1. Itshi yajiya gutukuatesa ha gusuanguluga tangua tudi mulonguga profesi jidi mu Biblia?

 PHANGI Ben udi muvuala, udi muzuela egi: “Ngana zumba gulonguga profesi jia Biblia.” Aye nji wana suanguluga nu profesi jiene ba? Nga ndo, wana mona egi profesi jiene jidi jiakola ha gukotelesa ba? Wajiya nji gutangiza egi gulonguga profesi guana huidisa. Uvi gula wakamba gujiya gishina Yehowa wasonegesele profesi jiene mu Mbimbi yenji, mbawujizumba muavula.

2. Itshi tuza muzuelela mu longo edi?

² Mu longo edi tuza mumona mukunda natshi tudi naye gulonguga profesi jia Biblia nu luholo tudi naye gujilonguga. Gungima tuza mutadila profesi mbadi jidi mu mukanda wa Danyele, nu luholo ukoteleshi wa profesi jiene wajiya gutukuatesa mangino.

3. Itshi tudi naye gutshita gula tudi mutshigina gukotelesa profesi jia Biblia?

³ Tudi naye gutoga ukuateshi gula tudi mutshigina gukotelesa profesi jia Biblia. Ha gufezegesa, tangiza gale egi udi muya fundo dimoshi uvi ushigo mujiya fundo diene muabonga; uvi futa diaye mudi n’enji udi gudijiya muabonga. Udi mujiya muabonga fundo mudi nu njila jiagasue. Idi yadiago egi mbawukhala nu gusuanguluga ha guya nu futa diaye muene! Luholo lumoshi nji, Yehowa wana jiya muabonga sungi tudi nu ndaga mbajitubuila mu masugu adi muza. Hene ha gukotelesa profesi jia Biblia, tudi naye gumutoga ukuateshi.​—Dan. 2:28; 2 Phet. 1:19, 20.

4. Mukunda natshi Yehowa wasonegesele profesi mu Mbimbi yenji? (Yelemiya 29:11) (Tala nji gifuanesa.)

⁴ Yehowa wana khala gifua mvuaji, wana tshigina egi an’enji akhale nu gusuanguluga mu masugu adi muza. (Tanga Yelemiya 29:11.)  Uvi ha gumonesa egi udi wagudisha nu mvuaji, Yehowa wana gutuwambela ndaga mbajibua mu masugu adi muza, wana zuela nji giamatshidia. Watumile athu ha gusonega profesi jiene mu Mbimbi yenji hagula tujiye ndaga jia ndando gutuama egi jibue. (Yesh. 46:10) Profesi jia Biblia jidi diago khapho dia ndando diatuhanele Sh’etu wa mu dilu. Uvi luholo lutshi wajiya gusha mutshima egi profesi jia Biblia mbajitaganesewa?

5. Longo ditshi muvuala wajiya guzula mu gifezegeselo gia phangi Max?

⁵ An’etu a mavuala ana longuga hamoshi nu athu anyi anago gunemesa Biblia gu makhalasa awo. Ndaga jiana zuela athu ene nu makalegelo awo ajiya gutuma muvuala udi Temue wa Yehowa ha gukhala nu badute. Tuzuelelenu gifezegeselo gia phangi Max. Udi muzuela egi: “Tangua ngakhalele gu khalasa, ngasendesele guhaga badute egi ndaga jiakhalele gungulongesa mvuaji jiami jiakhalelego jia giamatshidia, ngakhalelego nji mutshigina egi Biblia yasonegewe mu ngolo jia Nzambi.” Itshi mvuaji jienji jiakalegele? Udi muzuela egi: “Anguvuidilego khabu, uvi ngakhalele mujiya egi akhalele muvua gikenene.” Mvuaji jia Max jiakalegele Biblia ha gumuhana mvutu gu mihu yenji. Max nji gu khanda yenji watshitshile ndaga ba recherche. Udi muzuela egi: “Ngalongugile profesi jia Biblia hakhami, ngasendesele nji guwambela mavuala ako ndaga ngakhalele mulonguga.” Gubonga gutshi guahetele muene? Udi muzuela luko egi: “Gungima, ngatshiginyile diago egi Biblia yasonegewe mu ngolo jia Nzambi!”

