1. Akuatshi akuatesele ha gukangula hungu dihe-dihe dia gu Filiphi?

TANGUA mupostolo Phaula, Silase, Luka nu Timote ahetele gu Filiphi dimbo diakhalele mutuamezewa gudi enya Roma, asangele athu avula akhalele musuanguluga nu lukuma luabonga lua Ufumu. Aphangi awa nguana a gikhesa akuatesele ha gukangula hungu dihe-dihe, alandudi asendesele gudibungisa hamoshi, yajiya gukhala monzo ya muklisto wa mukhetu mu jina dia Lidia.—Makal. 16:40.

2. Lamba ditshi hungu diene diataganele nadio?

² Hungu edi dihe-dihe diataganele nu malamba. Satana washinjigile mbalagaji jia giamatshidia ha guluisa Phaula nu apostolo ako akhalele n’enji luholo akhalele mulongesa lukuma luabonga. Phaula nu Silase akuatewe, abetewe, nu ambiwe mu bologo. Tangua azolewe mu bologo, ayile mutala alandudi ahe-ahe nu aakolesele. Hene, Phaula, Silase, nu Timote akatugile mu dimbo diene uvi idi mumonega gifua Luka wasalele guene. Itshi aphangi a mu hungu edi dihe-dihe akalegele? Yehowa waakuatesele nu nyuma yenji, hene alandudile gumukalegela nu gikhesa (ngolo). (Fili. 2:12) Phaula wasuangulugile muavula nawo!

3. Ha gutadila Filiphi 1:9-11, Phaula wakhalele mukombelela mukunda nu itshi?

³ Gungima dia ivo 10, Phaula wasonegele hungu dia gu Filiphi mukanda. Gula watanga mukanda wene, udi diago mumona egi Phaula wakhalele muzumba aphangi ene. Wasonegele egi: ‘Ngamizumba agasue nu guzumba guakoma gifua gudi nago Klisto Yesu.’ (Fili. 1:8) Waasonegele egi wakhalele  mukombelela mukunda nu ene. Watogele Yehowa hagula a akuatese ha gukudisa guzumba, ha gujiya gutomba ndaga jiabalega ndando, ha gukhala athu atagana, ha gutuna gukhakhuisa athu nu ha gulandula gumonesa mabundu a ndaga jiabonga. Mangino, esue nji tuajiya guzula malongo avula mu mbimbi jia giamatshidia jia Phaula. Tutangenu ndaga jiasonegele Phaula gudi Aklisto a gu Filiphi. (Tanga Filiphi 1:9-11.) Tuza muzuelela ndaga jiatangele muene nu luholo tuajiya gujikalegela.

4. (a) Ha gutadila 1 Yone 4:9, 10, Yehowa wamonesele guzumba guenji mukunda nu esue luholo lutshi? (b) Luholo lutshi tuajiya guzumba Nzambi?

⁴ Yehowa wamonesele guzumba guenji mukunda nu esue luholo gatumine mun’enji ha mavu ha gufua mukunda nu gubola guetu. (Tanga 1 Yone 4:9, 10.) Guzumba gua giamatshidia gua Nzambi guana gututuma ha gumuzumba nji. (Lomo 5:8) Luholo lutshi tuajiya guzumba Nzambi? Yesu wahanele mvutu gu muhu owu tangua gawambelele Mufalese egi: ‘Udi naye guzumba Yehowa nu mutshima waye wagasue, nu monyo waye wagasue nu matangi aye agasue.’ (Mat. 22:36, 37) Tudi naye guzumba Nzambi nu mutshima umoshi. Tudi naye gukudisa guzumba guetu mukunda nu Nzambi masugu agasue. Phaula wawambelele enya gu Filiphi egi guzumba guawo ‘gudivudise muavula diago.’ Itshi tuajiya gutshita ha gukudisa guzumba guetu mukunda nu Nzambi?

5. Luholo lutshi tuajiya gukolesa guzumba guetu?

⁵ Ha guzumba Nzambi, tudi naye gumujiya. Biblia idi muzuela egi: ‘Muthu udi gashigo muzumba athu ako, gajiyago Nzambi, handaga Nzambi udi guzumba.’ (1 Yone 4:8) Mupostolo Phaula wamonesele egi guzumba guetu mukunda nu Nzambi gudi naye gukola tangua tudi muheta “ujiyi wa giamatshidia, nu ukoteleshi wa ndaga” jienji. (Fili. 1:9) Tangua tuasendesele gulonguga Biblia, tuasendesele guzumba Yehowa nga tuakhalele khenji tujiya galego ndaga jiavula jiamutadila. Tangua tudi mulonguga ndaga jiatadila Yehowa, guzumba guetu mukunda nu muene mbagukola. Hene idi diago nu ndando ha gulonguga Biblia masugu agasue nu gutangigiza muabonga ndaga tudi mutanga!—Fili. 2:16.

