Betele nu athu ako. Aphangi a gu Hunji dia Akulu Atuameji ene hakhawo ana hana formasio gudi aphangi ana guakuatesa ha gutshita mu komite jia gudisha jia gu Hunji dia Akulu Atuameji. Mangino akuateshi ene ana tuamezewa gudi Nzambi ana tagenesa inemo yavula mu ulondegi wa Yehowa. Adi yagudilondega muabonga ha gulandula gutshita mudimo wa guhana imeme ya Klisto ima adi nayo funu.

14. Matangi atshi a ndando tudi naye gukuata mu longo edi?

¹⁴ Matangi a ndando tudi naye gukuata mu longo edi adi egi: Tangua Aklisto ambiwe maji mu nyuma a gisugishilo mbaaya mu dilu hehi nu gisugishilo gia lamba diakola, akombeledi a Nzambi mbaakhala ha mavu mbaalandula gumukombelela nu gujinginyina guagasue. Tudi mujiya egi mutangua diene, thundu ya ifutshi Biblia yana tamega egi Goga wa gu Magoga mbaaluisa akombeledi a Nzambi. (Ezek. 38:18-20) Uvi uluishi wene wa tangua diazonda mbawushigo mubinga; mbaashigo mukanga akombeleledi a Nzambi njila ha gukombelela Yehowa. Yehowa mbawuhuluisa akombeledi enji! Mupostolo Yone wamonele “thundu yakoma” ya imeme iko ya Klisto mu vizio. Yehowa wawambelele Yone egi ‘thundu yene yakoma’ ya athu, yakatuga “mu lamba diakola.” (Gumo. 7:9, 14) Yadiago, esue mujiya egi Yehowa mbawahuluisa!

15-16. Hagutadila Gumonesa 17:14, ndaga itshi Aklisto ambiwe maji mu nyuma mbaakalagala mutangua dia ita ya Alemagedona? Ndaga itshi idi gutuhana gikhesa?

¹⁵ Uvi athu ako ajiya gudihula egi: ‘Mudimo utshi Aklisto ambiwe maji mu nyuma mbaaya mutshita mu dilu? Biblia idi muhana mvutu gu muhu wene. Yana monesa egi baguvernema a ha mavu awa ‘mbaalua ita nu Mun’a Gimeme.’ Uvi mbaashigo mubinga nga hazonda. Biblia idi muzuela egi: “Mun’a Gimeme mbawaabinga.”  Akuatshi mbaamukuatesa ha gulua ita yene? Verse idi muhana mvutu egi athu anyi “Nzambi watamegele” nu “watombele” nu “adi agujinginyina” gudi muene. (Tanga Gumonesa 17:14.) Athu ene adi akuatshi? Adi Aklisto ambiwe maji mu nyuma anyi mbaafuzumuga ha guya mu dilu! Hene tangua Aklisto ambiwe maji mu nyuma anyi asala ha mavu mbaaya mu dilu hehi nu gisugishilo gia lamba diakola, ndaga ya thomo mbaakalagala idi gulua ita. Ginemo gia ndando diago! Aklisto ako ambiwe maji mu nyuma akhalele mulua ita gutuama dia gubua Matemue a Yehowa. Ako akhalele masuta. Uvi tangua abuile Aklisto a giamatshidia, alongogugile ha gujinga mu guhuima nu athu ako. (Gal. 5:22; 2 Tes. 3:16) Abembele gudinginyisa mu ndaga jia ita. Uvi gungima dia gufuzumuga ha guya mu dilu, mbaaya mutshita mudimo hamoshi nu Klisto nu anjelo enji a gijila ha guluisa mbalagaji jia Nzambi gu ita ya gisugishilo.

¹⁶ Tangiza gale ndaga eyi! Aklisto ako ambiwe maji mu nyuma adi ha mavu awa, adi athu a gukola nu ashigo luko nu ngolo jiavula. Uvi tangua mbaafuzumuga ha guya mu dilu, mbaakhala nu ngolo, mbaabua athu a mu nyuma anyi ajiyilego gufua, mbaalua hamoshi nu Yesu Klisto, suta dia ngolo. Gungima dia ita ya Alemagedona, mbaatshita mudimo hamoshi nu Yesu ha gukuatesa athu ha gubua athu atagana. Idi yadiago egi tangua mbaakhala mu dilu, mbaakuatesa aphangi’awo a mala nu a akhetu anyi ana zumba muavula adi ha mavu gubalega tangua akhalele mujinga ha mavu!

17. Luholo lutshi tudi mujiya egi Nzambi mbawubamba akombeledi enji agasue mutangua dia ita ya Alemagedona?

¹⁷ Udi mukatshi dia imeme iko ba? Gula idi ngenyi, itshi mbawutshita tangua ita ya Alemagedona mbayisendesa? Ndaga wajiya gukalagala yene eyi: Khala mushila Yehowa mutshima, khala nji mulandula utuameji wenji. Idi mukotelesa itshi? Mbimbi eji jia Biblia jidi gutuhana gikhesa. Jidi muzuela egi: ‘Nginenu mu sugu jienu, kangenu ijidigo yenu, disuegenu uu nu tangua khabu jiami mbajihua.’ (Yesh. 26:20) Mu tangua diene, Yehowa mbawuhuluisa akombeledi enji agasue agujinginyina adi mu dilu nu ha mavu. Gifua mupostolo Phaula, tuana gusha mutshima egi gushigo nga ‘guvernema, nga ima idi guene mangino, nga ima mbayiza . . . yajiya gutukhaphumuna mu guzumba guatumonesele Nzambi.’ (Roma 8:38, 39) Hene tubuitshigo mutshima egi: Yehowa wana gutuzumba muavula, nu mbagashigo gutubemba nga hazonda!