LONGO DIA 16
Giamatshidia Giatadila Athu a Gufua
‘Owu muho tuajiya gukhaphumuna ndaga jia nyuma ya giamatshidia nu jia nyuma ya mambo.’—1 YONE 4:6.
LUNGIMBO 73 Donne-nous de la hardiesse
NDAGA JIDI MU LONGO EDI *
Hafundo dia gudinginyisa mu kutime jishigo musuanguluisa Nzambi, hana enya fami yaye gikhesa mukunda nu gufua gua muthu akhalele muzumba (Tala paragrafe 1-2) *
1-2. (a) Mu maluholo atshi Satana wana gudimba athu? (b) Itshi tuza muzuelela mu longo edi?
SATANA udi “sha mambo,” wana gudimba athu sendese mu tangua dia Adama nu Eva. (Yone 8:44) Wana gulongesa malongo a mambo atadila gufua nu monyo gungima dia gufua. Malongo a luholo elu ana guzola kutime jiavula jiana gukatuga mu woma wa ivule ya mvumbi. Hene, aphangi avula a mala nu a akhetu ana “gulua ita mukunda nu gutshigina” gula muthu ya mu fami yawo nga ya mu dimbo diawo wafua.—Yuda 3.
2 Gula watagana nu ndaga eyi, itshi yajiya gugukuatesa ha gutumagela ndaga Biblia idi muzuela mukunda nu gufua? (Ef. 6:11) Luholo lutshi wajiya gukolesa nu guhana gikhesa gudi phangi mumoshi wa Muklisto udi mushinjigiwa ha gudinginyisa mu kutime jiana gutuna Nzambi? Longo edi didi muzuelela luholo Yehowa wana gutukuatesa. Tuzuelelenu thomo ndaga Biblia yana guzuela mukunda nu gufua.
GIAMATSHIDIA GIATADILA ATHU A GUFUA
3. Malamba atshi mambo a thomo ambile Satana abatele?
3 Nzambi gafugilego athu mukunda nu gufua. Adama nu Eva akhalelego naye gufua gula nga atumagele mukhuala waleba Yehowa waahanele egi: “Uvi udigo ndo mabundu a mutshi udi muhana ndunge jia gujiya ndaga jiabonga nu jiabola, ndaga ya gula waadia, lusugu luene aye mbawufua gaye diago.” (Gis. 2:16, 17) Gungima Satana wazolele milonga. Wazuelele nu Eva mu njila ya nyoga egi: ‘Mbamushigo mufua diago.’ Ndaga ya gikenene idi egi Eva watshiginyile mambo a Satana nu wadile bundu diene. Gungima, mulumi’enji nji wadile bundu diene. (Gis. 3:4, 6) Hene, gubola nu gufua guanginyile gudi athu agasue.—Lomo 5:12.
4-5. Luholo lutshi Satana wana landula gudimba athu?
4 Adama nu Eva afuile, gifua muazuelele Nzambi. Uvi Satana gabembelego gumba mambo mu ndaga yatadila gufua. Gungima, wasendesele gulezela mambo ako. Mukatshi dia mambo ene, tuajiya gutanga malongo ana guzuela egi muila wana gufua uvi monyo wana guya gosa. Mambo ene ana gudimba athu avula uu nu mangino.—1 Tim. 4:1.
5 Mukunda natshi athu avula ana gutshigina mambo a Satana? Ana gutshigina mambo enji handaga Satana wana gujiya luholo athu ana gudivua mukunda nu gufua, hene gana guadimba. Tuanago gutshigina gufua, handaga Nzambi watufugile nu felela dia gujinga mayilago. (Mulo. 3:11) Gufua guakhala mbalagaji yetu.—1 Kol. 15:26.
6-7. (a) Satana wabingile ha gusuega giamatshidia giatadila athu a gufua? Kotelesa. (b) Luholo lutshi giamatshidia gia Biblia giana gutukuatesa ha gukatula woma wa athu afile gale?