6. Itshi wajiya gutshita gula udi nu badute? Mukunda natshi?

⁶ Gula udi nu badute egi Biblia yana zuela ndo giamatshidia gifua muazuelele Max, uvigo musonyi. Uvi idi nu ndando ha gutshita ndaga imoshi muphushi. Badute adi gifua ukelengenye. Gula wawubemba, wajiya guzangela gima gia ndando mage-mage. Ha gukatula badute ajiya gubolesa gutshigina guaye, wajiya gudihula egi: ‘Ngana tshigina diago ndaga Biblia yana zuela mukunda nu masugu adi muza ba?’ Gula ndo, wajiya gulonguga profesi jia Biblia jinyi jiatagenesewe gale. Luholo lutshi wajiya gujilonguga?

7. Itshi yakuatesele Danyele ha gulonguga profesi? (Danyele 12:10) (Tala nji gifuanesa.)

⁷ Danyele watubembele gifezegeselo giabonga mu ndaga yatadila gulonguga profesi. Guakhalele nu ndaga yabonga yakhalele gumutuma ha gulonguga profesi: Wakhalele mutshigina gujiya giamatshidia. Danyele wakhalele nji muthu ya gudibulumuisa, wakhalele mujiya nji egi Yehowa mbawumukuatesa ha gukotelesa profesi jiene gula wasala yagujinginyina gudi muene nu wamutumagela. (Dan. 2:27, 28; tanga Danyele 12:10.) Wamonesele egi wakhalele muthu wa gudibulumuisa hakhalele muene mutoga ukuateshi gudi Yehowa. (Dan. 2:18) Danyele wakhalele nji mulonguga muabonga. Wakhalele mutshita ba recherche mu mikanda ya Nzambi inyi yakhalele naye muene. (Yel. 25:11, 12; Dan. 9:2) Luholo lutshi wajiya gulandula gifezegeselo gienji?

8. Mukunda natshi athu ako ana longuga profesi jia Biblia? Uvi esue itshi tuajiya gutshita?

 ⁸ Tangiza ndaga jidi gugutuma ha gulonguga profesi jia Biblia. Wana longuga profesi jia Biblia handaga wana tshigina gujiya giamatshidia ba? Gula idi ngenyi, Yehowa mbawugukuatesa. (Yone 4:23, 24; 14:16, 17) Uvi athu ako ana khala nu ndaga jiko jiana guatuma ha gulonguga profesi jia Biblia. Ana gudifelela egi ajiya gumona nga ndaga imoshi yajiya guatshiginyisa egi Biblia ishigo Mbimbi ya Nzambi. Ana tangiza egi gula Biblia ishigo Mbimbi ya Nzambi, ngenyi ene hakhawo ajiya guditombela ndaga jiabonga nga jiabola. Uvi esue tushigo naye gukhala nu matangi a luholo elu tangua tudi mulonguga profesi jia Biblia. Gudi nu khadilo dimoshi dia ndando tudi naye gukhala nadio ha gukotelesa profesi jia Biblia.

9. Khadilo ditshi didi naye gutukuatesa ha gukotelesa profesi jia Biblia? Kotelesa.

⁹ Khala muthu wagudibulumuisa. Yehowa wana zuela egi mbawukuatesa athu agudibulumuisa. (Yak. 4:6) Hene hagula egi tukotelese profesi jia Biblia, tudi naye gumutoga ukuateshi mu gisambu. Gula tudi athu agudibulumuisa, mbatutshigina utuameji wana gutuhana muhiga wafubidila nu watema, Yehowa wana kalegela ha gutuhana ima ya gudia ya mu nyuma mu tangua diatagana. (Luka 12:42) Yehowa gashigo Nzambi wa lumuamua, hene wana khala nu muhiga phamba mumoshi wana gutukuatesa ha gukotelesa giamatshidia gidi mu Mbimbi yenji.​—1 Kol. 14:33; Ef. 4:4-6.

