1. Itshi Aklisto adi naye gutshita ha guheta gu gisugishilo gia phushi mukunda nu monyo?

ESUE Aklisto, tuana guzula phushi mukunda nu guheta monyo. Ngatshima tuasendesa guzula phushi masugu awa, nga tuasendesele gale mualeha, tudi naye gulandula guzula phushi uu nu tangua mbatuheta gu gisugishilo. Malongo ahanele mupostolo Phaula gudi Aklisto a gu Filiphi ajiya gutuhana gikhesa (ngolo), ha guheta gu gisugishilo gia phushi jietu. Tangua Aklisto a mu hungu diene ahetele mukanda wa mupostolo phaula, ako akhalele ana gukombelela gale Yehowa sendese mualeha. Akhalele muzula phushi muabonga, uvi mupostolo Phaula waawunguluishile egi akhalele naye gujizula nu gukolesela. Watshiginyile egi Aklisto ene alandule gifezegeselo gienji gia ‘gulandula guzula phushi ha gutagenesa felela.’—Fili. 3:14.

2. Mukunda natshi malongo Phaula wahanele Aklisto a gu Filiphi ahetele mu tangua diabonga?

² Malongo ahanele Phaula gudi Aklisto a gu Filiphi ahetele mu tangua diabonga. Handaga hungu diene diataganele nu usageshi tangua diazolewe. Usageshi wene wasendesele tangua mupostolo Phaula nu Silase atumagele ndaga yaawambelele Nzambi ha ‘guzawuga gu Masedonia,’ hehi nu givo 50 gia Tangua Dietu. Hene, ayile gu Filiphi ha gulongesa lukuma luabonga. (Makal. 16:9) Guene amonele mukhetu mumoshi mu jina dia Lidia, wago ‘wakhalele mutegelela, Yehowa wakangudile mutshima wenji’ ha guvua lukuma luabonga. (Makal. 16:14) Matangua azonda gungima, mukhetu muene wabatijiwe hamoshi nu enya fami yenji agasue. Uvi, Satana wasendesele gualuisa. Athu a mu dimbo diene akuatele Phaula nu Silase ayile nawo gutuama dia asopheshi nu a ambidile mambo egi ene akhalele muzola nguma. Phaula nu Silase abetewe nu ambiwe mu bologo, gungima a awambelele ha gukatuga mu dimbo. (Makal. 16:16-40) Uvi Phaula nu Silase abembelego nga hazonda! Itshi Aklisto a mu hungu diene dihe-dihe atshitshile? Abembele gifezegeselo giabonga handaga ene nji akolesele! Idi yadiago  egi ahetele gikhesa giavula mu gifezegeselo gia Phaula nu Silase.

3. Desizio ditshi diazudile mupostolo Phaula, nu mihu itshi tuza mutalela?

³ Phaula wazudile desizio egi gashigo naye gubemba. (2 Kol. 4:16) Wakhalele mujiya egi udi naye gukalegela Yehowa mudimo nu gujinginyina guagasue uu nu gu gisugishilo gia lujingu luenji. Gifezegeselo gia Phaula gidi gutulongesa itshi? Mangino, ifezegeselo itshi ya aphangi idi mumonesa egi tuajiya gukolesela ngatshima tuatagana nu malamba? Luholo lutshi felela dietu dia mu masugu adi muza diajiya gukolesa desizio dietu dia gutuna gubemba nga hazonda?

4. Luholo lutshi Phaula walandudile gukalegela Yehowa mudimo ikhale watagenele nu malamba?

⁴ Tangiza ndaga jiagasue jiakhalele mutshita Phaula tangua gasonegele Aklisto a gu Filiphi mukanda. Wakhalele mu bologo gu Roma. Gakhalelego nu luholo lua guya mulongesa. Uvi, walandudile gulongesa athu akhalele muza gumutala gu bologo nu wakhalele musonegela mahungu a gualeha mikanda. Luholo lumoshi nji, mangino Aklisto avula anyi ashigo nu luholo lua guya mu mudimo wa gulongesa, ana gukalegela okazio wagasue ana guheta ha gulongesa lukuma luabonga gudi athu ana guza guatala gumbo diawo. Gula ashigo nu luholo lua mutala athu, ana guasonegela mikanda idi guahana gikhesa.

