1-2. Itshi yajiya gutukuatesa ha gukotelesa luholo Yehowa wadivile mukunda nu mambo Satana wamumbidile?

 TANGIZA egi muthu mumoshi wana kuatesa, wasendesa guzuela ndaga jiabola mukunda nu aye. Wajiya egi idi ndaga ya mambo uvi athu ako adi guyitshigina. Luholo lutshi wajiya gudivua gula ndaga yene ishigo gugusuanguluisa, uvi ene asendesa guyizuelela muavula nu athu avula nji adi guyitshigina? Gula wana gudisagesa mukunda nu athu ako nu wana tshigina gubamba lukuma luaye, ndaga jiene jia mambo jiajiya gugulebesa diago muila.​—Ish. 22:1.

² Lumene elu luajiya gutukuatesa ha gukotelesa luholo Yehowa wadivuile tangua lukuma luenji luabolesewe. Muanjelo mumoshi mukatshi dia anjelo enji, wamumbidile mambo gudi Eva. Eva watshiginyile mambo ene. Mambo ene atumile mvuaji jietu jia thomo ha gulumbugila Yehowa. Hene athu agasue ana tshita gubola nu ana gufua. (Gis. 3:1-6; Roma 5:12) Mambo ambile Satana mu dihia dia Edene, ana gutubatela ndaga jiagasue tudi mutagana najio mangino gifua, gufua, ita nu malamba ako. Idi yadiago egi Yehowa wana guvua gikenene mukunda nu ndaga jiene jia mambo nu malamba ana gutubuila mukunda nu mambo ene. Gana suanguluga ndo mukunda nu ndaga jiene nu wana khala nu khabu jiakola. Uvi muene wana landula gukhala “Nzambi wa gusuanguluga.”​—1 Tim. 1:11.

3. Luendu lutshi tudi nalo?

³ Tuajiya gumonesa mu makalegelo etu egi Satana wambile mambo mukunda nu Yehowa gula tudi mutumagela mukhuala owu udi muzuela egi: ‘Tumbuisenu jina dia Yehowa.’ (Ngi. 113:1) Tuana tumbuisa jina dia Yehowa tangua tuana wambela athu ako giamatshidia  giatadila jina dienji dia gijila. Aye nji wana tumbuisa jina dia Yehowa ba? Tutadilenu ndaga thathu jia ndando jiajiya gutukuatesa ha gutumbuisa jina dia Yehowa Nzambi wetu nu mutshima umoshi.

TUANA SUANGULUISA YEHOWA TANGUA TUANA TUMBUISA JINA DIENJI

4. Mukunda natshi gutumbuisa Yehowa guana gumusuanguluisa? Hana gifezegeselo. (Tala nji gifuanesa.)

⁴ Tuana suanguluisa Tata wetu wa mu dilu tangua tuana tumbuisa jina dienji. (Ngi. 119:108) Ndaga yene idi mumonesa egi Yehowa Nzambi wa ngolo jiagasue udi gifua athu ashigo atagana anyi ana khala nu funu egi athu ako a atumbuise nu a ahane gikhesa ba? Ndo sha. Tutadilenu gifezegeselo egi. Tangiza gale egi mona mukhetu mumoshi wa galenge wakuata sh’enji mu shingo nu udi gumuwambela egi: “Udi tata wabonga gubalega a tata agasue a ha mavu!” Sh’enji wa muemueta nu wasuanguluga mukunda nu ndaga yene. Mukunda natshi? Idi mukotelesa egi sh’enji wakhadi nu funu egi mun’enji wa mukhetu amutumbuise nu a muhane gikhesa ba? Ndo sha. Uvi idi handaga tata muene wana zumba mun’enji wa mukhetu nu udi nu gusuanguluga egi mona muene amuzumbe nji nu amuhane mersi mukunda nu ndaga jiana gumukalegela muene. Udi nji mujiya egi makalegelo ene mbaakuatesa mun’enji wa mukhetu ha gukhala nu gusuanguluga gula wakula. Luholo lumoshi nji Yehowa Tata wetu wabalega gukoma wana khala nu gusuanguluga tangua tuana gumutumbuisa.

