1. Luholo lutshi Yehowa wana gutadila akombeledi enji agujinginyina?

YEHOWA wana zula akombeledi enji agasue agujinginyina nu ndando mukatshi dia hungu nu wana guazumba. Ngatshima tuana khala nu inemo ya gudisha, mukut’etu agasue tuana khala nu ndando nu tuana khala nu funu ya athu ako. Mupostolo Phaula udi gutukuatesa ha gukotelesa longo edi dia ndando. Luholo lutshi?

2. Ha gutadila Efeso 4:16, mukunda natshi tudi naye gunemesa muthu wagasue nu gutshita hamoshi?

² Mu verse yakuata longo edi, mupostolo Phaula wazuelele egi gushigo nga muthu mumoshi mukatshi dia akombeledi a Yehowa wajiya guwambela muko egi: ‘Ngushigo nu funu yaye.’ (1 Kol. 12:21) Ha gubamba guhuima mu hungu, tudi naye gunemesa muthu wagasue nu gutshita hamoshi. (Tanga Efeso 4:16.) Gula tudi mutshita hamoshi mu gudivua, muthu wagasue mbawudivua egi wana guzumbiwa nu hungu mbadikhala diakola.

3. Itshi tuza muzuelela mu longo edi?

³ Mu maluholo atshi tuajiya gumonesa egi tuana gunemesa aphangi’ako mukatshi dia hungu? Mu longo edi, tuza mumona luholo akulu adi naye gunemesa akulu n’ako. Tuza mumona nji luholo mukut’etu agasue tudi naye gunemesa aphangi’a mala nu a akhetu anyi adi undumbu. Gungima, tuza muzuelela luholo tuajiya gumonesa egi tuana nemesa aphangi anago guzuela zuelelo dietu muabonga.

4. Longo ditshi diahanele mupostolo Phaula mu Lomo 12:10 akulu adi naye gukalegela?

⁴ Akulu agasue a mu hungu ana gutombewa mu njila ya nyuma  ya Yehowa. Uvi, ana tshitago ndaga luholo lumoshi nu ana khala nu ndunge jia gudisha. (1 Kol. 12:17, 18) Yajiya gukhala egi akulu ako khenji atshitago masugu avula sendese atombewe nu ashigo nu eksperianse yavula. Yajiya gukhala nji egi ako ashigo nu luholo lua gutshita ndaga jiavula handaga adi athu agukola nga nu ukhashi mu muila. Uvi, gushigo nga mukulu mumoshi wajiya gutangiza egi mukulu muko gashigo nu ndando. Akulu agasue adi naye gukalegela longo diahanele mupostolo Phaula mu Lomo 12:10.—Tanga.

5. Luholo lutshi akulu ana monesa egi ana nemesa akulu n’ako? Mukunda natshi gutshita ngenyi gudi nu ndando?

⁵ Akulu ana monesa egi ana gudinemesa gula adi mutegelela muabonga tangua ako adi muzuela. Ndaga eyi yana khala diago nu ndando yavula tangua ana gudibungisa ha guzuelela ndaga jiakoma jia mu hungu. Mukunda natshi? Inzo Yaleha ya Mutaledi ya 1 Octobre 1988 ya Français yazuelele egi: “Akulu adi naye gujiya egi mu njila ya nyuma yabonga, Klisto wajiya gukalegela mukulu wagasue mu hunji dia akulu ha guzuelela longo dimoshi dia Biblia diajiya gukuatesa akulu ha gutshita ndaga imoshi nga ha guzula desizio dimoshi dia ndando. (Makal. 15:6-15) Nyuma ya Nzambi yana kuatesago phamba mukulu mumoshi, uvi yana guakuatesa mukut’awo agasue.”