6 Ngatshima Satana wana gusha ngolo hagula athu ajiyigo giamatshidia giatadila gufua, uvi giana gujiyiwa. Hene, mangino athu avula ana gujiya nu ana gulongesa giamatshidia giatadila luholo muthu wana gubua gula wafua, nu ana gulongesa nji felela dia gufuzumuga. (Mulo. 9:5, 10; Makal. 24:15) Giamatshidia giene giana gutuhana ngolo nu giana gutukatula woma nu dute jia ndaga athu ana gutangiza egi jiajiya gubuila muthu gula wafua. Ha gufezegesa, esue akombeledi a Yehowa tuana guvua ndo woma wa mvumbi; nga gutangiza egi ndaga yabola yajiya gubuila athu tuakhalele muzumba afile gale. Tuana gujiya egi anago gujinga luko nu ajiyilego gututshita gubola. Idi gifua akhala gu tulo tuabala. (Yone 11:11-14) Tuana gujiya luko egi athu a gufua ana gujiya ndo luholo tangua diana gubalega. Ikhale athu anyi afile gale mualeha, mbaashigo mujiya egi ivo yavula yabalega gale gutuama egi afuzumuge.
7 Giamatshidia giatadila athu a gufua gishigo giakola ha gukotelesa nu gidi giatagana diago, ishigo ngenyi? Giamatshidia giene gidi gia gudisha nu mambo ambile Satana! Ndaga jiene jia mambo jianago gudimba phamba athu, uvi jiana gushingisa nji Mufugi wetu. Tutadilenu mihu eyi yalandula, hagula tukotelese malamba ana gutubatela Satana. Luholo lutshi mambo a Satana ana gushingisa Yehowa? Luholo lutshi mambo ene ana gutuma athu avula ha gutuna guhaga gutshigina gu mulambu wa Yesu? Luholo lutshi ana gulezela malamba gudi athu?
MAMBO A SATANA AZOLELE MALAMBA AVULA
8. Ha gutadila Yelemiya 19:5, luholo lutshi mambo a Satana atadila athu a gufua ana gushingisa Yehowa?
8 Mambo a Satana atadila athu a gufua ana gushingisa Yehowa. Mukatshi dia mambo ene, tuajiya gutanga malongo athu ana gulongesa egi gula muthu wafua wana gumona lamba mu zanga dia tshuiya. Malongo ene ana gushingisa Nzambi! Luholo lutshi? Ana gutuma athu ha gutangiza egi Nzambi wa guzumba wakhala nu khuta gifua Diabulu. (1 Yone 4:8) Luholo lutshi wana gudivua mukunda nu mambo ene? Luko, luholo lutshi Yehowa wana gudivua? Yehowa ganago gutshigina khuta jia maluholo agasue.—Tanga Yelemiya 19:5.
9. Luholo lutshi mambo a Satana ana gutuma athu ha gutuna gusha gutshigina gu mulambu wa Klisto udi muzuelewa mu Yone 3:16 nu mu 15:13?
9 Mambo a Satana ana gutuma athu avula ha gutuna guhaga gutshigina gu mulambu wa Yesu. (Mat. 20:28) Mambo ako a Satana adi egi monyo wa athu wanago gufua. Gula nga yakhala ngenyi, nga athu agasue ana gujinga mayilago. Ngenyi, Klisto gakhalelego naye guhana monyo wenji gifua mulambu hagula tuhete monyo wa ivo nu ivo. Jiyenu egi mulambu wa Klisto wana gumonesa guzumba guakoma Yehowa wana gukhala nago mukunda nu athu. (Tanga Yone 3:16; 15:13.) Tangiza luholo Yehowa nu Yesu ana gudivua mukunda nu malongo ana gumonesa egi mulambu wene ushigo nu ndando!