5. Tangua tuana tumbuisa Yehowa ndaga jitshi tuana monesa egi jidi jia mambo?

⁵ Tangua tuana tumbuisa Yehowa, tuana monesa egi ndaga jiazuelele Satana mukunda nu esue jidi nji jia mambo. Satana wazuelele egi gushigo nga nu muthu wajiya gutumbuisa jina dia Nzambi. Wazuelele egi gushigo nga muthu wajiya gusala yagujinginyina gudi Nzambi gula watagana nu lamba. Wazuelele nji egi gula tushigo muheta gishimbigo, mukut’etu agasue mbatubemba gukombelela Nzambi. (Yobo 1:9-11; 2:4) Uvi Yobo wasalele yagujinginyina gudi Nzambi nu wamonesele egi Satana udi muenya mambo. Aye nji mbawusala yagujinginyina gudi Nzambi ba? Mukut’etu agusue tudi nu luendu lua gutumbuisa jina dia Yehowa Tata wetu nu gumusuanguluisa gula tudi gumukalegela nu mutshima umoshi. (Ish. 27:11) Gutshita ngenyi gudi luendu luakoma.

6. Luholo lutshi tuajiya gulandula gifezegeselo gia Fumu Davidi nu gia enya Levi? (Nehemiya 9:5)

⁶ Athu anyi ana zumba Yehowa, ana tumbuisa jina dienji nu mutshima wawo wagasue. Fumu Davidi wasonegele egi: ‘Mbangutumbuisa Yehowa; ima yagasue idi mukatshi diami mbayitumbuisa jina dienji dia gijila.’ (Ngi. 103:1) Davidi wakotelesele egi gutumbuisa jina dia Yehowa idi gutumbuisa Yehowa muene hakhenji. Tangua tuana guvua jina dia Yehowa, tuana tangiza gula udi Nzambi wa luholo lutshi, tuana tangiza nji makalegelo enji  nu ndaga jia gushimana jiakalegele muene. Davidi wakhalele mutumbuisa jina dia Sh’enji wa mu dilu nu gumonesa egi didi dia gijila. Wayitshitshile nu ima ‘yagasue ya mukatshi dienji,’ yakotelesa egi nu mutshima wenji wagasue. Luholo lumoshi nji, enya Levi ahanele gifezegeselo giabonga mu ndaga yatadila gutumbuisa Yehowa. Azuelele nu gudibulumuisa guagasue egi, mbimbi jiawo jiakhalelego jiatagana ha gutumbuisa jina dia Yehowa dia gijila gifua luholo ludi naye muene gutumbuishiwa. (Tanga Nehemiya 9:5.) Idi yadiago egi Yehowa wasuangulugile luholo enya Levi amutumbuishile.

7. Luholo lutshi tuajiya gutumbuisa Yehowa mu mudimo wa gulongesa nu mu ndaga tuana tshita lusugu nu lusugu?

⁷ Mangino tuajiya gumonesa egi tuana suanguluisa Yehowa gula tudi mulongesa lukuma luabonga nu gikhesa, tudi gumuhana mersi mukunda nu ndaga jiatukalegele muene nu tudi gumuzumba. Tangua tuanaya mu mudimo wa gulongesa, felela dietu diathomo diana khala dia gukuatesa athu ako ha gubua mafuta a Yehowa, nu ha guakuatesa ha gudivua gifua luholo tuana gudivua mukunda nu tata wetu wa guzumba. (Yak. 4:8) Tuana khala nu gusuanguluga ha guwambela athu ako ndaga Biblia yana zuela mukunda nu Yehowa yatadila guzumba guenji, luholo luana tshita muene ndaga mu luholo luatagana, ndunge nu ngolo jienji nu makalegelo enji ako ana gutusuanguluisa. Esue nji tuana monesa egi tuana tumbuisa Yehowa nu tuana gumusuanguluisa gula tudi mutshita ngolo ha gulandula gifezegeselo gienji. (Ef. 5:1) Gula tudi mutshita ngenyi, tuana monesa egi tuanago gudinginyisa mu ndaga jiabola jia ha mavu awa. Ngenyi athu ako mbaamona egi tudi yagudisha nu enya ha mavu awa nu ajiya gudihula egi, mukunda natshi tudi yagudisha nawo. (Mat. 5:14-16) Tangua tudi mujinga nawo, tuajiya guakotelesela mukunda natshi tuana kalagala ndaga jia gudisha nawo. Ngenyi, athu adi nu mitshima yatagana, mbaakuata ufuta nu Yehowa Nzambi wetu. Gula tudi mutumbuisa Yehowa mu luholo elu, mbatumusuanguluisa.​—1 Tim. 2:3, 4.

