GUTSHIGINA guana gutuhana ngolo jiavula. Ha gufezegesa, ngatshima Satana wana gukamba gutulebesa mu nyuma, uvi gutshigina guana gutukuatesa ha ‘gujima mifula yagasue ya tshuya ya muthu wabola.’ (Ef. 6:16) Gula tudi nu gutshigina, tuajiya gukolesela malamba akola adi gifua milundu. Yesu wawambelele alandudi enji egi: ‘Gula mudi nu gutshigina gifua lumbale lua Mutarde, mbamuwambela mulundu owu egi katuga guogu nda gunu. wene mbawukatuga.’ (Mat. 17:20) Ndaga ya gutshigina guana gukolesa ufuta wetu nu Yehowa, hene tudi naye gutalela mihu eyi: Gutshigina gudi itshi? Itshi tudi naye gutshita hagukhala nu gutshigina? Luholo lutshi tuajiya gukolesa gutshigina guetu? Gudi nanyi tuajiya gumonesa gutshigina?—Lomo 4:3.

Gumonesa gutshigina gushigo phamba gutshigina ndaga jiana gulongesa Biblia, handaga ‘ba demo ana gutshigina nji [egi Nzambi wakhala guene] nu ana gudigita nu woma.’ (Yak. 2:19) Na, gutshigina gudi diago itshi?

Biblia yana gukotelesa gutshigina mu maluholo mbadi. Luholo lua thomo, “gutshigina gudi gujiya gua diago gua ndaga jitudi mudifelela.” (Heb. 11:1a) Gula udi nu gutshigina, mbawumona diago egi ima yagasue yana guzuela Nzambi mbayitaganesewa. Ha gufezegesa, Yehowa wawambelele enya Isalele egi: ‘Enue muajiya gushiya gikotelo giami giatadila muanya nu gikotelo giami giatadila phipha hagula muanya nu phipha imuenegago mu tangua diawo ba? Ndo sha. Luholo lumoshi nji, gushigo nga gima giajiya gushiya gikotelo giami nu Davidi.’ (Yel. 33:20, 21) Wana guvua woma egi kumbi diajiya gubemba guzoga gosa, ngenyi phipha nu muanya yajiya gubemba gumonega ba? Gula wana gutshigina mikhuala ya physique yana gutshita egi mavu alandule gubalumuga gu axe yenji nu gu kumbi, wajiya guhaga giphapha gudi Mufugi wa mikhuala yene egi gajiyilego gutagenesa malaji enji ba? Ndo sha!—Yesh. 55:10, 11; Mat. 5:18.

Luholo lua mbadi, gutshigina gudi “gutshigina gua ndaga jidi jishigo mumuenega gu meso.” Mu guzuela guko, gutshigina gudi gujiya egi ndaga jiene jidi jia giamatshidia ngatshima tushigo gujimona gu meso. (Heb. 11:1b) Mu luholo lutshi? Gula mun’aye waguhula egi, ‘Luholo lutshi udi mujiya egi muhehe wakhala guene?’ Ngatshima muhehe wanago gumonega, wajiya gukuatesa mun’aye ha gujiya ndaga jidi mumonesa egi muhehe wakhala guene—gifua guhuima, gudinyigisa gua mitshi nu mayiji, nu ima iko. Mona wajiya gumona ijiyishilo, gatshigina egi gima gimoshi ngenyi giakhala guene ngatshima gashigo gugimona. Luholo lumoshi nji, gutshigina guana gukatuga mu ijiyishilo ya giamatshidia.—Lomo 1:20.