10. Longo ditshi wazula mu gifezegeselo gia phangi Esther?

¹⁰ Khala mulonguga muabonga. Sendesa thomo gulonguga profesi jinyi jidi gugusuanguluisa. Phangi Esther watshitshile nji ngenyi. Wakhalele mutshigina gujiya ndaga jiavula jiatadila profesi jiana zuelela guza gua Masiya. Udi muzuela egi: “Tangua ngakhalele nu ivo 15, ngasendesele gutshita ba recherche ha gumona ndaga jidi gungutshiginyisa egi profesi jiene jiasonegewe diago gutuama egi Yesu avualewe.” Ndaga jialongugile muene jiatadila ba rulo a Mer Morte jiamukuatesele muavula. Udi muzuela egi: “Mukatshi dia rulo jiene, jiko jiasonegewe gutuama egi Klisto avualewe, jidi diago mumonesa egi profesi jidi mu rulo jiene, jiakatugile gudi Nzambi.” Phangi Esther udi muzuela luko egi: “Ngatangele ndaga jiene mbala jiavula ha gujikotelesa muabonga.” Uvi udi nu gusuanguluga handaga wakalegele diago ngolo. Gungima dia gulonguga muabonga profesi jiavula jia Biblia, phangi Esther udi muzuela egi: “Ame hakhami ngadimonela diago egi Biblia yana zuela ndaga jia giamatshidia!”

11. Mukunda natshi idi nu ndando ha gutshigina egi Biblia yana zuela giamatshidia?

¹¹ Tangua tuana mona luholo profesi jiko jia Biblia jiatagenele gale, yana gututuma diago ha guhaga mutshima gudi Yehowa nu mu utuameji wana gutuhana muene. Profesi jia Biblia jiana gutukuatesa nji ha gukhala nu matangi abonga mu mafelela etu atadila masugu adi muza, ikhale mangino tudi mutagana nu malamba. Henyaha tuzuelelenu profesi jia Biblia mbadi jidi mu mukanda wa Danyele jinyi jidi mutagenesewa mangino. Gula tuajikotelesa, jiajiya gutukuatesa ha guzula badesizio abonga.

12. Ikanzo ya ‘utadi wa gubungisa nu wuma’ idi mumonesa itshi? (Danyele 2:41-43)

¹² Tanga Danyele 2:41-43. Danyele wahanele ukoteleshi wa nzoji yalotele Fumu Nebukadenezale. Mu nzoji yene, fumu wamonele egi ikanzo ya gisongo yakhalele ya ‘utadi wa gubungisa nu wuma.’ Gula tuafuanesa profesi eyi nu jiko jidi mu mukanda wa Danyele nu wa Gumonesa, tudi mukotelesa egi ikanzo ya gisongo giene idi mumonesa Puissance Mondiale Anglo-Américaine, baguvernema a ngolo adi muhinyina mangino. Danyele wazuelele mukunda nu baguvernema ene egi: ‘Ufumu wene mbawukhala khanda iko wakola uvi khanda iko waleba.’ Mukunda natshi khanda iko idi yaleba? Handaga athu adi mu ufumu wene ana fuanesewa nu wuma, ana tshita ndaga jiana lebesa ufumu wene ha gukalagala ndaga gifua utadi. b