6. Ha gutadila 1 Yone 4:11, 20, 21, mu luholo lutshi tuajiya gukudisa guzumba guetu?

⁶ Luholo luana gutuzumba Nzambi luana gututuma ha guzumba aphangi etu. (Tanga 1 Yone 4:11, 20, 21.) Matangua ako tuajiya gutangiza egi ishigo lamba ha guzumba aphangi etu Aklisto. Handaga tuana gukombelela Yehowa nu tuana gutshigina gulandula makalegelo enji abonga. Tuana gulandula gifezegeselo gia Yesu yago wahanele monyo wenji mukunda nu esue. Uvi, matangua ako yajiya gukhala lamba ha gutumagela mukhuala udi gututoga ha gudizumba. Tutadilenu gifezegeselo gia hungu dia gu Filiphi.

7. Longo diahanele Phaula gudi Evodi nu Sentishe didi gutulongesa ishi?

⁷ Evodi nu Sentishe akhalele aphangi a akhetu a gikhesa (ngolo), akalegele mudimo ‘hamoshi’ nu mupostolo Phaula. Uvi, Yajiya gukhala, abembele egi matululu azogele mukatshi diawo a akhaphumune. Mu mukanda Phaula wasonegele hungu diakhalele aphangi awa a akhetu, watangele jina a Evodi nu Sentishe, nu waahanele malongo hagula “adivuise.” (Fili. 4:2, 3) Phaula watangijile egi yakhalele nu ndando ha guhana malongo mu hungu diagasue. Waawambelele egi: ‘mutshite ndaga jiagasue gunyema ndo nu guhaga ndo giphapha.’ (Fili. 2:14) Idi yadiago egi, longo edi dia Phaula diakuatesele aphangi awa a akhetu, nu  diakuatesele nji hungu diagasue ha gumonesa guzumba mukatshi diawo.

8. Mukunda nathi yajiya gukhala lamba ha guzumba aphangi etu, nu itshi yajiya gutukuatesa ha gubinga khadilo edi?

⁸ Matangua ako, yajiya gukhala lamba ha guzumba aphangi etu, gula tudi mutala phamba gubola guawo gifua muatshitshile Evodi nu Sentishe. Mukuta wetu agasue tuana gutshita gubola masugu agasue. Gula tudi mutala phamba gubola gua athu ako, guzumba guetu mukunda nu ene mbaguleba. Gula phangi mumoshi wabuita mutshima ha gutukuatesa ha gukomba Inzo ya Ufumu, tuajiya guvua khabu. Gula tuasendesa gutanga gubola guana kalagala muene, khabu jietu mbajivula, guzumba guetu gudi muene mbaguleba. Gula watagana nu ndaga ya luholo elu, idi ndaga yabonga ha gujiya egi, Yehowa wana gumona muabonga gubola guetu nu gua aphangi etu. Ngatshima tudi athu abola, Uvi Yehowa wana gutuzumba nu wana guzumba nji aphangi ene. Hene, tudi naye gulandula khadilo dia guzumba gua Yehowa, nu gutala ndaga jiabonga jiana gutshita aphangi. Gula tuatshita ngolo ha guzumba aphangi etu, mbatujinga nawo hamoshi.—Fili. 2:1, 2.

9. Itshi idi mukatshi dia ‘ndaga jiabalega ndando’ jiasonegele mupostolo Phaula mu mukanda wenji gudi enya gu Filiphi?

⁹ Nyuma ya bonga yakuatesele Phaula ha guhana malongo gudi enya gu Filiphi—nu gudi Aklisto agasue—ha “gujiya gutomba ndaga jiabalega ndando.” (Fili. 1:10) Mukatshi dia ndaga jiene tuajiya gutanga gutumbuisa jina dia Yehowa, gutagenesewa gua malaji enji, nu gujinga hamoshi mu guhuima mu hungu. (Mat. 6:9, 10; Yone 13:35) Gula ndaga eji jidi jiabalega ndando mu lujingu luetu, mbatumonesa egi tuazumba Yehowa.

