1. Ha gutadila Hebelu 12:1, itshi tudi naye gutshita ha guzula phushi uu nu gu gisugishilo ha guheta monyo?

 BIBLIA yana fuanesa monyo wetu Aklisto nu athu ana zula phushi. Athu agasue adi muzula phushi uu nu gu gisugishilo mbaaheta monyo wa ivo nu ivo. (2 Tim. 4:7, 8) Tudi naye gutshita ngolo ha gulandula guzula phushi handaga gisugishilo giasuena hehi. Mupostolo Phaula wazudile phushi uu nu gu gisugishilo, udi gutuwambela ndaga jiajiya gutukuatesa ha gubinga uu nu gu gisugishilo. Udi gutuwambela egi tudi naye ‘gubemba ginemo giagasue . . . ha gukolesela mu phushi tudi naye guzula jinyi jiahagewa gutuama dietu.’​—Tanga Hebelu 12:1.

2. ‘Gubemba ginemo giagasue’ gudi mukotelesa itshi?

² Tangua Phaula wasonegele egi tudi naye ‘gubemba ginemo giagasue,’ wakhalele mutshigina guzuela egi gushigo nga nu ginemo Muklisto adi naye gubata ba? Ndo sha. Wazuelele egi tudi naye gubemba inemo yagasue ishigo nu ndando. Inemo ya luholo elu yajiya gutukanga njila ha guzula phushi muabonga nga gutuhuidisa. Ha gulandula guzula phushi jiene, tudi naye gujiya inemo yene ishigo nu ndando nu guyibemba muphushi. Uvi inemo inyi tudi naye gubata, tushigo naye guyibemba. Gula ndo, esue hakhetu tuajiya gudikatula mukatshi dia athu adi muzula phushi. (2 Tim. 2:5) Na inemo itshi tudi naye gubata?

3. (a) Gifua luholo Galatiya 6:5 idi guyimonesa, itshi tudi naye gubata? (b) Itshi tuza muzuelela mu longo edi? Mukunda natshi?

³ Tanga Galatiya 6:5. Phaula wazuelele ndaga imoshi tudi naye gubata. Wasonegele egi “muthu nu muthu mbawudibatela ginemo gienji.” Mu verse eyi Phaula wakhalele muzuelela ndaga Nzambi wana toga muthu wagasue mukatshi dietu ha gutshita, inyi muthu moko gajiyilego gukalagala ha fundo dietu. Mu longo edi, tuza mumona gula ‘ginemo gietu hakhetu’ gidi itshi  nu luholo tuajiya gugibata. Tuza nji mumona inemo ishigo nu ndando inyi tuajiya gukhala nayo nu gujiya luholo tuajiya guyibemba. Gubata inemo yetu hakhetu nu gubemba inemo ishigo nu ndando mbagutukuatesa ha guzula phushi muabonga uu nu gu gisugishilo ha guheta monyo.

4. Mukunda natshi yana khalago lamba ha gutaganesa desizio tuazudile dia gukombelela Yehowa mu monyo wetu wagasue? (Tala nji gifuanesa.)

⁴ Desizio tuazudile dia gukombelela Yehowa monyo wetu wagasue. Tangua tuana gudihana gudi Yehowa, tuana gumulaya ha gumukombelela nu gutshita gutshigina guenji. Tudi naye gutagenesa desizio diene. Gutaganesa ndaga jiagasue tualayele Yehowa gudi ginemo giakoma, uvi giana khalago lamba ha gubata. Idi ngenyi handaga Yehowa watufugile ha gukagala gutshigina guenji. (Gumo. 4:11) Watufugile mu gifuanesa gienji, watuhanele nji nzala ya gumujiya nu gumukombelela. Gishina giene, tuana kuata ufuta wakola n’enji nu tuana suanguluga ha gutshita gutshigina guenji. (Ngi. 40:8) Tangua tuana kalagala gutshigina gua Nzambi nu tuana landula gifezegeselo gia Mun’enji, tuana ‘heta ngolo’.​—Mat. 11:28-30.

5. Itshi yajiya gugukuatesa ha gutaganesa ndaga walayele Yehowa? (1 Yone 5:3)

 ⁵ Luholo lutshi wajiya gubata ginemo giene? Ndaga eji mbadi jiajiya gugukuatesa. Ya thomo, khala muzumba Yehowa muavula. Wajiya gumuzumba muavula gula udi mutangigiza ndaga jiagasue jiagukalegele Yehowa nu jinyi mbajigukalegela muene mu masugu adi muza. Gula udi muzumba Yehowa muavula, mbayikhala yaleba gudi aye ha gumutumagela. (Tanga 1 Yone 5:3.) Ya mbadi, khala mulandula gifezegeselo gia Yesu. Yesu wakalegele gutshigina gua Nzambi handaga wakhalele mutoga Yehowa ukuateshi nu wahagele meso gu gishimbigo. (Heb. 5:7; 12:2) Khala mukombelela Yehowa ha gumutoga ukuateshi wenji, khala nji muhaga matangi aye mu felela dia monyo wa ivo nu ivo gifua Yesu. Gula udi muzumba Yehowa muavula nu udi mulandula gifezegeselo gia Mun’enji, mbawutagenesa diago ndaga walayele Yehowa.