6. Itshi yana kuatesa akulu ha gutshita ndaga mu gudivua? Gubonga gutshi hungu diana guheta?

⁶ Mukulu wana gunemesa akulu n’ako ganago gukamba egi muene udi naye gukhala muthu wa thomo ha guzuela mu gudibungisa guagasue gua akulu. Ganago guzuela muavula mu gudibungisa nu ganago gutangiza egi matangi enji adi naye gukhala abonga tangua diagasue. Uvi, wana hana matangi’enji nu gudibulumuisa guagasue nu wana tegelela muabonga ndaga akulu ako adi muzuela. Ndaga yabalega ndando idi egi, mukulu muene wana khala hehi ha guzuelela longo dia Biblia nga gulandula utuameji wa ‘muhiga watema nu wafubidila.’ (Mat. 24:45-47) Gula akulu adi muzumba akulu n’ako nu adi gudinemesa, nyuma ya Nzambi mbayikhala nawo nu mbayatuameza ha guzula badesizio ajiya gukuatesa hungu.—Yak. 3:17, 18.

7. Luholo lutshi Yesu wakhalele mutadila athu akhalele undumbu?

⁷ Mangino, mukatshi dia hungu tuana khala nu aphangi adizudile gale mu ulo nu ako mukatshi diawo ana khala nu ana. Uvi, tuana khala nji nu aphangi’a mala nu a akhetu adi undumbu. Luholo lutshi tudi naye gutadila aphangi’awa adi undumbu? Tudi naye gulandula luholo Yesu wakhalele guatadila. Yesu gazudilego mukhetu mu ulo hakhalele muene mutshita mudimo wenji ha mavu. Wasalele undumbu nu washile matangi’enji phamba mu mudimo wenji. Yesu galongeselego nga hazonda egi Aklisto adi naye gudizula mu ulo nga gusala undumbu. Uvi wazuelele egi Aklisto ako ajiya guzula desizio dia gutuna gudizula mu ulo. (Mat. 19:11, 12; tala noti jia gulonguga jia Matayo 19:12.) Yesu wakhalele munemesa athu akhalele undumbu. Gakhalelego guatadila gifua athu a githuhu nga athu ashigo nu gima.

8. Mu gudivua nu 1 Kolinto 7:7-9, ndaga itshi mupostolo Phaula wakolesele Aklisto ha gutadila?

⁸ Mupostolo Phaula wakhalele nji undumbu tangua diakhalele muene mutshita mudimo wenji. Phaula gazuelelego nga hazonda egi idi ndaga yabola gudi Muklisto ha gudizula mu ulo. Wakhalele mujiya egi didi desizio dia muthu muene hakhenji. Uvi Phaula wakolesele Aklisto ha gutadila gula ajiya gusala undumbu ha gukalegela Yehowa mudimo. (Tanga 1 Kolinto 7:7-9.) Idi yadiago egi mupostolo Phaula wakhalele munemesa Aklisto akhalele undumbu. Watombele Timote, muvuala wakhalele undumbu ha gutagenesa inemo yakoma. * (Fili. 2:19-22) Ishigo ndaga yabonga ha gutangiza egi phangi mumoshi wa yala udi mutagenesa ndaga jiana togewa ha guheta inemo ya mu hungu phamba gula wazudile gale mukhetu mu ulo nga ndo.—1 Kol. 7:32-35, 38.

9. Itshi tuajiya guzuela mu ndaga yatadila gudizula mu ulo nga gukhala undumbu?

⁹ Ikhale Yesu nga Phaula, azuelelego nga lusugu lumoshi egi Aklisto adi naye gudizula mu ulo nga gusala undumbu. Uvi itshi tuajiya guzuela mu ndaga yatadila gudizula mu ulo nga gusala undumbu? Inzo Yaleha ya Mutaledi ya 1 Octobre 2012 ya Français yazuelele ndaga yene haphelo egi: “Idi yadiago egi, [gudizula mu ulo nga gukhala undumbu,] yagasue mbadi yana katuga gudi Nzambi. . . . Yehowa gana tshiginago egi [athu adi undumbu] adisagese nga guvua musonyi handaga ashigo mu ulo.” Hene, tudi naye  gunemesa aphangi’a mala nu a akhetu anyi adi undumbu mukatshi dia hungu.

