1. Ha gutadila Efeso 6:10-13, mu luholo lutshi Yehowa wana gumonesa egi wana gudisagesa mukunda nu esue? Kotelesa.

MUKATSHI dia ndaga jidi mumonesa egi Yehowa wana gudisagesa mukunda nu esue akombeledi enji, wana gutukuatesa ha gulua nu mbalagaji jietu. Mbalagaji jietu jiakoma jidi Satana nu bademo. Yehowa wana gututemesa mukunda nu mbalagaji eji, wana gutuhana ima tudi naye funu ha gulua najio. (Tanga Efeso 6:10-13.) Gula tuatshigina ukuateshi wa Yehowa nu tuamuhagela mutshima, mbatubinga guluisa Diabulu. Tuajiya gumuhagela mutshima gifua muamuhagele mupostolo Phaula. Wasonegele egi: ‘Gula Nzambi udi nu esue, nanyi wajiya gutuluisa?’—Lomo 8:31.

2. Itshi tuza mumona mu longo edi?

² Esue Aklisto a giamatshidia tuajiyilego guzuelela ndaga jia Satana nu bademo tangua diagasue. Tudi naye gulonguga ndaga jia Yehowa nu gumukalegela tangua diagasue. (Ngi. 25:5) Uvi, tudi naye gujiya ndaga Satana wana gutshita. Mukunda natshi? Handaga gujiya ndaga jienji guajiya gutukuatesa hagula tuhuigiwago gudi muene. (2 Kol. 2:11) Mu longo edi, tuza mumona ndaga Satana nu bademo ana gukalegela muavula ha gudimba athu. Tuza mumona luko luholo tuajiya gubinga ha gulua nawo.

3-4. (a) Unganga-ngombo udi itshi? (b) Athu guvula gutshi ana gutshigina ngolo jia unganga-ngombo?

³ Satana nu bademo ana gukalegela muavula midimo ya phipha ha gudimba athu. Athu ana gutshita midimo ya phipha ana guzuela egi, ana gujiya ndaga athu ajiyilego gujiya gula ashigo nu wanga. Ha gufezegesa, ako ana guzuela egi  ana gujiya ndaga mbajibua mu masugu adi muza mu njila ya unganga-ngombo. Ako ajiya gumonesa gifua ana guzuela nu athu afuile gale. Ako ana gukalegela wanga nga midimo ya phipha, nu ana gukamba gulowa athu. *

⁴ Athu guvula gutshi ana gutshigina ngolo jia unganga-ngombo? Sondage imoshi yatshitshiwe mu ifutshi 18 ya gu Amérique latine nu gu mahongo a gu Caraïbes yamonesele egi muthu mumoshi mukatshi dia athu mutatu wana gutshigina egi wanga wana gukhala, nu avula mukatshi diawo ana gutshigina egi ajiya guta maga nu nyuma jiabola. Sondage iko yatshitshiwe mu ifutshi 18 ya mu Afrique. Athu avula ahudiwe mihu mukatshi diawo azuelele egi ana gutshigina egi wanga wana gukhala. Idi yadiago egi, ikhale tudi mujinga fundo ditshi, tudi naye gutuna unganga-ngombo. Satana udi mukamba gudimba “athu agasue a ha mavu.”—Yat. 12:9.

5. Luholo lutshi Yehowa wana gutadila unganga-ngombo?

⁵ Yehowa udi “Nzambi wa giamatshidia.” (Ngi. 31:5) Luholo lutshi Nzambi wana gutadila unganga-ngombo? Wana guwutuna! Yehowa wawambelele enya gu Isalele egi: ‘Mukatshi dienu musangewago muthu udi muhana mun’enji wa yala nga wa mukhetu gifua mulambu ha giwotshielo, nga muthu udi muphonga jingombo, nga udi nu jithemua ha gujiya ndaga jia gumatuama, nga muthu udi mutala ijiyilo mukunda nu gujiya ndaga jia wanga, muenya fugo udi muya muhula athu adi mutamega ivule, nu ana zuela ndaga jidi khenji jibuago, nga muthu udi muzuela nu jimvumbi. Yehowa Nzambi wenu udi mutuna athu adi mutshita milonga eyi.’ (Mikh. 18:10-12) Aklisto anago gulandula mukhuala Yehowa wahanele enya Isalele. Uvi tudi mujiya egi matangi enji mukunda nu unganga-ngombo khenji asombegesele ndo.—Mal. 3:6.

