Mu longo diene, tuamonele egi gudi nu ndaga imoshi ya ndando athu agasue nu anjelo adi naye gutshita, ndaga yene idi gutumbuisa jina diakoma dia Yehowa. Ikhale luholo lua guhinyina lua Yehowa luana khala luabonga nga ndo, luana gudivua nu gutumbuishiwa gua jina dienji. Luholo lumoshi nji, gula muthu udi wagujinginyina gudi Nzambi nga ndo, yana gudivua nu ndaga yabalega ndando, yakotelesa egi gutumbuishiwa gua jina dia Yehowa.

Henyaha mukunda natshi tudi muzuele egi ndaga yabelega ndaga idi jina dia Yehowa nu gutumbuishiwa gua jina diene? Tutadilenu ndaga thathu jidi mumonesa ndaga yene.

Ya thomo, Satana wazuelele ndaga jiabola mukunda nu jina dia Yehowa nga lukuma luenji mu dihia dia Edene. Muhu Satana wahudile Eva wakhalele mumonesa egi Yehowa wakhala wamina, mikhuala yaahanele muene yakhalele yakola ha gutumagela. Gungima Satana wazuelele ndaga jia gudisha nu jinyi Yehowa wawambelele Adama nu Eva. Wazuelele egi Nzambi udi muenya mambo. Ngenyi wabolesele lukuma lua jina dia Yehowa. Wabuile “Diabulu,” yakotelesa egi “muthu wana gumbila athu ako mambo.” (Yone 8:44) Luholo Eva watshiginyile mambo a Satana, watunyile gutumagela Nzambi, walumbugidile nji luholo luenji lua gutuameza. (Gis. 3:1-6) Uu nu mangino, Satana wana landula gumbila Yehowa mambo. Athu ana tshigina mambo ene ana tuna gutumagela Yehowa. Akombeledi a Nzambi ana jiya egi gumbila jina dia Yehowa dia gijila mambo gudi diago ndaga yabola. Khadilo diene diana tshita egi malamba nu ndaga jiabola jikhale ha mavu.

Ya mbadi, Yehowa mbawubuisa jina dienji dia gijila, mbawudiwevua gu mambo agasue ana gudimbila mukunda nu gubonga gua ima yagasue yafugile muene. Yene ndaga yabalega ndando gu meso a Yehowa. Gishina giene wana zuela egi: ‘Mbangutumbuisa diago jina diami diakoma.’ (Ezek. 36:23) Yesu wamonesele ndaga yabalega ndando akombeledi a Yehowa agujinginyina adi naye gutoga mu isambu yawo hazuelele muene egi: “Jina diaye dinemesewe.” (Mat. 6:9) Biblia yana monesa egi gutumbuisa jina dia Yehowa gudi nu ndando yavula. Tutadilenu ndaga yana zuela: ‘Tumbuisenu jina dia Yehowa.’ (1 Gudi. 16:29; Ngi. 96:8) ‘Yimbenu ngimbo ha gutumbuisa jina dienji dia lutumbu.’ (Ngi. 66:2) ‘Mbangutumbuisa jina diaye ivo nu ivo.’ (Ngi. 86:12) Mukatshi dia mbala jiagasue Yehowa wazuelele sendese mu dilu, imoshi yakhalele gu tempelo ya Yelusalema tangua Yesu wazuelele egi: “Tata, tumbuisa jina diaye.” Yehowa wamuvutudile egi: “Ngaditumbuishile gale nu mbanguditumbuisa luko.”​—Yone 12:28. a

Ya thathu, ndaga jialayele Yehowa jiana gudivua nu jina dienji nga lukuma luenji. Tangiza gale luholo jina dia Yehowa mbadikhala nu ndando gungima dia Uhinyinyi wa ivo 1 000 wa Klisto nu gungima dia gulolewa gua gisugishilo! Mu tangua diene anjelo nu athu agasue mbadivua gikuatshi mukunda nu jina dia Yehowa? Ha guheta mvutu gu muhu wene, tutadilenu ndaga mbadi jiajiya gutukuatesa: Gusala yagujinginyina gudi Nzambi nu luholo luenji lua guhinyina.  Mu tangua diene, athu mbaashigo mukhala nu funu ya gumonesa egi adi agujinginyina gudi Yehowa, handaga mbaakhala athu atagana nu mbaakhala amonesa gale nji egi ana gumutumagela. Mbaaheta monyo wa ivo nu ivo. Athu mbaalandula luko guzuelela luholo lua gutuameza lua Yehowa ba? Luholo luene lua gutuameza lua Yehowa mbalulandula nji gukhaphumuna anjelo nu athu ba? Ndo. Mbayishigo mukhala luko nu ndando ha gumonesa gula luholo lua guhinyina lua Yehowa ludi luabonga, handaga mu tangua diene anjelo agasue mu dilu nu athu agasue a ha mavu mbaakhala nu gudivua guabonga nu mbaatshigina nji gutuamezewa gudi Yehowa. Uvi akombeledi a Yehowa mbaalandula guzula jina dienji nu ndando ba?

Mu tangua diene, athu agasue mbaajiya giamatshidia giatadila Yehowa; jina dienji mbadinemesewa nji diago. Uvi jina dia Yehowa mbadilandula gukhala nu ndando yavula gudi akombeledi enji mu dilu nu ha mavu. Mukunda natshi? Handaga mbaamona luholo Yehowa mbawulandula gukalagala ndaga jiabonga. Tangiza gale: Mu tangua diene Yesu mbawuvutula ufumu wagasue gudi Yehowa nu gudibulumuisa guagasue, ngenyi Nzambi mbawubua “ima yagasue mukunda nu athu agasue.” (1 Kol. 15:28) Gungima athu agasue a ha mavu mbaasuanguluga ha ‘gukudiwa mu uhiga nu lutumbu luagasue gifua luholo ana a Nzambi mbakudiwa mu uhiga.’ (Roma 8:21) Yehowa mbawutaganesa ndaga jialayele muene ha gubungisa akombeledi enji a mu dilu nu a ha mavu ha gubua fami imoshi yakoma.​—Ef. 1:10.

Gungima dia ndaga eji jiagasue, luholo lutshi akombeledi a Yehowa a mu dilu nu a ha mavu mbaadivua? Idi yadiago egi mbatulandula gukhala nu nzala yakola ya gutumbuisa jina dia Yehowa. Nyuma ya Nzambi yatumine muyimbi wa ngimbo Davidi ha gusonega egi: ‘Yehowa Nzambi atumbuishiwe . . . Tumbuisenu jina dienji diakoma ivo nu ivo.’ (Ngi. 72:18, 19) Mbatulandula gukhala nu ndaga jihe-jihe mbajitutuma ha gutumbuisa jina dia Yehowa ivo nu ivo.

Jina dia Yehowa diana monesa ndaga jiagasue jiamutadila. Diana gutuwunguluisa nji guzumba guenji mukunda nu athu. (1 Yone 4:8) Mbatulandula guwunguluga egi, guzumba guatumile Yehowa ha gutufuga, guene guamutumile ha guhana gibawu mukunda nu esue, guene nji guana gumutuma ha guhinyina mu luholo luabonga. Mbatulandula nji gumona guzumba gua Yehowa mukunda nu esue mayilago. Mbatukuata ufuta wakola nu Tata wetu wa mu dilu, mbatuyimba nji ngimbo ha gutumbuisa jina dienji diakoma ivo nu ivo.​—Ngi. 73:28.