1. Luendu lutshi tuana khala nalo?

GUKHALA mukatshi dia hungu dia Yehowa gudi luendu luakoma diago! Tangua tuana kombelela Yehowa hamoshi nu aphangi’a mala nu a akhetu, tuana khala mu guhuima nu gusuanguluga guavula. Ginemo gitshi wana khala nagio mu hungu?

2. Gifezegeselo gitshi mupostolo Phaula gahanele mu mikanda yavula yasonegele muene?

² Tuajiya guzula malongo avula atadila ginemo tuana khala nagio mu hungu mu gifezegeselo giahanele mupostolo Phaula mu mikanda yavula yasonegele muene mu ngolo jia Nzambi. Mu mikanda yene, mupostolo Phaula wafuanesele hungu nu muila wa muthu. Wafuanesele nji muthu wagasue mukatshi dia hungu nu gitshinyi gia muila.—Lomo 12:4-8; 1 Kol. 12:12-27; Ef. 4:16.

3. Malongo atshi thathu tuza muzuelela mu longo edi?

³ Mu longo edi, tuza muzuelela malongo thathu a ndando tuajiya guzula mu gifezegeselo gia Phaula. Thomo, tuza mumona egi muthu wagasue mukatshi dietu wana khala nu ndando * mu hungu dia Yehowa. Ya mbadi, tuza muzuelela ndaga tudi naye gutshita gula idi lamba gudi esue ha gujiya egi tuana khala nu ndando mu hungu. Ya thathu, tuza mumona mukunda natshi tudi naye gudihana muavula ha gutagenesa ginemo giatuhanele Yehowa mukatshi dia hungu dienji.

4. Mukanda wa Lomo 12:4, 5 udi gutulongesa itshi?

⁴ Longo dia thomo tuajiya guzula mu gifezegeselo gia mupostolo Phaula didi egi mukut’etu agasue tuana khala nu ndando mu fami ya Yehowa. Ha guhana gifezegeselo giene, Phaula wasendesele guzuela egi: ‘Mu muila umoshi tudi nu itshinyi yavula, uvi itshinyi yagasue ishigo nu mudimo ungoshi. Luholo lumoshi nji, ngatshima esue tudi tuavula, tudi muila umoshi mu Klisto nu muthu nu muthu udi gifua gitshinyi gia muko.’ (Lomo 12:4, 5) Mbimbi eji jia Phaula jidi mukotelesa itshi? Jidi mukotelesa egi muthu nu muthu udi nu ginemo gia gudisha mu hungu, uvi mukut’etu agasue tuana khala nu ndando.

5. ‘Kado’ gatshi Yehowa wahanele hungu?

⁵ Yajiya gukhala egi tangua wana gutangiza athu ana khala nu ndando mu hungu, matangi’aye anaya gudi aphangi ana gutuameza. (1 Tes. 5:12; Heb. 13:17) Idi yadiago egi mu njila ya Yesu, Yehowa watuhanele akulu gifua ‘kado ga athu’ mu hungu Dienji. (Ef. 4:8) Mukatshi dia ‘kado gene ga athu’ tuajiya gutanga aphangi a gu Hunji dia Akulu Atuameji nu aphangi ana guakuatesa nu aphangi a gu Komite ya Filiale, atadi awendji, alongeshi a makhalasa a Ufumu, akulu a mu hungu nu akuateshi a mudimo. Aphangi’awa agasue atombewe mu njila ya nyuma ya Yehowa ha gubamba imeme yenji ya ndando nu ha gukolesa hungu.—1 Phet. 5:2, 3.

6. Ha gutadila 1 Tesalonike 2:6-8, itshi aphangi’awa a mala atombewe mu njila ya nyuma ya Nzambi ana kolesela ha gutshita?