10. Luholo lutshi mambo a Satana atadila gufua ana gulezela malamba gudi athu?
10 Mambo a Satana ana gulezela malamba gudi athu. Gula mvuaji jiafuisa mun’awo, athu ako ajiya guaawambela egi Nzambi wamuzudi hagula amubuise muanjelo mu dilu. Mambo ene a Satana adi mulebesa malamba a mvuaji jiene ba? Ndo, adi guavudisa. Mafumu a mangumba akhalele mumonesa athu lamba, akhalele nji mushiya ako holu dia mitshi nu guakonda tshuiya, ha gumonesa egi malongo a mambo a zanga dia tshuiya adi a giamatshidia. Mukanda umoshi udi mumonesa egi mukatshi dia mafumu akhalele mushiya athu gu Espagne, ako akhalele mumona gifua “gukonda muthu tshuiya guajiya gumukuatesa ha gukotelesa lamba dia zanga dia tshuiya,” hagula abalumune mutshima gutuama dia gufua. Mu ifutshi yavula, ana gushinjiga athu ha gukombelela akhakha awo afile gale ha guanemesa nga ha guatoga ukuateshi. Ako ana gukombelela akhakha awo afile gale hagula a atshitshigo gubola. Ndaga ya lamba idi egi mambo ene a Satana anago guhana gikhesa nga hazonda, uvi ana gubatela athu malamba nu woma.
TUMAGELA GIAMASTSHIDIA GIA BIBLIA
Gutshita ba recherche mu Biblia nu gusolula muabonga nu enya fami ashigo Matemue a Yehowa guajiya gugukuatesa ha gujinga nawo muabonga (Tala paragrafe 13-14) *
11. Luholo lutshi enya fami yetu nga mafuta etu ajiya gutushinjiga ha gushiya mikhuala ya Biblia?
11 Guzumba Yehowa nu Mbimbi yenji guana gutuhana gikhesa gia gumutumagela ngatshima enya fami yetu nu mafuta etu atushinjiga ha gudinginyisa mu kutime jiawo jiabola jiatadila athu a gufua. Ajiya gutukuatesa musonyi, nga guzuela egi tuanago guzumba athu afile gale, nga ndo tuanago guanemesa. Ajiya guzuela luko egi khadilo dietu diajiya gutuma athu afile gale ha gusagesa athu adi nu monyo. Luholo lutshi tuajiya gutumagela giamatshidia gia Biblia? Tutadilenu luholo tuajiya gukalegela malongo a Biblia awa alandula.
12. Kutime jitshi jiatadila athu a gufua Biblia yana gutunyisa haphelo?
12 Zula desizio dia “gudikhaphumuna” nu kutime jianago gudivua nu Biblia. (2 Kol. 6:17) Mu mahongo a gu Caraïbes athu avula ana gutangiza egi gula muthu wafua, “givule” gienji giajiya gusala ha gusagesa athu amutshitshile gubola. Mukanda umoshi udi muzuela egi “givule” giene giajiya nji “gusagesa athu avula.” Mu kutime jiko jia mu Afrique, gula muthu wafua, athu ana gubanda hanze nu tshuya masugu avula. Mukunda natshi? Ana gutangiza egi gutshita ngenyi guana guakuatesa hagula givule giabola giasagesago! Luholo tudi akombeledi a Yehowa, tushigo naye gudinginyisa mu kutime nga gutshita ndaga jidi munemesa mambo a Satana!—1 Kol. 10:21, 22.
13. Luholo Yakoba 1:5 idi guyimonesa, itshi wajiya gutshita gula ushigo mujiya ndaga ya gutshita mukunda nu kutime imoshi ngenyi?
13 Gula ushigo mujiya ndaga ya gutshita mukunda nu kutime imoshi ngenyi, samba Yehowa hagula aguhane gutema. (Tanga Yakoba 1:5.) Gungima tshita ba recherche mu mikanda yetu. Gula luholo ludi guene, toga ukuateshi gudi akulu a hungu dienu. Mbaashigo muzula desizio ha fundo diaye, uvi ajiya gugukuatesa nu malongo a Biblia, gifua wawa tuazuelela mu longo edi. Gula watshita ngenyi, mbawukudisa ‘ndunge jia ukhaphumunyi,’ ndunge jiene mbajigukuatesa ha “gukhaphumuna ndaga jiabonga nu jiabola.”—Heb. 5:14.
