LONGO DIA 33
‘Athu adi Gugutegelela’ Mbaahuluishiwa
“Monesa gutema mukunda nu aye hakhaye nu mukunda nu malongo aye. Kolesela mu ndaga eji, gula watshita ngenyi mbawudihuluisa nu mbawuhuluisa nji athu adi gugutegelela.”—1 TIM. 4:16 NWT.
LUNGIMBO 67 “Longesa Lukuma”
NDAGA JIDI MU LONGO EDI *
1. Itshi tuana gutshigina mukunda nu enya fami yetu?
PHANGI Pauline * wazuelele egi: “Tangua ngasendesele gulonguga giamatshidia, ngakhalele mutshigina egi mbatukhale nu enya fami yami agasue mu phaladiso. Uvi ngakhalele mutshigina muavula egi mulumi’ami Wayne, nu mun’etu wa yala abue nji Matemue a Yehowa gifua ame.” Udi nu enya fami yaye adi ashigo matemue a Yehowa ba? Gula idi ngenyi, aye nji udi gudivua gifua Pauline, mukunda nu enya fami yaye.
2. Mihu itshi tuza muzuelela mu longo edi?
2 Tuajiyilego gushinjiga enya fami yetu ha gutshigina lukuma luabonga, uvi tuajiya guakuatesa ha gutshigina malongo a Biblia. (2 Tim. 3:14, 15) Mukunda natshi tudi naye gulongesa enya fami yetu? Mukunda natshi tudi naye gudihaga ha fundo diawo? Luholo lutshi tuajiya gukuatesa enya fami yetu ha guzumba Yehowa gifua esue? Nu luholo lutshi hungu diajiya gutukuatesa?
MUKUNDA NATSHI TUDI NAYE GULONGESA ENYA FAMI YETU?
3. Ha gutadila 2 Phetelo 3:9, mukunda natshi tudi naye gulongesa enya fami yetu?
3 Gualeha ndo, Yehowa mbawushiya mavu awa a Satana. Phamba ‘athu adi nu mitshima ya tagana ha guheta monyo’ ene mbaahuluishiwa. (Makal. 13:48) Tuana gubalegesa tangua diavula nu ngolo jiavula ha gulongesa athu ako a mu dimbo dietu, idi yatagana egi tukuatese nji enya fami yetu ha gujiya Yehowa gifua esue. Yehowa Sh’etu wa guzumba, ‘gashigo mutshigina nga muthu mumoshi afue, uvi udi mutshigina egi athu agasue abalumune mitshima yawo.’—Tanga 2 Phetelo 3:9.
4. Ndaga itshi yabola tuajiya gukalagala tangua tudi mulongesa enya fami yetu?
4 Tudi naye gujiya egi gudi nu luholo luawaha nu luabola lua gulongesa lukuma luabonga. Yajiya gukhala egi gudi athu ako tuana guzuela nu gisemo, uvi gudi enya fami yetu tuana guawambela ndaga nu gisegela.
5. Itshi tudi naye gujiya gutuama egi tulongese giamatshidia gudi enya fami yetu?
5 Gula tuatangiza mbala ya thomo tualongesele enya fami yetu, avula mukatshi dietu ajiya guvua gubola luholo aalongesele nu ajiya gukamba guyikalagala luholo luko. Mupostolo Phaula walongesele Aklisto egi: ‘Mbimbi jienu jikhale tangua diagasue jiatagana, jiagumba mungua, ngenyi mbamujiya luholo muajiya guhana mvutu gudi muthu wagasue.’ (Kol. 4:5, 6) Idi ndaga yabonga ha gujiya longo edi tangua tudi mulongesa enya fami yetu. Ndaga ya matangua ako, ha fundo dia guakuatesa ha gututegelela, tuajiya guahana jikhabu.
ITSHI TUDI NAYE GUTSHITA HA GUKUATESA ENYA FAMI YETU?
Gudihaga ha fundo diawo nu khadilo diaye diabonga guajiya gualongesa muabonga (Tala paragrafe 6-8) *
6-7. Hana gifezegeselo gidi mumonesa funu ya gudihaga ha fundo dia mulumi’aye nga mukaji’aye yonu gashigo Temue wa Yehowa.
6 Dihage ha fundo diawo. Pauline, yago tuazuelela guthunda, udi muzuela egi: “Thomo, ngakhalele mutshigina gulongesa mulumi’ami ndaga jia mu nyuma. Uvi tuakhalelego gudivua ‘muabonga’.” Wayne mulumi’a Pauline, gakalelego mujiya ndaga jiavula jidi mu Biblia, nu gakhalelego mukotelesa ndaga jiakhalele muzuela Pauline. Gudi muene, wakhalele mumona egi ndaga jiagasue jiakhalele muzuela mukaji’enji jiakhalele mutadila phamba gikombelelo gienji. Wakhalele muvua woma egi mukaji’enji wangina mu gadingumba ga milonga, nu udi muhuigiwa.