⁶ Aphangi awa ana gutombewa mu njila ya nyuma ya Nzambi ha gutagenesa inemo ya gudisha. Gifua luholo mago nu malu nu itshinyi iko ya muila yana gukalagala hamoshi ha gukamba gubonga gua muila, aphangi ene ana tshita mudimo wakola ha gukamba gubonga gua hungu. Anago gukamba lutumbu luawo hakhawo. Uvi, ana tshita ngolo ha gukuatesa nu gukolesa aphangi’awo a mala nu a akhetu. (Tanga 1 Tesalonike 2:6-8.) Tuana guhana Yehowa mersi mukunda nu aphangi awa agukula mu nyuma ana guhaga gubonga gua athu ako ha fundo dia thomo!

7. Ishimbigo itshi aphangi adi mu mudimo wa tangua diagasue ana guheta?

⁷ Aphangi ako mu hungu ajiya gutombewa ha gutshita mudimo wa gimisioner, wa avundji a njila akoma nu a tangua diagasue. Ha mavu agasue, aphangi’a mala nu a akhetu ana zula desizio dia gulongesa nu gubuisa athu alandudi tangua diagasue. Gutshita ngenyi guana kuatesa athu avula ha gubua alandudi a Klisto Yesu. Yehowa wana shimbiga muavula aphangi awa ana tshita mudimo wa tangua diagasue, ngatshima anago gukhala nu makuta avula nga ima ya gujingila. (Mako 10:29, 30) Tuana guzumba aphangi ene a mala nu a akhetu nu tudi guahana mersi mukunda nu mudimo wawo mu hungu!

8. Mukunda natshi mulongeshi wagasue wa lukuma luabonga wana khala nu ndando gudi Yehowa?

⁸ Phamba aphangi atombewe mu njila ya nyuma ya Nzambi nu anyi adi mu mudimo wa tangua diagasue ana khala nu ndando mu hungu ba? Ndo sha! Alongeshi agasue a lukuma luabonga ana khala nu ndando gudi Nzambi nu mu hungu. (Lomo 10:15; 1 Kol. 3:6-9) Felela diabalega ndando dia phangi wagasue mu hungu diana khala dia gubuisa athu alandudi a Fumu wetu Yesu Klisto. (Mat. 28:19, 20; 1 Tim. 2:4) Alongeshi agasue abatijiwe gale nu anyi khenji abatijiwego ana gutshita ngolo ha guhaga mudimo wene ha fundo dia thomo.—Mat. 24:14.

9. Mukunda natshi tuana guzula aphangi’etu a akhetu nu ndando?

⁹ Yehowa wana guzula aphangi a akhetu nu ndando luholo wana guahana mudimo wakoma mu hungu. Wana guazula nu ndando luholo ana gumukombelela nu gujinginyina guagasue ikhale adi amama, akhetu azudiwe gale  mu ulo, akhetu a gafunda nga anyi adi undumbu. Biblia yana guzuelela akhetu avula anyi asuanguluishile Nzambi. Atumbuishiwe handaga ahanele gifezegeselo giabonga giatadila gutema, gutshigina, gikhesa, khadilo dia guhana nu ndaga jiko jiawaha. (Luka 8:2, 3; Makal. 16:14, 15; Lomo 16:3, 6; Fili. 4:3; Heb. 11:11, 31, 35) Tudi muhana Yehowa mersi avula mukunda nu aphangi awa a akhetu adi nu makalegelo awa abonga mu mahungu etu!

10. Mukunda natshi tuana guzula aphangi agukola nu ndando?

¹⁰ Tuana suanguluga nji gukhala nu athu avula agukola mu hungu. Mahungu avula ana khala nu aphangi’a mala nu a akhetu agukola adihanele ha gukombelela Yehowa nu gujinginyina guagasue mu monyo wawo wagasue. Yajiya gukhala egi akatuga gujiya giamatshidia mu masugu abalega. Avula mukatshi diawo ana gukhala nu ukhashi mu muila handaga adi muya nu gukola. Ukhashi wene wajiya guakanga njila ya gutshita ndaga ajiya gukalagala mu hungu nu mu mudimo wa gulongesa. Uvi, ikhale ngenyi, aphangi’awa ana tshita yagasue mu gudivua nu ngolo jiawo ha guya mulongesa nu ana kalegela ngolo jiawo ha guhana athu ako gikhesa nu formasio! Ba eksperianse awo ana gutukuatesa muavula. Aphangi’awa ana khala diago nu ndando gudi Yehowa nu gudi esue.—Ish. 16:31.