13. Giamatshidia gitshi gia ndando tuajiya gulonguga mu profesi eyi?

¹³ Tuajiya gulonguga giamatshidia gia ndando mu gisongo giakotelesele Danyele; tuajiya nji guzula malongo avula mu ukoteleshi wa ikanzo ya gifuanesa giene. Thomo, Puissance Mondiale Anglo-Américaine yamonesele egi idi nu ngolo jiavula. Ha gufezegesa, yatshitshile ngolo ha gubinga Ita ya Thomo nu Ita ya Mbadi ya ha Mavu Agasue. Uvi ufumu wene walebesewe nu mbawulandula gulebesewa, handaga athu mu ufumu wene ana gudiluisa nu ana luisa baguvernema awo. Ndaga ya mbadi idi egi, Puissance Mondiale Anglo-Américaine idi ufumu wa suga udi mutuameza mavu gutuama egi Ufumu wa Nzambi uze usugise ma ufumu agasue a ana athu. Ikhale matangua ako ifutshi iko idi muluisa Puissance Mondiale Anglo-Américaine, uvi gushigo nu gifutshi mbagihinyina ha fundo dienji. Tuazuela ngenyi handaga “seso” didi mumonesa Ufumu wa Nzambi, mbadimuanga ikanzo, yakotelesa egi gitshinyi gia gisongo ginyi gidi mumonesa Puissance Mondiale Anglo-Américaine.​—Dan. 2:34, 35, 44, 45.

14. Luholo lutshi gukotelesa profesi yatadila ikanzo ya utadi nu wuma guajiya gutukuatesa ha guzula badesizio abonga?

¹⁴ Wana tshigina diago egi profesi ya Danyele yatadila ikanzo ya utadi nu wuma idi ya giamatshidia ba? Gula idi ngenyi, mbayigukuatesa ha gujiya luholo udi naye gutuameza monyo waye. Mbawushigo mukamba gukhala muenya umonyi wavula-vula handaga udi mujiya egi gualeha ndo mavu wawa adi mushiyiwa. (Luka 12:16-21; 1 Yone 2:15-17) Gukotelesa profesi eyi mbagugukuatesa nji ha gumona funu ya gulongesa lukuma luabonga. (Mat. 6:33; 28:18-20) Gungima dia gulonguga profesi eyi, wajiya gudihula egi: ‘Badesizio ngana zula ana monesa egi ngana tshigina diago egi gualeha ndo Ufumu wa Nzambi mbawukatula baguvernema agasue a ha mavu ba?’

15. Nanyi udi ‘fumu wa gu nord’ nu ‘fumu wa gu sud’ mangino? (Danyele 11:40)

¹⁵ Tanga Danyele 11:40. Mukanda wa Danyele mukhapho 11 udi muzuelela mafumu mbadi adi gudiluisa ha guhinyina mavu agasue. Gula tuafuanesa profesi eyi nu profesi jiko jidi mu Biblia, tudi mumona egi ‘fumu wa gu nord’ udi Russie nu ifutshi iko yana gumuhana mago; uvi ‘fumu wa gu sud’ udi Puissance Mondiale Anglo-Américaine. c

16. Luholo lutshi ‘fumu wa gu nord’ wana kalegela akombeledi a Nzambi ndaga?

¹⁶ Akombeledi a Nzambi ana khala mu ifutshi idi mutuamezewa gudi ‘fumu wa gu nord’  ana tagana nu usageshi wavula. Ako mukatshi diawo ana betewa nu ana mbiwa mu bologo mukunda nu gutshigina guawo. Usageshi wa ‘fumu wa gu nord’ wana kolesa gutshigina gua aphangi’etu. Mukunda natshi? Handaga ana jiya egi usageshi wana tagana nawo akombeledi a Nzambi, wana tagenesa profesi ya Biblia idi mu mukanda wa Danyele. d (Dan. 11:41) Gujiya ngenyi guajiya gutukuatesa ha gubamba felela dietu nu gusala ya gujinginyina gudi Yehowa.