5. Ha gutadila mbimbi jia Phaula jidi mu Filiphi 3:12-14, itshi yamukuatesele ha guhaga meso gu felela dienji?

⁵ Phaula gabembelego egi ndaga jiabonga nga jiabola gakhalele mutshita thomo jiwunganese matangi enji ha gukombelela Yehowa. Uvi, wazuelele egi: “Ngudi mubuita mutshima gu ndaga jia gu mangima,” ha ‘gulandula ndaga jidi gutuama’ ha gubinga guzula phushi uu nu gu gisugishilo. (Tanga Filiphi 3:12-14.) Ndaga jitshi jiakhalele naye guwunganesa matangi a Phaula? Gutuama egi Phaula abue Muklisto, watshitshile ndaga jiavula jiakoma. Uvi, wakhalele mumona ndaga jiene gifua “ima ya ha shita.” (Fili. 3:3-8) Ya mbadi, ikhale wakhalele gudibela luholo wamonesele Aklisto lamba, gabembelego egi matangi ene amukange njila ha gukombelela Yehowa. Ya thathu, gatangijilego egi wakalegele gale Yehowa mudimo wavula. Phaula watagenesele mudimo wenji muabonga ngatshima wambiwe mu bologo, wasonewe maseso, wabundugile mu muta nga tangua gakhalelego nu ima ya gudia nu milele. (2 Kol. 11:23-27) Uvi, Phaula wajiyile egi udi naye gulandula gukombelela Yehowa, ha fundo dia guhaga matangi enji mu midimo yenji ikulu nu malamba enji. Esue nji tudi naye gutshita ngenyi.

6. Itshi idi mukatshi dia “ndaga jia gu mangima” tudi naye gubuita mutshima?

⁶ Luholo lutshi tuajiya gulandula gifezegeselo gia Phaula gia ‘gubuita mutshima gu ndaga jia gu mangima’? Athu ako mukatshi dietu adi naye gubinga khadilo dia gudibela mukunda nu gubola atshitshile masugu abalega. Gula idi ngenyi, wajiya gusendesa gulonguga ndaga jiatadila mulambu wahanele Klisto. Gula tudi mutanga nu gutangigiza nu gutshita gisambu gu ndaga yatadila gibawu, tuajiya gubinga khadilo dia gulaba gudibela. Tuajiya gubemba gudisagesa mukunda nu gubola guatutotesele Yehowa. Tutadilenu longo diko tuajiya guzula mu gifezegeselo gia Phaula. Yajiya gukhala egi athu ako abembele mudimo wa makuta avula ha gutshita muavula mudimo wa Yehowa. Gula idi ngenyi, tuajiya gubuita ndaga jiabalegele gale mutshima, gula tudi mutuna gutangiza ima tuakhalele naye guheta. (Lutang. 11:4-6; Mulo. 7:10) Mukatshi dia “ndaga jia gu mangima” tuajiya gutanga nji ndaga tuatshitshile gale mu mudimo wa Yehowa, nga malamba atubuidile mu masugu abalega. Yadiago, gula tudi mutangiza luholo Yehowa  watukuatesele mu masugu abalega, tuajiya gusuena hehi nu Yehowa. Uvi, tushigo naye gutangiza nga hazonda egi tuamukalegele gale mudimo wavula.—1 Kol. 15:58.