Luholo gutshigina guana gukatuga mu ijiyishilo, hagula egi muthu akhale nu gutshigina udi naye thomo gukhala nu ‘ujiyi wa diago wa giamatshidia.’ (1 Tim. 2:4) Uvi guasugilego hanyinyi. Mupostolo Phaula wasonegele egi: ‘Muthu wana gumonesa gutshigina mu mutshima.’ (Lomo 10:10) Muthu gashigo naye phamba gutshigina giamatshidia, uvi udi naye gugizula nu ndando. Gungima udi naye gukalagala midimo ya gutshigina, yakotelesa egi gujinga mu luholo ludi musuanguluisa Nzambi. (Yak. 2:20) Muthu udi gashigo muzula giamatshidia nu ndando  wajiya gutuna ijiyishilo yagasue, handaga gashigo mutshigina gusombegesa ndaga jiana gutshigina muene, nga ndo udi mutshigina gutshita ndaga jidi mu matangi enji. (2 Phet. 3:3, 4; Yuda 18) Hene, mu tangua dikulu athu agasue amonele ndaga jia gushimana ahagelego gutshigina mu ndaga jiene. (Lutang. 14:11; Yone 12:37) Nyuma ya Nzambi yahanele gutshigina phamba gudi athu akhalele mutshigina giamatshidia.—Gal. 5:22; 2 Tes. 2:10, 11.

Fumu Davidi wakhalele mukatshi dia athu amonesele gutshigina guakola. (Heb. 11:32, 33) Uvi gushigo nga muthu mumoshi mu fami ya ba Davidi wakhalele nu gutshigina gua luholo elu. Tufezegese: Lusugu lumoshi, Eliyabe mukulu’a Davidi wamonesele egi gakhalelego nu gutshigina gudi Yehowa tangua gabalele (adingidile) Davidi gu mulonga watadila guluisa Goliyata. (1 Sam. 17:26-28) Gushigo nga muthu wana guvualewa nu gutshigina; nga ndo gushigo nga muthu wana hanewa gutshigina gudi mvuaji jienji. Davidi wakhalele nu gutshigina handaga wakhalele nu ufuta wabonga nu Nzambi.

Mu Ngimbo 27, Davidi udi mumonesa luholo gahetele gutshigina ogu guakola. (Verse 1) Davidi wakhalele mutangigiza ndaga jiatagenele najio muene mualeha nu luholo Yehowa wamukuatesele ha gulua nu mbalagaji. (Verse 2, 3) Wakhalele muzula inzo ya gukombelela Yehowa nu ndando. (Verse 4) Davidi wakhalele mukombelela Nzambi hamoshi nu akombeledi ako mu inzo ya gukombelela. (Verse 6) Wakhalele mukombelela muavula ha gukamba Yehowa. (Verse 7, 8) Davidi wakhalele nji musuanguluga gulongesewa njila jia Nzambi. (Verse 11) Gutshigina guakhalele nu ndando gudi Davidi hene gahudile egi: ‘Itshi yakhalele naye gungubuila gula nga ngakhalelego nu gutshigina?’—Verse 13, NWT.

Wajiya gukhala nu gutshigina gifua gua Davidi gula walandula makalegelo nu ndaga jiatangewa mu Ngimbo 27. Handaga gutshigina guana gukatuga mu ujiyji wa diago, gula udi mulonguga Mbimbi ya Nzambi muavula nu mikanda tuana guzola, mbawudi mumonesa gitshinyi egi gia bundu dia nyuma ya Nzambi. (Ngi. 1:2, 3) Zula tangua diavula tangua udi mutangigiza ndaga walonguga. Gula tudi mutangigiza ndaga tudi mulonguga, mbatukudisa khadilo dia guhana Nzambi mersi. Gula khadilo diene diakula, mbawukhala hehi ha gumonesa gutshigina guaye mu gudibungisa gua mu hungu nu tangua mbawukhala mulongesa felela diaye gudi athu ako. (Heb. 10:23-25) Luko, tuana gumonesa gutshigina tangua tuana gulandula “gukombelela Nzambi gubemba ndo.” (Luka 18:1-8) Hene, ‘kombelela [Yehowa] tangua diagasue’, haga mutshima egi ‘muene wana gumikuatesa.’ (1 Tes. 5:17; 1 Phet. 5:7) Gutshigina guana gututuma ha gutshita midimo yawaha, gungima, midimo yene yana gukolesa gutshigina guetu.—Yak. 2:22.

Mu ngueze gutuama egi Yesu afue, wawambelele alandudi enji egi: ‘Monesenu  gutshigina gudi Nzambi; monesenu nji gutshigina gudi ame.’ (Yone 14:1) Tudi naye gumonesa gutshina gudi Yehowa nu gudi Yesu. Luholo lutshi wajiya gumonesa gutshigina gudi Yesu? Tutadilenu maluholo thathu.