10. Itshi tudi naye gutshita ha gumonewa gifua athu atagana?

¹⁰ Phaula wazuelele luko egi mudi naye ‘gukhala athu atagana.’ Ishigo mukotelesa egi tudi naye gukhala athu atagana ashigo mutshita nga gubola. Tuajiyilego gukhala athu atagana gifua muakhala Yehowa Nzambi. Uvi Yehowa wana gutumona gifua athu atagana gula tudi mutshita yagasue ha gumonesa guzumba, nu tudi mujiya gutomba ndaga jiabalega ndando. Tuajiya gumonesa guzumba tangua tudi mutuna gutshita ndaga jiajiya gukhakhuisa athu ako.

11. Mukunda natshi tushigo naye gukhakhuisa athu ako?

¹¹ Longo didi muzuela egi mukhakhuisago athu ako didi diago nu ndando. Luholo lutshi tuajiya gukhakhuisa muthu? Tuajiya gukhakhuiasa athu ako mu saga jia gudikenesa (gukena) tudi mutomba, mu gusudiga guetu nga mu midimo tuana gutomba ha gutshita. Yajiya gukhala egi ndaga tudi mutshita ishigo gayo yabola. Uvi idi ndaga yabola gula ndaga tudi mukalagala jishigo musuanguluisa mitshima ya athu ako nga jidi guakhakhuisa mu nyuma. Yesu wazuelele egi, idi ndaga yabonga ha gukudigiwa seso yakoma mu shingo nu gubishidiwa mu kianga gula tuakhakhuisa gimeme gienji gimoshi!—Mat. 18:6.

12. Longo ditshi tudi muzula mu lumene lua aphangi mbadi a avundji a njila?

¹² Tala luholo avundji a njila muyadi yala nu mukaji’enji akalegeele mbimbi jia Yesu. Akhalele hungu dimoshi nu phangi muko nu mukaji’enji akatugile gubatijiwa. Fundo akatugile, athu ana mona ndaga jiko jiavula gifua ndaga jia sonyi. Aphangi awa ahe-ahe, akhalele mutangiza egi Aklisto ajiyilego guya mutala video—nga video jiene jishigo jiabola. Yaasagesele muavula tangua avile egi avundji a njila anyi mbadi yala nu mukaji’enji ayile mutala video. Gungima, aphangi ene a avundji a njila  abembele guya mutala video uu nu tangua aphangi awa ahe-ahe akudile mu nyuma nu akotelesele ndaga jiabonga nu jia bola. (Heb. 5:14) Tangua akalegele ngenyi, aphangi awa a avundji anjila amonesele diago egi akhalelego muzumba aphangi awa ahe-ahe phamba mu mbimbi uvi mu makalegelo.—Lomo 14:19-21; 1 Yone 3:18.

13. Luholo lutshi tuajiya gutuma muthu ha gukalagala gubola?

¹³ Luholo luko tuajiya gukhakhuisa muthu ludi gumutuma ha gukalagala gubola. Mu luholo lutshi? Tufezegese. Muthu mumoshi walonguga Biblia, wabalegesa matangua avula nu watshita ngolo jiavula ha gubemba gunua matombe abala. Wakotelesa egi udi naye diago gubemba gunua matombe. Wasombegesa lujingu luenji muphushi nu wabatijiwa. Gungima, aphangi ako a Aklisto amutamega ha gunua matombe, nu amuwambela egi: “Henyaha wabui gale Muklisto; udi nu nyuma ya Yehowa. Gitshinyi gimoshi gia bundu dia nyuma gidi gudikanda. Gula udi nu gudikanda, mbawushigo munua matombe avula.” Idi diago ndaga ya gubalega gubola gula phangi yowu muhe-muhe walandula longo edi diabola nu wasendesa luko gunua matombe!

14. Luholo lutshi gudibungisa gua mu hungu guana gutukuatesa ha gukalegela malongo adi mu Filiphi 1:10?

¹⁴ Gudibungisa guetu gua mu hungu guana gutukuatesa ha gutumagela malongo adi mu Filiphi 1:10 mu maluholo avula. Luholo lua thomo, malongo tuana gulonguga mu gudibungisa ana gutumonesa ndaga jiana gumona Yehowa gifua ndaga jiabalega ndando. Lua mbadi, tuana gulonguga luholo  lua gukalegela malongo tuana gulonguga hagula tuajiya gubua athu atagana. Lua thathu, tuana gudihana gikhesa ‘ha gudizumba muabonga nu gutshita ndaga jiabonga.’ (Heb. 10:24, 25) Tangua tudi muhana aphangi etu gikhesa, guzumba guetu mukunda nu Nzambi nu aphangi guana guvula. Gula tudi muzumba Nzambi nu aphangi etu, mbatutshita yagasue ha gutuna gukhakhuisa aphangi etu.