7. Ha gutadila 1 Kolinto 9:24-27, ndaga itshi ya ndando tudi naye gutshita ha gubinga phushi jia monyo? Fezegesa.

⁷ Phaula wakotelesele muabonga mbimbi jia zuelele Yesu egi: “Hagienu jingolo ha gungina gu mufulo wazonda.” (Luka 13:23, 24) Phaula wajiyile egi udi naye gukalagala ngolo gifua Yesu mu lujingu luenji luagasue. Wafuanesele lujingu lua Aklisto nu guzula phushi. (Tanga 1 Kolinto 9:24-27.) Muthu udi muzula phushi wana guhaga matangi enji gu mufundunda wa gisugishilo, ganago gutala ima yajiya gumuwunganesa. Hagufezegesa, mangino athu ana guzula phushi ajiya gubalegela mu mazando adi nu ima yavula yajiya guawunganesa matangi. Udi mutangiza egi muthu udi muzula phushi wajiya gumagana ha gutala ima yawaha idi mudigiwa ba? Gula udi nu funu ya gubinga, gajiyilego gumagana nga hazonda! Esue nji, tudi naye gutuna ima idi muwunganesa matangi etu tangua tudi muzula phushi mukunda nu monyo. Gula tuahaga mutshima gu gishina tudi muzudila phushi, nu tuakalagala ngolo gifua Phaula, mbatuheta gishimbigo!

8. Ndaga jitshi thathu tuza mutadila?

⁸ Henyaha, tutadilenu ndaga jiajiya gutulebesa muila. Ya thomo, yajiya gukhala egi ndaga jiakalegewego luholo tuakhalele gudifelela. Ya mbadi, guleba gua ngolo jia muila tangua tuakola, nu ya thathu, malamba adi mushipha ivo yavula. Tuajiya gukolesela mu malamba a luholo elu gula tualandula gifezegeselo gia athu abingile malamba ene.—Fili. 3:17.

9. Tuana gudivua gikuatshi gula tuamona egi mafelela etu ataganelego?

⁹ Gula ndaga jiakalegewego luholo tuakhalele gudifelela. Tuana gudifelela ndaga jiawaha jiatulayile Yehowa. Tangua profete wa Yehowa Habakuka, gazuelele egi wakhalele nu funu egi Yehowa asugise umbundudi wa enya Yuda, Yehowa wa muwambelele egi: ‘landula gunengena.’ (Hab. 2:3) Uvi tuajiya gutotesa gikhesa (ngolo) gula tuamona gifua ndaga tuana  gudifelela jiataganelego. Tuajiya guleba muila. (Ish. 13:12) Mu siekle ya 20, aphangi ataganele nu ndaga ya luholo elu. Mu tangua diene, Aklisto avula ambiwe maji mu nyuma akhalele gudifelela egi mbaaya mu dilu mu 1914. Tangua amonele egi felela diawo nu gutagana ndo, Itshi aphangi awa akalegele ha gulua nu ndaga eyi?

10. Itshi phangi mumoshi nu mukaji’enji atshitshile tangua amonele egi ndaga jiakalegewego luholo akhalele gudifelela?

¹⁰ Tutadile gifegeselo giabonga gia Aklisto mbadi abingile khadilo dia guleba muila. Phangi Royal Spatz wabatijiwe nu ivo 20 mu 1908. Wakhalele gudifelela diago egi gualeha ndo udi muya mu dilu. Hene, mu 1911, hasogele (hambishile) muene phangi wa mukhetu mu jina dia Pearl, wamuhudile egi: “Udi mujiya ndaga mbayibua mu 1914. Gula tuatshigina gudizula mu ulo, tudizule luenyelu!” Aphangi awa abembelele guzula phushi luholo felela diawo dia guya mu dilu mu 1914 diatunyile gutagana ba? Ndo, handaga ahagele matangi awo ha gutshita gutshigina gua Yehowa, uvi ishigo mukunda nu guya mu dilu. Akhalele nu desizio dia guzula phushi nu gukolesela guagasue. Hene, Royal nu Pearl alandudile gukalegela Yehowa nu gujinginyina guagasue uu nu tangua afile gungima dia ivo yavula. Yadiago tuana gunengena lusugu Yehowa mbagaweva jina dienji nu mbagamonesa egi Ufumu wenji udi watagana, nu tangua mbagatagenesa malaji enji. Jiya egi Yehowa mbawutagenesa diago malaji enji mu tangua diabonga. Uvi henyaha, tulandule gukombelela Nzambi, tulebigo muila gula tuamona egi ndaga jiakalegewego luholo tuakhalele gudifelela.