6. (a) Luholo lutshi Satana wana gukalegela unganga-ngombo ha gusagesa athu? (b) Giamatshidia gitshi giatadila athu a gufua Mulongeshi 9:5 udi muzuelela?

⁶ Yehowa wana gututemesa mukunda nu unganga-ngombo handaga Satana wana guwukalegela ha gusagesa athu. Satana wana gukalegela unganga-ngombo ha guvudisa mambo; wana guzuela egi athu a gufua ana gujinga fundo diko. (Tanga Mulongeshi 9:5.) Satana wana gukalegela luko unganga-ngombo ha guhana athu woma nu ha guakatula gukhanda ya Yehowa. Felela dienji diana khala egi athu ana gutshita unganga-ngombo ashile bademo mutshima uvi Yehowa ndo.

7. Ndaga jitshi Yehowa wana gutuwambela?

⁷ Gifua luholo tuayimonyi gutuama, Yehowa wana gutuwambela ndaga tudi naye gujiya hagula Satana nu bademo atuhuigigo. Tutadilenu ndaga tuajiya gutshita ha gulua nu Satana nu bademo.

8. (a) Mu luholo lutshi luatagana tuajiya gulua nu nyuma jiabola? (b) Luholo lutshi Ngimbo 146:4 idi mumonesa haphelo mambo a Satana atadila gufua?

⁸ Gutanga Mbimbi ya Nzambi nu guyitangigiza. Lulu luholo luatagana tuajiya gutuna mambo ana gumba nyuma jiabola. Mbimbi ya Nzambi idi gifua phogo ya mazo abala yajiya gukoka mambo  a Satana. (Ef. 6:17) Ha gufezegesa, Mbimbi ya Nzambi yana gumonesa haphelo mambo ana guzuela egi athu a gufua ajiya guzuela nu athu a monyo. (Tanga Ngimbo 146:4.) Yana gutulongesa nji egi phamba Yehowa wajiya gutuwambela ndaga jia masugu adi muza. (Yesh. 45:21; 46:10) Gula tudi mutanga Mbimbi ya Nzambi nu guyitangigiza lusugu nu lusugu, mbatudilondega ha gutuna mambo nyuma jiabola jiana gukamba egi tutshigine.

9. Makalegelo atshi a unganga-ngombo tudi naye gutuna?

⁹ Utshitshigo nga ndaga imoshi idi gudivua nu unganga-ngombo. Esue Aklisto a giamatshidia tuanago gutshita ndaga jia unganga-ngombo nga hazonda. Ha gufezegesa, tuajiyilego guphonga nga gukamba guzuela nu athu afile gale ikhale mu loholo lutshi. Gifua luholo tuayizuelela mu longo diabalega, tuanago gutshita bakutime adi mutshiginyisa egi athu a gufua ana gujinga fundo diko. Tuajiyilego gukalegela jithemua nga ngombo ha gujiya ndaga mbajibua mu masugu adi muza. (Yesh. 8:19) Tudi mujiya egi makalegelo ene agasue akhala abola, nu ajiya gututuma ha gukuata ufuta nu Satana nu bademo.

10-11. (a) Isthi athu ako a mu siekle ya thomo atshitshile tangua alongugile giamatshidia? (b) Ha gutadila 1 Kolinto 10:21, mukunda natshi tudi naye gulandula gifezegeselo gia Aklisto a mu siekle ya thomo, nu luholo lutshi tuajiya guyitshita?