15. ‘Guzalesewa nu mabundu a ndaga jiabonga’ guakotelesa itshi?

¹⁵ Phaula wakombelele muavula hagula enya gu Filiphi akhale ‘aguzalesewa nu mabundu a ndaga jiabonga.’ (Fili. 1:11) Idi yadiago egi, mukatshi dia ‘mabundu awa abonga’ tudi mutanga guzumba guawo mukunda nu Yehowa nu gudi athu enji. Akhalele naye nji gulongesa athu ako ndaga jiatadila gutshigina guawo ahagele gudi Yesu nu felela diawo diawaha. Mu Filiphi 2:15 mudi nji nu gifezegeselo giko egi, ‘guhenya ha mavu gifua themua jia mu dilu.’ Ndaga eyi idi gutuwunguluisa luholo Yesu gatamegele alandudi enji egi “muenda ha mavu.” (Mat. 5:14-16) Wawambelele nji alandudi enji ha ‘gubuisa athu alandudi’, nu wazuelele egi ene mbaabua ‘matemue . . . uu nu gu gisugishilo gia mavu agasue.’ (Mat. 28:18-20; Makal. 1:8) Tuana gumonesa ‘mabundu a ndaga jiabonga’ tangua tuana gukalagala ngolo ha gutshita mudimo owu wa ndando.

16. Luholo lutshi Filiphi 1:12-14 idi mumonesa egi tuajiya gulema gifua mienda ngatshima tuatagana nu malamba? (Tala gifuanesa holu dia gizula.)

¹⁶ Ngatshima tuatagana nu ndaga jia luholo lutshi, tuajiya gulema gifua mienda. Matangua ako, ndaga idi gutukanga njila ha gulongesa lukuma luabonga yajiya gutuhana luendu lua gulongesa muabonga. Mupostolo  Phaula wasonegele mukanda gudi enya gu Filiphi tangua diakhalele muene mu bologo gu Roma. Ngatshima Phaula wakhalele mu bologo, gabembelego gulongesa masuta akhalele gumutalela nu athu akhalele muza gumutala. Walongesele nu gikhesa mu matangua awa a malamba, gifezegeselo gienji giahanele aphangi gikhesa nu gia akuatesele ha ‘gulongesa mbimbi ya Nzambi woma ndo.’—Tanga Filiphi 1:12-14; 4:22.

17. Luholo lutshi aphangi a mala nu a akhetu alandudile gulongesa ngatshima yakhalele lamba?

¹⁷ Aphangi avula a mala nu a akhetu ana gulandula khadilo dia gikhesa gia mupostolo Phaula. Mu ifutshi ana gujinga, gulongesa lukuma mukatshi dia athu nga inzo nu inzo guana tunyishiwa, hene ana gukamba luholo luko lua gulongesa lukuma luene. (Mat. 10:16-20) Mu gifutshi gimoshi, mutadi muwendji wazuelele egi mulongeshi wagasue wajiya gulongesa gudi enya fami yenji, gudi bavuaze, mafuta a khalasa, mafuta a mudimo, nu gudi athu tudi mujiya. Mu ivo mbadi, mahungu avudile diago mu mafundo ene. Yajiya gukhala egi fundo wana gujinga anago gutunyisa mudimo wa gulongesa. Uvi, tuajiya guzula malongo a ndando gu gifezegeselo giabembele aphangi etu a mala nu a khetu: gula watshita yagasue ha gulongesa athu ako, Yehowa mbawuguhana ngolo jia gulandula gulongesa ngatshima idi lamba.—Fili. 2:13.

18. Tudi naye guzula desizio dia gutshita itshi?

¹⁸ Sendese mangino, tudi naye guzula desizio dia gukalegela malongo asonegele Phaula gudi enya gu Filiphi. Tudi naye gujiya gutomba ndaga jiabalega ndando, gukhala athu atagana, gutuna gukhakhuisa athu ako, nu gumonesa mabundu a ndaga jiabonga. Ngenyi, guzumba guetu mbagudivudisa nu mbatutumbuisa Yehowa Sh’etu wa guzumba.