11-12. Mukunda natshi tudi naye gulandula gukombelela Yehowa ngatshima tushigo luko nu ngolo jiavula? Fezegesa.

¹¹ Guleba gua ngolo jia muila tangua tuakola. Muthu wana guzula phushi wana gukhala nu funu ya ngolo jiavula mu muila, uvi esue tushigo nu funu ya ngolo jiavula mu muila ha gukhala agujinginyina gudi Yehowa. Athu avula a gukola ashigo nu ngolo jiavula mu muila uvi ana gukhala agujinginyina gudi Yehowa. (2 Kol. 4:16) Ha gufezegesa, tangua phangi Arthur Secord * gakhalele nu ivo 88, wakhalele watshitshi gale gu Betele ivo 55, uvi gungima gakhalelego luko nu ngolo, wakhalele nji nu ukhashi. Lusugu lumoshi, phangi wakhalele gumukuatesa wayile gu gitanda gienji ha gujiya ndaga gakhalele najio funu. Wamutalele nu wamudijigile nu guzumba guagasue egi: “Phangi Secord, watshitshile gale ndaga jiavula mu mudimo wa Yehowa.” Uvi Arthur, gakhalelego mutala luko ndaga jiakalegele muene mualeha. Watalele phangi muene nu gumuemueta, wazuelele egi: “Ayi, idi ngenyi. Ndaga tuatshitshile, jishigo jiene  jidi nu ndando. Uvi ndaga ya gubalega ndando idi gusala ya gujinginyina gudi Yehowa.”

¹² Yajiya gukhala egi wakalegele gale Yehowa mudimo ivo yavula, uvi luenyelu muila ushigo guguhana njila ya gutshita ndaga jiavula luholo wakhalele mutshita ha thomo. Gula idi ngenyi, ulebigo muila. Jiya egi Yehowa wana gujiya nu wana gusuanguluga nu mudimo wamukalegele mu masugu abalega. (Heb. 6:10) Henyaha, jiya egi guvula gua ndaga tuana gukalegela Yehowa gushigo guene guana gumonesa egi tuana gumuzumba. Uvi, tuana gumonesa egi tuazumba Yehowa tangua tuana gumonesa khadilo diawaha nu tuana gumutshitshila mudimo nu ngolo jietu jiagasue. (Kol. 3:23) Yehowa wana gujiya muabonga ngolo jietu nu ganago gututoga ha gutshita ndaga jiavula gubalega ngolo jietu.—Mako 12:43, 44.

13. Luholo lutshi eksperianse ya Anatoly nu Lidiya idi gutukuatesa ha gulandula gukombelela Yehowa ngatshima tuatagana nu malamba?

¹³ Malamba adi mushipha ivo yavula. Akombeledi avula a Yehowa ataganele nu malamba nu umbalagaji ivo yavula. Tufezegese: Anatoly Melnik * wakhalele nu ivo 12 hambiwe sh’enji mu bologo, nu hatumiwe muene gu Siberie, ba kilometre 7 000 nu fami yenji gu Moldavie. Gungima dia givo gimoshi, Anatoly, nu gin’enji nu akhakh’enji, atumiwe nji mu bologo gu Siberie. Gungima, akhalele muya mu gudibungisa mu dimbo diko, uvi akhalele naye guwenda ba kilometre 30 mu tangua dia neige, guma guakhalele guahuma diago. Gungima, phangi Melnik wabalegesele ivo thathu mu bologo, gualeha nu mukaji’enji, Lidiya, nu mun’awo wa mukhetu wa givo gimoshi. Mu ivo eyi yagasue ya lamba, Anatoly nu fami yenji alandudile gukalegela Yehowa nu gujinginyina guagasue. Mangino, Anatoly udi nu ivo 82, nu wana gutshita gu Bethel ya gu Asie centrale. Esue nji tuajiya gutshita yagasue tuajiya gutshita mu mudimo wa Yehowa gifua Anatoly nu Lidiya, nu gulandula gukolesela gifua luholo tuakolesele mu masugu abalega.—Gal. 6:9.