TUANA SUANGULUISA YESU TANGUA TUANA TUMBUISA JINA DIA YEHOWA

8. Luholo lutshi Yesu wahanele gifezegeselo giabonga mu ndaga yatadila gutumbuisa jina dia Yehowa?

⁸ Gushigo nga nu muthu mumoshi mu dilu nga ha mavu, wana jiya Yehowa muabonga gubalega Yesu. (Mat. 11:27) Yesu wana zumba Sh’enji, hene wakhalele gifezegeselo giabonga mu ndaga yatadila gutumbuisa jina dia Yehowa. (Yone 14:31) Tangua diatshitshile muene gisambu gudi Sh’enji mu phipha gutuama egi afue, wamonesele ndaga ya ndando yakalegele muene ha mavu. Wazuelele egi: “Ngajiyishile jina diaye.” (Yone 17:26) Itshi Yesu watshiginyile guzuela?

9. Gifezegeselo gitshi Yesu wakalegele ha gukuatesa athu ha gujiya makalegelo a Yehowa muabonga?

⁹ Yesu galongeselego athu phamba egi jina dia Nzambi didi Yehowa, uvi waawambelele nji ndaga jiko jiavula. Enya Yuda anyi Yesu walongesele, akhalele mujiya jina dia Nzambi. Uvi Yesu ‘muene waakotelesele muabonga gula Tata udi nanyi.’ (Yone 1:17, 18) Ha gufezegesa, mikanda ya Biblia yasonegewe mu zuelelo dia Hebelu, yana monesa egi Yehowa udi Nzambi wa khenda nu wana gudisha ha fundo dia athu ako. (Guz. 34:5-7) Yesu wamonesele giamatshidia giene haphelo, tangua diatele muene gishima gia mona wa totele nu gia sh’enji. Tangua tuana tanga mu Biblia egi tata muene wamonele mun’enji munu wabalumuine mutshima hakhalele muene “ndambu gualeha,” wayile phushi gumutagana, wamuyambele, wamutotesele gubola guenji nu mutshima wagasue. Gishima egi gidi gutukuatesa ha gukotelesa muabonga egi Yehowa wana khala Nzambi wa khenda nu wana gudisha ha fundo dia athu ako. (Luka 15:11-32) Yesu wakuatesele athu ako ha gujiya Yehowa muabonga.

10. a) Luholo lutshi tudi mujiya egi Yesu wakhalele mukalegela jina dia Yehowa nu wakhalele mutshigina egi athu ako nji atshite ngenyi? (Mako 5:19) (Tala nji gifuanesa.) b) Ndaga itshi Yesu wana tshigina egi tukalagale mangino?

 ¹⁰ Yesu nji wakhalele mutshigina egi athu akalegele jina dia Sh’enji ba? Ayi. Yajiya gukhala egi mafumu ako a ikombelelo akhalelego mukalegela jina dia Nzambi handaga akhalele mutangiza egi gutshita ngenyi gudi gutuna gunemesa Nzambi. Uvi Yesu gabembelego egi ndaga jia luholo elu jimukange njila ha gutumbuisa jina dia Sh’enji handaga jiakhalelego mukatuga mu Biblia. Tutadilenu ndaga yatshitshile Yesu hazolele muene yala mumoshi bademo mu mavu a Gelasa. Athu avuile woma wavula nu abubidile Yesu ha gukatuga mu mavu ene uvi muene gakatugilego. (Mako 5:16, 17) Yesu wakhalele mutshigina egi jina dia Yehowa dijiyiwe guene. Hene wawambelele muthu muene ha guwambela athu egi ishigo Yesu wamusagele uvi Yehowa wamusagele. (Tanga Mako 5:19.) a Mangino nji Yesu wana tshigina egi tulongese athu ako jina dia Sh’enji ha mavu a mudidi! (Mat. 24:14; 28:19, 20) Gula tudi mutshita ngenyi, tuana suanguluisa Fumu wetu Yesu.