Luholo lua thomo, khala mumona mulambu wa Yesu gifua kado gaguhanele Nzambi. Mupostolo Phaula wazuelele egi: ‘Ngudi mujinga mukunda nu gutshigina gua mun’a Nzambi, yago wanguzumbile nu wadihanene mukunda nu ame.’ (Gal. 2:20) Gula udi mumonesa gutshigina gudi Yesu, mbawutshigina diago egi mulambu wa Yesu mbawugukuatesa, Nzambi mbawugutotesela gubola mu njila ya mulambu wene; nu wakhala nu felela dia lujingu lua ivo-ivo mu njila ya mulambu wene; luko, mulambu wene wana gumonesa egi Nzambi wana guguzumba. (Lomo 8:32, 38, 39; Ef. 1:7) Gula watshigina egi mulambu wa Yesu mbawugukuatesa, mbawushigo luko gudibela muavula nu gudisagesa mukunda nu gubola guaye.—2 Tes. 2:16, 17.

Luholo lua mbadi, suena hehi nu Yehowa mu gisambu mu njila ya mulambu wa Yesu. Mukunda nu mulambu, tuajiya gukombelela Yehowa ‘nu gudifelela nago ha guheta khenda nu ngasa yajiya gutukuatesa mu tangua diatagana.’ (Heb. 4:15, 16; 10:19-22) Gisambu giana gutukuatesa ha gukolesela gu ndaga idi gututuma ha gutshita gubola.—Luka 22:40.

Luholo lua thathu, tumagela Yesu. Mupostolo Yone wasonegele egi: ‘Muthu udi mumonesa gutshigina gudi Mona udi nu monyo wa ivo nu ivo; udi gashigo mutumagela Mona mbagamonyigo monyo, uvi khabu jia Nzambi jidi n’enji.’ (Yone 3:36) Yone udi mumonesa gudisha gudi mukatshi dia gumonesa gutshigina nu gutuna gutumaga. Hene, wana gumonesa gutshigina gudi Yesu tangua wana gumutumagela. Wana gutumagela Yesu tangua wana gulandula “mukhuala wa Klisto,” yakotelesa malongo agasue a Yesu nu ndaga jiatutumine muene ha gutshita. (Gal. 6:2) Wana tumagela luko Yesu tangua wana gulandula utuameji wana gutuhana muene mu njila ya ‘muhiga wafubidila nu watema.’ (Mat. 24:45) Gula udi mutumagela Yesu, mbawuheta ngolo jia gukolesela mu malamba akola adi gifua gikudi.—Luka 6:47, 48.

Lusugu lumoshi, muthu mumoshi wawambelele Yesu mangololo egi: ‘Ngudi nu gutshigina! Ngukuatese fundo ngushigo nu gutshigina!’ (Mako 9:24) Wakhalele nu ndambo ya gutshigina, uvi nu gudibulumuisa guagasue, wajiyile egi wakhalele naye gulunda gutshigina guavula. Mukut’etu agasue, tudi naye gulunda gutshigina guavula, gifua yala owu. Mukut’etu agasue tuajiya gukolesa gutshigina guetu. Gifua luholo tuayimonyi guthunda, tuana gukolesa gutshigina guetu tangua tuana gulonguga Mbimbi ya Nzambi nu guyitangigiza, yago yana gukudisa khadilo dietu dia guhana Yehowa mersi. Gutshigina guetu nu gua Aklisto ako mbagukola tangua tudi mukombelela Yehowa, tudi mulongesa felela dietu gudi athu ako, nu tangua tudi mukolesela mu gisambu. Hene, tangua tuana gukolesa gutshigina guetu, tuana guheta ishimbigo yavula. Mbimbi ya Nzambi idi gutuwambela egi: ‘Enue mafut’ami, mudikudise mu gutshigina guenu gua gijila . . . hagula mudibambe mu guzumba gua Nzambi.’—Yuda 20, 21.