6. Mukunda natshi tudi naye gutagenesa inemo yetu mu fami? (Tala nji gifuanesa.)

⁶ Inemo yetu mu fami. Luholo tuana zula phushi ha guheta monyo, tudi naye guzumba Yehowa nu Yesu muavula gubalega enya fami yetu. (Mat. 10:37) Ndaga yene ishigo mukotelesa egi tudi naye gutuna gutagenesa inemo yetu mu fami. Uvi hagula tusuanguluise Yehowa nu Klisto, tudi naye gutagenesa inemo yetu mu fami. (1 Tim. 5:4, 8) Gula tuatshita ngenyi, mbatukhala nu gusuanguluga guavula. Yehowa wana jiya egi hagula fami ikhale nu gusuanguluga, yala nu mukaji’enji adi naye gudizumba nu gudinemesa, mvuaji jidi naye guzumba an’awo nu gualongesa, ana nji adi naye gutumagela mvuaji jiawo.​—Ef. 5:33; 6:1, 4.

7. Luholo lutshi wajiya gutagenesa ginemo giaye mu fami?

⁷ Luholo lutshi wajiya gubata ginemo giene? Ikhale udi yala nga mukhetu nga mona, khala mukalegela malongo a Biblia, ukhadigo mutshita phamba ndaga jidi gugujila mu matangi, nga kutime yenu nga jinyi jiana zuela enya ndunge. (Ish. 24:3, 4) Khala nji muzula tangua dia gutanga mikanda yetu, handaga yana monesa maluholo tuajiya gukalegela malongo a Biblia. Ha gufezegesa, mu gitshinyi “De l’aide pour les familles” muana khala nu malongo abonga ajiya gukuatesa athu adizudile gale mu ulo, mvuaji nu mavuala mu ndaga ana tagana najio. b Khala mukalegela malongo a Biblia ikhale athu ako a mu fami yaye anago guakalegela. Gula mudi mutshita ngenyi, fami yenu mbayikhala nu gusuanguluga, Yehowa mbawumikuatesa nji.​—1 Phet. 3:1, 2.

8. Ndaga itshi yajiya gutubuila mukunda nu badesizio tuana zula?

⁸ Ginemo tudi nagio mukunda nu badesizio tuana zula. Yehowa watuhanele luendu lua guditombela ndaga, wana tshigina egi tukhale nu gusuanguluga gula tudi muzula badesizio abonga. Uvi ganago gutubamba gu malamba tuajiya gutagana nawo gula tuazula badesizio abola. (Gal. 6:7, 8) Hene tudi naye gutshigina gubata ginemo gia badesizio abola tuazudile nu gia ndaga tuazuelele gutangiza ndo, nga gia ndaga yabola tuakalegele. Gula tuatshitshile ndaga imoshi yabola, tuajiya gulandula gudisagesa mu matangi mukunda nu ndaga yene. Uvi gula tudi mujiya egi tudi naye gubata ginemo gia badesizio etu, mbayitutuma ha guwambela akulu gubola guetu, ha gubalumuna mutshima nu gutuna gukalagala luko ndaga yene. Gutshita ndaga eji guajiya gutukuatesa ha gulandula  guzula phushi uu nu gu gisugishilo ha guheta monyo.

9. Itshi wajiya gutshita gula wazudile desizio diabola? (Tala nji gifuanesa.)

⁹ Luholo lutshi wajiya gubata ginemo giene? Itshi wajiya gutshita gula wazudile desizio diabola? Jiya egi wajiyilego gusombegesa ndaga jiabalegele gale. Ulabigo gubolesa tangua diaye nga ngolo jiaye ha gumonesa egi wakalegelego ndaga yabola, nga gudibela mukunda nu ndaga yene nga gumona athu ako gubola. Uvi tshigina gubola guaye, tshita ngolo ha gukalagala ndaga jiabonga. Gula wana landula gudisagesa mukunda nu ndaga yabola watshitshile, wambela Yehowa ndaga yene mu gisambu nu gudibulumuisa guagasue, balumuna mutshima, mutoge nji ha gugutotesela. (Ngi. 25:11; 51:3, 4) Toga pardo gudi athu wakalegele gubola, kamba nji ukuateshi wa akulu gula luholo ludi guene. (Yone 5:14, 15) Zula malongo mu ndaga yabola watshitshile, tshita yagasue ha gutuna guyivutugila luko. Gula watshita ngenyi, wajiya gusha mutshima egi Yehowa mbawuguvuila khenda nu mbawugukuatesa.​—Ngi. 103:8-13.