10. Luholo lutshi tuajiya gumonesa egi tuana gunemesa aphangi’etu a mala nu a akhetu anyi adi undumbu?

¹⁰ Luholo lutshi tuajiya gumonesa egi tuana gunemesa luholo aphangi’a mala nu a akhetu ana gudivua? Tudi naye gujiya egi gudi nu ndaga jiavula jiana gutshita egi aphangi’a mala nu a akhetu akhale undumbu. Ha gufezegesa, ako ana guzula ene akhawo desizio dia gusala undumbu. Ako ana khala nu funu ya gudizula mu ulo, uvi khenji ahetelego muthu wabonga mukunda nu ene. Uvi ako afuishile akaji’awo nga alumi’awo. Gula idi ngenyi, idi yabonga ha guhula aphangi adi undumbu ha gujiya mukunda natshi khenji adizudile mu ulo nga guakuatesa ha guheta muthu ajiya gudizula nawo mu ulo ba? Idi yadiago egi, Aklisto ako mukatshi diawo ajiya gukhala nu funu ya ukuateshi wa luholo elu. Uvi, gula atogelego ukuateshi, luholo lutshi aphangi ene ajiya gudivua gula tudi guakambela athu a gudizula nawo mu ulo? (1 Tes. 4:11; 1 Tim. 5:13) Henyaha tutadilenu ndaga jiana zuela aphangi’a mala nu a akhetu agujinginyina anyi adi undumbu.

11-12. Luholo lutshi tuajiya gulebesa aphangi anyi adi undumbu muila?

¹¹ Mutadi muwendji mumoshi wana tagenesa muabonga ginemo gienji udi muzuela egi, gukhala undumbu guana gubata gubonga guavula. Uvi, udi muzuela luko egi muila wana gumuleba gula aphangi adi gumuhula egi: “Itshi udi munengena ha guzula mukhetu mu ulo?” Phangi mumoshi wa yala yonu udi undumbu, wana tshita mudimo gu Betele udi muzuela egi: “Matangua ako, nganavua aphangi’a mala nu a akhetu muzuela egi ana guvua khenda mukunda nu aphangi anyi adi undumbu. Gutangiza ngenyi guajiya guatuma ha gutangiza egi gukhala undumbu gudi ginemo, uvi gushigo kado.”

¹² Phangi mumoshi wa mukhetu wana khala undumbu udi muzuela egi: “Aphangi ako ana tangiza egi aphangi’agasue anyi ana khala undumbu ana kamba athu a gudizula nawo mu ulo, nga ndo, aphangi ene ana kalegela okazio wagasue tangua adi mu hunji nu athu ako ha guheta muthu ya gudizula nawo mu ulo. Lusugu lumoshi, ngatshitshile vuayaje ha guya gu dimbo diko mukunda nu mudimo wami wa gu Betele. Tangua ngahetele guene, ngayile mu gudibungisa gua mu hungu mu phipha. Phangi wa mukhetu tuakhalele n’enji wanguwambelele egi mu hungu diawo gudi nu aphangi’a mala mbadi ngudi nawo gindongo gimoshi. Wanguwambelele egi ngushigo gugukambela yala. Uvi tangua tuakhalele muzoga mu Inzo ya Ufumu, wangubatele gudi aphangi ene mbadi hagula tudimone nawo. Ndaga yene yatusuanguluishilego nga hazonda nu aphangi’ene mbadi a mala.”

13. Gifezegeselo gitshi giahanele gikhesa gudi phangi mumoshi wa mukhetu udi undumbu?

¹³ Phangi muko wa mukhetu udi undumbu, wana tshita mudimo gu Betele udi muzuela egi: “Ngudi mujiya aphangi a avundji a njila agukola anyi ana khala undumbu. Ana khala atema nu mafelela awaha mu mudimo wa Yehowa, ana khala hehi ha gukuatesa athu ako, ana suanguluga nu mudimo wawo nu ana kuatesa diago hungu muavula. Ana tadila undumbu wawo mu luholo luabonga nu ana tangizago egi ene abalega athu ako handaga adi undumbu. Ana tangizago nji egi ajiyilego gukhala nu gusuanguluga handaga adizudilego mu ulo nga ndo handaga ashigo nu ana.” Gukhala mukatshi dia hungu diana gunemesa aphangi nu guazula nu ndando idi ndaga yabonga diago. Ukhadigo mutangiza egi aphangi ana guguvuila khenda nga fuwa. Anago gugujimbila nga gutangiza egi aye udi nu ndando yavula guabalega ene. Jiya egi ana guguzumba muavula.