11-12. Mu luholo lutshi mavuala a mu hungu dienu ana guguhana gikhesa?

¹¹ Henyaha, tuzuelelenu aphangi’etu a mavuala. Ana gutagana nu malamba avula tangua ana gukula ha mavu awa a Satana Diabulu nu azala nu malongo a mambo a filozofi. (1 Yone 5:19) Uvi, mukut’etu agasue tuana guheta gikhesa tangua tuana gumona mavuala muhana mvutu mu gudibungisa, muya mu mudimo wa gulongesa nga tangua ana guzuelela ndaga jiatadila gutshigina guawo nu gikhesa giagasue. Yadiago, mavuala mudi diago nu ndando yavula mukatshi dia hungu dia Yehowa!—Ngi. 8:2.

¹² Uvi, yana khala lamba gudi aphangi’etu ako ha gutshigina egi ana khala nu ndando mukatshi dia hungu. Itshi yajiya gutukuatesa ha gujiya egi muthu nu muthu udi ndando mukatshi dia hungu? Tuzuelelenu ndaga yene.

13-14. Mukunda natshi aphangi ako ajiya gutangiza egi ashigo nu ndando mu hungu?

¹³ Tutadilenu longo dia mbadi tuajiya guzula mu gifezegeselo gia Phaula. Wazuelele ndaga aphangi avula ana tagana naye mangino; yana khala lamba gudi ene ha gutshigina egi ana khala nu ndando mu hungu. Phaula wazuelele egi: “Gula kulu diazuela egi: ‘Ame ngushigo koko, ngushigo gitshinyi gia muila,’ ndaga eyi ishigo mutshita egi dikhadigo gitshinyi gia muila. Gula kutshi diazuela egi: ‘Ame ngushigo diso, ngushigo gitshinyi gia muila,’ ndaga eyi ishigo mutshita egi dikhadigo gitshinyi gia muila.” (1 Kol. 12:15, 16) Itshi Phaula gatulongesele mu verse eyi?

¹⁴ Gula wasendesa gudithesa nu athu ako a mu hungu, wajiya gutangiza egi ushigo nu ndando. Aphangi’ako a mu hungu ajiya gukhala nu luendu lua gukhala alongeshi abonga, lua gulondega ndaga muabonga nga lua gukolesa athu ako. Yajiya gukhala egi wana gudivua gamba ushigo watagana ha gukalagala ndaga gifua ene. Gudivua ngenyi gudi mumonesa egi udi muthu wa gudibulumuisa nu udi mujiya egi wajiyilego gutshita ndaga jiagasue. (Fili. 2:3) Uvi udi naye gumonesa gutema, handaga wajiya guleba muila gula walandula gudifuanesa nu aphangi ana tshita ndaga muabonga. Gifua luholo luazuelele Phaula, wajiya gutangiza gifua ushigo nu ndando nga hazonda mu hungu. Itshi yajiya gugukuatesa ha gubinga matangi a luholo elu?