14. Mu maluholo atshi tuajiya gutuna gukhala gikhakhuishilo mukunda nu athu ako?
14 “Tshitshienu ndaga jiagasue ha gutumbuisa Nzambi. Mukhadigo gikhakhuishilo.” (1 Kol. 10:31, 32, NWT) Gula tuazula desizio dia gudinginyisa mu kutime imoshi ngenyi, tudi naye gutangiza gula desizio dietu mbadisagesa aphangi etu aklisto mu mutshima nga ndo. Tushigo naye gukhala gikhakhuishilo mukunda nu athu ako! (Mako 9:42) Tushigo naye nji gutshita ndaga jiajiya gusagesa athu ashigo Matemue a Yehowa. Guzumba mbagututuma ha guawambela ndaga nu ginemua giagasue ha gutumbuisa Yehowa. Tuajiyilego gumana nu athu nga gulelula kutime jiawo. Jiya egi guzumba guakhala nu ngolo jiavula! Gula tudi mumonesa guzumba gua luholo elu ha gunemesa mbalagaji jietu, tuajiya gukuata mitshima yawo.
15-16. (a) Mukunda natshi idi ndaga yabonga ha gudijiga athu ako egi tudi matemue a Yehowa? Hana gifezegeselo. (b) Luholo lutshi tuajiya gukalegela mbimbi jidi mu Lomo 1:16?
15 Wambela athu muana gujinga nawo egi udi Temue wa Yehowa. (Yesh. 43:10) Gula enya fami yaye nu athu ako adi mujiya egi udi Temue wa Yehowa, mbaashigo gugusagesa ha gudinginyisa mu ndaga jia kutime gula muafuisa muthu. Francisco wana jinga gu Mozambique udi muzuela egi: “Tangua ame nu mukaji’ami Carolina tualongugile giamatshidia, tuawambelele enya fami yetu egi mbatushigo luko mukombelela mvumbi. Yakhalele lamba tangua phangi’a Carolina wa mukhetu wafile. Kutime jia gumbo dietu jiana gutoga ha guweva kimbi tangua adi mutshita ndaga jia dingumba. Gungima enya fami adi naye gubanda masugu thathu ha fundo diene. Ana gutangiza egi gutshita ngenyi guana gulebesa khabu jia givule gia mvumbi. Enya fami ya Carolina akhalele mutangiza egi muene nji mbawubanda ha fundo diene.”
16 Phangi Francisco nu mukaji’enji atshitshile itshi? Francisco umuzuela egi: “Tuatunyile gudinginyisa mu kutime jiene handaga tuana guzumba Yehowa nu tuana kamba gumusuanguluisa. Enya fami ya Carolina avuile khabu jiavula. Azuelele egi tuanemeselego mvumbi, nu mbaashigo muza luko gututala nga gutukuatesa. Luholo tuakhalele tuadiangela gale guadijiga egi tudi matemue a Yehowa, tuazuelelego nawo ndaga yene tangua akhalele nu khabu. Enya fami ako akhalele gutuzuelela egi tuaadijigile gale egi tudi matemue a Yehowa. Tangua, enya fami ya Carolina abembele guvua khabu, tuatshitshile ngolo ha gukhala nawo mu guhuima. Hene, ako ajile gumbo dietu ha gututoga mikanda.” Tushigo naye guvua musonyi ha gutumagela giamatshidia Biblia yana gulongesa mu ndaga yatadila gufua.—Tanga Lomo 1:16.
HANA GIKHESA NU UKUATESHI GUDI ATHU ADI MUDILA
Mafuta abonga ana guhana gikhesa nu ukuateshi gudi athu afuishi muthu akhalele ene muzumba (Tala paragrafe 17-19) *
17. Itshi tuajiya gutshita gula phangi mumoshi wafuisa muthu akhalele muzumba?
17 Gula phangi Muklisto wafuisa muthu wana guzumba, tudi naye gutshita ngolo ha gukhala ‘futa diabonga . . . , phangi wavalewe mukunda nu matangua a malamba.’ (Ish. 17:17) Luholo lutshi tuajiya gukhala “futa diabonga,” gula adi mushinjiga phangi mumoshi wa yala nga wa mukhetu wafuishi muthu ha gudinginyisa mu kutime jiabola? Tutadilenu malongo mbadi a Biblia ajiya gutukuatesa ha guhana gikhesa gudi phangi wafuishi muthu.