17. Luholo lutshi ‘fumu wa gu sud’ wakalegele akombeledia Nzambi ndaga?

¹⁷ Mu ivo yabalega, ‘fumu wa gu sud’ wasagesele nji akombeledi a Yehowa. Ha gufezegesa, mu sungi ya Ita ya Thomo nu Ita ya Mbadi ya ha Mavu Agasue, aphangi’etu avula ambiwe mu bologo handaga atunyile guya mulua ita. Ana ako a Matemue a Yehowa akayewe nji gu khalasa handaga atunyile gutshita salut au drapeau. Mu ivo yabalega, Matemue a Yehowa ana khala mu ifutshi idi mutuamezewa gudi fumu wa gu sud atagenele nji nu ndaga yalolele gutshigina guawo. Ha gufezegesa, mu tangua dia  kampanye ga vote, Muklisto wajiya gusendesa gusuanguluga nu parti politike imoshi ngenyi nga nu kandida mumoshi. Ikhale gajiyilego gutshita vote, uvi wajiya gusendesa gutangiza mu mutshima wenji egi parti politike imoshi ngenyi idi yabonga gubalega iko. Idi diago nu ndando ha gutuna gudinginyisa mu ndaga jia politike ikhale mu makalegelo nga mu matangi etu!​—Yone 15:18, 19; 18:36.

18. Itshi tuajiya gutshita gula ‘fumu wa gu nord’ udi gudiluisa nu ‘fumu wa gu sud’? (Tala nji gifuanesa.)

¹⁸ Athu anyi ana tuna gusha gutshigina mu profesi jia Biblia, ajiya guvua gikenene giavula ha gumona ‘fumu ya gu sud’ ‘muluisa’ ‘fumu ya gu nord.’ (Dan. 11:40) Mafumu ene mbadi adi nu mata akola ajiya gushiya athu agasue a ha mavu. Uvi tudi mujiya egi Yehowa mbagashigo muhana njila egi ndaga yene ikalegewe. (Yesh. 45:18) Umbalagaji wa ‘fumu wa gu nord’ nu ‘fumu wa gu sud’ wanago gutuhana woma, uvi wana kolesa gutshigina guetu. Wana monesa egi gisugishilo gia mavu awa giasuena hehi.

19. Itshi tudi naye gujiya mu ndaga yatadila profesi jia Biblia?

¹⁹ Tushigo mujiya luholo profesi jiko jia Biblia mbajitagenesewa. Ikhale muene profete Danyele hakhenji gakhalelego mukotelesa ndaga jiagasue jiasonegele muene. (Dan. 12:8, 9) Uvi gula tushigo mujiya luholo profesi imoshi mbayitagenesewa, ishigo mukotelesa egi profesi yene mbayishigo mutagana. Tudi naye diago gusha mutshima egi Yehowa mbawutukuatesa ha gukotelesa ndaga tudi najio funu mu tangua diabonga, gifua luholo luatshitshile muene mu tangua dikulu.​—Am. 3:7.

20. Profesi jitshi jia Biblia mbajitagana gualeha ndo? Itshi tudi naye gulandula gutshita?

²⁰ Athu mbaazuela egi: “Tudi mu guhuima nu mu ubambi!” (1 Tes. 5:3) Gungima, mafumu a politike mbaabalumugila ikombelelo yagasue ya mambo nu mbaayishiya. (Gumo. 17:16, 17) Gungima mbaaluisa akombeledi a Nzambi. (Ezek. 38:18, 19) Ndaga eji jiagasue mbajibata diago gu ita ya Alemagedona. (Gumo. 16:14, 16) Tuajiya diago gusha mutshima egi gualeha ndo ndaga eji mbajikalegewa. Uvi gutuama egi jikalegewe, tulandulenu guhaga matangi etu mu profesi jia Biblia, nu gukuatesa athu ako ha gutshita gifua esue; ngenyi tudi mumonesa egi tudi muhana diago mersi gudi Sh’etu wa guzumba udi mu dilu.