1. Ba desizio atshi athu avula ana guzula, mukunda natshi ana guzula ba desizio ene?

MANGINO, akombeledi a Nzambi avula ana khala nu khadilo dia gudihana. Aphangi avula a mala nu a akhetu, ana guzula desizio dia gusala undumbu. Aphangi ako adizudile gale mu ulo, uvi ana guzula desizio dia gutuna guvuala ana. Fami jiavula jiana guzula desizio dia gukhala nu lujingu lualeba. Aphangi awa agasue ana guzula desizio edi mukunda nu ndaga imoshi ya ndando. Ndaga yene idi gukalegela Yehowa mudimo muavula gula luholo ludi guene. Ana khala nu gusuanguluga, ana sha mutshima egi Yehowa mbawutagenesa nzala jiawo jiagasue. Yehowa mbawakuatesa diago ba? Ayi! Mukunda natshi tuazuela ngenyi? Handaga mu tangua dikulu, wataganesele nzala jiagasue jia akombeledi enji. Ha gufezegesa, washimbigile Abalahama, ‘tata wa athu agasue adi nu gutshigina.’—Lomo 4:11.

2. (a) Ha gutadila Hebelu 11:8-10, 16, mukunda natshi Abalahama wakatugile mu dimbo dia Ur? (b) Itshi tuza muzuelela mu longo edi?

² Abalahama watshiginyile ha gubemba lujingu luabonga gakhalele nalo mu dimbo dia Ur. Mukunda natshi? Handaga wakhalele munengena ‘dimbo didi nu fondasio jiakola.’ (Tanga Hebelu 11:8-10, 16.) ‘Dimbo’ diene didi mukotelesa itshi? Malamba atshi Abalahama gataganele nawo tangua gakhalele munengena gutungiwa gua dimbo diene? Luholo lutshi tuajiya gukhala gifua Abalahama nu aphangi’ako a mu masugu etu ana gulandula gifezegeselo gienji?

3. ‘Dimbo’ ditshi Abalahama gakhalele munengena?

³ Dimbo Abalahama gakhalele munengena didi Ufumu wa Nzambi. Yesu Klisto muene udi Fumu wa Ufumu wene. Mbawuhinyina  hamoshi nu Aklisto 144 000 ambiwe maji mu nyuma. Mupostolo Phaula watamegele Ufumu wene egi ‘dimbo dia Nzambi udi nu monyo, Yelusalema ya mu dilu.’ (Heb. 12:22; Yat. 5:8-10; 14:1) Yesu wawambelele alandudi enji ha gukombelela mukunda nu Ufumu wene. Waawambelele ha gutoga egi Ufumu wene uze, hagula gutshigina gua Nzambi gukalegewe ha mavu gifua mu dilu.—Mat. 6:10.

4. Ha gutadila Gisendeselo 17:1, 2, 6, luholo lutshi Abalahama gajiyile ndaga jiatadila dimbo nga Ufumu walayewe gudi Nzambi?

⁴ Abalahama wakhalele mujiya luholo Ufumu wa Nzambi mbawulondewa ba? Ndo. Ivo yavula yabalega, ndaga eyi yakhalele ‘ndaga ya gijila yasuegewe.’ (Ef. 1:8-10; Kol. 1:26, 27) Uvi Abalahama wakhalele mujiya egi ajigulu enji ako mbaabua mafumu, handaga Yehowa wamulayele ndaga yene. (Tanga Gisendeselo 17:1, 2, 6.) Abalahama wakhalele nu gutshigina guakola mu ndaga jia mulayele Nzambi, yakhalele gifua wamonyi gale muthu watombewe nga Masiya, yonu udi naye gukhala Fumu mu Ufumu wa Nzambi. Gishina giene Yesu gawambelele enya Yuda a mutangua dienji egi: ‘Sh’enu Abalahama wasuangulugile muavula mu gudifelela gua gumona lusugu luami, muene walumonele, wasuangulugile.’ (Yone 8:56) Yadiago, Abalahama wakhalele mujiya egi ajigulu enji ako mbaakhala ahinyinyi mu Ufumu walondewe gudi Yehowa, wakhalele nji munengena egi Yehowa atagenese laji diene.