¹⁰ Tukatule ndaga jiagasue jidi gudivua nu wanga. Mu siekle ya thomo, enya gu Efeso ako akhalele nu wanga. Tangua alongugile giamatshidia, atshitshile ngolo ha gusombegesa. “Ako akhalele atshitshi a ndaga jia ilumbe-lumbe abungishile mikanda yawo, ayikondele tshuya gu phala ya athu agasue.” (Makal. 19:19) Athu awa atshitshile diago ngolo ha gulua nu nyuma jiabola. Mikanda yawo ya wanga yakhalele mikanda ya falanga jiavula. Uvi ha fundo dia giyidiga nga guyihana athu, ayikondele  tshuya. Akhalele nu nzala yavula ya gusuanguluisa Yehowa ngatshima mikanda yawo yakhalele ya mbongo jiavula.

¹¹ Luholo lutshi tuajiya gulandula gifezegeselo gia Aklisto a mu siekle ya thomo? Idi ndaga yabonga gula tuabishila ima yagasue idi gudivua nu wanga. Mukatshi dia ima yene tuajiya gutanga mikanga, nu ima iko athu ana gukhala naye ha gudibamba gu nyuma jiabola.—Tanga 1 Kolinto 10:21.

12. Mihu isthi tuajiya gudihula mukunda nu saga tuana gutshita?

¹² Talela muabonga saga jiaye wana gutshita. Dihule egi: ‘Ngana gutanga mikanda, mazulunalu, nga ndaga jia mu Internet jidi muzuelela wanga ba? Miziki ngana gutegelela nu ndaga ngana gutala mu video nu mu TV jiana gusunzula wanga ba? Saga ngana gutshita jiana gukhala nu ndaga jia wanga ba? Saga jiene jiana guzuelela ndaga jia imbombi, jia nganga nga jia bademo ba? Jiana gumonesa wanga nu gulowa athu gifua ishigo ndaga yabola ba?’ Idi yadiago egi, saga jiagasue jidi mumonesa ndaga jiagushimana jianago gukhala jia wanga. Gula watshigina gudikenesa, tomba muabonga saga jiajiya gugukuatesa ha gutuna ndaga jiagasue Yehowa wana gutuna. Tudi naye gutshita ngolo “ha gukhala nu mutshima ulaphe” gutuama dia Nzambi wetu.—Makal. 24:16. *

13. Ndaga itshi tushigo naye gutshita?

¹³ Ukhadigo muta mene jiatadila bademo. Mu ndaga eyi, tudi naye gulandula gifezegeselo gia Yesu. (1 Phet. 2:21) Yesu wakhalele mu dilu gutuama dia guza ha mavu,  nu wajiyile ndaga jiavula jiatadila Satana nu bademo. Uvi akhalelego muta mene jia ndaga jiana gutshita nyuma jiene jiabola. Yesu wakhalele mutshigina gulongesa athu ndaga jia Yehowa uvi jia Satana ndo. Ha gulandula gifezegeselo gia Yesu, tushigo naye guta mene jia bademo. Uvi tudi naye gumonesa mu mbimbi jietu egi “mutshima [wetu] udi musuanguluga mukunda nu ndaga imoshi yabonga,” ndaga yene idi giamatshidia.—Ngi. 45:1, NWT.

14-15. (a) Mukunda natshi tushigo naye guvua woma wa nyuma jiabola? (b) Itshi idi gutumonesa egi Yehowa wana gubamba akombeledi enji mangino?

¹⁴ Uvuigo woma wa nyuma jiabola. Ndaga jiabola jiajiya gutubuila luholo tudi mujinga ha mavu awa ashigo atagana. Aksida, misongo, nga gufua guajiya gutubuila mu gisagumuisa. Uvi tushigo naye gutangiza egi nyuma jiabola jidi ha gishina gia ndaga eji. Biblia idi muzuela egi “tangua nu ndaga jishigo gutangiza” jiajiya gubuila muthu wagasue. (Mulo. 9:11, NWT) Yehowa wamonesele egi udi nu ngolo jiavula diago gubalega bademo. Ha gufezegesa, Yehowa gahanelego Satana njila ya gushiwa Yobo. (Yobo 2:6) Mu tangua dia Moise, Yehowa wamonesele egi wakhalele nu ngolo jiavula gubalega nganga-nzambi jia wanga jia gu Egypte. (Guz. 8:18; 9:11) Gungima, havutugile Yesu mu dilu, Yehowa wamuhanele ngolo nu Ufumu, hene Yesu wakayele Satana nu bademo mu dilu. Guasala masugu azonda, mbaabishidiwa mu wina ushigo nu gisugishilo, mbashigo mukhala nu luholo lua guhana luko athu lamba.—Yat. 12:9; 20:2, 3.

