GUDI nu ndaga imoshi wana gusuanguluga gukalagala mu hungu, uvi henyaha ushigo nu luholo lua guyikalagala ba? Ndaga yene yajiya gukhala ginemo gimoshi phangi muko gadi mutagenesa. Nga ndo yajiya gukhala ginemo gia mu hungu nga mudimo wunu wakhalele mutshita thomo. Gukula, ukhashi wa muila, lamba dia mbongo nga inemo iko mu fami yajiya gugukanga njila ha gutshita mudimo wene. Nga ndo yajiya gukhala egi wabembele ginemo wakhalele nagio mukunda nu usombegeshi wa ndaga jia organizasio. Ikhale nga ndaga itshi yagutumine ha gubemba ginemo giaye, wajiya gudivua gifua ushigo mukalegela Nzambi luholo wakhalele mutshigina. Mu ndaga jia luholo elu, wajiya gudivua gifua ushigo gaye nu ndando. Gula idi ngenyi, itshi yajiya gugukuatesa ha gukatula matangi abola adi gugujila, gifua guleba muila, gudivuila khabu, nga kuvuila atu ako khabu? Luholo lutshi wajiya gubamba gusuanguluga guaye?

Gifegeselo gia Yone Mubatiji giajiya gutukuatesa ha gubamba gusuanguluga guetu. Yone wakhalele musuanguluga nu inemo yenji ya ndando, uvi gakhalelego mujiya itshi yajiya gumubuila mu mudimo wa Yehowa. Gakhalelego mutangiza nga hazonda egi wajiya gubalegesa matangua avula mu bologo gifua muabalegesele muene mu mudimo wenji wa gulongesa. Uvi Yone walandudile gukhala nu gusuanguluga, wabambele khadilo diene lujingu luenji luagasue. Itshi yamukuatesele? Luholo lutshi tuajiya gubamba gusuanguluga guetu ngatshima tudi gudivua gifua tushigo mukalagala ndaga tuatshigina gukalagala?

Mu printemps ya givo 29 gia Tangua Dietu, Yone wasendesele gukuatesa athu ha gulondega mitshima yawo mukunda nu guza gua Masiya. Wakhalele muzuela egi: “Balumunyenu mitshima yenu, ndaga ya Ufumu wa mu dilu udi gale hehi.” (Mat. 3:2; Luka 1:12-17) Avula atshiginyile. Hene, thundu jia athu jiakhalele mukatuga mu mafundo a gualeha ha guza mutegelela ulongeshi wa Yone, avula abalumuine mitshima yawo, nu abatijiwe. Yone walezele mafumu a mangumba anyi akhalele gudimonesa gifua athu awaha egi usopheshi wa Nzambi udi guanenga gula abalumuinego mitshima yawo. (Mat. 3:5-12) Ndaga ya gubalega ndando mu mudimo wenji yamonegele tangua gabatijile Yesu gu suga ya givo 29 gia Tangua Dietu. Sendese tangua diene, Yone watogele athu ako ha gulandula Yesu, Masiya yago watendelewe.—Yone 1:32-37.

 Ha gutadila mudimo wakhalele nawo Yone, Yesu wazuelele egi: “Mukatshi dia athu abutshiwe gudi akhetu, khenji gumonega galego muthu wabalega Yone Mubatiji gukoma.” (Mat. 11:11) Idi yadiago egi Yone wasuanguluigile nu ishimbigo yahetele muene. Athu avula mangino ana guheta ishimbigo gifua Yone. Tuzuelele phangi Terry. Muene nu makaji’enji Sandra, atshitshile ivo 50 mu mudimo wa tangua diagasue. Terry udi muzuela egi: “Ngahetele inemo yavula mu mudimo wa tangua diagasue. Ngakhalele muvundi wa njila, ngakalegele mudimo gu Betele, ngakhalele pionye spesiale, luko ngakhalele nji mutadi muwendji, mutadi muwendji wa distrike, mangino ngudi pionye spesiale.” Idi ndaga ya bonga ha guheta inemo mu mudimo wa Nzambi, luholo tuza guyimona mu gifezegeselo gia Yone, ha gubamba gusuanguluga tudi naye gutshita ngolo jiavula gula ndaga jiasombegesa mu lujingu luetu.