10. Mukunda natshi nzala ya gukalagala ndaga jiavula-vula idi ginemo gianema ha gubata? (Galatiya 6:4)

¹⁰ Nzala ya gukalagala ndaga jiavula-vula. Khadilo dia gudifuanesa nu athu ako diajiya gukhala gifua ginemo gianema tudi mubata. (Tanga Galatiya 6:4.) Gula tudi gudifuanesa tangua diagasue nu athu ako, tuajiya gusendesa guavuila ginjiongo nga gukamba gubua gifua ene. (Gal. 5:26) Gula tudi mukamba gutshita ndaga gifua athu ako ikhale tushigo nu ngolo jia gukalagala ndaga jiene, tuajiya gudimonesa lamba. Biblia yana zuela egi: ‘Gula wahetelego gima wakhalele gudifelela, wajiya guvua gikenene,’ ngenyi yajiya nji gukhala lamba ha gunengenena gima ginyi tuajiyilego guheta! (Ish. 13:12) Gutshita ngenyi guajiya gutulebesa muila nu gutukanga njila ha gulandula guzula phushi uu nu gu gisugishilo ha guheta monyo.​—Ish. 24:10.

11. itshi yajiya gugukuatesa ha gutuna guvua nzala ya gukalagala ndaga jiavula-vula?

¹¹ Luholo lusthi wajiya gubemba ginemo giene? Ukhadigo mukamba gutshita ndaga jiavula-vula gubalega jinyi Yehowa wana gugutoga. Ganago gugutoga ha gumuhana ima ushigo nayo. (2 Kol. 8:12) Jiya egi Yehowa ganago gufuanesa ndaga wana tshita nu jinyi athu ako ana tshita. (Mat. 25:20-23) Wana suanguluga nu mudimo wana gumukalegela nu mutshima waye wagasue nu gujinginyina guaye nu khadilo diaye dia gukolesela. Khala mujiya nji nu gudibulumuisa guagasue egi ivo yaye nu sante yaye nga ndaga jiko wajiya gukalagala jiajiya gugukanga njila ha gutshita ndaga udi mutshigina gutshita mangino. Wajiya gutuna inemo iko gula ivo yaye nga sante yaye idi gugukanga njila gifua Barzilayi. (2 Sam. 19:35, 36) Khala mutshigina ukuateshi wa athu ako, khala nji muhana athu ako inemo gula luholo ludi guene gifua muatshitshile Moize. (Guz. 18:21, 22) Gula udi nu khadilo dia gudibulumuisa dia luholo elu, mbawushigo mukamba gutshita ndaga jiavula-vula jinyi jiajiya gugulebesa muila ha gulandula guzula phushi uu nu gu gisugishilo ha guheta monyo.

12. Tuajiya gubata ginemo gia badesizio abola athu ako ana zula ba? Kotelesa.

¹² Gutangiza egi udi naye gubata ginemo mukunda nu badesizio abola athu ako ana zula. Tuajiyilego guzula badesizio mukunda nu athu ako; nga gutshita egi malamba a abuilago mukunda nu badesizio abola azudile. Ha gufezegesa, mona wajiya guzula desizio dia gubemba gukombelela Yehowa. Desizio dienji diajiya gubatela mvuaji jienji gikenene giavula. Uvi mvuaji jiana gudibela mukunda nu badesizio  abola ana zula an’awo, jiana bata ginemo gianema diago. Yehowa ganago gutshigina egi abate ginemo giene.​—Roma 14:12.

13. Ndaga itshi mvuaji jiajiya gukalagala gula mun’awo wazula desizio diabola?

¹³ Luholo lusthi wajiya gubemba ginemo giene? Khala mujiya egi Yehowa wahanele muthu wagasue luendu lua guditombela ndaga. Wana bemba muthu wagasue ha gudizudila desizio; ikhale desizio dia gumukombelela. Yehowa wana jiya egi mvuaji jishigo athu atagana, uvi wana tshigina egi atshite yagasue ha gusansa an’awo. Badesizio an’enu ana zula adi ginemo giawo uvi ishigo gienu. (Ish. 20:11) Uvi muajiya gulandula gudisagesa mukunda nu ndaga muakhalele naye gukalagala gifua mvuaji uvi muajikalegelego. Gula idi ngenyi, wambelenu Yehowa luholo mudi gudivua, mutogenu nji ha gumitotesela. Wana jiya egi mushigo nu luholo lua gusombegesa ndaga jiabalegele gale. Uvi gashigo nji gumitoga ha gukanga njila gu malamba ajiya gubuila an’enu mukunda nu badesizio abola azudile. Khalenu mujiya egi gula an’enu atshita yagasue ha guvutuga gudi Yehowa, muene mbawatshigina luko.​—Luka 15:18-20.