7 Pauline umuzuela egi wakhalele mubalegesa matangua avula mu ngueze nu mu phoso nu aphangi a mu hungu—mu gudibungisa, mu mudimo wa gulongesa nu gudibungisa nu mafuta enji. Udi muzuela luko egi: “Matangua ako, Wayne gakhalelego musanga nga muthu hembo, wakhalele mukhala hakhenji.” Yadiago, Wayne wakhalele mutshigina egi abalegese tangua nu mukaji’enji nu mun’enji. Gakhalelego mujiya akuatshi mukaji’enji nu mun’enji akhalele muya mukhala nawo, nu wakhalele mumona gifua mafuta ahe-ahe a mukaji’enji akhalele nu ndando yavula gubalega muene. Wayne wakambele gushiya ulo nu mukaji’enji Pauline. Wajiya gutangiza ndaga jiakhalele naye gutshita Pauline ha gudihaga ha fundo dia mulumi’enji?
8. Ha gutadila 1 Phetelo 3:1, 2, itshi enya mu fami yetu ana gukuata muabonga?
8 Khala nu makalegelo abonga. Jiya egi, enya mu fami ana gukuata muabonga ndaga tuana gukalagala gubalega ndaga tuana guzuela. (Tanga 1 Phetelo 3:1, 2.) Pauline wakotelesele ndaga yene. Udi muzuela egi: “Ngajiyile egi Wayne wakhalele gutuzumba, gakhalelego mutshigia egi tushiye ulo. Uvi luholo gakhalele gungukalegela ndaga, luangukuatesele ha gusendesa gutshita ndaga jiana guzuela Yehowa mukunda nu ulo. Ha fundo dia guzuela muavula, ngazudile desizio dia gukhala nu makalegelo abonga.” Pauline wabembele gushinjiga Wayne ha guzuelela maga a Biblia, nu wasendesele guta n’enji maga ako a lujingu. Wayne wamonele egi mukaji’enji wabuile wahuima, mun’enji nji wabuile watumaga diago. (Ish. 31:18, 27, 28) Tangua Wayne gamonele egi malongo a Biblia asombegesele makalegelo a fami yenji, wasendesele gutshigina malongo a Mbimbi ya Nzambi.—1 Kol. 7:12-14, 16.
9. Mukunda natshi tudi naye gukolesela?
9 Landula gukuatesa enya fami yaye. Yehowa wana gutuhana gifezegeselo. ‘Lusugu nu lusugu’ wana guhana athu luendu lua gutegelela lukuma luabonga ha guheta monyo. (Yel. 44:4) Mupostolo Phaula wawambelele Timote ha gukolesela ha gukuatesa athu ako. Mukunda natshi? Handaga gukalagala ngenyi, wakhalele naye gudihuluisa nu guhuluisa athu akhalele gumutegelela. (1 Tim. 4:16) Tuana guzumba enya fami yetu, hene tuana gutshigina egi alonguge giamatshidia gidi mu Mbimbi ya Nzambi. Mbimbi nu makalegelo abonga a Pauline akuatesele fami yenji. Mangino, Pauline udi musuanguluga ha gukombelela Yehowa hamoshi nu mulumi’enji. Mukut’awo agasue adi avundji a njila, Wayne udi mukulu mu hungu.
10. Mukunda natshi tudi naye gukhala nu guhuiminyina?
10 Khala nu guhuiminyina. Tangua tudi muzula desizio dia gutumagela Nzambi, enya fami yetu ajiyilego gutshigina usombegeshi tudi mutshita. Handaga, ana gujiya egi mbatushigo luko mudibungisa nawo ha gutshita feti jia mangumba nu gudibungisa nawo mu ndaga jia politiki. Enya fami yetu ako ajiya gutuvila khabu jiabala. (Mat. 10:35, 36) Uvi esue tuajiyilego gutangiza egi mbaashigo musombegesa. Gula tuabemba guakuatesa ha gujiya ndaga jia gikombelelo gietu, idi gifua tudi guasophesa egi ajiyilego guheta monyo wa ivo nu ivo. Yehowa gatuhanelego mudimo wa gusophesa athu—wawuhanele gudi Yesu. (Yone 5:22) Gula tudi nu guhuiminyina, enya fami yetu mbategelela diago lukuma luabonga.—Tala galuanda “ Kalegela Site Internet Yetu ha Gulongesa.”