¹⁵ Mangino gudi nu ndaga jiavula jidi mumonesa egi Yehowa wana gubamba akombeledi enji. Tangiza gale: Tuana gulongesa giamatshidia ha mavu agasue. (Mat. 28:19, 20) Tuana gumonesa haphelo midimo ya Diabulu. Yadiago, gula nga Satana wakhala nu ngolo, nga wakangele gale midimo yetu yagasue. Hene, tushigo naye guvua woma wa nyuma jiabola. Tudi mujiya egi ‘Yehowa wana guwendesa meso enji holu dia mavu a mudidi ha gukuatesa athu adi gumutshigina nu mitshima yawo yagasue.’ (2 Gudi. 16:9) Gula tudi ya gujinginyina gudi Yehowa, bademo ajiyilego gulandula gutusagesa.

16-17. Hana gifezegeselo gidi mumonesa egi yana gutoga gikhesa ha gulua nu nyuma jiabola.

¹⁶ Yana gutoga gikhesa ha gulua nu nyuma jiabola, tangua mafuta etu nga enya fami atutoga ha gutshita ndaga yabola. Uvi Yehowa wana gushimbiga athu adi mumonesa gikhesa. Tutadilenu gifezegeselo gia phangi wa mukhetu Erica gu gifutshi gia Ghana. Tangua Erica wasendesele gulonguga Biblia wakhalele nu ivo 21. Sh’enji wakhalele nganga-ngombo; amuwambelele ha gudinginyisa mu kutime jia ima ya wanga yakhalele mutoga egi adie ima yahanyi sh’enji gifua mulambu gudi nzambi jienji. Tangua Erica watunyile, fami yenji yazuelele egi washingile nzambi jiawo. Enya fami yenji atangijile egi nzambi jiajiya gualowa malui nga misongo.

¹⁷ Erica wakatugile gumbo diawo handaga fami yenji yakhalele gumushinjiga ha gulandula kutime jiabola, uvi muene watunyile. Matemue ako amuzanguile, akhalele nenji gumbo diawo. Yehowa washimbigile Erica, wamuhanele fami ihe-ihe ya aphangi Aklisto, akhalele gifua aphangi enji a mala nu a akhetu. (Mako 10:29, 30) Fami ya Erica yamukayele nu yakondele ima yenji yagasue tshuya, uvi muene wasalele ya gujinginyina gudi Yehowa, wabatijiwe gale, mangino udi muvundji wa njila wa tangua diagasue. Erica ganago guvua luko woma wa bademo. Erica udi muzuela mukunda nu fami yenji egi, “ngana gusamba masugu agasue hagula enya fami yami ajiye Yehowa hagula ahete gusuanguluga nu akatuge mu uhiga wa midimo ya bademo.”

18. Gubonga gutshi mbatuheta gula tuashila Yehowa mutshima?

¹⁸ Athu agasue mukatshi dietu mbaashigo mutagana nu malamba ajiya gulola gutshigina guawo. Uvi mukut’etu agasue tudi naye gulua nu nyuma jiabola nu gushila Yehowa mutshima. Gula tuatshita ngenyi, Satana mbagashigo gutuhuiga nu mambo enji, nu mbatuheta gubonga. Luko, mbatushigo muvuila bademo woma. Ngenyi, mbatukolesa ufuta wetu nu Yehowa. Mulandudi Yakoba wasonegele egi: ‘Tumagelenu Nzambi, uvi khalenu mbalagaji jia Diabulu, ngenyi muene mbawumilenga gualeha. Suenenu hehi nu Nzambi, nu muene mbawusuena hehi nu enue.’—Yak. 4:7, 8.