18. Mukunda natshi Yesu wadidile, nu longo ditshi tuajiya guzula mu gifezegeselo gienji?
18 “Dilenu nu athu adi mudila.” (Lomo 12:15, NWT) Yajiya gukhala lamba ha gujiya ndaga ya guwambela phangi wafuishi muthu. Matangua ako gudila guetu guabalega mbimbi tuajiya guzuela. Tangua Lazalo futa dia Yesu wafuile, Mariya, Mata, nu athu ako akhalele mudila muavula. Tangua Yesu wajile gungima dia masugu nguana, muene nji ‘wazolele masoji,’ ngatshima wakhalele mujiya egi umuza mufuzumuna Lazalo. (Yone 11:17, 33-35) Gudila gua Yesu guamonesele luholo Yehowa wadivile tangua Lazalo wafuile. Tangua enya fami amonele Yesu mudila, akotelesele egi Yesu wakhalele diago guazumba, ndaga yene yahanele diago Mariya nu Mata gikhesa. Luholo lumoshi nji, gula aphangi’etu amona egi tuana guazumba nu tuana gudihaga ha fundo diawo, mbaajiya egi ashigo hakhawo uvi adi nu mafuta adi guaakuatesa.
19. Tangua tudi muhana phangi wafuishi muthu gikhesa, mu maluholo atshi tuajiya gukalegela Mulongeshi 3:7?
19 “Tangua dia guhena nu tangua dia guzuela.” (Mulo. 3:7, NWT) Luholo luko tuajiya guhana gikhesa gudi phangi wafuishi muthu ludi gumutegelela muabonga tangua adi muzuela. Mubembele tangua dia guzuela luholo gadi gudivua, umuwambelago ndaga jia “izuele-zuele.” (Yobo 6:2, 3) Yajiya gukhala egi phangi muene udi musagesewa gudi enya fami yenji ashigo Matemue a Yehowa. Sambenu nenji. Toga Yehowa Nzambi ‘Wana guvua isambu’ ha gumuhana ngolo nu ndunge jia gutangiza. (Ngi. 65:2) Gula luholo ludi guene, tangienu nenji Biblia hamoshi. Nga ndo mutangele lumene lua muthu mumoshi lua mu mikanda yetu ludi gudivua nu ndaga yatagana naye muene ha gumuhana gikhesa.
20. Itshi mbatumona mu longo dialandula?
20 Tuana gusuanguluga muavula ha gujiya giamatshidia giatadila athu a gufua, nu felela diawaha dia masugu adi muza mukunda nu athu adi mu ndumba! (Yone 5:28, 29) Hene, tutumagelenu giamatshidia gia Biblia nu gikhesa giagasue mu mbimbi nu mu makalegelo, nu tugilongese gudi athu ako gula tuaheta okazio. Mu longo dialandula mbatumona ndaga iko Satana wana gukalegela ha gukanga athu njila ya gujiya giamatshidia—wanga. Mbatumona mukunda natshi tudi naye gutuna makalegelo nu saga jidi gudivua nu ndaga jia bademo.
LUNGIMBO 24 Venez à la montagne de Jéhovah !
^ par. 5 Satana nu bademo enji ana gudimba athu gu ndaga yatadila luholo athu a gufua ana gukhala. Mambo ene azolele kutime jiavula jianago gudivua nu Biblia. Longo edi diza gutukuatesa ha gusala ya gujinginyina gudi Yehowa tangua athu ako adi gutushinjiga ha gutshita kutime jia luholo elu.
^ par. 55 UKOTELESHI WA IFUANESA: Mama mumoshi udi mudila mukunda nu gufua gua muthu mumoshi wakhalele muene muzumba, enya fami ago adi Matemue aza gumuhana gikhesa.
^ par. 57 UKOTELESHI WA IFUANESA: Temue wa Yehowa mumoshi watshita ba recherche mu ndaga yatadila kutime jia mafua, gungima udi mukotelesela enya fami yenji anyi ashigo matemue ndaga jiene.
^ par. 59 UKOTELESHI WA IFUANESA: Akulu a mu hungu dia Uklisto adi muhana gikhesa nu ukuateshi gudi Temue wafuishi phangi’enji.