11-13. Longo ditshi tudi muzula mu ndaga yataganele naye Alice nu mvuaji jienji?
11 Khala nu gisemo, ubembigo egi enya fami yaye asombegese desizio diaye. (Ish. 15:2) Tuzuelele gifezegeselo gia Alice. Walongugile giamatshidia tangua diakhalele mujinga muene gualeha nu mvuaji jienji. Mvuaji jienji jiakhalelego musha gutshigina gudi Nzambi nu akhalele enya politiki. Wamonele egi, wakhalele naye gutshita muphushi ha guadijiga ndaga jiabonga gakhalele muene mulonguga. Alice udi muzuela egi: “Gula washipha ha guwambela enya fami yaye ndaga jihe-jihe udi mulonguga nu jinyi udi mutshita, mbaavua khabu jiabala lusugu mbaajiya ndaga jiene.” Wasonegele mvuaji jienji mukanda, watombele ha guzuelela guzumba mu mukanda wenji, handaga watangijile egi yakalele naye guasuanguluisa. (1 Kol. 13:1-13) Wahanele mvuaji jienji mersi luholo amusasele nu amubambele, nu waatumine bakado. Tangua gayile mutala mvuaji jienji, wakhalele mutshita yagasue ha guakuatesa mu midimo yagasue gu inzo. Thomo, mvuaji jienji jiasuangulugilego nu ndaga jiakhalele muawambela Alice.
12 Hakhalele Alice gumbo dia mvuaji jienji, walandudile gutanga Biblia lusugu nu lusugu. Alice udi muzuela egi: “Gutshita ngenyi guakuatesele mama ha gujiya egi Biblia yakhala nu ndando yavula gudi ame.” Mu tangua diene, sh’a Alice wasendesele gulonguga Biblia hagula ajiye ndaga yasombegesele matangi a mun’enji, gungima amone gima gimoshi gia gumutunyishila gulonguga. Alice udi muzuela egi: “Ngamuhanele Biblia, nu ngamusonegele jindaga jiko mukatshi.” Itshi yabuile gungima? Sh’a Alice gamonelego nga gima gimoshi giabola, uvi ndaga jiatangele muene jiakuatele diago mutshima wenji.
13 Tudi naye gukhala nu gisemo, tubembigo egi enya fami yetu asombegese desizio dietu, nga tuatagana nu malamba. (1 Kol. 4:12b) Alice wakolesele tangua gatagenele nu umbalagaji gudi gin’enji. Udi muzuela egi: “Tangua ngabatijiwe, mama wangutamegele egi ‘gikata gia mona.’” Alice watshitshile itshi? Udi muzuela egi: “Ngabembelego gulongesa giamatshidia ngakhalele mulonguga, ngamuwambelele nu ginemua giagasue egi ngazudi desizio dia gubua Temue wa Yehowa, ngajiyilego gudisombegesa. Ngadijigile mama egi ngana gumuzumba diago. Tuasendesele gudila, nu ngamutelegele ima ya gudia yawaha. Sendese lusugu luene, mama wajiyile diago egi Biblia yangubuishile muthu wabonga.”
14. Mukunda natshi tushigo naye gubemba egi enya fami yetu asombegese desizio dietu dia gukombelela Yehowa?
14 Matangua ajiya gubalega avula gutuama egi enya fami yetu akotelese egi gukombelela Yehowa gudi nu ndando yavula gu meso etu. Ha gufezegesa, Alice watunyile mudimo wa falanga wamuhanele mvuaji jienji, wabuile muvundji wa njila, gin’enji wasendesele luko gudila. Uvi Alice gambelego egi enya fami yenji asombegese desizio dienji. Alice udi muzuela egi: “Gula wabemba egi enya fami yaye asombegese desizio diaye gu ndaga imoshi, mbaakamba gusombegesa ba desizio aye ako mu ndaga jiko. Uvi, gula udi nu gisemo nu wabembelego egi enya fami yaye asombegese desizio diaye, ako mukatshi diawo mbaagutegelela.” Alice wataganele nu ndaga ya luholo elu. Mangino mvuaji jienji jidi avundji a njila, sh’enji udi mukulu mu hungu.
LUHOLO LUTSHI HUNGU DIAJIYA GUTUKUATESA?
Luholo lutshi hungu diajiya gukuatesa enya fami yetu ashigo Matemue? (Tala paragrafe 15-16) *
15. Ha gutadila Matayo 5:14-16 nu 1 Phetelo 2:12, luholo lutshi ‘midimo yabonga’ ya aphangi a mu hungu yajiya gukuatesa enya fami yetu?