5. Luholo lutshi tudi mujiya egi Abalahama wakhalele munengena ‘dimbo’ dialondewe gudi Nzambi?

⁵ Luholo lutshi Abalahama wamonesele egi wakhalele munengena ‘dimbo’ nga Ufumu wa Nzambi? Thomo, Abalahama gadinginyishilego mu ndaga jia ufumu wa ha mavu. Gakhalelego mujinga fundo dimoshi, nu gakhalelego muhana ukuateshi wenji nga gudi fumu mumoshi wa ha mavu. Luko, Abalahama gakambelego gukhala nu ufumu wenji hakhenji. Uvi, walanduile gutumagela Yehowa nu wakhalele munengena egi Muene atagenese felela Dienji. Ngenyi, Abalahama wamonesele gutshigina guakola gudi Yehowa. Henyaha tutadilenu malamba Abalahama gatagenele nawo, nu malongo tuajiya guzula mu gifezegeselo gienji.

6. Luholo lutshi dimbo dia Ur diakhalele?

⁶ Abalahama wabembele dimbo diakhalele dia gutungiwa muabonga, dia ubambi, nu umonyi  wavula. Dimbo diene diatungiwe nu ibayi (ibindji) yakola, diakhalele dia gujieta nu meya. Enya gu Ur akhalele enya ndunge. Akhalele mujiya gusonega muabonga nu akhalele mujiya nji matematike. Dimbo diene diakhalele dimbo dia mingenda, handaga ba archéologues amonele mikanda ya mingenda mu dimbo diene. Jinzo jia mu dimbo diene jiakhalele jia gutunga nu brike jiakola, jia gushala muabonga, jia gumba mukubu. Jiko jiakhalele nu sugu 13 jiko 14 jia gumba sima nu maseso akola.

7. Mukunda natshi Abalahama gakhalele muhaga mutshima egi Yehowa mbawumubamba nu fami yenji?

⁷ Abalahama wahagele mutshima wenji gudi Yehowa egi mbawumubamba nu fami yenji. Mukunda natshi? Tangiza gale luholo Abalahama nu Sara abembele dimbo diabonga nu inzo yawo yawaha, ha guya mujinga mu matenta gu Kanana. Fundo diakhalele muene nu fami yenji diakhalelego nu ibayi yabonga nu njila jia meya. Luholo akhalelego mu ubambi, yakhalele yaleba hagula mbalagaji jiajiya gualuisa.

8. Lamba ditshi Abalahama gatagenele nadio mu tangua dimoshi ngenyi?

⁸ Abalahama wakhalele mukalagala gutshigina gua Nzambi, uvi mu tangua dimoshi, yakhalele lamba ha gutagenesa nzala jia enya fami yenji. Fundo diamutogele Yehowa ha guya diakhalele nu nzala yakola. Luholo nzala yakhalele yakola guene, Abalahama wazudile desizio dia guya mujinga nu fami yenji gu Egypte mukunda nu tangua diazonda. Tangua ahetele gu Egypte, fumu Farao wazudile Sara ha gumubuisa mukaji’enji. Tangiza gale gikenene Abalahama gakhalele nagio uu nu tangua Yehowa gahanele Farao ndola hagula avutudile Abalahama mukaji’enji.—Gis. 12:10-19.

9. Lamba ditshi Abalahama gakhalele nadio mu fami yenji?

⁹ Abalahama wakhalele nu lamba dimoshi diakola mu fami yenji. Mukaji’enji Sara gakhalelego muvuala ana. Ndaga yene yaahuile diago gikenene ivo yavula. Gungima, Sara wahanele muenya mudimo wenji Agar gudi Abalahama hagula avuale n’enji ana. Uvi tangua Agar gamitshile vumo dia Ishemayele, wasendesele gusegulula Sara. Ndaga yene yasagesele Sara muavula, hene gamukayele gumbo dienji.—Gis. 16:1-6.

10. Ndaga itshi yabuidile Ishemayele nu Isaka yalolele gutshigina gua Abalahama gudi Yehowa?

¹⁰ Sara wamitshile, wavualele mon’a yala, Abalahama wahanele mona muene jina egi Isaka. Abalahama wakhalele muzumba an’enji awa mbadi, Ishemayele nu Isaka. Luholo Ishemayele wakhalele musagesa Isaka, Yehowa wawambelele Abalahama ha gumukaya nu gin’enji Agar. (Gis. 21:9-14) Ivo yavula gungima, Yehowa watogele Abalahama ha guhana Isaka gifua mulambu. (Gis. 22:1, 2; Heb. 11:17-19) Mu ndaga eji jiagasue, Abalahama washile mutshima egi Yehowa mbawutagenesa mafelela enji agasue atadila an’enji.