11. Yesu walongesele alandudi enji ha gukombelela mukunda nu ndaga itshi? Mukunda natshi idi nu ndando? (Ezekiele 36:23)

¹¹ Yesu wajiyile egi gutshigina gua Sh’enji guana khala egi jina dienji dinemesewe nu guzola haphelo mambo Satana wamumbidile. Gishina giene Fumu wetu walongesele alandudi enji ha gukombelela egi: “Tata wetu udi mu dilu, jina diaye dinemesewe.” (Mat. 6:9) Yesu wakotelesele egi ima yagasue yafugiwe idi naye gunemesa jina dia Nzambi. (Tanga Ezekiele 36:23.) Gushigo nga gima gimoshi mukatshi dia ima yafugiwe mu dilu nga ha mavu yana nemesa jina dia Yehowa gubalega Yesu. Hakuatewe Yesu, mbalagaji jienji jiamufundile egi washingile Nzambi! Yesu wajiyile egi gubolesa nu gushingisa jina dia gijila dia Sh’enji guakhalele gubola guakoma diago. Wakhalele gudisagesa muavula handaga athu akhalele naye gumufunda mukunda nu ndaga yene. Yajiya gukhala egi yene ndaga yahanele Yesu “gikenene giavula” mu matangua a gisugishilo a gukuatewa guenji.​—Luka 22:41-44.

12. Luholo lutshi Yesu wanemesele jina dia Sh’enji mu luholo lua gushimana?

¹² Ha gunemesa jina dia Sh’enji, Yesu wamonele malamba akola, amushingile nu amumbidile mambo. Wakhalele mujiya egi udi naye gutumagela Sh’enji mu ndaga jiagasue; gakhalelego nga nu gima gia guvuila musonyi. (Heb. 12:2) Wakhalele  mujiya nji egi Satana wakhalele gumuluisa mu matangua ene a lamba. (Luka 22:2-4; 23:33, 34) Satana wakhalele musha mutshima egi Yesu mbagashigo musala ya gujinginyina gudi Yehowa uvi gabingilego nga hazonda! Yesu wamonesele diago egi Satana wana khala muenya mambo nu Yehowa udi nu akombeledi enji agujinginyina, ana landula gusala ya gujinginyina gudi muene ikhale adi mutagana nu malamba!

13. Luholo lutshi wajiya gusuanguluisa Fumu wetu udi muhinyina?

¹³ Aye nji wana tshigina gusuanguluisa Fumu wetu udi muhinyina ba? Landula gutumbuisa jina dia Yehowa nu gukuatesa athu ako ha gujiya makalegelo enji. Gula watshita ngenyi, mbawumonesa egi wana landula gifezegeselo gia Yesu. (1 Phet. 2:21) Mbawusuanguluisa Yehowa nu mbawumonesa egi mbalagaji Wenji Satana udi muenya mbambo gifua muatshitshile Yesu!

TANGUA TUANA TUMBUISA JINA DIA YEHOWA TUANA KUATESA ATHU AKO HA GUHULUISA MONYO WAWO

14-15. Ndaga jitshi jia gushimana tuajiya gumona gula tudi mulongesa athu ako ndaga jiatadila Yehowa?

¹⁴ Tangua tuana tumbuisa jina dia Yehowa tuana kuatesa athu ako ha guhuluisa monyo wawo. Luholo lutshi? Satana ‘wabuishile ndunge jia athu anago gusha gutshigina gudi Nzambi ufofo.’ (2 Kol. 4:4) Gishina giene ana tshigina ndaga jia mambo jiana zuela Satana gifua: 1) Nzambi gana khala guene ndo, 2) Nzambi udi gualeha nu esue gajiyilego gukuatesa athu, 3) Nzambi udi muenya khuta, wana sagesa athu ana tshita gubola mayilago. Satana wana mba mambo awa handaga wana tshigina gubolesa jina dia Yehowa hagula akange athu njila ha gusuena hehi nu Nzambi. Uvi tangua tuana longesa lukuma luabonga, tuana kanga Satana njila ha gutagenesa felela dienji. Tuana longesa athu giamatshidia giatadila Yehowa, tuana tumbuisa nji jina dienji dia gijila. Gubonga gutshi tuana heta gula tuatshita ngenyi?