15. Ha gutadila 1 Kolinto 12:4-11, ndaga itshi tudi naye gujiya yatadila luendu tuajiya gukhala nalo?

¹⁵ Tutadilenu gale ndaga eyi: Mu siekle ya thomo, Yehowa wahanele Aklisto ako luendu lua gutshita ndaga jia gushimana mu njila ya nyuma yenji, uvi ishigo Aklisto agasue ahetele luendu luene. (Tanga 1 Kolinto 12:4-11.) Yehowa waahanele luendu lua gutshita ndaga mu luholo lua gudisha, uvi ene agasue akhalele nu ndando. Mangino, tuanago gukhala nu luendu lua gukalagala ndaga jia gushimana mu njila ya nyuma ya Nzambi. Longo ditshi tuajiya guzula? Yajiya gukhala egi mukut’etu agasue tuanago gutshita ndaga luholo lumoshi, uvi muthu wagasue wana khala nu ndando gu meso a Yehowa.

16. Longo ditshi diahanele mupostolo Phaula tudi naye gukalegela?

 ¹⁶ Ha fundo dia gudifuanesa nu aphangi’ako Aklisto, tudi naye gukalegelela longo diahanele mupostolo Phaula egi: ‘Muabonga muthu nu muthu atadile makalegelo enji; ngenyi mbawukhala nu gishina gia gusuangulugila mukunda nu mudimo watshitshile muene, uvi gashigo naye gudifuanesa nu muthu muko.’—Gal. 6:4.

17. Gubonga gutshi mbatuheta gula tudi mulandula longo dia mupostolo Phaula?

¹⁷ Gula tualandula longo dia mupostolo Phaula nu tuatadila makalegelo etu, tuajiya gusendesa gukotelesa egi muthu wagasue wajiya gukhala nu luendu lua gutshita ndaga muthu muko gajiyilego gutshita. Ha gufezegesa, yajiya gukhala egi mukulu mumoshi ganago gulongesa muabonga mu hungu, uvi wana gutshita muabonga mudimo wa gubuisa athu alandudi. Nga ndo, yajiya gukhala egi ganago gulondega ndaga muabonga gifua akulu ako a mu hungu, uvi aphangi anaya gudi muene ha gukamba malongo handaga wana khala nu gisemo nu wana guazumba. Nga ndo yajiya gukhala egi mukulu muene wana khala nu khadilo dia guyamba athu. (Heb. 13:2, 16) Gula tuakotelesa muabonga egi tuana khala nu luendu lua gutshita ndaga muabonga, mbatukhala nu gusuanguluga ha gutshita ndaga jiajiya gukuatesa hungu. Mbatuvuilago nji aphangi’etu fuwa gula adi nu luendu lua gutshita ndaga jia gudisha nu jietu.

18. Luholo lutshi tuajiya gukudisa mudimo wetu nu maluholo etu a gutshita ndaga?

¹⁸ Ikhale tudi nu ginemo gitshi mu hungu, mukut’etu agasue tudi naye gukhala nu nzala ya gukudisa mudimo wetu nu maluholo etu a gutshita ndaga. Ha gukudisa mudimo wetu nu maluholo a gutshita ndaga, Yehowa wana gutuhana formasio yawaha mu njila ya organizasio wenji. Ha gufezegesa, mu gudibungisa guetu gua mukatshi dia phoso, tuana guheta malongo atadila luholo lua gutshita muabonga mudimo wetu wa gulongesa. Wana gutshita ngolo ha gukalegela formasio yene ba?

19. Luholo lutshi wajiya gutagenesa felela dia gungina Khalasa dia Alongeshi a Ufumu?

¹⁹ Khalasa dia Alongeshi a Ufumu diana guhana nji formasio yawaha. Aphangi’a mala nu a akhetu adi nu ivo sendese 23 uu nu 65 anyi adi mu mudimo wa tangua diagasue ana khala nu luendu lua gungina khalasa diene. Wajiya gumona gifua wajiyilego gungina khalasa diene nga hazonda. Uvi ha fundo dia gutangiza ngenyi, tshita liste ya ndaga jidi gugutuma ha gungina khalasa diene. Gungima, sonega ndaga mbajigukuatesa ha gutagenesa ndaga jiana gutogewa ha guya guene. Gula watshita ngolo, hamoshi nu ukuateshi wa Yehowa, wajiya gukhala hehi ha gutshita ndaga wakhalele mutangiza egi wajiyilego gutshita.