11. Mukunda natshi Abalahama wakhalele naye gunengena Yehowa nu guhuiminyina guagasue?

¹¹ Mu tangua diene, Abalahama wakhalele naye gunengena Yehowa nu guhuiminyina guagasue. Yajiya gukhala egi Abalahama wakhalele nu ivo gubalega 70 tangua akatugile gu dimbo dia Ur nu fami yenji. (Gis. 11:31–12:4) Wabalegesele ivo hehi nu 100 mujinga mu jinzo jia matenta, muwenda mu mavu a gu Kanana. Abalahama wafuile nu ivo 175. (Gis. 25:7) Uvi gamonelego gutaganesewa gua felela dia Yehowa dia guhana mavu gudi an’enji. Gajingilego muavula ha gumona dimbo diakhalele munengena muene, yakotelesa Ufumu wa Nzambi. Ikhale ngenyi, Abalahama wafuile ‘wagukola nu gusuanguluga.’ (Gis. 25:8) Abalahama wataganele nu malamba avula, uvi wabambele gutshigina guakola gudi Yehowa nu wakhalele nu gusuanguluga ha gunengena Yehowa. Itshi yamukuatesele ha gukolesela? Handaga masugu agasue a monyo wenji, Yehowa wakhalele gumubamba  nu wakhalele gumuzula gifua futa dienji.—Gis. 15:1; Yesh. 41:8; Yak. 2:22, 23.

12. Itshi tudi munengena? Ndaga itshi tuza muzuelela?

¹² Tudi munengena dimbo didi nu fondasio jiakola gifua Abalahama. Uvi, esue tushigo munengena egi dimbo diene ditungiwe, handaga Ufumu wa Nzambi wahagewe sendese mu 1914 nu wana guhinyina gale mu dilu. (Yat. 12:7-10) Tuana gunengena egi Ufumu wene usendese guhinyina ha mavu. Tujimbilago egi tangua tudi munengena Ufumu wene, tudi naye gutagana nu malamba avula gifua Abalahama nu Sara. Akombeledi a Yehowa a mangino ana gulandula gifezegeselo gia Abalahama ba? Mene jia aphangi jiana zolewa mu Inzo Yaleha ya Mutaledi jiana gumonesa gamba mangino, akombeledi a Yehowa avula ana khala nu gutshigina nu guhuiminyina gifua Abalahama nu Sara. Tuzuelelenu mene jiazonda jia aphangi’ene nu malongo tuajiya guzula mu ifezegeselo yawo.

13. Longo ditshi wazula mu lumene lua phangi Walden?

¹³ Khala hehi ha gudihana. Gula tuatshigina guhaga Ufumu wa Nzambi ha fundo dia thomo mu monyo wetu, tudi naye gukhala gifua Abalahama munu wadihanele ha gusuanguluisa Nzambi. (Mat. 6:33; Mako 10:28-30) Tutadilenu gale gifezegeselo gia phangi Bill Walden. * Wasendesele gulonguga Biblia nu Matemue a Yehowa mu 1942, mu givo giene, wahetele diplome gu université ya gu États-Unis gifua ingénieur gu architecture. Mulongeshi wenji mumoshi wamukambelele mudimo gungima dia guzula diplome, uvi Bill watunyine genji. Udi muezuela egi ngazudile desizio dia gukalegela Nzambi mudimo muavula, hafundo dia gutshigina mudimo wa makuta avula-vula. Matangua azonda gungima, guvernema yazuelele egi Bill udi naye guya gu mudimo wa gisuta. Muene watunyine genji nu gudibulumuisa guagasue, hene amumbile mubologo mukunda nu ivo 5 nu amutogele makuta 10 000$. Wazogele mu bologo gungima dia ivo thathu. Gungima, amutamegele gu khalasa dia Gileade nu amutumine ha gukalagala mudimo wa gimisionere gu Afrique. Gungima Bill wadizudile mu ulo nu mukaji’enji Eva, alanduile gukalagala mudimo gu Afrique. Ndaga yene yamonesele egi adihanele diago gudi Yehowa.  Gungima dia ivo yavula, avutugile gu États-Unis ha gukuatesa mama wa Bill. Bill udi muzuela mu mbimbi jiazonda egi: “Masoji ana gunguwenda gu meso tangua ngana gutangiza luendu lua nguhanele Yehowa ha gumukalegela mudimo ivo gubalega 70. Ngana gumuhana mersi mu luholo angukuatesele monyo wami wagasue ha gumukalegela.” Dihule egi: Ngudi hehi ha guhaga mudimo wa tangua diagasue ha fundo dia thomo mu monyo wami ba?

14-15. Longo ditshi wazula mu eksperianse ya Phangi Apostolidis nu mukaji’enji?