Yone mubatuiji wakhalele mubamba gusuanguluga guenji handaga wakhalele musuanguluga nu mudimo wenji. Tuzule gifezegeselo. Gungima dia gubatijiwa gua Yesu, mudimo wa Yone wasendesele gubulumuga, uvi wa Yesu wasendesele gukanduga. Alandudi a Yone asuangulugilego nu ndaga yene hene amuwambelele egi: “Tala, luenyelu na [Yesu] udi gale mubatiza! Athu agassue na adi muya gudi muene.” (Yone 3:26) Yone waavutudile egi: “Muthu udi muzula mukhetu mu ulo muene mulumi’a mukhetu muene. Uvi gula futa dia muthu udi muzula mukhetu, wavua dijui dia futa dienji, wana gusuanguluga muavula diago ha guvua dijui dia muthu udi muzula mukhetu mu ulo. Hene gusuanguluga ngudi nago gudi guatagana diago.” (Yone 3:29, NWT) Yone gakambelego gudifuanesa nu Yesu; gatangijilego nji egi mudimo wenji wabulumuga mukunda nu mudimo wakoma wa Yesu. Uvi, wabambele gusuanguluga guenji handaga wakhalele musuanguluga nu mudimo wenji wa gukhala “futa dia muthu udi muzula mukhetu.”

Khadilo dia Yone diamukuatesele ha gubamba gusuanguluga guenji ngatshima gutagenesa mudimo wenji guakhalelego ndaga yaleba. Ha gufezegesa, Yone wakhalele Nazileya wa givualewa, nu gakhalelego munua matombe. (Luka 1:15) Ha guzuelela lujingu lua leba lua Yone Yesu wazuelele egi: “Hajile Yone, gakhalelego mudia nga gunua.” Gu khanda iko, Yesu nu alandudi enji akhalelego nu ijila ya gudia nu akhalele mujinga gifua athu agasue. (Mat. 11:18, 19) Luko, Yone gakalegelego nga ndaga ya gushimana, uvi wajiyile egi alandudi a Yesu nu athu awa akhalele thomo alandudi enji, akhalele naye gukalagala ndaga jia gushimana. (Mat. 10:1; Yone 10:41) Gabembelego egi ndaga eyi imuwunganese matangi, uvi walandudile gukalagala mudimo wa Yehowa nu gikhesa (ngolo).

Gula esue nji tuasuanguluga nu inemo tudi nayo mu mudimo wa Yehowa, mbatubamba gusuanguluga guetu. Terry, tuazuelela guthunda udi muzuela egi: “Ngana gutagenesa muabonga ginemo giagasue giana gunguhanewa.” Gula watangiza mudimo wenji wa tangua diagasue, wana guzulela egi: “Mbangudisagesago nga hazonda mukunda nu mudimo owu, uvi ngumutangiza matangua awaha ngabalegesele mu mudimo wene.”

Tuajiya gusuanguluga muavula mu mudimo wa Yehowa gula tuatangiza ndaga yana gutshita egi mudimo wene ukhale nu ndando yavula. Ndaga yene idi luendu tuakhala nalo lua gukhala ‘mafuta a mudimo a Nzambi.’ (1 Kol. 3:9) Umonyi wanago gubola gula wabambewa muabonga; luholo lumoshi nji, mbatubamba gusuanguluga guetu gula tualandula gutangigiza luendu luetu lua gukalagala hamoshi nu Nzambi. Ngenyi, mbatushigo mufuanesa mudimo wetu tuana gukalagela Nzambi nu wa aphangi ako. Mbatushigo nji mutangiza egi inemo yatuhanele Yehowa ishigo nu ndando uvi ya athu ako idi nu ndando yavula.—Gal. 6:4.