14. Luholo lutshi tuajiya gumonesa egi tuana nemesa aphangi adi undumbu?

¹⁴ Aphangi’etu a mala nu a akhetu adi undumbu mbaakhala nu gusuanguluga gula tudi  guazula nu ndando mukunda nu makalegelo awo abonga, uvi ndo handaga adi undumbu. Ha fundo dia guavuila khenda, tudi naye guazula nu ndando mukunda nu gujinginyina guawo. Gula tuakalagala ngenyi, aphangi’etu a mala nu a akhetu anyi adi undumbu mbatangizago nga hazonda egi tuana guawambela egi: ‘Ngushigo nu funu yaye.’ (1 Kol. 12:21) Mbaamona diago egi tuana guanemesa nu tuana guazula nu ndando mukatshi dia hungu.

15. Usombegeshi utshi aphangi ako ana gutshita ha gulongesa muavula?

¹⁵ Mu ivo yabalega, alongeshi avula adihagele mafelela ha gulonguga zuelelo dihe-dihe hagula ajiya gutshita muavula mudimo wa gulongesa. Ha gutshita ngenyi, adi naye gusombegesa ndaga jiko mu lujingu luawo. Aphangi’ene ana bemba mahungu a mazuelelo awo ha guya muhana ukuateshi mu hungu dia zuelelo diko nu anyi adi nu funu ya alongeshi a Ufumu. (Makal. 16:9) Aphangi’awa ana zula desizio edi ene hakhawo ha gukuatesa ndaga jia Ufumu. Ngatshima ana balegesa ivo yavula ha gujiya guzuela muabonga zuelelo dihe-dihe, uvi ana kuatesa hungu muavula. Makalegelo awa abonga nu eksperianse yawo yana kuatesa nu yana kolesa hungu. Tuana zula aphangi’awa a mala nu a akhetu ana gudihana nu ndando yavula!

16. Ndaga itshi akulu adi naye gutadila ha gutomba phangi mumoshi wa yala ha gubua mukulu nga mukuateshi wa mudimo?

¹⁶ Hunji dia akulu diajiyilego gutuna gutomba phangi mumoshi wa yala ha gubua mukulu nga mukuateshi wa mudimo handaga gashigo muzuela muabonga zuelelo dia hungu. Akulu adi naye gutadila ndaga Biblia yana guzuela ha gutomba phangi ha gubua mukulu nga mukuateshi wa mudimo. Uvi, ajiyilego gutomba phangi handaga wana guzuela zuelelo dia hungu muabonga.—1 Tim. 3:1-10, 12, 13; Tito 1:5-9.

17. Ndaga jitshi fami jiko jiana tagana najio tangua ana katuga mu gifutshi giawo ha guya mu ifutshi iko?

¹⁷ Fami jiko jia Aklisto jiana lenga malamba mu ifutshi yawo ha guya mujinga nga gukamba mudimo mu ifutshi iko. Gula idi ngenyi, yajiya gukhala egi an’awo adi naye guya gu khalasa ha gulonguga zuelelo diakoma dia gifutshi giawo gihe-gihe. Yajiya gukhala nji egi mvuaji jidi naye gulonguga zuelelo diene dihe-dihe ha guheta mudimo. Itshi ajiya gutshita gula mu dimbo diene gudi nu hungu nga hunji dia zuelelo diawo? Mu hungu ditshi fami yene idi naye guya mu gudibungisa? Mbaatomba ha guya mu hungu dia zuelelo dihe-dihe dia gifutshi giene nga mu hungu dia zuelelo dia fami yawo?