14. Phaula wamonele egi udi naye gutshita itshi ha guheta gishimbigo?

¹⁴ Phaula wahagele diago mutshima egi mbawumanesela guzula phushi nu mbawuheta gishimbigo. Luholo gakhalele Muklisto wambiwe maji mu nyuma, wakhalele nu felela dia ‘guheta gishimbigo gia gutamega gua Nzambi.’ Uvi, ha guheta gishimbigo giene, Phaula wamonele egi udi naye gulandula “guhaga musende wa phushi.” (Fili. 3:14) Phaula wakalegele  gifezegeselo giawaha ha gukuatesa enya gu Filiphi ha guhaga matangi awo gu gishimbigo.

15. Luholo lutshi Phaula wahanele gifezegeselo gia gukhala ana a ufumu ha gukolesa enya gu Filiphi ha gulandula “guhaga musende wa phushi”?

¹⁵ Phaula wa wunguluishile enya gu Filiphi gishimbigo giawo gia guya mujinga mu dilu. (Fili. 3:20) Mukunda natshi akhalele naye guwunguluga gishimbigo giene? Mu tangua diawo, gukhala muenya Roma guakhalele gishimbigo gia koma. * Uvi, Aklisto ambiwe maji mu nyuma, akhalele nu gishimbigo giabonga gubalega gukhala muenya Roma, giakhalele naye guabatela gubonga guavula. Gukhala monya Ufumu wa Nzambi guakhalele nu ndando yavula gubalega gukhala muenya Roma! Hene, Phaula wakolesele enya gu Filiphi ha ‘gudituameza gifua ana a ufumu mu luholo luatagana lua lukuma luabonga luatadila Klisto.’ (Fili. 1:27) Aklisto ambiwe maji mu nyuma mangino, ana guhana gifezegeselo giabonga luholo ana gutshita ngolo ha guheta gishimbigo giawo gia guya mu dilu.

16. Ngatshima tudi nu felela dia gujinga mu dilu nga ha mavu, itshi tudi naye gulandula gutshita mu gudivua nu Filiphi 4:6, 7?

¹⁶ Ngatshima tudi nu felela dia gujinga mu dilu nga hashi mu phaladiso, tudi naye gukalagala ngolo ha guheta gishimbigo giene. Nga tuatagana nu malamba a luholo lutshi, tushigo naye gutangiza ndaga jia mualeha, nu tushigo naye gubemba egi gima gimoshi gitukange njila ha gukombelela Yehowa. (Fili. 3:16) Tuajiya gumona egi mafelela etu ashigo mutagana, nga ndo ngolo jietu jia muila jialeba. Yajiya gukhala egi tuana gutagana nu lamba diakoma nga usageshi ivo yavula. Ikhale ngenyi nga ndo, ‘mudisagesago nga mu ndaga imoshi.’ Uvi, wambelenu Nzambi ndaga mudi nayo funu mu gukombelela guenu, nu muene mbawumihana guhuima guabalega ndunge jiagasue jia muthu.—Tanga Filiphi 4:6, 7.

17. Itshi mbatumona mu longo dialandula?

¹⁷ Muthu wana guzula phushi wana gutshita ngolo gula wamona mufundunda wa gisugishilo, esue nji tudi naye guhaga matangi etu gu gishimbigo handaga tuaheta gugisugishilo gia phushi jia monyo. Gula luholo ludi guene, tulandule gutshita ngenyi nu gutala malaji abonga adi gutunenga. Itshi tudi naye gutshita hagula tulandule gukhala mu njila yabonga, nu luholo lutshi tuajiya gukolesela? Longo dialandula mbaditukuatesa ha gujiya ndaga tudi naye guhaga ha fundo dia thomo nu ha ‘gutomba ndaga jiabalega ndando.’—Fili. 1:9, 10.