15 Yehowa wana gunana athu gudi muene mu njila ya ‘midimo yabonga’ ya Aklisto mu hungu. (Tanga Matayo 5:14-16; 1 Phetelo 2:12.) Gula mulumi’aye nga mukaji’aye gashigo Temue wa Yehowa, wamonele gale nga muthu mumoshi wa muhungu diaye ba? Pauline, wago tuazuelela guthunda, wakhalele mutamega aphangi a mu hungu gumbo diawo hagula Wayne wajiya gudijiya nawo. Wayne udi muwunguluga luholo phangi mumoshi gamukuatesele ha gujiya luholo matemue akhala diago: “Phangi muene wazudile konje lusugu lumoshi gu mudimo phamba ha gutala match hamoshi nu ame. Ngamonele egi ‘udi genji gifua athu agasue!’”
16. Mukunda natshi tudi naye gutamega enya fami yetu ha guza mu gudibungisa?
16 Luholo luabonga lua gukuatesa enya fami yetu ludi guatamega ha guya nawo mu gudibungisa gua mu hungu. (1 Kol. 14:24, 25) Gudibungisa gua thomo guayile Wayne guakhalele—Guwunguluga gufua gua Yesu—handaga yakhalele gungima dia mudimo, nu yanago guzula matangua avula. Wayne udi muzuela egi: “Ngakoteleselego muabonga ndaga akhalele mulongesa uvi ndaga yanguyitugishile idi athu. Akhalele muza gunguyamba nu gunguhana lumene. Akhalele diago nu guzumba gua giamatshidia.” Yala mungoshi nu mukaji’enji akhalele mujinga muabonga nu Pauline, akhalele gumukuatesa nu mun’enji wa yala mu gudibungisa nu mu mudimo wa gulongesa. Tangua Wayne gazudile desizio dia gujiya malongo a Biblia ana gutshigina Pauline, watogele ha gulonguga Biblia nu phangi muene wa yala.
17. Gu mulonga utshi tushigo naye gudisagesa, uvi mukunda natshi tushigo naye gubemba gukuatesa enya fami yetu?
17 Felela dietu didi egi aphangi etu agasue a mu fami atshitshile Yehowa mudimo hamoshi nu esue. Ngatshima tuatshita ngolo ha gukuatesa enya fami yetu ha gubua akombeledi a Yehowa, uvi tujiye egi ajiya gutuna gawo. Gula atuna gawo, tuajiyilego gudisagesa mukunda nu desizio diawo. Tuajiyilego gushinjiga nga muthu mumoshi ha gutshigina giamatshidia. Gula enya fami yaye amona gusuanguluga udi nago luholo wana gukombelela Yehowa, yajiya guakuatesa muavula. Kombelela mukunda nu ene. Zuela nawo nu gisemo. Ubembigo guakuatesa! (Makal. 20:20) Khala nu felela egi Yehowa mbawushimbiga ngolo udi mumonesa. Gula enya fami yaye agutegelela, mbaahuluishiwa!
LUNGIMBO 57 Gulongesa Athu a Maluholo Agasue
^ par. 5 Tuana gutshigina egi enya fami yetu abue Matemue a Yehowa, uvi ene adi naye gutomba gula adi naye gumukombelela nga ndo. Longo edi diza mumonesa ndaga tuajiya gutshita ha gukuatesa enya fami yetu hagula atutegelele.
^ par. 1 Mu longo edi, majina ako asombegesewe. Mu longo edi, mbimbi eyi: “Enya fami yetu,” tuayikalegela ha guzuelela aphangi etu a mu fami anyi ashigo Matemue a Yehowa.
^ par. 53 UKOTELESHI WA IFUANESA: Muvuala mumoshi wa yala udi mulongesa sh’enji yonu gashigo Temue tangua adi mulonda n’enji gamiyo. Ha heta muene tangua, udi gumutalesa video ya jw.org®.
^ par. 55 UKOTELESHI WA IFUANESA: Phangi mumoshi wa mukhetu udi mutegelela muabonga tangua mulumi’enji yonu gashigio Temue adi muzuelela mudimo wavula adi nawo. Gungima udi mubalegesa tangua nu gusuanguluga guagsue nu fami yenji.
^ par. 57 UKOTELESHI WA IFUANESA: Phangi mumoshi wa mukhetu watamega aphangi a mu hungu ha guza gumbo diawo. Adi mukamba gujiya muabonga mulumi’enji. Gungima, yala muene waya mu gudibungisa gua guwunguluga gufua gua Yesu nu mukaji’enji.