18. Ha gutadila Galatiya 6:5, luholo lutshi tuajiya gunemesa desizio dia fumu ya fami?

¹⁸ Fumu ya fami udi naye guzula desizio ha gujiya gula hungu ditshi fami yenji idi naye guya. Luholo ndaga yene idi guatadila ene hakhawo, fumu ya fami udi naye guzula desizio diabonga mukunda nu enya fami yenji. (Tanga Galatiya 6:5.) Tudi naye gunemesa desizio dia fumu ya  fami. Desizio diagasue mbadizula fumu ya fami, tudi naye guditshigina nu guyamba fami yene mu hungu dietu. Tudi naye nji guazula nu ndando.—Lomo 15:7.

19. Ndaga itshi mafumu a fami adi naye gutadila mu gisambu?

¹⁹ Fami jiko jiajiya guzula desizio dia guya mu hungu diana zuela zuelelo dia mvuaji, uvi yajiya gukhala egi ana ashigo mujiya guzuela muabonga zuelelo diene. Gula hungu diene didi ha fundo diana zuelewa zuelelo dihe-dihe dia gifutshi giene, yajiya gukhala lamba gudi ana ha gukotelesa ndaga jidi mulongesewa mu gudibungisa nu ajiyilego gukula mu nyuma. Mukunda natshi? Handaga yajiya gukhala egi gu khalasa ana gualongesa mu zuelelo dihe-dihe, uvi mu zuelelo dia mvuaji jiawo ndo. Mu ndaga ya luholo elu, fumu ya fami udi naye gutshita gisambu ha gujiya ndaga adi naye gutshita ha gukuatesa an’awo ha gusuena hehi nu Yehowa nu akombeledi enji. Luko, mvuaji jidi naye gukuatesa an’awo ha gujiya guzuela muabonga zuelelo diawo, nga ndo, ajiya guya mu hungu dia zuelelo an’awo adi mukotelesa muabonga. Hungu diagasue mbaditomba fumu ya fami ha guya nu enya fami yenji, aphangi a mu hungu diene adi naye guanemesa nu guazula nu ndando.

20. Luholo lutshi tuajiya gumonesa egi tuana nemesa aphangi’etu adi mulonguga zuelelo dihe-dihe?

²⁰ Mahungu avula adi nu aphangi’a mala nu a akhetu ana tshita ngolo ha gulonguga zuelelo dihe-dihe gifua luholo tuayimona mu longo edi. Yajiya gukhala lamba gudi ene ha guzuela ndaga adi mutangiza. Uvi gula tushigo mutala phamba luholo luawo lua guzuela zuelelo dihe-dihe, mbatumona guzumba guawo mukunda nu Yehowa nu nzala yawo ya gumukombelela. Gula tudi mumona makalegelo awo abonga, mbatuzula aphangi’ene nu ndando nu mbatuanemesa. Mbatuzuedigo egi ‘ngushigo nu funu yaye’ phamba handaga ashigo muzuela zuelelo dietu muabonga.

21-22. Luendu lutshi luabonga tuana khala nalo?

²¹ Yehowa watuhanele luendu luabonga lua gukhala mukatshi dia hungu dienji. Ikhale udi yala nga mukhetu, udi undumbu nga muadizudile gale mu ulo, udi muvuala nga muthu wa gukola, ikhale wana guzuela zuelelo dimoshi muabonga nga ndo, mukut’etu agasue tuana khala nu ndando gudi Yehowa nu gudi athu ako.—Lomo 12:4, 5; Kol. 3:10, 11.

²² Tulandulenu gukalegela malongo awa avula abonga tualonguga mu gifezegeselo gia mupostolo Phaula giatadila muila wa muthu. Gutshita ngenyi mbagutukuatesa ha gujiya ndaga tuajiya gukalagala ha gukolesa aphangi’etu a mala nu a akhetu, ha guazumba nu guanemesa.