¹⁴ Utangizago egi mbawushigo mutagana nu malamba. Tuazudi longo mu gifezegeselo gia Abalahama gamba, ikhale athu anyi ana gukalegela Yehowa mudimo monyo wawo wagasue ana gutagana nu malamba. (Yak. 1:2; 1 Phet. 5:9) Eksperianse ya phangi Aristotelis Apostolidis * idi mumonesa gamba ndaga yene idi ya giamatshidia. Wabatijiwe mu 1946 gu Grece. Mu 1952 wahudile phangi Eleni ulo, yonu wakhalele nu mafelela a luholo lumoshi gifua muene. Uvi Eleni wakatele tumeur cérébrale (misongo ya mu wongo). Amusagele misongo yene, uvi ivo yazonda gungima dia gudizula mu ulo misongo yene yavutugile. Minganga yamuphandele luko, uvi Eleni wasalele nu paralysie, gakhalelego luko muzuela muabonga. Muene wasalele mulongeshi wa gikhesa ikhale wakhalele mukata, ikhale enya guvernema ya mu tangua diawo akhalele guaasagesa.

¹⁵ Phangi Aristotelis walanduile gujinga nu mukaji’enji ivo 30. Mutangua diene wakhalele mukulu, wakhalele mukalagala mudimo gu komite ya asamble nu wakhalele mukuatesa ha gutunga sale ya asamble imoshi. Mu 1987, tangua Eleni wakhalele mu mudimo wa gulongesa, gijidigo gia mubuidile nu wanamenele (wanemegewele). Watshitshile ivo thathu gudijiya ndo, gungima wafuile genji. Aristotelis udi muzuela egi: “Ivo yavula gungima, ngatagenele nu malamba avula. Ako akhalele gungubuila mu gisagumuisa. Ngazudile desizio dia gukolesela hagula ngulebigo muila. Yehowa wanguhanele ngolo ngakhalele najio funu ha gukolesela mu malamba ene.” (Ngi. 94:18, 19) Yehowa wana guzumba akombeledi enji agasue ana gumukalegela mudimo ikhale adi mutagana nu malamba!

16. Longo ditshi Phangi Knorr wahanele mukaji’enji?

¹⁶ Khala mutangiza ndaga jia mu masugu adi  muza gutuama. Abalahama wakhalele mutangiza ishimbigo Yehowa mbaamuhana. Ndaga yene yamukuatesele ha gukolesela mu malamba. Phangi Audrey Hyde walanduile gutangigiza felela dienji dia masugu adi muza, ikhale mulumi’enji wa thomo Nathan H. Knorr, wafuile nu misongo ya cancer, nu mulumi’enji wa mbadi Glenn Hyde wakhalele mukata misongo ya Alzheimer. * Wazuelele egi, ndaga Phangi Knorr wamuwambelele masugu azonda gutuama dia gufua guenji yamukuatesele ha gukolesela. Udi muzuela egi: “Nathan wanguwunguluishile gamba: ‘Idi yadiago egi gungima dia gufua, tuanago gumona lamba.’ Wanguwambelele luko egi: ‘Landula gutala gutuama handaga guene gudi gishimbigo giaye. . . . Khala nu ndaga jiavula jia gukalagala, khala mukuatesa athu ako. Gukalagala ngenyi mbagugukuatesa ha gukhala nu gusuanguluga.’” Didi diago longo diabonga ha gukhala nu ndaga jiavula jia gukalegela athu ako, nu “gusuanguluga mukunda nu felela dietu”!—Lomo 12:12.

17. (a) Itshi yajiya gutukuatesa ha gulandula gutangigiza ndaga jia mu masugu adi muza? (b) Luholo lutshi ndaga jidi mu Mika 7:7 jidi gutukuatesa ha gusuanguluga nu ishimbigo ya mu masugu adi muza?

¹⁷ Mangino, tudi nu ndaga jiavula jiajiya gutukuatesa ha gulandula gutangigiza ndaga jia mu masugu adi muza. Ndaga jidi mukalegewa ha mavu awa jidi mumonesa egi tudi diago gu gisugishilo gia masugu a gisugishilo gia mavu awa. Tushigo luko nu masugu avula ha gunengenena dimbo didi nu fondasio jiakola, hagula disendese guhinyina ha mavu. Mbatuheta ishimbigo yavula, mbatukhala nji nu gusuanguluga ha gumona gufuzumuga gua an’etu tuana zumba afuile gale. Mutangua diene, Yehowa mbawushimbiga Abalahama nu fami yenji, mukunda nu gutshigina nu khadilo dia guhuiminyina amonesele tangua akhalele ha mavu. Mbawukhala hene ha guayamba ba? Esue nji tuajiya gukhala hehi ha gudihana mukunda nu Ufumu wa Nzambi, gula tudi nu gutshigina tangua tudi mu malamba nu tudi munengenena Yehowa nu guhuiminyina guagasue gifua Abalahama.—Tanga Mika 7:7.