14. Mukunda natshi gudisagesa muavula mukunda nu gubola tuakalegele gudi ginemo tudi naye gubemba?

¹⁴ Gudisagesa muavula mukunda nu gubola tuakalegele. Gula tuakalagala gubola, tuana vua gikenene. Uvi Yehowa ganago gutshigina egi tukhale gudisagesa muavula mukunda nu gubola tuakalegele. Gudisagesa muavula gudi ginemo tudi naye gubemba. Luholo lutshi tuajiya gujiya gula tudi gudisagesa muavula mukunda nu gubola tuakalegele? Gula tuawambelele gale akulu gubola guetu, tuabalumuine mutshima nu tuana tshita ngolo ha gutuna guvutugila gubola guene, tuajiya gusha musthima egi Yehowa watutotesele gale. (Makal. 3:19) Yehowa ganago gutshigina egi tulandule gudisagesa muavula gula tuakalegele gale ndaga eji. Wana jiya egi ndaga yene yajiya gutulebesa muila. (Ngi. 31:10) Gula tudi muvua gikenene giavula mukunda nu gubola tuakalegele, tuajiya gubemba  guzula phushi uu nu gu gisugishilo ha guheta monyo.​—2 Kol. 2:7.

15. Itshi yajiya gugukuatesa ha gutuna gudisagesa muavula mukunda nu gubola wakalegele? (1 Yone 3:19, 20) (Tala nji gifuanesa.)

¹⁵ Luholo lusthi wajiya gubemba ginemo giene? Gula wana landula gudisagesa muavula mukunda nu gubola wakalegele, khala mutangiza luholo Nzambi wana totesela athu. (Ngi. 130:4) Gula watotesela athu ana balumuna diago mutshima, wana gualaya egi: ‘Mbangushigo muwunguluga luko gubola guawo.’ (Yel. 31:34) Yakotelesa egi Yehowa mbagashigo luko mutangiza gubola guaye gula wagutotesele gale gubola guene. Hene utangizago egi malamba udi mutagana nawo mukunda nu gubola wakalegele adi mumonesa egi Yehowa gagutoteselego. Ukhadigo gudibela gula gubola wakalegele gushigo guguhana njila ha guheta inemo mu hungu. Yehowa ganago gutangiza gubola guaye, aye nji ushigo naye gutshita ngenyi.​—Tanga 1 Yone 3:19, 20.

16. Luholo tudi gifua athu ana zula phushi, itshi tudi naye gujiya?

¹⁶ Luholo tuana zula phushi ha guheta monyo, tudi naye ‘gujizula hagula tubinge.’ (1 Kol. 9:24) Ndaga yajiya gutukuatesa ha gubinga idi gujiya inemo tudi naye gubata nu inemo tudi naye gubemba. Mu longo edi tuazuelela ifezegeselo yazonda ya inemo tudi naye gubata nga gubemba. Uvi gudi nu ifezegeselo iko yavula tuatangelego. Yesu wazuelele egi tuajiya gubua mu muheto wa “gudia guavula nu gunua matombe avula nu gikenene gia lujingu.” (Luka 21:34) Verse eyi nu verse jiko jia Biblia jiajiya gugukuatesa ha gumona ndaga jiko jia mu monyo waye wajiya gusombegesa ha gulandula guzula phushi uu nu gu gisugishilo ha guheta monyo.

17. Mukunda natshi tuajiya gusha mutshima egi mbatubinga guzula phushi ha guheta monyo?

¹⁷ Tuajiya gusha mutshima egi mbatubinga guzula phushi ha guheta monyo handaga Yehowa mbawutuhana ngolo tudi najio funu. (Yesh. 40:29-31) Hene, ulebigo muila! Landula gifezefeselo gia mupostolo Phaula wazudile phushi nu gikhesa giagasue ha guheta gishimbigo. (Fili. 3:13, 14) Gushigo nga nu muthu mumoshi wajiya guzula phushi ha fungdo diaye, uvi Yehowa wajiya gugukuatesa ha gubinga. Yehowa wajiya gugukuatesa ha gubata inemo yaye, wajiya nji gugukuatesa ha gubemba inemo ishigo nu ndando. (Ngi. 68:19) Mbawugukuatesa nji ha guzula phushi nu ha gukolesa uu nu gu gisugishilo ha guheta monyo!