20. Longo ditshi tuajiya guzula mu Lomo 12:6-8?

²⁰ Longo dia thathu tuajiya guzula mu gifezegeselo giahanele Phaula didi mu Lomo 12:6-8. (Tanga.) Mu verse eyi, Phaula wamonesele egi aphangi agasue a mu hungu ana khala nu luendu lua gutshita ndaga mu maluholo agudisha. Uvi hugo edi wamonesele egi tudi naye gukalegela ngolo nu gutema guetu ha gukuatesa nu gukolesa hungu.

21-22. Longo ditshi tuajiya guzula mu gifezegeselo gia phangi Robert nu Felice?

²¹ Tutadilenu gifezegselo gia phangi Robert. Gungima dia guhana mago mu gifutshi giko, amutogele ha guya mutshita mudimo gu Betele ya gu gifutshi giawo. Ngatshima aphangi amuwambelele egi gatshitshilego nga ndaga imoshi yabola, uvi udi muzuela egi: “Mbeji jiavula jiabalegele ngakhalelego nu gusuanguluga handaga ngakhalele mutangiza egi gatshitshilego mudimo wami kiawaha. Matangua ako ngakhalele mutangiza egi ngajiya gubemba gami gutshita  mudimo gu Betele.” Itshi yamukuatesele ha gukhala luko nu gusuanguluga? Mukulu mungoshi wamuwambelele egi Yehowa wana gutuhana formasio mu inemo tuadiangele gukhala naye hagula wajiya gutukalegela muavula mu mudimo tudi nawo luenyelu. Robert wakotelesele egi ha fundo dia gutangiza ndaga jiabalegele gale, udi naye gusha matangi enji mu ndaga jiajiya muene gutshita luenyelu.

²² Phangi Felice Episcopo wataganele nji nu ndaga ya luholo lumoshi. Mu 1956, muene nu mukaji’enji anginyile khalasa dia Gileade, gungima ayile mutshita mudimo wa mutadi muwendji gu Bolivie. Mu 1964 avualele mona. Phangi Felice udi muzuela egi: “Yakhalele lamba ha gubemba mudimo wetu tuazumbile muavula. Givo hehi nu gimoshi giabalegele ngakhalelego nu gusuanguluga. Uvi Yehowa wangukuatesele, ngasombegesele luholo luami lua gutadila ndaga, ngashile matangi’ami mu ginemo giami gia gukhala mvuaji.” Aye nji wana gudivua gifua phangi Robert nga Felice ba? Muila wana guguleba handaga henyaha ushigo luko nu inemo ya mu hungu wakhalele naye masugu abalega ba? Gula idi ngenyi, wajiya gukhala nu gusuanguluga gula wasombegesa luholo luaye lua gutadila ndaga nu wahaga matangi’aye mu ndaga wajiya gutshita luenyelu ha gukalegela Yehowa mudimo nu ha gukuatesa aphangi’aye. Gula udi mukalegela ngolo nu gutema guaye tangua diagasue ha gukuatesa aphangi ako, mbawukhala nu gusuanguluga guavula tangua udi mukolesa hungu.

23. Tudi naye guzula tangua dia gutshita itshi? Itshi mbatuzuelela mu longo dialandula?

²³ Mukut’etu agasue tuana khala nu ndando gu meso a Yehowa. Muene wana tshigina tudivue egi tuana khala mukatshi dia fami yenji. Gula tuazula tangua dia gutangigiza ndaga tuajiya gutshita ha gukolesa aphangi’etu, gungima tuatshita ndaga yene; tuajiyilego gudivua gifua tushigo nu ndando mu hungu! Uvi luholo lutshi tuana gutadila aphangi ako mu hungu? Luholo lutshi tuajiya gumonesa egi tuana guazumba nu tuana guanemesa? Mbatuzuelela mihu eyi ya ndando mu longo dialandula.