¹⁵ Giamatshidia gidi mu Mbimbi ya Nzambi giana khala nu ngolo jiavula. Gula tudi mulongesa athu ndaga jiatadila Yehowa nu makalegelo enji, mbatumona ndaga imoshi yagushimana. Mulele unu Satana waatshuigile guphala wana sendesa gukatuga mage-mage nu ana sendesa gutadila Tata wetu wa guzumba gifua luholo esue tuana gumutadila. Anasendesa gunemesa Nzambi handaga ngolo jienji jishigo nu gisugishilo. (Yesh. 40:26) Ana gumushila mutshima luholo luana tshita muene ndaga mu luholo luatagana. (Mikh. 32:4) Ana longuga ndaga jiavula jiatadila  ndunge jienji. (Yesh. 55:9; Roma 11:33) Ana heta gikhesa ha gujiya egi Yehowa udi Nzambi wa guzumba. (1 Yone 4:8) Tangua ana suena hehi nu Yehowa, felela diawo dia gujinga mayilago gifua anenji diana kola diago. Tudi nu luendu luakoma lua gukuatesa athu ha gusuena hehi nu Yehowa! Gula tudi mutshita ngenyi, Yehowa mbawutuzula egi tudi ‘mafuta enji a mudimo.’​—1 Kol. 3:5, 9.

16. Luholo lutshi athu ako ana gudivua tangua ana jiya jina dia Nzambi? Hana gifezegeselo.

¹⁶ Thomo, tuajiya gulongesa athu egi jina dia Nzambi didi Yehowa. Gutshita ngenyi guajiya gukuata diago mutshima wa muthu udi mutshigina gujiya ndaga jiavula jiatadila Nzambi. Ha gufezegesa, muvuala wa mukhetu mumoshi jina dienji Aaliyah b gakudilego mu fami ya Matemue a Yehowa. Gakhalelego musuanguluga nu ndaga akhalele mulongesa mu gikombelelo giawo nu gakhalelego gudivua hehi nu Nzambi. Uvi ndaga jiasombegesele tangua diasendesele muene gulonguga Biblia nu Matemue a Yehowa. Wasendesele gumona Nzambi gifua Futa dienji. Wadihudile ha gujiya egi athu akatudile jina dia Nzambi mu Biblia jiavula, ha fundo dienji asonegele batitre gifua Fumu. Gujiya jina dia Nzambi guasombegesele monyo wenji. Wazuelele egi: “Futa diami wabalega gubonga wana khala nu jina!” Gubonga gutshi guahetele muene? Udi muzuela egi: “Mangino ngana khala diago mu guhuima. Ngana gudivua nu ginemua.” Yala mumoshi jina dienji Steve wakhalele mujiya gushiga miziki muabonga, wakudile mu kutime jia enya Yuda. Watunyile guya mukombelela nga mu gikombelelo gimoshi handaga wamonele egi enya ikombelelo ene akhalele enya mambo. Uvi tangua gin’enji wafile, wayile mukhala fundo Temue wa Yehowa mumoshi wakhalele mulonguga Biblia nu muthu. Wadihudile ha gujiya jina dia Nzambi. Udi muzuela egi: “Khenji gajiyilego jina dia Nzambi. Idi mbala ya thomo gudi ame ha gujiya egi Nzambi wana khala muthu wa giamatshidia! Ngana gumumona diago gifua muthu. Ngajiyile diago egi ngaheta Futa.”

17. Mukunda natshi tudi naye guzula desizio dia gulandula gutumbuisa jina dia Yehowa? (Tala nji gifuanesa.)

¹⁷ Tangua wana longesa lukuma luabonga, wana wambela athu jina dia gijila dia Yehowa ba? Wana guakuatesa ha gujiya diago makalegelo a Nzambi wetu ba? Gula udi mutshita ngenyi, udi mutumbuisa jina dia Nzambi. Tulandulenu gutumbuisa jina dia Yehowa tangua tudi mukuatesa athu ako ha gujiya gula udi Nzambi wa luholo lutshi. Gula tudi mutshita ngenyi mbatuhuluisa monyo wawo, mbatulandula nji gifezegeselo gia Fumu wetu Yesu Klisto. Ndaga yabalega ndando idi egi, mbatusuanguluisa Yehowa Tata wetu wa guzumba. Tulandulenu ‘gutumbuisa jina dia [Yehowa] mayilago’!​—Ngi. 145:2.