Yajiya gukhala Yone wakhalele mujiya egi mudimo wenji mbawumusuga, uvi gakhalelego mujiya luholo lutshi mbawusuga. (Yone 3:30) Mu givo 30 gia Tangua Dietu, mbeji 6 gungima dia gubatiza Yesu, Fumu Helode wambile Yone mu bologo. Uvi Yone walandudile gulongesa. (Mako 6:17-20) Itshi yamukuatesele ha gubamba gusuanguluga mu tangua edi dia lamba? Walandudile guhaga matangi enji mu ndaga jia mu nyuma.

Hakhalele Yone mu bologo, wavile mene jiatadila mudimo wa Yesu. (Mat. 11:2; Luka 7:18) Yone wakhalele mujiya egi Yesu wakhalele Masiya, uvi wakhalele gudihula gula luholo lutshi Yesu mbagatagenesa ndaga jiagasue mukanda  wa Nzambi wana guzuela egi Masiya mbawutagenesa. Wakhalele nji mujiya egi Masiya mbawubua fumu, hene gakhalele gudihula gula Yesu wakhalele naye gusendesa guhinyina mu tangua diene. Wakhalele nji gudihula gula Yesu mbawumuzola mu bologo. Yone wakhalele nu funu ya gujiya mudimo Yesu wakhalele naye gutshita, hene gatumile alandudi enji mbadi ha gumuhula egi: “Aye udi muene udi naye ya guza, nga tunenga muko?” (Luka 7:19) Tangua avutugile, Yone wategelele muabonga hakhalele ene gumuwambela luholo Yesu wakhalele musaga athu mu luholo lua gushimana, nu luholo gaavutudile ha gumuwambela egi: “Ifofo idi mumona, ikata idi muwenda, enya hute adi musagewa, afua matshui adi muvua, agufua adi mufuzumuwa, nu phutu jidi mulongesewa lukuma luabonga.”—Luka 7:20-22.

Idi yadiago egi mbimbi eji jiahanele diago Yone gikhesa. Yamonesele diago egi Yesu wakhalele mutagenesa profesi jiakhalele muzuelela Masiya. Ngatshima Yesu gazolelego Yone mu bologo, Yone wakhalele mujiya egi mudimo wenji wakhalelego wa gituhu. Wabambele gusuanguluga guenji ngatshima watagenele nu malamba.

Esue nji, gula tuahaga matangi etu mu ndaga jia mu nyuma gifua Yone, mbatubamba gusuanguluga guetu nu guhuiminyina guagasue. (Kol. 1:9-11) Tuajiya gukolesela gula tudi mutanga Biblia nu guyitangigiza; gutshita ngenyi mbagutukuatesa ha gujiya egi mudimo tuakalegele Nzambi ushigo wa gituhu. (1 Kol. 15:58) Sandra udi muzuela egi: “Gutanga mukhapho wa Biblia lusugu nu lusugu guangukuatesele ha gusuena hehi nu Yehowa. Guangukuatesele ha guhaga matangi ami gudi Yehowa uvi gudi ame hakhami ndo.” Tuajiya gutanga rapore jia mudimo wa Ufumu udi mukalegewa, jiajiya gutukuatesa ha gutuna gutangiza phamba milonga yetu, uvi ha gutangiza ndaga jidi mukalagala Yehowa. Sandra udi muzuela egi: “Programe jia mbeji jiagasue ya JW Télédiffusion jiana gungukuatesa ha gudivua egi ngudi ya gujinginyina nu organizasio wa Yehowa, nu ha gubamba gusuanguluga mu mudimo wami.”

Yone Mubatiji watshitshile mudimo wenji tangua diazonda, walongesele nu ‘nyuma nu ngolo jia Eliya,’ nu gifua Eliya, wakhalele ‘muthu nu matangi gifua esue.’ (Luka 1:17; Yak. 5:17) Esue nji, gula tualandula gifezegeselo gienji gia gusuanguluga nu mudimo wetu nu guhaga matangi mu mudimo wa Yehowa, mbatubamba gusuanguluga mu mudimo wetu, nga itshi yabua.